‘Ma Wo Bo Nyɛ Duru Na Wo Ho Nyɛ Den’
‘Ma Wo Bo Nyɛ Duru Na Wo Ho Nyɛ Den’
‘Ma wo bo nyɛ duru na wo ho nyɛ den, efisɛ Yehowa wo Nyankopɔn ka wo ho.’—YOS. 1:7-9.
WUBEBUA DƐN?
Nneɛma bɛn mu na Enok ne Noa daa akokoduru adi?
Ɔkwan bɛn so na mmea bi a wɔtenaa ase tete no daa gyidi ne akokoduru adi?
Mmofra bɛn na wɔada akokoduru adi ma w’ani agye ho?
1, 2. (a) Ɛtɔ bere bi a dɛn na yehia na yɛayɛ nea ɛteɛ? (b) Dɛn na yɛrebesusuw ho?
SƐ OBI nni akokoduru a, nea ɛkyerɛ ne sɛ osuro ade anaa ɔyɛ ohufo. Sɛ yɛka sɛ obi wɔ akokoduru a, ebia nea ɛba yɛn adwenem ne obi a ne ho yɛ den anaa ne bo yɛ hyew na onsuro hwee. Nanso ɛtɔ da bi a, egye akokoduru na yɛatumi adi nokware ama Yehowa wɔ nneɛma nketenkete mu mpo.
2 Bible ka nnipa bi ho asɛm sɛ wohyiaa tebea a emu yɛ den paa, nanso wɔde akokoduru gyinaa ano. Afoforo hyiaa tebea a Yehowa asomfo hyia da biara da yi bi, na wɔn nso daa akokoduru adi. Dɛn na yebetumi asua afi nnipa a wɔdaa akokoduru adi a Bible ka wɔn ho asɛm no hɔ? Yɛbɛyɛ dɛn atumi ada akokoduru adi?
WODII ADANSE AKOKODURU SO WƆ WIASE BƆNE MU
3. Dɛn na Enok kae sɛ ɛbɛba amumɔyɛfo so?
3 Ansa na Noa Nsuyiri no reba no, na egye akokoduru na obi atumi adi Yehowa ho adanse wɔ abɔnefo mu. Nanso Enok a “ɔto Adam so ason wɔ awo ntoatoaso mu” no de akokoduru hyɛɛ nkɔm sɛ: “Hwɛ! Yehowa de n’ahotefo mpempem pii bae bebuu nnipa nyinaa atɛn, na oyii amumɔyɛfo nyinaa ntɛn wɔ wɔn amumɔyɛde a wɔyɛe wɔ amumɔyɛ so, ne ahodwirisɛm a nnebɔneyɛfo amumɔyɛfo ka too no so no nyinaa ho.” (Yuda 14, 15) Enok kaa asɛm no te sɛ nea asi dedaw efisɛ na nkɔmhyɛ no bɛbam ɔkwan biara so. Ampa ara nsuyiri a ɛbaa wiase nyinaa no sɛee nnipa abɔnefo!
4. Tebea bɛn mu na Noa ne ‘Onyankopɔn nantewee’?
4 Enok wu akyi bɛboro mfe 650 no, Nsuyiri no bae afe 2370 A.Y.B. mu. Ntam hɔ baabi na wɔwoo Noa. Onyaa abusua na ɔne ne mmabarima yɛɛ adaka. Ansa na Nsuyiri no reba no, abɔfo bɔne danee wɔn ho nnipa bɛwarewaree mmea a wɔn ho yɛ fɛ, na wɔne wɔn woo mma a wɔfrɛ wɔn Nefilim. Saa bere no na nnipa de bɔne ne amumɔyɛsɛm ahyɛ asase so mã. (Gen. 6:1-5, 9, 11) Eyi nyinaa akyi no, “Noa ne nokware Nyankopɔn nantewee” na ɔde akokoduru dii adanse sɛ “trenee sɛnkafo.” (Monkenkan 2 Petro 2:4, 5.) Yehia akokoduru a ɛte saa ara wɔ nna a edi akyiri yi mu.
