TE AURAA O TEIE MAU IRAVA

Mareko 1:15: “Ua fatata mai nei te Basileia o te Atua”

FAAROO NA ROTO TE REO

“Ua tae mai te tau faataahia, e ua fatata mai te Faatereraa arii a te Atua. A tatarahapa e a tiaturi i te parau apî oaoa.”—Mareko 1:15, Huriraa o te ao apî.

“Ua hope te tau, ua fatata mai nei te Basileia o te Atua: a tatarahapa ˈe a faaroo i te Evanelia.”—Mareko 1:15, Te Faufaa Api.

Auraa o te Mareko 1:15

Ua parau Iesu Mesia e ua “fatata mai” te Faatereraa arii a te Atua a no te mea o ˈna te riro mai ei Arii o tera Faatereraa arii e tei pihaiiho o ˈna ia ratou i tera taime.

Aita Iesu i hinaaro e parau e ua haamata aˈena te Faatereraa arii i te faatere. Ua faataa hoi o ˈna i muri aˈe i ta ˈna mau pǐpǐ e e haamauhia te Faatereraa arii i mua nei. (Ohipa 1:6, 7) Ua tae mai râ o ˈna i te matahiti iho â ta te Bibilia i tohu e e fa mai oia no te riro mai ei Arii. b No reira i tia ˈi ia Iesu ia parau: “Ua tae mai te tau faataahia.” Te tau faataahia ïa no ˈna no te haamata i te poro i te evanelia, aore ra te parau apî oaoa, no nia i te Faatereraa arii.—Luka 4:16-21, 43.

Ia faufaahia te taata i te parau apî oaoa o te Faatereraa arii, i titauhia ia ratou ia tatarahapa i te mau hara ta ratou i rave na e ia ora ia au i te mau ture aveia a te Atua. Ma te na reira ua faaite ratou i to ratou tiaturi i te parau apî oaoa no nia i tera Faatereraa arii o te haamauhia i mua atu.

Irava tapiri o te Mareko 1:15

Ua faahiti Iesu i teie mau parau a haamata ˈi i ta ˈna taviniraa i Galilea. Ia au i te Mataio 4:17, o te faatia ra i te hoê â tupuraa, “i reira” Iesu i te pororaa i te Faatereraa arii a te Atua. O te Faatereraa arii te manaˈo tumu o te taviniraa a Iesu. Ua faahitihia te reira hau atu i te 100 taime i roto i na Evanelia c e maha, i te rahiraa o te taime i roto i ta Iesu mau parau. I roto i te Bibilia, i te rahiraa o te taime, o te Faatereraa arii a te Atua te tumu parau ta Iesu i faahiti roa ˈˈe.

A taio i te Mareko pene 1 e te mau nota tatararaa e te mau faahororaa i te tahi atu mau irava.

a Te Faatereraa arii a te Atua, o te faatereraa ïa ta te Atua i haamau i te raˈi no te faatupu i to ˈna hinaaro i nia i te fenua. (Daniela 2:44; Mataio 6:10) No te ite atu â, a hiˈo i te tumu parau “Eaha te Basileia o te Atua?”

b I tia na ia Iesu ia riro ei arii no te amo hoê o ta ˈna mau hopoia ei Mesia fafauhia, te tia taa ê a te Atua. No te ite atu â no nia i te mau parau tohu Bibilia o te faaite ra o Iesu te Mesia, a hiˈo “Te haapapu ra anei te mau parau tohu no nia i te Mesia e o Iesu te Mesia?”

c Te mau Evanelia, o na buka matamua e maha ïa o te mau Papai Heleni Kerisetiano, matauhia i te piihia Te Faufaa apî. E itehia i roto te aamu o te oraraa o Iesu e ta ˈna taviniraa.