1. Bere a Mose dii Israelfo no anim fii Egypt no, dɛn na ɔyɛe a ɛkyerɛ sɛ na ogye Yehowa di?

 WƆN a Hebrifo nhoma no ka wɔn ho asɛm sɛ na wɔwɔ gyidi no, yɛrentumi nka nnyaw Mose. (Heb. 3:​2-5; 11:​23-25) Gyidi a na ɔwɔ nti, otumi dii Israelfo no anim ma wɔfii Egypt. Wamma Farao ne n’asraafo no anhunahuna no. Ɔde ne ho too Yehowa so, na odii Israelfo no anim de wɔn twaa Po Kɔkɔɔ no, na akyiri yi wɔkoduu sare no so. (Heb. 11:​27-29) Eduu baabi no, ɛyɛɛ Israelfo dodow no ara sɛ Yehowa rentumi nhwɛ wɔn, nanso Mose de, ɔkɔɔ so de ne ho too Yehowa so. Mose nsa ansi fam, efisɛ Onyankopɔn yɛɛ anwanwade maa Israelfo no nyaa aduan ne nsu wɔ sare no so. a—Ex. 15:​22-25; Dw. 78:​23-25.

2. Adɛn nti na Onyankopɔn bisaa Mose sɛ: “Yehowa nsa yɛ tia anaa”? (Numeri 11:​21-23)

² Ɛwom sɛ na Mose gyidi so, nanso bere a Yehowa gyee Israelfo no fii Egypt afe baako akyi no, ɛyɛɛ no sɛ gyama Yehowa rentumi mma Israelfo no nam nwe. Sare no so a na Israelfo no wɔ no, na hwee nni hɔ, enti na Mose nhu ɔkwan a Yehowa bɛfa so ama nnipa ɔpepem pii yi nyinaa nam a ɛbɛso wɔn. Enti Yehowa bisaa Mose sɛ: “Adɛn, Yehowa nsa yɛ tia anaa?” (Kenkan Numeri 11:​21-23.) Ɛha no, asɛm a ɛne “Yehowa nsa” no, egyina hɔ ma Onyankopɔn honhom kronkron anaa ne tumi a ɔde yɛ ade. Yɛhwɛ mu paa a, nea na Yehowa rebisa Mose ne sɛ, ‘Wugye di paa sɛ nea maka sɛ mɛyɛ no, merentumi nyɛ anaa?’

3. Mose ne Israelfo a wɔannye anni sɛ Onyankopɔn betumi ama wɔn nsa aka nea wɔhia no, adɛn nti na ɛho hia sɛ yesusuw wɔn asɛm no ho?

 ³ ‘Enti Yehowa bɛma me ne m’abusua nsa aka nea yehia anaa?’ Ebia woabisa saa asɛm no pɛn. Sɛ woabisa oo, sɛ wummisae oo, Mose ne Israelfo a na wɔnnye nni sɛ Onyankopɔn betumi ama wɔn nsa aka nea wɔhia no, momma yensusuw wɔn asɛm no ho. Yɛbɛhwɛ Bible mu nsɛm bi a ɛbɛboa yɛn ma yenya ahotoso kɛse sɛ Yehowa nsa nyɛ tia.

SUA BIRIBI FI MOSE NE ISRAELFO NO HƆ

4. Ɛbɛyɛ sɛ dɛn na ɛmaa Israelfo no pii nyaa adwene sɛ Yehowa rentumi mma wɔn nea wɔhia?

⁴ Adɛn nti na Israelfo no pii nyaa adwene sɛ Yehowa rentumi mma wɔn nea wɔhia? Bere a Israelfo no refi Egypt akɔ Bɔhyɛ Asaase no so no, wɔne “firamanfiramanfo bebree” na ɛkɔe. Wɔdii nna kakra wɔ sare kɛse no so. (Ex. 12:38; Deut. 8:15) Eduu baabi no, mana no fonoo firamanfiramanfo no, enti wɔfii ase nwiinwii, na Israelfo no bebree nso yɛɛ saa. (Num. 11:​4-6) Enti wɔn kɔn dɔɔ aduan a na wɔdi wɔ Egypt no. Nkurɔfo no tuu wɔn ano guu Mose so, enti onyaa adwene sɛ ɛsɛ sɛ ɔno ara kɔpɛ nam ma wɔn.—Num. 11:​13, 14.

