“Ia haere au na te peho o te poiri rahi, eita vau e mǎtaˈu i te ino, tei pihai iho hoi oe ia ˈu. Na te raau a te tiai mamoe na oe ra e tamahanahana ia ˈu.”—Salamo 23:4, Huriraa o te ao apî.

 “Ia haere noa ˈtu vau na te peho ra o te mǎrǔ pohe, e ore â vau e mǎtaˈu i te ino, tei pihai-atoa-iho oe ia ˈu: to raau e te tootoo tei haamahanahana mai ia ˈu.”—Salamo 23:4, Te Bibilia Moˈa ra.

 E paruru te Atua i te feia e haamori ra ia ˈna tae noa ˈtu i roto i te mau tupuraa fifi. Te faaau ra teie irava i ta ˈna aupuru ia ratou i te aupuru a te hoê tiai i ta ˈna mamoe. b Te faaau atoa ra te irava i te mau tupuraa fifi mau i te hoê vahi poiri rahi e te atâta mau. I roto i taua tupuraa ra, eita te mau tavini a te Atua e moˈemoˈe aore ra e riaria, tei pihai iho hoi te Atua ia ratou.

 I mutaa ihora, e raau ta te hoê tiai no te paruru i te mau mamoe i te mau animara taehae. E raau roa atoa ta ˈna e tarou to mua no te aratai aore ra no te faaatea mai i ta ˈna mau mamoe i te mau vahi atâta. E Tiai î i te here atoa o Iehova o te paruru e o te aratai i te feia e haamori ra ia ˈna. E aupuru atoa oia ia ratou i roto i te mau tupuraa fifi roa o to ratou oraraa. Ua rau ta ˈna mau ravea:

•   E haapii e e tamahanahana oia ia ratou na roto i ta ˈna Parau te Bibilia.—Roma 15:4.

•   E faaroo oia i ta ratou mau pure, a horoa ˈtu ai i te hau o te feruriraa e o te aau.—Philipi 4:6, 7.

•   E faaitoito oia ia ratou na roto i to ratou mau taeae e tuahine.—Hebera 10:24, 25.

•   E horoa ˈtu oia i te tiaturiraa papu o te hoê oraraa maitai aˈe, i reira oia e faaore ai i te mauiui atoa ta ratou e faaruru nei.—Salamo 37:29; Apokalupo 21:3-5.

 Na Davida i papai i te Salamo 23. E tiai mamoe oia i to ˈna apîraa e ua riro mai ei arii o te nunaa Iseraela. (Samuela 1, 17:34, 35; Samuela 2, 7:8) Te faataa ra te omuaraa o teie Salamo ia Iehova mai te hoê tiai o te aratai, o te faatamaa e o te haapuai i ta ˈna mau tavini, mai ta te hoê tiai e rave no ta ˈna mau mamoe.—Salamo 23:1-3.

 I te Salamo 23:4, no te faaite i te parururaa a te Atua, ua parau Davida “oe” no te Atua, e ere atura “oia.” Te haapapu ra teie tauiraa e mea piri roa Davida ia Iehova. Ua papu ia Davida e te haapeapea ra te Atua no ˈna e ua ite oia eaha te fifi ta ˈna e faaruru ra. Aita ˈtura ïa Davida i mǎtaˈu i te ino.

 I te irava 5 e te 6 o te Salamo 23, ua taui te faahohoˈaraa, te hoê ïa fatu fare e ta ˈna mau manihini. Mai te hoê fatu fare aau horoa noa, e hamani maitai Iehova ia Davida mai te hoê manihini taa ê. Eita e noaa i te mau enemi o Davida ia tapea i te Atua ia aupuru ia ˈna. I te irava 6, te faahiti ra Davida i to ˈna tiaturi e tamau te Atua i te here e i te hamani maitai ia ˈna i te roaraa o to ˈna oraraa.

 Te faaite ra te mau faahohoˈaraa o te Salamo 23 e aupuru noa te Atua i ta ˈna mau tavini.—Petero 1, 2:25.