Me Yare Nyinaa Akyi No, Manya Anigye

Sɛnea Paulette Gaspar ka kyerɛe

Ɛwom sɛ bere a wɔwoo me no na me mu duru yɛ bɛyɛ kilogram abiɛsa de, nanso na oduruyɛfo no nim sɛ biribi atɔ kyima paa wɔ me ho. Bere a wɔrewo me no, me nnompe no mu bi bubui. Nea mepɛ sɛ mekyerɛ ne sɛ, minyaa dompe mu yare. Wɔkɔyɛɛ me oprehyɛn ntɛm ara de, nanso na nnuruyɛfo no nni anidaso biara sɛ menya nkwa. Ná wosusuw sɛ ade renkye me so.

W ƆWOO me wɔ Australia ahenkurow Canberra mu wɔ June 14, 1972 mu. Ɛmfa ho nea na obiara susuw no, ade kyee me so. Nanso ɛno akyi no, mpafe kyeree me. Esiane sɛ na nnuruyɛfo no susuw sɛ ɛyɛ dɛn ara a mewu nti, wɔamma me aduru biara, na wogyaee me too hɔ sɛ “nea ɛbɛyɛ me biara nyɛ me.” Sɛnea ɛkɔbae no, nea ɛbɛyɛ me yɛɛ me, enti manwu.

Sɛ midwen ho a, mihu sɛ saa bere no, na ɛrenyɛ mmerɛw mma m’awofo koraa. Esiane sɛ na biribiara nkyerɛ sɛ mɛyɛ yiye nti, nnuruyɛfo a na wodwen m’awofo ho no ka kyerɛɛ wɔn sɛ ɛnsɛ sɛ wɔbɛn me pii. Nokwasɛm ni, asram abiɛsa a edi kan a midii wɔ ayaresabea no, wɔamma m’awofo kwan ma wɔanso me mu mpo. Ná ɛnyɛ den koraa sɛ woso me mu a wobepira me. Bere a afei ɛbɛdaa adi sɛ merenwu no, nnuruyɛfo no ka kyerɛɛ m’awofo sɛ wɔmfa me nkɔto baabi a wɔhwɛ mmofra a wɔadi dɛm.

Nanso, m’awofo sii gyinae sɛ wɔde me bɛkɔ fie. Asɛm no ne sɛ, ná Yehowa Adansefo ne me maame fii ase suaa Bible no nkyɛe. Nea osuae no kaa ne koma kɛse ma ɔtee nka sɛ ɛsɛ sɛ ɔhwɛ me. Nanso ɛbɛyɛ sɛ awerɛhow ne ɔbrɛ pii a ɔfaa mu wɔ me ho nti, na ontumi mmɛn me kɛse. Ná wɔtaa de me kɔ ayaresabea. Sɛ woguare me mpo a, na me dompe tumi bu. Sɛ me nwansi kɛkɛ a, na me dompe bi ho tumi kã.

Minyaa Adwenemhaw

Bere a merenyin no, na metena mmubuafo akongua mu bere nyinaa. Esiane sɛ na merentumi nnantew nti, manhaw me ho sɛ mesua nnantew. Nsɛnnennen yi nyinaa akyi no, m’awofo hwɛɛ me yiye paa.

Bio nso, me maame bɔɔ mmɔden sɛ ɔde Bible mu asɛm a ɛma awerɛkyekye no bɛkyerɛkyerɛ me. Sɛ nhwɛso no, ɔkyerɛkyerɛɛ me sɛ daakye Onyankopɔn bɛyɛ asase yi paradise, na nnipa nyinaa benya Onyankopɔn ho nimdeɛ a edi mũ, biribiara renhaw wɔn adwene, na wɔrenyare bio. (Dwom 37:10, 11; Yesaia 33:24) Nanso, me maame kaa ne komam nokware sɛ  sɛ saa bere no mmae a, merentumi nyɛ me tebea no ho hwee.

Mfiase no, mekɔɔ ayarefo sukuu. Ná m’akyerɛkyerɛfo nnim nea metumi ayɛ daakye, na na me nso, minni botae biara si m’ani so. Nokwarem no, na ɛnyɛ mmerɛw koraa sɛ mɛkɔ sukuu. Ná mmofra a wɔwɔ sukuu no mu no pii mpɛ m’asɛm. Akyiri yi, mifii ayarefo sukuu no mu kɔɔ sukuu a mmofra afoforo nyinaa kɔ bi no. Mibehui sɛ afoforo a na me ne wɔn bɔ no ma mebrɛ, meyɛ basaa, na na midwennwen. Ne nyinaa akyi no, na masi me bo sɛ mede mfe 12 bɛkɔ sukuu awie sɛnea obiara yɛ no.