5-6. Sɛnea firamanfiramanfo no suban nyaa Israelfo no so tumi no, dɛn na yebetumi asua afi mu?

⁵ Firamanfiramanfo no ani ansɔ nea Yehowa yɛ maa wɔn no, na Israelfo no nso suasuaa wɔn. Yɛn nso, nneɛma a Yehowa yɛ ma yɛn no, sɛ wɔn a atwa yɛn ho ahyia no nkyerɛ ho anisɔ a, wɔn suban no betumi awiawia yɛn. Nneɛma anaa hokwan bi a na yɛwɔ bere bi a atwam no, sɛ yɛde yɛn adwene si so dodo a, ebetumi ama yɛayɛ bonniayɛ. Afei nso, sɛ yɛn ani bere nkurɔfo ade a, ɛremma yɛn ani nsɔ nea yɛwɔ. Nanso tebea biara a yɛwɔ mu no, sɛ yɛma yɛn ani sɔ nea yɛwɔ a, ɛbɛma yɛn ani agye paa.

⁶ Ná Onyankopɔn ahyɛ Israelfo no bɔ sɛ, sɛ wɔdu Bɔhyɛ Asaase no so a, ɔbɛma wɔn nneɛma pa pii ama abu so. Ná anka ɛsɛ sɛ Israelfo no kae saa bɔhyɛ no, na wɔhu sɛ ɛnyɛ sare no so hɔ na na wɔbedi dɛ. Yɛn nso, nneɛma a ebia yenni bi wɔ saa wiase yi mu no, ɛnsɛ sɛ yɛde yɛn adwene si so dodo. Mmom, nea Yehowa ahyɛ bɔ sɛ ɔde bɛma yɛn wɔ wiase foforo no mu no, ɛno na ɛsɛ sɛ yɛde yɛn adwene si so. Sɛ yɛyɛ saa a, ɛbɛma yɛn ani agye paa. Afei nso, Bible mu nsɛm a ebetumi aboa yɛn ma yɛde yɛn ho ato Yehowa so kɛse no, yebetumi akenkan na yɛadwinnwen ho.

7. Adɛn nti na yebetumi anya awerɛhyem sɛ Yehowa nsa nyɛ tia?

⁷ Ne nyinaa mu no, ebia wubebisa sɛ, adɛn nti na Onyankopɔn bisaa Mose sɛ: “Yehowa nsa yɛ tia anaa?” Ɛbɛyɛ sɛ na Yehowa reboa Mose ma wahu sɛ ɛnyɛ sɛ ɔwɔ tumi kɛkɛ, na mmom ne tumi no kɔ akyiri paa. Enti ɛmfa ho sɛ na Israelfo no wɔ sare no so no, na Onyankopɔn betumi ama wɔn nam bebree awe. Onyankopɔn de “nsa a ɛyɛ den ne basa a wateɛ mu” na egyee wɔn. (Dw. 136:​11, 12) Enti baabiara a yɛhyɛ biara no, sɛ yehyia sɔhwɛ a, ɛnsɛ sɛ yɛn adwenem yɛ yɛn naa sɛ Yehowa nsa bedi aboa yɛn.—Dw. 138:​6, 7.

