Ɔyerenom—Munnya Obu Kɛse Mma Mo Kununom
Ɔyerenom—Munnya Obu Kɛse Mma Mo Kununom
‘Ɔyerenom, mommrɛ mo ho ase mma mo ankasa mo kununom.’—EFESOFO 5:22.
1. Dɛn nti na ɛtaa yɛ den ma ɔyere sɛ obebu ne kunu?
WƆ AMAN pii so no, sɛ nnipa baanu ware a, ayeforo no ka ntam sɛ obenya obu kɛse ama ne kunu. Nanso ɔkwan a okununom pii fa so ne wɔn yerenom di nsɛm no na ɛkyerɛ sɛ ebia ɛbɛyɛ den ama wɔn yerenom sɛ wobedi ntam no so anaasɛ ɛrenyɛ den. Aware nyaa mfiase pa. Onyankopɔn yii Adam, onipa a odi kan no mparow biako na ɔde yɛɛ ɔbea no. Adam kae sɛ: “Afei me nnompe mu dompe ne me honam mu nam ni.”—Genesis 2:19-23.
2. Dɛn na asesa wɔ su a mmea kura wɔ aware ho no ho nnansa yi?
2 Ɛmfa ho mfiase pa a aware nyae no, wɔ 1960 mfe no mfiase mu no, wɔtew mmea fekuw bi wɔ Amerika a na ne botae ne sɛ ɛbɛboa mmea ma wɔade wɔn ho afi mmarima nhyɛso ase. Saa bere no, sɛ wɔkyekyɛm a, awarefo a na wogyaw wɔn mmusua hɔ no mu bɛyɛ 300 yɛ mmarima, ɛnna biako yɛ ɔbea. Nanso ebeduu 1960 mfe no awiei no, na mmea 3 na wogyaw wɔn mmusua hɔ. Seesei, ɛte sɛ nea mmea ka kasafĩ, nom nsa, nom sigaret, na wɔbɔ brabɔne te sɛ mmarima ara pɛ. So eyi ama mmea anya anigye sen kan no? Dabi. Wɔ aman bi mu no, wɔn a wɔware no mu bɛyɛ fã gyae aware. So mmɔden a mmea bi bɔ sɛ wɔbɛma wɔn aware ayɛ yiye no aboa wɔn anaasɛ asɛe asɛm no koraa?—2 Timoteo 3:1-5.
3. Dɛn titiriw na ɛde ɔhaw aba aware mu?
3 Ɔhaw titiriw bɛn na ɛwɔ aware mu? Ɔkwan bi so no, ɛyɛ ɔhaw a ɛwɔ hɔ fi bere a ɔbɔfo tuatewfo, “ɔwɔ dedaw no, nea wɔfrɛ no Ɔbonsam ne Satan” daadaa Hawa no. (Adiyisɛm 12:9; 1 Timoteo 2:13, 14) Satan ama ayɛ te sɛ nea Onyankopɔn nkyerɛkyerɛ nye. Sɛ nhwɛso no, Ɔbonsam ama aware ayɛ sɛ biribi a ɛyɛ den dodo. Satan a ɔyɛ wiase sodifo no nam nsɛm ho amanneɛbɔfo so trɛw atosɛm mu, a n’atirimpɔw ara ne sɛ ɔbɛma Onyankopɔn akwankyerɛ ayɛ sɛ nea atwam, na ɛko tia mmea. (2 Korintofo 4:3, 4) Nanso sɛ yɛde adwempa susuw nea Onyankopɔn ka wɔ asɛyɛde a ɔbea wɔ wɔ aware mu ho a, yebehu sɛnea nyansa ne mfaso wɔ Onyankopɔn Asɛm so.
Kɔkɔbɔ a Wɔde ma Wɔn a Wɔware
4, 5. (a) Dɛn nti na ahwɛyiye ho hia bere a woresusuw aware ho no? (b) Dɛn na ɛsɛ sɛ ɔbea yɛ ansa na wapene so aware obi?
