Bɛn Onyankopɔn
‘Wo Kra Bɛkotow Ama Me’
AHOBRƐASE yɛ suban a ɛyɛ fɛ. Sɛ obi brɛ ne ho ase a, ɛma nnipa tumi bɛn no. Awerɛhosɛm ne sɛ, ɛnnɛ nnipa pii mmrɛ wɔn ho ase, titiriw wɔn a wodi nkurɔfo so. Yehowa Nyankopɔn a ɔwɔ tumi sen obiara wɔ amansan yi mu no nso ɛ? Ɔwɔ ahobrɛase anaa? Momma yɛnhwɛ odiyifo Yeremia asɛm a ɛwɔ Kwadwom 3:20, 21 no.—Kenkan.
Bere a Yeremia kyerɛw Kwadwom nhoma no, na ɛyɛ bere a emu yɛ den paa ma Israelfo no. Ohuu asɛnkɛse bi a ɛmaa ne werɛ howee. Ɛne sɛ, Babilonfo no bɛsɛee Yerusalem kurow a na ne koma da so no. Odiyifo a na awerɛhow ahyɛ no ma no hui sɛ Israelfo bɔne nti na Onyankopɔn maa amanehunu no too wɔn. Enti, na Yeremia anidaso asa anaa? Wugye di sɛ ɔtee nka sɛ Yehowa wɔ akyirikyiri dodo anaasɛ enhia no sɛ obeyi wɔn a wɔanu wɔn ho no afi ahohia mu anaa? Tie sɛnea Yeremia gyinaa ne manfo no anan mu kasa maa wɔn no.
Ɛwom sɛ na nnipa pii redi awerɛhow de, nanso na Yeremia wɔ anidaso. Ɔka kyerɛɛ Yehowa sɛ: “Wo kra * [kyerɛ sɛ, Yehowa ankasa] bɛkae na woakotow ama me.” (Nkyekyɛm 20) Ná Yeremia adwene si no pi. Ná onim sɛ Yehowa werɛ remfi ɔno anaa ne nkurɔfo a wɔanu wɔn ho no. Ɛnde, dɛn na na ade nyinaa so Tumfoɔ Nyankopɔn bɛyɛ?—Adiyisɛm 15:3.
Ná Yeremia nim paa sɛ Yehowa ‘bɛkotow’ ama ne nkurɔfo a wɔanu wɔn ho no. Bible nkyerɛase foforo ka sɛ: “O kae, na bɔ wo mu ase ma me.” Saa asɛm yi boa yɛn ma yehu sɛ Yehowa wɔ ayamhyehye. Sɛnea yɛbɛka no no, Yehowa a ɔyɛ “ɔsorosoroni, asase nyinaa so” no bɛbɔ ne mu ase apagyaw n’asomfo afi animguase mu agyina hɔ na wɔasan anya n’anim dom. (Dwom 83:18) Saa anidaso yi nti, Yeremia kyekyee ne koma a abubu no werɛ. Odiyifo nokwafo no sii ne bo sɛ obenya abotare atwɛn akosi sɛ Yehowa begye ne nkurɔfo a wɔanu wɔn ho no wɔ bere a ɛfata mu.— 21.
Nsɛm a Yeremia kyerɛwee yi ma yehu Yehowa ho nneɛma abien bi. Nea edi kan, ɔbrɛ ne ho ase. (Dwom 18:35) Ɛwom sɛ Yehowa “tumi korɔn” de, nanso wayɛ krado sɛ obesian aba yɛn nkyɛn abɛboa yɛn bere a yɛn ho akyere yɛn no. (Hiob 37:23; Dwom 113:5-7) So eyi nyɛ awerɛkyekye? Nea ɛto so abien, Yehowa yɛ mmɔborɔhunufo, enti ɔwɔ ‘ɔpɛ sɛ ɔde bɔne befiri’ abɔnefo a wɔanu wɔn ho, na wasan agye wɔn aba ne nkyɛn. (Dwom 86:5) Ahobrɛase ne mmɔborɔhunu na ɛnam.
Hwɛ awerɛkyekye a ɛyɛ sɛ Yehowa nte sɛ nnipa sodifo a ahantan nti wɔmmrɛ wɔn ho ase na wonnwen nnipa ho no! Wunhu sɛ ɛsɛ sɛ wutumi sua Onyankopɔn a ɔwɔ ahobrɛase no ho ade? Ɔno na wayɛ krado sɛ ‘ɔbɛbɔ ne mu ase’ apagyaw n’asomfo afi animguase mu agyina hɔ na wɔasan anya anidaso.
June Bible akenkan:
[Ase hɔ asɛm]
^ nky. 3 Tete nhoma akyerɛwfo sesaa saa nkyekyɛm yi kaa no ɔkwan foforo so sɛ “me kra,” na ɛbɛyɛɛ sɛ Yeremia na ɔreka n’ankasa ho asɛm. Asɛmfua ɔkra no, Bible de gyina hɔ ma abɔde a ɛwɔ asase so, enti wobenyaa adwene sɛ ɛnsɛ sɛ wɔde frɛ Onyankopɔn. Nanso Bible taa ka Onyankopɔn ho asɛm te sɛ onipa na ama yɛate sɛnea ɔte no ase yiye. Esiane sɛ “ɔkra” betumi akyerɛ “yɛn nkwa” nti, bere a Yeremia kae sɛ “wo kra” no, na ɛkyerɛ “wo.”
[Asɛm a wɔafa aka wɔ kratafa 14]
Yehowa ayɛ krado sɛ obesian aba yɛn nkyɛn abɛboa yɛn bere a yɛn ho akyere yɛn no