NA WƆWƆ GYIDI NE AKOKODURU
5. Ɔkwan bɛn so na Mose daa gyidi ne akokoduru adi?
5 Ná Mose wɔ gyidi ne akokoduru a ɛkyɛn so. (Heb. 11:24-27) Onyankopɔn maa Mose dii Israelfo no anim fii Egypt faa sare no so fi afe 1513 kosi afe 1473 A.Y.B. Ná Mose susuw sɛ adwuma no yɛ den ma no nanso ɔpenee so. (Ex. 6:12) Ɔne ne nua Aaron kɔɔ Egypt hene Farao tirimɔdenfo no anim mpɛn pii. Wɔde akokoduru kae sɛ Yehowa de Ɔhaw Du bɛba Egyptfo so de agu wɔn anyame anim ase na wagye ne nkurɔfo. (Ex., ti 7-12) Mose daa gyidi ne akokoduru adi efisɛ Onyankopɔn boaa no bere nyinaa sɛnea ɛte wɔ yɛn fam no.—Deut. 33:27.
6. Sɛ wiase atumfoɔ bisabisa yɛn nsɛm a, dɛn na ɛbɛboa yɛn ma yɛde akokoduru adi adanse?
6 Yehia akokoduru a na Mose wɔ no bi efisɛ Yesu kae sɛ: “Me nti, wɔbɛtwe mo akɔ amrado ne ahene anim, na ayɛ adanse ama wɔne amanaman no. Nanso, sɛ woyi mo ma a, munnnwinnwen sɛnea mobɛkasa anaasɛ nea mobɛka ho; wɔde nea mobɛka bɛma mo dɔn no mu; ɛnyɛ mo ankasa na mokasa, mmom mo Agya no honhom na ɛnam mo so kasa.” (Mat. 10:18-20) Sɛ wiase atumfoɔ bisabisa yɛn nsɛm a, Yehowa honhom bɛboa yɛn ma yɛde gyidi ne akokoduru adi adanse obu so.—Monkenkan Luka 12:11, 12.
7. Dɛn na ɛmaa Yosua nyaa akokoduru na esii no yiye?
7 Yosua na obesii Mose anan, na osuaa Onyankopɔn Mmara daa, na eyi maa gyidi ne akokoduru a ɔwɔ yɛɛ kɛse. Bɛyɛ mfe 1473 ansa na Kristo reba no, na Israelfo no ayɛ krado sɛ wɔbɛhyɛn Bɔhyɛ Asase no so. Onyankopɔn ka kyerɛɛ wɔn sɛ: ‘Momma mo bo nyɛ duru na mo ho nyɛ den.’ Onyankopɔn kae sɛ sɛ Yosua di Mmara no so a, ɔbɛyɛ n’ade nyansam na asi no yiye. Onyankopɔn ka kyerɛɛ no sɛ: “Nsuro na mmɔ hu, efisɛ baabi a wobɛkɔ biara no, Yehowa wo Nyankopɔn ka wo ho.” (Yos. 1:7-9) Hwɛ sɛnea ɛbɛyɛ sɛ saa asɛm no hyɛɛ Yosua den! Ná Onyankopɔn ka ne ho ampa efisɛ bɛyɛ mfe 1467 ansa na Kristo reba no, na wɔadi Bɔhyɛ Asase no fã kɛse no ara so. Wɔde mfe asia pɛ na ɛyɛɛ saa!