4 Bible de kɔkɔbɔ ma. Ɛka sɛ wɔ wiase a Ɔbonsam di so yi mu no, wɔn a wɔwɔ aware pa mpo ho “behiahia” wɔn. Enti ɛmfa ho sɛ Onyankopɔn na ɔhyehyɛɛ aware no, Bible de kɔkɔbɔ ma wɔn a wɔware no. Bible kyerɛwfo bi kaa obi a ne kunu awu ma enti ɔwɔ hokwan sɛ otumi ware bio no ho asɛm sɛ: “Sɛ ɔtra hɔ sɛnea ɔte a, n’ani begye mmom.” Yesu nso kamfoo sigyadi maa wɔn a ‘wobetumi agye atom.’ Nanso sɛ obi paw sɛ ɔbɛware a, ɛsɛ sɛ ɔware wɔ “Awurade mu nkutoo,” kyerɛ sɛ, ɛsɛ sɛ ɔware Onyankopɔn somfo a wahyira ne ho so abɔ asu.—1 Korintofo 7:28, 36-40; Mateo 19:10-12.
5 Nea enti a ɛsɛ sɛ ɔbea titiriw na osusuw onipa a ɔbɛware no ho no ne kɔkɔbɔ a Bible de ma yi: “Mmara akyekyere ɔbea warefo afam ne kunu ho.” Sɛ ɔbarima no wu nkutoo anaasɛ ɔsɛe aware na sɛ awarefo no gu aware no a, ansa na ɔbea no atumi ‘ade ne ho afi ne mmara ase.’ (Romafo 7:2, 3) Sɛ w’ani bɔ obi so na wunya ne ho dɔ a, ebetumi ama moanya mo ho anigye, nanso ɛno nkutoo nkyerɛ sɛ wubenya aware pa. Enti ehia sɛ ɔbea a ɔnwaree bisa ne ho sɛ, ‘So mewɔ ɔpɛ sɛ me ne ɔbarima yi bɛyɛ nhyehyɛe aware na makɔhyɛ ne mmara ase?’ Ɛyɛ bere a wunnya nwaree no na ɛsɛ sɛ wususuw asɛmmisa yi ho, na ɛnyɛ bere a woaware awie no.
6. Gyinae bɛn na mmea dodow no ara betumi asi nnɛ, na dɛn nti na ɛho hia saa?
6 Wɔ mmeae pii nnɛ no, sɛ obi ka kyerɛ ɔbea bi sɛ ɔbɛware no a, ɔwɔ hokwan sɛ ɔpene so anaa ɔmpene so. Nanso esiane sɛ nkate a ɔbea wɔ sɛ obenya obi a ɔbɛdɔ no na ɔne no atra sɛ awarefo no mu tumi yɛ den nti, ebetumi ayɛ den paa ama no sɛ obesi gyinae a nyansa wom. Ɔkyerɛwfo bi kae sɛ: “Dodow a yɛpɛ sɛ yɛyɛ biribi no—sɛ́ ebia yɛpɛ sɛ yɛware anaasɛ yɛforo bepɔw bi no—dodow no ara na sɛ anhwɛ a yebebu yɛn ani agu biribiara so, na yɛatie nea ɛbɛyɛ yɛn asom dɛ nkutoo.” Sɛ obi reforo bepɔw na wansusuw nneɛma ho yiye a, obetumi ahwere ne nkwa; saa ara na sɛ obi amfi nyansam ampaw aware mu hokafo a, ebetumi adi no awu.
