TE AURAA O TEIE MAU IRAVA

Genese 1:1: “I te haamataraa, poiete ihora te Atua i te raˈi e te fenua”

FAAROO NA ROTO TE REO

“I te haamataraa, poiete ihora te Atua i te raˈi e te fenua.”—Genese 1:1, Huriraa o te ao apî.

“Hamani ihora te Atua i te raˈi e te fenua i te matamua ra.”—Genese 1:1, Te Bibilia Moˈa ra.

Auraa o te Genese 1:1

Te faaite ra teie irava matamua o te Bibilia e piti parau mau faufaa roa. A tahi, e haamataraa to “te raˈi e te fenua” aore ra te ao nui. Te piti, na te Atua i poiete i teie mau mea atoa.—Apokalupo 4:11.

Aita te Bibilia e haapapu ra ehia maoro e e mea nafea to te Atua poieteraa i te ao nui. Te faataa nei râ e ua poiete o ˈna i te reira maoti to ˈna “mana rahi mau e to ˈna puai faahiahia”—Isaia 40:26.

E faaohipahia te taˈo Hebera hurihia ei “poiete” aore ra “hamani” no te faataa noa i te mau ohipa ta te Atua e rave. a I roto i te Bibilia, o te Atua ra o Iehova b anaˈe te parauhia te Atua poiete.—Isaia 42:5; 45:18.

Irava tapiri o te Genese 1:1

Te irava matamua o te buka Genese, o te haamataraa ïa o te aamu o te poieteraa itehia i roto i te Genese pene 1 e 2. Mai te Genese 1:1 tae atu i te 2:4, te faataa poto nei te Bibilia i ta te Atua i rave i to ˈna poieteraa i te fenua e te mau mea ora atoa e tae noa ˈtu i te tane e vahine matamua. I muri iho, te horoa atoa ra te Bibilia i te tahi atu mau faataaraa no nia i te poieteraa o te tane e vahine.—Genese 2:7-25.

Te faataa ra te Genese i te mau mea ta te Atua i poiete i roto i te area tau e ono “mahana.” E ere na ono mahana e 24 hora e area tau roa râ. No reira, i roto i te Bibilia, e nehenehe te taˈo “mahana” e faaauhia i te hoê roaraa tau. I roto i te Genese 2:4, ua faaohipahia te taˈo “mahana” e to te taˈo “tau” no te faataa i na ono mahana a poiete ai te Atua i te mau mea atoa.

Manaˈo hape no nia i te Genese 1:1

Manaˈo hape: Ua poiete te Atua i te ao nui a tau tausani matahiti aˈenei.

Tupuraa: Aita te Bibilia e faaite ra afea te ao nui i te poieteraahia. Aita atoa te Genese 1:1 e faahapa ra i ta te mau aivanaa e tiaturi ra, oia hoi e miria matahiti to te ao nui. c

Manaˈo hape: Te faaite ra te Genese 1:1 e Toru tahi te Atua, no te mea ua faaohipahia na roto i te reo Hebera te taˈo Elohim.

Tupuraa: I ǒ nei, te manaˈo ra te taata e ua faaohipahia te taˈo Hebera Elohim, hurihia ei “Atua,” no te faataa e mea rahi te Atua. E ere roa ˈtu râ! Ua faaohipahia te reira no te faataa i te hanahana aore ra te hau-ê-raa o te hoê Atua otahi. Tera ïa ta te hoê buka Katolika e haapapu ra no te Genese 1:1, tei pihaiiho anaˈe Elohim i te hoê taˈo o te faataa i te hoê ohipa e ravehia ra e te hoê noa taata, e faataa iho â Elohim i te hanahana aore ra te hau-ê-raa.—New Catholic Encyclopedia, piti o te neneiraa, buka 6, api 272.

A taio i te Genese pene 1 e te mau nota tatararaa e te mau faahororaa i te tahi atu mau irava.

a Te parau ra te tahi huriraa Bibilia no nia i teie taˈo: “Aita te taˈo Hebera bara, o ‘poiete’ te auraa e faaohipahia no te mau ohipa ta te taata e hamani. E faaohipahia râ bara no te mau ohipa anaˈe ta te Atua e rave.”—HCSB Study Bible, api 7.

b O Iehova te iˈoa o te Atua.—Salamo 83:18.

c Teie ta te hoê buka no nia i te parau Hebera hurihia ei “i te matamua ra” aore ra “i te haamataraa”: “Aita te roaraa o te tau e faataahia i roto i teie taˈo.”—The Expositor’s Bible Commentary, neneiraa apî, buka 1, api 51.