MMEA A WƆDE AKOKODURU SOM ONYANKOPƆN
8. Dɛn na Rahab yɛe a ɛkyerɛ sɛ na ɔwɔ gyidi ne akokoduru?
8 Efi tete nyinaa, mmea pii de akokoduru asom Yehowa. Sɛ nhwɛso no, aguaman Rahab a na ofi Yeriko no gyee Onyankopɔn dii, ɔde mmarima a Yosua somaa wɔn no siei, na ɔmaa mmarima a ɔhene somaa wɔn no de wɔn ani kyerɛɛ baabi foforo. Bere a Israelfo sɛee Yeriko no, wogyee Rahab ne ne fiefo nkwa. Rahab gyaee ne brabɔne no, na ɔde nokwaredi som Yehowa. Akyiri yi ɔbɛyɛɛ Mesia no nanabea mpo. (Yos. 2:1-6; 6:22, 23; Mat. 1:1, 5) Hwɛ sɛnea ne gyidi ne n’akokoduru nti wohyiraa no!
9. Dɛn na Debora, Barak, ne Yael yɛe de daa akokoduru adi?
9 Yosua wui bɛyɛ afe 1450 A.Y.B. mu. Ne wu akyi no, Onyankopɔn paw atemmufo ma wodii Israel so. Ná Kanaan hene Yabin ahyɛ Israelfo so mfe 20, enti Onyankopɔn maa odiyifobea Debora ka kyerɛɛ ɔtemmufo Barak sɛ ɔnyɛ ho biribi. Barak boaboaa mmarima 10,000 ano wɔ Bepɔw Tabor so sɛ ɔne Yabin sahene Sisera rebɛko. Ná Sisera ne ne dɔm ne ne nteaseɛnam 900 wɔ Kison subon mu. Bere a Israelfo no kɔɔ subon no mu no, Onyankopɔn maa nsu yiri faa hɔ nyinaa ma ɛhɔ yɛɛ atɛkyɛ, na ɛyɛɛ den maa Kanaanfo no sɛ wɔde wɔn nteaseɛnam bɛfa mu. Barak mmarima no dii nkonim na “Sisera asraafo no nyinaa totɔɔ nkrante ano.” Sisera kɔbɔɔ ne ho aguaa wɔ ɔbea bi a wɔfrɛ no Yael ntamadan mu. Afei bere a ɔdae no, Yael kum no. Enti sɛnea Debora ka kyerɛɛ Barak no, saa nkonim yi ho “anuonyam” kɔɔ ɔbea hɔ, kyerɛ sɛ Yael hɔ. Esiane sɛ Debora, Barak, ne Yael yɛɛ ade akokoduru so nti, Israel “asase no so dwoe mfe aduanan.” (Atem. 4:1-9, 14-22; 5:20, 21, 31) Onyankopɔn asomfo pii, mmarima ne mmea nyinaa, ada gyidi ne akokoduru a ɛte saa adi.
YƐN ANOM NSƐM TUMI MA AFOFORO NYA AKOKODURU
10. Dɛn nti na yebetumi aka sɛ yɛn anom nsɛm betumi ama afoforo anya akokoduru?
10 Yɛn anom nsɛm betumi ama wɔn a yɛne wɔn som Yehowa anya akokoduru. Afeha a ɛto so 11 ansa na Kristo reba no, Ɔhene Dawid ka kyerɛɛ ne ba Solomon sɛ: “Nya akokoduru, yɛ den na keka wo ho. Nsuro, na mmɔ hu nso, na Yehowa Nyankopɔn, me Nyankopɔn no ka wo ho. Ɔrempa wo na ɔrennyaw wo kosi sɛ wubewie Yehowa fie adwuma no nyinaa.” (1 Be. 28:20) Solomon de akokoduru sii asɔrefie fɛfɛ bi maa Yehowa wɔ Yerusalem.
11. Ɔkwan bɛn so na akokoduru a Israelni abeawa no de kasae no boaa obi?