7. Afotu pa bɛn na wɔde ama wɔn a wɔrehwehwɛ obi aware no?
7 Sɛ ɔbarima bi ka kyerɛ ɔbea sɛ ɔbɛware no a, ɛsɛ sɛ ɔbea no susuw nea ɔbarima no mmara a ɔbɛkɔ akɔhyɛ ase no kyerɛ no ho anibere so. Mfe bi a atwam no, Indiani ababaa bi gyee toom sɛ: “Yɛn awofo anyin na wonim nyansa sen yɛn, na wɔnte sɛ yɛn a obi betumi adaadaa yɛn ntɛm no. . . . Ɛnyɛ den koraa sɛ metumi adi mfomso.” Mmoa a awofo ne afoforo betumi de ama yɛn no ho hia. Bere bi a atwam no, ɔfotufo bi hyɛɛ mmerante ne mmabaa nkuran sɛ wɔmmɛn nnipa a wɔpɛ sɛ wɔware wɔn no awofo na wɔntɔ wɔn bo ase nhwɛ sɛnea onii no ne n’awofo ne n’abusua mufo afoforo di nsɛm fa nso.
Sɛnea Yesu Brɛɛ ne Ho Ase
8, 9. (a) Yesu buu ne ho ase a ɔbrɛ maa Onyankopɔn no dɛn? (b) Mfaso bɛn na ebetumi afi ahobrɛase mu aba?
8 Ɛwom sɛ ebetumi ayɛ den ama mmea sɛ wɔbɛbrɛ wɔn ho ase de, nanso wobetumi abu no sɛ nidi wom, sɛnea Yesu mpo yɛe no. Ɛmfa ho sɛ na Yesu ho ase a ɔbɛbrɛ ama Onyankopɔn no hwehwɛ sɛ ohu amane na owu wɔ asɛndua so no, onyaa anigye sɛ ɔbrɛɛ ne ho ase maa Onyankopɔn. (Luka 22:41-44; Hebrifo 5:7, 8; 12:3) Mmea betumi ahwɛ Yesu asuasua no, efisɛ Bible ka sɛ: “Ɔbea nso ti ne ɔbarima; Kristo nso ti ne Nyankopɔn.” (1 Korintofo 11:3) Nanso nea ɛsɛ sɛ yɛhyɛ no nsow ne sɛ, ɛnyɛ bere a mmea aware nkutoo na wɔhyɛ mmarima tiyɛ ase.
9 Bible kyerɛkyerɛ mu sɛ, sɛ́ ebia mmea aware anaa wɔnwaree no, ɛsɛ sɛ wɔbrɛ wɔn ho ase hyɛ mmarima a wɔfata a wɔyɛ ahwɛfo wɔ Kristofo asafo no mu ase. (1 Timoteo 2:12, 13; Hebrifo 13:17) Sɛ mmea di Onyankopɔn akwankyerɛ akyi brɛ wɔn ho ase a, wɔyɛ nhwɛso ma abɔfo no wɔ Onyankopɔn nhyehyɛe mu. (1 Korintofo 11:8-10) Bio nso, mmea awarefo a wɔn ani afi nam wɔn nhwɛso pa ne nyansahyɛ a mfaso wɔ so so kyerɛkyerɛ mmabaa ma ‘wɔbrɛ wɔn ho ase ma wɔn ankasa wɔn kununom.’—Tito 2:3-5.
10. Ahobrɛase ho nhwɛso bɛn na Yesu yɛe?
10 Yesu huu mfaso a ɛwɔ ahobrɛase a ɛfata so. Bere bi, ɔka kyerɛɛ ɔsomafo Petro sɛ ontua wɔn baanu tow mma atumfo no, na mpo ɔmaa Petro sika a ɔde betua. Akyiri yi Petro kyerɛwee sɛ: “Awurade nti mommrɛ mo ho ase mma nnipa nhyehyɛe nyinaa.” (1 Petro 2:13; Mateo 17:24-27) Yɛkenkan Yesu ahobrɛase ho nhwɛso a ɛda nsow paa ho asɛm sɛ: “Ogyaa biribiara mu faa akoa tebea bɛyɛɛ sɛ nnipa. Nea ɛsen saa no, bere a ohui sɛ ne su ne ne yɛbea te sɛ onipa no, ɔbrɛɛ ne ho ase yɛɛ osetie kosii owu mu.”—Filipifo 2:5-8.
