Bɔ Wo Ho Ban Fi Ahonhommɔne Ho

WƆTETEE James wɔ akuraa bi a atew ne ho wɔ Malaita, supɔw a ɛwɔ Solomon Islands no ase. Efi ne mmofraase na wɔakyerɛkyerɛ no sɛ onni ahonhom ni. Ɔka sɛ: “Mansusuw da sɛ mɛma ahonhom ahaw afoforo, nanso na migye di sɛ sɛ menya anigye wɔ asetena mu a, gye sɛ mema rarafono [amanne a wɔyɛ de hwehwɛ mmoa fi ahonhom hɔ] bɔ me ho ban.”

Sɛnea ɛte wɔ nnipa a wɔwɔ wiase mmeae pii fam no, wɔn a wɔwɔ Solomon Islands no nso gye di sɛ ahonhom betumi aboa obi anaa wahaw no. Nokwarem no, Melanesiafo pii bu ahonhom a wɔkyerɛ sɛ wɔboa nnipa no sɛ woye, na wonsuro wɔn.

Wɔnam akwan pii so kyerɛ sɛ wogye ahonhom dwumadi di. Sɛ nhwɛso no, bere a na James yɛ abofra no, sɛ mmea a wɔwɔ n’akuraa no te sɛ anomaa a wɔfrɛ no korokoro resu a, ntɛm ara na wɔaka wɔn mma ahyɛ dan mu. Dɛn ntia? Ná wogye di sɛ anomaa no sũ kyerɛ sɛ asɛm rebɛto obi.

Nnipa binom a wɔwɔ akuraa no ase de ɔbo fitaa bi to wɔn apongua atifi. Ná James yɛ eyi, na na osusuw sɛ ɔbo fitaa no bɛbɔ ne ho ban afi ahonhommɔne ho. Na sɛ James wɔ adwumam na odidi wie a, ɔboaboa n’aduan ase nnikae nyinaa ano kyekyere to hɔ, na akyiri yi watow agu. Ade titiriw a enti na ɔyɛ saa ne sɛ, na osuro sɛ obi a ɔwɔ ani bɔne bɛsesaw de ato no aduru ma wayare.

Ebia wɔnyɛ amanne a ɛte saa wɔ baabi a wote no, nanso ebetumi aba sɛ sɛnea James yɛe no, wobɛte nka sɛ ɛsɛ sɛ wudi mo hɔnom amanne bi akyi sɛnea ɛbɛyɛ a wobɛbɔ wo ho ban afi ahonhommɔne ho. Ebia wobɛte nka sɛ sɛ woamfa wo ho anhyɛ amanne yi mu a, asɛmmɔne bi bɛto wo.

Sɛ wugye Bible no tom a, akyinnye biara nni ho sɛ wobɛpɛ sɛ wuhu nea ɛka wɔ nsɛmmisa a edidi so yi ho: (1) Ɔkwan bɛn so na ahonhommɔne betumi ahaw wo? (2) Sɛ wudi mo hɔnom amanne bi akyi a, so ebetumi ama adaemone ahaw wo? (3) Wobɛyɛ dɛn anya ahobammɔ ankasa afi ahonhommɔne ho na ama w’ani agye?

Sɛnea Ahonhommɔne Haw Afoforo

Bible ma yehu sɛ ahonhommɔne nyɛ nnipa a wɔawuwu ahonhom. Onyankopɔn  Asɛm ka sɛ: “Ateasefo nim sɛ wobewuwu; awufo de, wonnim biribiara.” (Ɔsɛnkafo 9:5) Nokwasɛm ni, ahonhommɔne yɛ abɔfo atuatewfo a wɔakɔka Satan ho a wɔrebɔ mmɔden sɛ wɔbɛdaadaa nnipa.—Adiyisɛm 12:9.

Kyerɛwnsɛm no ka no pefee sɛ ehia sɛ wɔbɔ yɛn ho ban fi ahonhommɔne ho. Ɔsomafo Paulo kyerɛw kɔmaa Kristofo a wɔwɔ Efeso no sɛ: “Ɛnyɛ yɛne mogya ne ɔhonam na ɛredi asi, na mmom yɛne . . . ahonhommɔne dɔm a wɔwɔ soro hɔnom na anya.” Ɔsomafo Petro kaa nea odi ahonhommɔne nyinaa so tumi, Satan Ɔbonsam, ho asɛm sɛ ɔte sɛ “gyata a ɔbobom apɛ obi amene no.”—Efesofo 6:12; 1 Petro 5:8.