8. Mfomso a Israelfo no mu pii dii no, yɛbɛyɛ dɛn na yɛansuasua wɔn? (Hwɛ mfoni no nso.)

⁸ Ankyɛ na Yehowa maa wɔn nam; ɔmaa wɔn mmoko pii. Anwanwade a Onyankopɔn yɛe yi, Israelfo no ankyerɛ ho anisɔ. Mmom, wɔn mu bebree fom  nam no. Nkurɔfo no anna; wɔde da baako ne fã sesaw mmoko bebree. Yehowa bo fuw “nnipa a wodii wɔn akɔnnɔ akyi no,” na ɔtwee wɔn aso. (Num. 11:​31-34) Dɛn na yebetumi asua afi nea ɛtoo wɔn no mu? Ɛsɛ sɛ yɛhwɛ yiye na yɛn ani ammere ade. Sɛ yɛwɔ sika oo, sɛ yenni bi oo, ɛsɛ sɛ yɛde si yɛn ani so sɛ ‘yɛbɛboaboa yɛn agyapade ano wɔ soro.’ Ɛno kyerɛ sɛ yɛne Yehowa ne Yesu bɛfa adamfo denneennen. (Mat. 6:​19, 20; Luka 16:9) Sɛ yɛyɛ saa a, yebetumi anya awerɛhyem sɛ Yehowa bɛma yɛn nea yehia.

9. Awerɛhyem bɛn na yebetumi anya wɔ Onyankopɔn mu?

⁹ Ɛnnɛ nso, Yehowa de ne nsa di boa ne nkurɔfo. Wohwɛ a, wei kyerɛ sɛ yɛn ho renkyere yɛn anaa ɔkɔm renne yɛn da anaa? b Daabi. Nanso Yehowa rennyaw yɛn da. Sɔhwɛ biara a yebehyia no, ɔbɛhyɛ yɛn den ma yɛagyina mu. Yɛbɛyɛ dɛn akyerɛ sɛ yegye di sɛ Yehowa bɛma yɛn nsa aka nea yehia? Momma yɛnhwɛ tebea mmienu bi: (1) bere a yɛn sikasɛm ayɛ basaa ne (2) bere a yɛredwen yɛn daakye ho.

BERE A YƐN SIKASƐM AYƐ BASAA

10. Nneɛma bɛn na ebetumi ama yɛn sikasɛm ayɛ basaa?

¹⁰ Bere a wiase awiei rebɛn no, yebetumi ahwɛ kwan sɛ nneɛma mu bɛyɛ den  paa. Aban a wɔsesa no, akodi, atoyerɛnkyɛm, anaa nsanyare ahorow betumi akɔfa ɛka abɛto yɛn so, na ebetumi ama yɛn adwuma afi yɛn nsa. Afei nso, yebetumi ahwere yɛn agyapade anaa yɛn fie. Ɛba saa a, ebia ebehia sɛ yɛkɔpɛ adwuma foforo wɔ baabi a yɛte no, anaa yɛne yɛn abusua tu kɔ baabi foforo sɛnea ɛbɛyɛ a yebetumi ahwɛ wɔn. Enti, dɛn na ɛbɛboa yɛn ma yɛasisi gyinae a ɛbɛkyerɛ sɛ yegye di sɛ Yehowa nsa nyɛ tia?

11. Sɛ wo sikasɛm yɛ basaa a, dɛn na wubetumi ayɛ? (Luka 12:​29-31)

¹¹ Anammɔn a edi kan a ehia paa sɛ wutu ne sɛ wobɛka wo haw no ho asɛm akyerɛ Yehowa. (Mmeb. 16:3) Srɛ Yehowa sɛ ɔmma wo nyansa a wode besisi gyinae pa, na ɔnka wo koma nto wo yam sɛnea ɛbɛyɛ a ‘worennwinnwen’ wo haw no ho. (Kenkan Luka 12:​29-31.) Srɛ no sɛ ɔmmoa wo na w’ani nsɔ kakra a wowɔ no. (1 Tim. 6:​7, 8) Nsɛm a ɛwɔ asafo nhoma mu a ɛma yehu nea ɛsɛ sɛ yɛyɛ bere a yɛn sikasɛm ayɛ basaa no, yɛ ho nhwehwɛmu. Nsɛm a ɛwɔ jw.org a ɛka nea yɛbɛyɛ bere a yɛn sikasɛm ayɛ basaa ho asɛm no, anuanom pii ahu sɛ aboa wɔn.