11. Dɛn nti na Petro hyɛɛ mmea nkuran sɛ wɔmmrɛ wɔn ho ase mma wɔn kununom a wɔnyɛ gyidifo no mpo?
11 Bere a Petro rehyɛ Kristofo nkuran sɛ wɔmmrɛ wɔn ho ase mma wiase yi mu atumfo atirimɔdenfo asisifo no, ɔkae sɛ: “Nokwarem no, eyi nti na wɔfrɛɛ mo, efisɛ Kristo mpo huu amane maa mo, na ogyaw mo nhwɛso a mode bedi n’anammɔn akyi pɛɛ.” (1 Petro 2:21) Bere a Petro kyerɛkyerɛɛ sɛnea Yesu huu amane na ɔbrɛɛ ne ho ase gyinaa mu akyi no, ɔhyɛɛ mmea a wɔn kununom nyɛ gyidifo nkuran sɛ: “Saa ara na mo ɔyerenom, mommrɛ mo ho ase mma mo ankasa mo kununom, na sɛ ebinom anyɛ aso amma asɛm no a, ɔyerenom nam wɔn abrabɔ so anya wɔn a wɔnkasa, efisɛ wɔn ankasa bedi mo abrabɔ kronn ne obu a emu dɔ no ho adanse.”—1 Petro 3:1, 2.
12. Mfaso bɛn na efii Yesu ahobrɛase no mu bae?
12 Sɛ wodi obi ho fɛw anaa wɔyeyaw no na wanka hwee a, afoforo betumi abu no sɛ ɔyɛ mmerɛw. Nanso ɛnyɛ saa na Yesu buu no. Petro kyerɛwee sɛ: “Bere a wɔsopaa no no, wanyɛ bi antua ka. Bere a ɔrehu amane no, wanhunahuna obiara.” (1 Petro 2:23) Ebinom a wohuu sɛnea Yesu huu amane no bɛyɛɛ gyidifo wɔ ɔkwan bi so. Wɔn mu bi ne odwowtwafo a wɔbɔɔ no asɛnduam wɔ Yesu nkyɛn ne ɔsraani panyin a ɔhwɛ ma wokum Yesu no. (Mateo 27:38-44, 54; Marko 15:39; Luka 23:39-43) Saa ara na Petro kyerɛe sɛ okununom a wɔnyɛ gyidifo, a ebinom mpo yɛ basabasa no, bɛba abɛyɛ Kristofo bere a wohu sɛnea wɔn yerenom da ahobrɛase su adi no. Ɛnnɛ, eyi ho nhwɛso wɔ hɔ.
Sɛnea Ɔyerenom Betumi Anya Wɔn Kununom
13, 14. Mfaso bɛn na afi mmea a wɔbrɛ wɔn ho ase ma wɔn kununom no mu aba?
13 Mmea a wɔabɛyɛ gyidifo nam Kristofo su a wɔda no adi so anya wɔn kununom. Wɔ Yehowa Adansefo ɔmantam nhyiam bi ase no, ɔbarima bi kaa ne yere Kristoni ho asɛm sɛ: “Misusuw sɛ me ne no anni no yiye. Nanso na obu me paa. Wammu me animtiaa da. Wammɔ mmɔden sɛ ɔde ne som mu nkyerɛkyerɛ bepuapua me. Ɔne me dii no ɔdɔ so. Sɛ ɔbɛkɔ ɔmansin nhyiam a, ɔbɔ mmɔden sɛ ɔbɛyɛ m’aduan asi hɔ, na wasiesie fie hɔ. Ne suban ma mifii ase nyaa Bible no ho anigye. Ɛne sɛ seesei migyina ha yi!” Nokwarem no, sɛ yɛbɛka a, ne yere nam n’abrabɔ so ‘nyaa no a wankasa.’