Ade titiriw a Satan nam so haw nnipa ne sɛ ɔdaadaa wɔn anaasɛ ɔsɔ wɔn hwɛ ma wɔyɛ nea Onyankopɔn mpɛ. Bible ka sɛ Satan “kɔ so ara dan ne ho hann bɔfo.” (2 Korintofo 11:14) Ɔyɛ ne ho sɛ honhom a ɔbɔ nkurɔfo ho ban, nanso nokwarem no, onkura adwempa. Satan fura nkurɔfo adwene ani ma enti wonhu ɔne Onyankopɔn nyinaa ho nokwasɛm. (2 Korintofo 4:4) Dɛn nti na ɔdaadaa nnipa?

Satan pɛ sɛ wɔsom no, na sɛ́ nkurɔfo nim anaa wonnim no, ɔpɛ sɛ wɔde ɔsom a ɛte saa ma no. Bere a Onyankopɔn ankasa Ba, Yesu, wɔ asase so no, Satan pɛe sɛ ‘Yesu bɔ ne mu ase som no.’ Yesu ka kyerɛɛ no sɛ: “Fi me so kɔ, Satan! Wɔakyerɛw sɛ, ‘Yehowa wo Nyankopɔn na ɛsɛ sɛ wokotow no.’” (Mateo 4:9, 10) Yesu anyɛ biribiara a ɛbɛkyerɛ sɛ ɔrekotow Satan de asom no.

Yehowa wɔ tumi sen ahonhom nyinaa, na ɔrenyɛ biribiara a ebedi wɔn a wotie no no awu da. (Dwom 83:18; Romafo 16:20) Nanso sɛ yɛbɛsɔ Yehowa Nyankopɔn ani sɛnea Yesu yɛe no a, ehia sɛ yɛhwɛ yiye na yɛanyɛ biribiara amfa ansom Satan anaa n’adaemone no. Ne saa nti, ɛsɛ sɛ yehu amanne ahorow a wɔyɛ wɔ yɛn hɔnom a ɛma wodi ahonhommɔne ni no. Wobɛyɛ dɛn ayɛ saa?

Hu Amanne Ahorow a Ɛnsɔ Onyankopɔn Ani

Yehowa Nyankopɔn bɔɔ ne nkurɔfo, Israelfo a wɔtenaa ase tete no kɔkɔ sɛ, ɛnsɛ sɛ wosuasua amanne ahorow a aman a wɔbɛn wɔn no yɛ no mu biara. Ɔkae sɛ: ‘Ɛnsɛ sɛ obi a ɔyɛ abusude yi bi tena mo mu: obi a ɔhyɛ abosonkɔm anaa oyi nkonyaa, nea ɔhwehwɛ hyɛbea ho sɛnkyerɛnne anaa odi asumansɛm, anaa nea ɔkyekyere afoforo.’ Bible ka wɔn a wɔyɛ saa amanne yi ho asɛm sɛ: “Yehowa kyi obi a ɔyɛ eyinom.”—Deuteronomium 18:10-12.

Eyi nti, sɛ woresusuw amanne ahorow a abu so wɔ baabi a wote no ho a, susuw nsɛmmisa yi ho hwɛ: So amanne no hyɛ adebisa ho nkuran? So ɛkyerɛ sɛ tumi bi a ɛbɔ nnipa ho ban wɔ nneɛma a nkwa nnim mu? So ɛma obi tumi to obi aduru anaa ɔbɔ ne ho ban fi mmusu ho? So ɛma obi de ne ho hyɛ ahonhom ase sen sɛ ɔde ne ho bɛhyɛ Yehowa, anaasɛ ne nanmusifo a wapaw no, Yesu ase?—Romafo 14:11; Filipifo 2:9, 10.

Ɛho hia paa sɛ wobɛpo amanne biara a ɛhyɛ nneyɛe a ɛte saa ho nkuran. Dɛn ntia? Honhom kaa ɔsomafo Paulo ma ɔkyerɛwee sɛ: “Muntumi nnidi wɔ ‘Yehowa pon’ so ne adaemone pon so.” Ɔkae sɛ, wɔn a wɔbɔ mmɔden sɛ wɔbɛsɔ Onyankopɔn ani na bere koro no ara wɔasɔ ahonhom afoforo nso ani no ‘rehyɛ Yehowa abufuw.’ (1 Korintofo 10:20-22) Yehowa Nyankopɔn hwehwɛ sɛ yɛsom ɔno nkutoo, na ɔfata nso.—Exodus 20:4, 5.

Susuw asɛmmisa yi nso ho hwɛ: So amanne no hyɛ adwene a ɛne sɛ, nea onipa yɛ biara ho asodi nna no so ho nkuran? Sɛ nhwɛso no, wobu awaresɛe ne nna a edi aware anim sɛ ade a ɛmfata wɔ mmeae pii, na Bible nso kasa tia. (1 Korintofo 6:9, 10) Nanso, wɔ Pacific mmeae bi no, sɛ abeawa  bi ka sɛ “wadi ahabammono,” * kyerɛ sɛ, wɔakankye agu no so nti na ɔne ɔbarima bi dae a, wogye nneyɛe a ɛte saa tom sɛ mfomso biara nni ho.