Bere a na mewɔ ntoaso sukuu no, na midwen sɛnea me mfɛfo sukuufo no nni anidaso ne atirimpɔw biara wɔ asetenam no ho. Ná mesan dwennwen nea me maame akyerɛkyerɛ me wɔ Bible mu no ho. M’adwene mu de, na minim sɛ nea ɔkae no yɛ nokware. Nanso saa bere no, Bible mu nokware no anka me koma. Eduu bere bi no, meyɛɛ m’adwen sɛ megye m’ani, na nea na ɛbɛba daakye biara mfa me ho.

Bere a midii mfe 18 no, mitu fii m’awofo fie ne m’ayɔnkofo bi a wɔn nso yɛ ayarefo kɔtenaa fie bi mu. M’ani gyei sɛ mitui, nanso na misuro. Ahofadi a minyae, sɛnea na mitumi yɛ nea mepɛ, ne me nnamfonom a na mene wɔn bɔ no ma m’ani gyei paa. Me nnamfonom pii warewaree. Me nso minyae a, anka manya obi a ɔdɔ me aware me. Nanso, esiane me yare no nti, na ɛbɛyɛ den paa sɛ menya kunu. Eyi maa me werɛ howee yiye.

Nanso, mammɔ Onyankopɔn sobo da. Ná masua Onyankopɔn ho ade pii ma enti na minim sɛ ɔrentumi nyɛ biribi a ɛnteɛ da. (Hiob 34:10) Mebɔɔ mmɔden sɛ mɛfa me tebea no saa ara. Ɛno mpo no, minyaa adwenemhaw a emu yɛ den.

Nkakrankakra M’adwennwen no So Tewee

Anigyesɛm ne sɛ, me maame tee tebea a na mewom no, na ɔhwehwɛɛ asafo mu panyin bi a ɔbɛn baabi a na mete no ma ɔbɛboaa me. Ɔpanyin no frɛɛ me wɔ telefon so sɛ memmra Kristofo nhyiam wɔ Yehowa Adansefo Ahenni Asa a ɛwɔ yɛn mpɔtam hɔ no so. Bio nso, onuawa bi a ɔwɔ asafo no mu fii ase ne me suaa Bible no dapɛn biara.

Bere a mekaakae Bible mu nokware a na me maame akyerɛkyerɛ me mfe bi a atwam no, m’asetena fii ase sesae. Minyaa mfɛfo Kristofo fekubɔ mu anigye. Nanso na masua sɛ merenka m’asɛm efisɛ na misuro sɛ anhwɛ a, na obi aka biribi ma ahaw me. Misusuw sɛ eyi ma ɛyɛɛ den maa me sɛ mɛdɔ Onyankopɔn. Ne nyinaa akyi no, na minim sɛ eye sɛ mehyira me nkwa so ama no. Enti wɔ December 1991 mu no, mebɔɔ asu de kyerɛe sɛ mahyira me ho so ama Onyankopɔn.

Mitu fii fie a na me ne me mfɛfo ayarefo te mu no, na me nkutoo kɔtenaa baabi foforo. Minyaa nsakrae a meyɛe yi so mfaso, na mihyiaa ho haw nso. Sɛ nhwɛso no, meyɛɛ ankonam paa, na na misuro sɛ anhwɛ a na ɔbarima bi abɛtow ahyɛ me so. Ankyɛ na m’adwennwen a emu yɛ den no san bae. Ɛwom sɛ na metew m’anim serew kyerɛ afoforo de, nanso na nneɛma nkɔ yiye. Ná mihia adamfo a ɔne me bɛbɔ a ɔbɛbɛn me bere nyinaa.

Mete nka sɛ Yehowa Nyankopɔn ma minyaa adamfo a ɔte saa. Asafo a ɛwɔ hɔ no mu mpanyimfo yɛɛ nhyehyɛe ma onuawa warefo bi a wɔfrɛ no Suzie ne me bɛtoaa Bible adesua no so. Ná Suzie nyɛ me kyerɛkyerɛfo kɛkɛ, ɔbɛyɛɛ me yɔnko berɛbo a medɔ no paa.

Suzie kyerɛkyerɛɛ me sɛnea mɛka nea na meresua no ho asɛm akyerɛ afoforo wɔ afie afie mu ne mmɔnten so. Afei m’ani begyee Onyankopɔn su ahorow no ho kɛse. Ɛwom sɛ na m’abɔ asu de, nanso na ɔdɔ a mewɔ ma Onyankopɔn no mu nnya nyɛɛ den. Bere bi mpo de, meyɛɛ m’adwene sɛ megyae Yehowa  som. Me ne Suzie susuw ho, na ɔboaa me ma mitumi dii ɔhaw no so.