11 Bɛyɛ mfe 1,000 ansa na Kristo reba no, Israelni abeawa bi asɛm a ɔde akokoduru kae boaa ɔkwatani bi. Ná Siriafo afa no dommum ma wabɛyɛ Siria sahene Naaman a ɔyɛ kwatani no abaawa. Ná abeawa no nim anwonwade a Yehowa nam Elisa so ayɛ. Enti ɔka kyerɛɛ Naaman yere sɛ, sɛ ne kunu kɔ Israel a, Onyankopɔn diyifo bɛsa no yare. Naaman tiei, na ɔkɔɔ Israel ma wɔsaa no yare anwonwakwan so, na ɔbɛyɛɛ Yehowa somfo. (2 Ahe. 5:1-3, 10-17) Sɛ woyɛ abeawa anaa abarimaa a wodɔ Onyankopɔn te sɛ Israelni abeawa no a, Onyankopɔn betumi ama woanya akokoduru de adi w’akyerɛkyerɛfo, wo mfɛfo sukuufo ne afoforo adanse.
12. Asɛm a Ɔhene Hesekia kae no kaa ne manfo no dɛn?
12 Nsɛm a ɛhyɛ nkuran betumi aboa obi ma ɔde akokoduru agyina tebea a ɛyɛ den mu. Bere a Asiriafo kɔtow hyɛɛ Yerusalem so bɛyɛ mfe 800 ansa na Kristo reba no, Ɔhene Hesekia ka kyerɛɛ ne manfo sɛ: “Munnya akokoduru na monyɛ den. Munnsuro na mommmɔ hu, Asiria hene ne nnipadɔm a wɔka ne ho no nti, efisɛ wɔn a wɔka yɛn ho no dɔɔso sen wɔn a wɔka ne ho. Ɔno de, ɔhonam basa na ɛka ne ho, na yɛn de, Yehowa, yɛn Nyankopɔn na ɔka yɛn ho sɛ ɔbɛboa yɛn, na wako yɛn ko ama yɛn.” Asɛm no kaa nkurɔfo no dɛn? “Ɔman no de wɔn werɛ hyɛɛ Yuda hene Hesekia nsɛm no mu.” (2 Be. 32:7, 8) Sɛ wɔretaa yɛn a, nsɛm a ɛte saa betumi ahyɛ yɛne yɛn nuanom Kristofo den na yɛde akokoduru agyina pintinn.
13. Dɛn na Ɔhene Ahab ahenkwaa Obadia yɛe a ɛkyerɛ sɛ ɔwɔ akokoduru?
13 Ɛtɔ da bi a akokoduru hwehwɛ sɛ yɛka yɛn ano tom. Bɛyɛ mfe 1,000 ansa na Kristo reba no, Obadia a na ɔyɛ Ɔhene Ahab ahenkwaa nyaa akokoduru de Yehowa adiyifo ɔha kohintaw “ɔbodan mu, aduonum aduonum,” sɛnea ɛbɛyɛ a Ɔhemmaa Yesebel renkum wɔn. (1 Ahe. 18:4) Ɛnnɛ, Yehowa asomfo anokwafo pii yɛ wɔn ade sɛ Obadia a na osuro Onyankopɔn no. Sɛ yɛn atamfo rehwehwɛ yɛn nuanom Kristofo akyi kwan a, yɛnkyerɛ.
NA ESTER YƐ ƆHEMMAA KOKODURUFO
14, 15. Ɔkwan bɛn so na Ɔhemmaa Ester daa gyidi ne akokoduru adi? Dɛn na efii mu bae?
14 Bɛyɛ mfe 500 ansa na Kristo reba no, Haman tirimɔdenfo no bɔɔ pɔw sɛ ɔbɛtɔre Yudafo ase afi Persia Ahemman mu. Ɔhemmaa Ester daa gyidi ne akokoduru kɛse adi saa bere no. Bere a Yudafo no tee asɛm no, wɔn werɛ howee na wodii mmuada, na akyinnye biara nni ho sɛ wofi wɔn koma nyinaa mu bɔɔ mpae. (Ester 4:1-3) Asɛm no haw Ɔhemmaa Ester paa. Ester busuani Mordekai de mmara a wɔahyɛ sɛ wɔntɔre Yudafo ase no kɔkyerɛɛ Ester, na Mordekai ka kyerɛɛ no sɛ ɔnkɔ ɔhene anim nkɔsrɛ mma ne nkurɔfo Yudafo no. Nanso sɛ ɔhene mfrɛɛ obi na ɔno ara kɔ n’anim a, na wobekum no.—Ester 4:4-11.