Nanso, Bible kyerɛkyerɛ sɛ, yɛbɛsoa yɛn ankasa adesoa. (Romafo 14:12; Galatifo 6:7) Sɛ nhwɛso no, Hawa, ɔbea a odi kan no susuw sɛ Satan na ɔdaadaa no ma ɔyɛɛ Onyankopɔn so asoɔden. Ɔkae sɛ: “Ɔwɔ no na ɔdaadaa me ma midii.” Nanso, Yehowa maa Hawa buu ne nneyɛe no ho akontaa. (Genesis 3:13, 16, 19) Saa ara na ɔbɛma yɛabu yɛn nneyɛe ho akontaa.—Hebrifo 4:13.

Dɛn na Ɛsɛ sɛ Woyɛ?

Sɛ wopɛ sɛ woyɛ nea ɛsɔ Onyankopɔn ani na wode Bible mu nnyinasosɛm bɔ wo bra a, ɛnde ehia sɛ wusi gyinae ntɛm ara. Nnipa komapafo a na wɔwɔ Efeso wɔ afeha a edi kan mu no yɛɛ eyi ho nhwɛso pa maa yɛn. Nea ɛbɛyɛ na wɔade wɔn ho afi ahonhommɔne ho no, wɔboaboaa nhoma a wɔde di asumansɛm nyinaa ano ‘hyewee ma obiara hui.’—Asomafo Nnwuma 19:19.

Ansa na saa nnipa yi rehyew wɔn nhoma no, ‘wɔbɛkaa wɔn nneyɛe kyerɛe pefee.’ (Asomafo Nnwuma 19:18) Bere a Paulo kaa Kristo ho asɛm kyerɛɛ wɔn ma ɛkaa wɔn koma no, wɔsɛee nhoma a wɔde di ahonhonsɛm no. Afei nso, wɔsesaa adwene a na wokura wɔ wɔn amanne ahorow ho no.

Nokwarem no, amanne ahorow a obi begyae akyi di no nna fam. Ná ɛnyɛ mmerɛw sɛ James a yɛadi kan aka ne ho asɛm no nso begyae. Ofii ase ne Yehowa Adansefo suaa Bible no, na n’ani gyee nea na ɔresua no ho. Nanso na onnyaee rarafono akyi di. Bere a osusuw amanne a ɔde ne ho hyɛɛ mu yi ho no, obehui sɛ ɛwom sɛ na ɔwɔ Yehowa bɔhyɛ ahorow a ɛfa daakye ho no mu gyidi de, nanso na ɔte nka sɛ ɛsɛ sɛ ɔkɔ so de ne ho hyɛ amanne ahorow yi mu na abɔ ne ho ban.

Dɛn na ɛboaa James ma ɔsesaa n’adwene? Ɔka sɛ: “Mebɔɔ mpae srɛɛ Yehowa sɛ ɔmmɔ me ho ban na ɔmmoa me ma minnya ne mu ahotoso. Afei nso, migyaee amanne ahorow a na meyɛ no nyinaa.” So James ahyia ɔhaw bi? Obua sɛ, “Dabi. Na mmom m’asua sɛ mede me ho bɛto Yehowa so. Mahu sɛnea yebetumi abɛn Yehowa sɛ yɛn adamfo.” Nokwarem no, bɛyɛ mfe ason ni, James de ne bere nyinaa aboa afoforo ma wɔasua nea Bible kyerɛkyerɛ.

Dɛn nti na wunsuasua James nhwɛso no? Hwehwɛ amanne ahorow a wɔyɛ wɔ baabi a wote no mu na ‘dwene ho’ hwɛ sɛ ɛne nea “Onyankopɔn pɛ” hyia anaa. (Romafo 12:1, 2) Afei, nya akokoduru na twe wo ho fi gyidihunu biara ho. Sɛ woyɛ saa a, wubetumi anya awerɛhyem sɛ Yehowa ‘begye wo’ na wabɔ wo ho ban. (2 Korintofo 6:16-18) Sɛnea James hui no, wo nso wubehu sɛ Bible mu bɔhyɛ yi yɛ nokware: “Abannennen ne Yehowa din. Emu na ɔtreneeni guan kɔ, na onya ahobammɔ.”—Mmebusɛm 18:10.—w09 05/01-E.

[Ase hɔ asɛm]

[Mfonini wɔ kratafa 13]

“Korokoro”

[Mfonini Fibea]

Courtesy of Dr. Bakshi Jehangir

[Mfonini wɔ kratafa 13]

Abeawa bi sesaw aduan ase nnikae sɛnea ɛbɛyɛ a obi mfa nkɔto aduru