12. Nsɛm bɛn na Kristoni bisa ne ho a, ebetumi ama wasi gyinae a ɛbɛboa n’abusua?

¹² Ebinom atu afi wɔn abusua nkyɛn akɔyɛ adwuma wɔ baabi foforo, nanso akyiri yi wɔhui sɛ, sɛɛ wɔansi gyina pa. Ansa na wobɛyɛ adwuma bi no, mfa w’adwene nsi sika a ɛwom no nko ara so, na mmom hwɛ sɛnea ɛbɛka wo som nso. (Luka 14:28) Bisa wo ho sɛ: ‘Sɛ migyaw me yere anaa me kunu hɔ a, sɛn na ɛbɛka m’aware? Mekɔ a, ebetumi ama makɔ adesua ne asɛnka daa, na me ne anuanom nso abɔ anaa?’ Sɛ wowɔ mma a, ebehia sɛ wubisa wo ho saa asɛm yi nso: ‘Sɛ me mma nni me nkyɛn a, mɛyɛ dɛn de “Yehowa nteɛso ne ne kasakyerɛ” atete wɔn?’ (Efe. 6:4) Sɛ woresi gyinae a, w’abusuafo anaa wo nnamfo a wɔmfa Bible afotu nyɛ adwuma no, ɛnyɛ nea wɔbɛka no na ɛsɛ sɛ wutie, mmom ɛsɛ sɛ woma Onyankopɔn kyerɛ wo kwan. c Tony te Asia atɔe; onyaa nnwuma pii a sika wom a na anka obetumi akɔyɛ wɔ amannɔne. Nanso, ɔbɔɔ asɛm no ho mpae, na ɔne ne yere susuw ho. Afei osii gyinae sɛ ɔrenkɔ, na mmom wɔbetwitwa nneɛma so. Tony bu kɔmpɔ hwɛ n’akyi a, ɔka sɛ: “Manya hokwan aboa ebinom ma wɔabehu Yehowa, na yɛn mma nso de anigye resom Yehowa. Yɛn abusua no ahu sɛ, sɛ yɛkɔ so de asɛm a ɛwɔ Mateo 6:33 no yɛ adwuma a, Yehowa bɛhwɛ yɛn.”

BERE A YƐREDWEN YƐN DAAKYE HO

13. Dɛn na yebetumi ayɛ no mprempren na sɛ yɛbɔ nkwakoraa ne mmerewa a yɛatumi ahwɛ yɛn ho?

¹³ Ebia yebebisa yɛn ho sɛ, ‘Mebɔ akwakoraa anaa aberewa a, hena na ɔbɛhwɛ me? Bible hyɛ yɛn nkuran sɛ yɛnyere yɛn ho nyɛ adwuma sɛnea ɛbɛyɛ a yebetumi ahwɛ yɛn ho daakye. (Mmeb. 6:​6-11) Sɛ ɛbɛyɛ yiye a, bɔ mmɔden sɛ wode biribi besie ama daakye. Bible ka sɛ sika bɔ nnipa ho ban. (Ɔsɛnk. 7:12) Nanso, ɛnsɛ sɛ yɛde sikapɛ si yɛn ani so.