Afei nso, Suzie boaa me ma mihui sɛ ɔhaw a merehyia no fã titiriw fi nnipa binom a wonni ɔdɔ kɛse ma Yehowa a na me ne wɔn bɔ no. Enti mifii ase ne wɔn a wɔatintim wɔ Onyankopɔn som mu no bɔe—titiriw wɔn a wɔn mfe akɔ anim no. Afei nso, na me ne me maame ntam nnwo; enti mifii ase siesiee me ne me maame ne me nuabarima nso ntam. Ɛyɛɛ me nwonwa sɛ efi saa bere no minyaa anigye bi a na minnyaa bi da. Me nuanom mmarima ne mmea a me ne wɔn som Onyankopɔn, m’abusuafo, ne nea ɛsen biara, Yehowa, ma minyaa anigye ne ahoɔden.—Dwom 28:7.

Adwuma Foforo

Bere a mekɔɔ Kristofo nhyiam kɛse bi kotiee ɔkasa bi a na ɛkyerɛ anigye a wɔn a wɔde wɔn bere nyinaa yɛ asɛnka adwuma no nya no, mekaa no me tirim sɛ, ‘Me nso, metumi ayɛ bi!’ Nokwarem no, mihui sɛ na eyi betumi ayɛ den ama me. Nanso, bere a mede mpaebɔ susuw asɛm no ho no, misii gyinae sɛ mebisa kwan na wɔama mayɛ bere nyinaa Bible kyerɛkyerɛfo, enti wɔ April 1998 mu no, mifii adwuma no ase.

Sɛ mehwɛ tebea a me wom yi a, mɛyɛ dɛn ayɛ asɛnka adwuma no? Meyɛ obi a mempɛ sɛ mɛyɛ adesoa ama obiara, enti na m’ani nnye ho sɛ bere nyinaa obi bepia me anaa afoforo bɛyɛ nneɛma ama me. Enti Suzie ne ne kunu Michael maa me nyansahyɛ bi: Wɔkae sɛ mentɔ moto. Nanso, na mɛyɛ dɛn akã moto? Sɛnea mfonini a ɛka asɛm yi ho kyerɛ no, wɔhwɛɛ me tebea no ho hyɛɛ da yɛɛ moto maa me. Ɛwom sɛ na me mu duru yɛ kilogram 19 pɛ de, nanso na ɛho nhia mpo sɛ mesɔre fi me mmubuafo akongua no mu ansa na maforo moto no!

Me moto foforo a m’ankasa mitumi ka no ma mitumi kɔ nkurɔfo nkyɛn ne wɔn kosua Bible no wɔ bere a eye ma me ne wɔn nyinaa mu. Nokwarem no, sɛ mereka moto no na mframa rebɔ fa m’anim a, ɛma m’ani gye paa!

M’ani gye bere a mihyia nkurɔfo wɔ mmɔnten so ne wɔn bɔ nkɔmmɔ no. Wɔn mu dodow no ara tew wɔn anim ma me, na wommu me animtiaa. M’ani gye ho sɛ mɛboa afoforo ma wɔasua Bible no. Mekae sɛ bere bi, me ne onuabarima bi a ɔware sen me pii kɔɔ asɛnka wɔ afie afie mu. Okyiaa ofiewura no, na bere a ofiewura no hwɛɛ me dinn no, obisaa nea me ne no nam no sɛ, “Otumi kasa?” Ɛmaa yɛn baanu nyinaa serewee. Bere a mekaa asɛm no kyerɛɛ ɔbea no wiei no, ohui sɛ mitumi kasa paa!

Seesei, m’ani gye wɔ asetena mu, na masua sɛ mɛdɔ Yehowa Nyankopɔn. Meda me maame ase sɛ ɔkyerɛkyerɛɛ me Bible mu nokware no, na mede ahotoso rehwɛ kwan sɛ ɛrenkyɛ Onyankopɔn ‘bɛyɛ nneɛma nyinaa foforo,’ na wayɛ me nipadua ketewaa no nso foforo!—Adiyisɛm 21:4, 5.—w09 05/01-E.

[Asɛm a wɔafa aka wɔ kratafa 26]

“Mebɔɔ mmɔden sɛ mɛfa me tebea no saa ara. Ɛno mpo no, minyaa adwenemhaw a emu yɛ den”