15 Mordekai ka kyerɛɛ Ester sɛ: ‘Sɛ woanka ho hwee a, ogye befi baabi foforo aba, nanso hena na onim sɛ ebia bere a ɛte sɛɛ nti na woabɛyɛ ɔdehye yi?’ Ester ka kyerɛɛ Mordekai sɛ ɔmmoaboa Yudafo no ano wɔ Susan na wonni mmuada mma no. Ester kae sɛ ɔno nso bedi mmuada, na ɔde kaa ho sɛ: “Ɛno akyi mɛkɔ ɔhene anim. Mmara mma kwan nanso mɛkɔ; miwu a, na mawu.” (Ester 4:12-17) Ester yɛɛ ade akokoduru so, na Ester nhoma no ma yehu sɛ Onyankopɔn gyee ne nkurɔfo. Ɛnnɛ, Kristofo a wɔasra wɔn ne wɔn nuanom nguan foforo no nso da akokoduru a ɛte saa adi bere a wɔahyia sɔhwɛ, na “mpaebɔ Tiefo” no boa wɔn bere nyinaa.—Monkenkan Dwom 65:2; 118:6.
“MA WO BO NTƆ WO YAM”
16. Dɛn na Yesu yɛe a mmofra betumi asua?
16 Yesu dii mfe 12 no, bere bi, wohuu no wɔ asɔrefie hɔ sɛ “ɔte akyerɛkyerɛfo no mfinimfini retie wɔn na ɔrebisabisa wɔn nsɛm.” Bere a wɔn a wɔretie no no huu “sɛnea n’adwenem dɔ na oyi nsɛm ano no,” wɔn ho dwiriw wɔn. (Luka 2:41-50) Ná Yesu yɛ abarimaa koraa, nanso na ɔwɔ gyidi ne akokoduru a obetumi de abisabisa akyerɛkyerɛfo mpanyimfo a wɔwɔ asɔrefie hɔ no nsɛm. Ɛsɛ sɛ mmofra a wɔwɔ Kristofo asafo no mu kae nea Yesu yɛe no. Eyi bɛboa wɔn ma ‘wɔde anoyi ama obiara a obebisa anidaso a ɛwɔ wɔn mu no ho asɛm.’—1 Pet. 3:15.
17. Dɛn nti na Yesu ka kyerɛɛ n’asuafo no sɛ ‘wɔmma wɔn bo ntɔ wɔn yam’? Dɛn nti na ɛsɛ sɛ yɛma yɛn bo yɛ duru?
17 Yesu ka kyerɛɛ nnipa bi sɛ ‘wɔmma wɔn bo ntɔ wɔn yam.’ (Mat. 9:2, 22) Ɔka kyerɛɛ n’asuafo sɛ: “Hwɛ, dɔn no reba, na nokwasɛm ni, adu sɛ mobɛhwete ama obiara akɔ ne fie na moagyaw me nkutoo; nanso ɛnkaa me nkutoo, efisɛ Agya no ka me ho. Maka eyinom akyerɛ mo na monam me so anya asomdwoe. Mo ho rehiahia mo wiase de, nanso momma mo bo ntɔ mo yam! Madi wiase so nkonim.” (Yoh. 16:32, 33) Wiase no tan yɛn te sɛ nea wɔtan Yesu akyidifo a wodi kan no, nanso mommma yɛnnyɛ sɛ wiase no. Sɛ yedwinnwen akokoduru a na Onyankopɔn Ba no wɔ ho a, ɛbɛhyɛ yɛn den ma yɛatwe yɛn ho afi wiase no ho. Yesu dii wiase so nkonim na yɛn nso yebetumi ayɛ saa.—Yoh. 17:16; Yak. 1:27.