14. Sɛ yɛredwen yɛn daakye ho a, adɛn nti na ɛsɛ sɛ yɛkae Hebrifo 13:5 no?

¹⁴ Yesu maa mfatoho bi de kyerɛe sɛ, sɛ obi boaboa sika ano na “ɔnyɛ ɔdefo wɔ Onyankopɔn fam” a, nyansa nnim. (Luka 12:​16-21) Afei nso, obiara nnim nea ebesi ɔkyena. (Mmeb. 23:​4, 5;  Yak. 4:​13-15) Yesu kaa sɛ obiara a ɔpɛ sɛ odi n’akyi no, ɛsɛ sɛ ɔyɛ krado sɛ obegyaw n’ahode nyinaa hɔ. (Luka 14:33) Tete Kristofo a na wɔwɔ Yudea no yɛɛ biribi saa; wɔfii wɔn pɛ mu gyaw wɔn ahode hɔ. (Heb. 10:34) Ɛnnɛ nso, esiane sɛ yɛntaa amanyɔkuw biara akyi nti, ama anuanom bebree ahwere wɔn agyapade. (Adi. 13:​16, 17) Adɛn nti na wɔpenee so maa wɔn agyapade fii wɔn nsa? Ɛbɔ a Yehowa ahyɛ sɛ: “Merennyaw wo da, na merennan m’akyi nkyerɛ wo da biara da” no, na wɔgye di paa sɛ obedi so. (Kenkan Hebrifo 13:5.) Yɛyɛ nea yebetumi biara sɛ yɛbɛpɛ biribi ato hɔ a yɛde bɛhwɛ yɛn ho daakye, nanso sɛ ɔbra no kyim yɛn kosi baabi a yɛnhwɛ kwan a, yɛwɔ awerɛhyem sɛ Yehowa bɛhwɛ yɛn.

15. Adwene a ɛntene bɛn na ɛnsɛ sɛ awofo nya wɔ wɔn mma ho? (Hwɛ mfoni no nso.)

¹⁵ Aman bi so no, ade titiriw nti a awarefo bi wo mma ne sɛ, wɔpɛ sɛ wɔnyin a wɔn mma no yɛ adwuma de hwɛ wɔn. Enti yɛbɛka a, awofo a ɛte saa bu wɔn mma sɛ “wɔn kookoo.” Nanso, Bible ka sɛ, awofo na ɛsɛ sɛ wɔhwɛ wɔn mma. (2 Kor. 12:14) Ɛwom, sɛ awofo mfe kɔ anim a, ebia ebehia sɛ wɔn mma yɛ wɔn  mmoa, na mmofra pii ani gye ho sɛ wɔbɛyɛ saa. (1 Tim. 5:4) Nanso, awofo nim sɛ, sɛ wɔtete wɔn mma ma wɔbɛsom Yehowa a, ɛno paa na ɛbɛma wɔn ani agye, na ɛnyɛ pɛ a wɔn mma bɛpɛ sika abɛhwɛ wɔn.—3 Yoh. 4.

16. Dɛn na awofo betumi ayɛ de aboa wɔn mma na ama wɔn ankasa atumi ahwɛ wɔn ho? (Efesofo 4:28)

¹⁶ Sɛ woreboa wo mma ama wɔahu nea wɔbetumi ayɛ de ahwɛ wɔn ho daakye a, fa wo nhwɛso kyerɛ wɔn sɛ, wɔbetumi de wɔn ho ato Yehowa so. Wɔn mmofraase pɛɛ no, kyerɛ wɔn sɛ adwumaden so wɔ mfaso. (Mmeb. 29:21; kenkan Efesofo 4:28.) Bere a wɔrenyin no, boa wɔn ma wɔnsua ade yiye wɔ sukuu. Ɛsɛ sɛ awofo hwehwɛ Bible nnyinasosɛm a wɔbetumi de aboa wɔn mma ma wɔahu nea wɔbesua wɔ sukuu. Sɛ wɔyɛ saa a, ɛbɛboa wɔn mma no ma wɔanya adwuma a wɔbɛyɛ de ahwɛ wɔn ho, na wɔanya bere pii nso de ayɛ asɛnka adwuma no.

17. Awerɛhyem bɛn na yebetumi anya?

¹⁷ Yehowa asomfo betumi anya awerɛhyem sɛ ɔbɛma wɔn nsa aka wɔn ahiade. Bere a wiase yi awiei rebobɔ ba no, ebehia sɛ yenya Yehowa mu ahotoso paa. Ɛmfa ho nea ebesi biara no, momma yenya gyidi paa sɛ Yehowa de ne tumi bedi aboa yɛn ma yɛn nsa aka nea yehia. Tokuru biara a yehyem no, yebetumi anya awerɛhyem sɛ Yehowa nsa a ɛyɛ den ne ne basa a wateɛ mu no betumi awura hɔ abɛboa yɛn.