“NYA AKOKODURU!”
18, 19. Dɛn na ɔsomafo Paulo de kyerɛe sɛ ɔwɔ gyidi ne akokoduru?
18 Ɔsomafo Paulo gyinaa sɔhwɛ pii ano. Bere bi, sɛ Roma asraafo ankogye Paulo a, anka Yudafo a wɔwɔ Yerusalem tetew ne mu. Anadwo no, “Awurade begyinaa ne nkyɛn kae sɛ: ‘Nya akokoduru! Na sɛnea woadi me ho adanse fefeefe wɔ Yerusalem no, saa ara na ɛsɛ sɛ wudi adanse wɔ Roma nso.’” (Aso. 23:11) Saa pɛpɛɛpɛ na Paulo yɛe.
19 Paulo de akokoduru kaa “asomafo ahotefo” a na wɔpɛ sɛ wɔsɛe Korinto asafo no anim. (2 Kor. 11:5; 12:11) Ná saa mmarima yi yɛ atorofo, nanso Paulo de na obetumi akyerɛ sɛ ɔyɛ ɔsomafo ankasa esiane nea na wafa mu nti. Wɔde no too afiase, wɔhwee no, ohyiaa asiane wɔ akwantu mu, ɔkɔm ne sukɔm dee no, osii pɛ, na na asafo no ho dadwen nso da no so. (Monkenkan 2 Korintofo 11:23-28.) Gyidi ne akokoduru a ɛkyɛn so a na Paulo wɔ no yɛ adanse a ɛkyerɛ sɛ Onyankopɔn na ɔhyɛɛ no den!
20, 21. (a) Ma nhwɛso bi a ɛkyerɛ sɛ ɛsɛ sɛ yɛkɔ so nya akokoduru. (b) Tebea horow bɛn mu na ebia ebehia sɛ yɛda akokoduru adi, na awerɛhyem bɛn na yebetumi anya?
20 Ɛnyɛ Kristofo nyinaa na wobehyia ɔtaa a emu yɛ den. Nanso ehia sɛ yɛn nyinaa nya akokoduru de gyina ɔhaw ahorow ano da biara da. Nhwɛso bi ni: Ná aberante bi a ɔwɔ Brazil ka atuntunafo kuw bi ho. Bere a osuaa Bible no, ohui sɛ ɛsɛ sɛ ɔyɛ nsakrae nanso na onim sɛ, sɛ ofi kuw no mu a wobekum no. Ɔbɔɔ mpae, na ɔde Bible mu nsɛm bi kyerɛɛ kuw no panyin ma ohuu nea enti a ɔrentumi nkɔ so ne wɔn mmɔ. Wɔmaa aberante no kwan sɛ obetumi afi kuw no mu, na wɔanyɛ no hwee. Akyiri yi ɔbɛyɛɛ ɔdawurubɔfo.
21 Yehia akokoduru na yɛde aka asɛmpa no. Ehia sɛ mmabun a wɔyɛ Kristofo nya akokoduru na ama wɔatumi akura wɔn mudi mu. Sɛ yɛrebɛkɔ nhyiam a, egye akokoduru na yɛasrɛ kwan afi adwuma mu na yɛatumi akɔ nna no nyinaa. Tebea foforo pii wɔ hɔ a ehia sɛ yɛda akokoduru adi. Nanso ɛmfa ho nsɛnnennen a yehyia no, Yehowa betie yɛn “gyidi mpaebɔ.” (Yak. 5:15) Ɔkwan biara so, ɔde ne honhom kronkron bɛboa yɛn ma yɛn ‘bo ayɛ duru na yɛn ho ayɛ den’!
[Adesua no ho Nsɛmmisa]
[Kratafa 11 mfonini]
Enok de akokoduru dii adanse wɔ wiase bɔne mu
[Kratafa 12 mfonini]
Ná Yael bo yɛ duru na na ɔyɛ den