14 Sɛnea Petro sii so dua no, ɛnyɛ nea ɔyere ka ne asɛm no, na mmom ne nneyɛe na etumi sow aba pa. Eyi ho nhwɛso ne ɔbea bi a osuaa Bible mu nokware na osii ne bo sɛ ɔbɛkɔ Kristofo nhyiam ahorow no. Ne kunu teɛɛm guu no so sɛ: “Agnes, sɛ woyɛ ɔbea a bue saa pon no na kɔ, na wokɔ a mma bio!” Agnes amfa “saa pon” no mu ankɔ, na mmom ɔfaa pon foforo mu. Da foforo a Agnes rekɔ asafo nhyiam anwummere no, ne kunu hunahunaa no sɛ: “Woba a, woremmɛto me fie ha.” Agnes bae no na ne kunu nni hɔ, ɔkɔhyɛɛ mu nnansa. Bere a Agnes kunu no san bae no, ofi ayamye mu bisaa no sɛ: “Dɛn na wubedi?” Agnes antoto ne som a ɔde ma Yehowa no ase da. Awiei koraa no, ne kunu no penee so ma wɔne no yɛɛ Bible adesua, hyiraa ne nkwa so maa Onyankopɔn, na akyiri yi ɔbɛsomee sɛ asafo mu panyin a wɔde asɛyɛde pii ahyehyɛ ne nsa.
15. “Ahosiesie” bɛn na wɔkamfo kyerɛ ɔyerenom a wɔyɛ Kristofo?
15 Ɔsomafo Petro kamfoo biribi a mmea a yɛaka wɔn ho asɛm yi daa no adi. Ɛno ne “ahosiesie.” Nanso na ɛnyɛ “mmɛsawɔw” anaa “ntadehyɛ” so na wɔde wɔn adwene besi kɛse. Mmom, Petro kae sɛ: “Momma [mo ahosiesie nyɛ] komam nipa a wahintaw wɔ honhom a ɛyɛ komm na edwo a ɛmporɔw mu, ade a ɛsom bo Nyankopɔn anim.” Honhom a ɛyɛ komm na edwo yi da adi wɔ ɛnne a mmea de kasa, nneyɛe a ɛfata a wɔda no adi, na ɛnyɛ akyinnyegye mu. Kristoni bea nam eyi so da obu a emu dɔ adi kyerɛ ne kunu.—1 Petro 3:3, 4.
Wɔn a Ɔyerenom Betumi Asuasua Wɔn
16. Akwan bɛn so na Sara yɛ nhwɛso pa ma Kristofo ɔyerenom?
16 Petro kyerɛwee sɛ: “Tete no, mmea kronkron a wɔde wɔn ho too Nyankopɔn so no hyehyɛɛ wɔn ho brɛɛ wɔn ho ase maa wɔn ankasa wɔn kununom.” (1 Petro 3:5) Mmea a wɔte saa no hui sɛ sɛ wotie Yehowa afotu de nya n’anim dom a, awiei koraa no, ɛbɛma wɔn abusua anya anigye ne daa nkwa. Petro ka Sara, Abraham yere fɛfɛ no ho asɛm sɛ ‘ɔyɛɛ aso maa Abraham na ɔfrɛɛ no “owura.”’ Sara boaa ne kunu a osuro Nyankopɔn a na Onyankopɔn aka akyerɛ no sɛ ontu nkɔ akyirikyiri asase bi so no. Sara de asetra pa a na ɔwɔ no bɔɔ afɔre na ɔde ne nkwa mpo too asiane mu. (Genesis 12:1, 10-13) Petro kamfoo Sara akokoduru no kyerɛɛ mmea, bere a ɔkae sɛ: “Na moabɛyɛ ne mma, sɛ mokɔ so yɛ papa na moansuro ahude biara a.”—1 Petro 3:6.
17. Dɛn nti na ɛbɛyɛ sɛ na Abigail ho asɛm wɔ Petro adwenem sɛ obi a Kristofo ɔyerenom betumi asuasua no?
17 Abigail yɛ ɔbea foforo a na ɔwɔ akokoduru ne Onyankopɔn mu gyidi. Ɛbɛyɛ sɛ na ɔno nso ho asɛm wɔ Petro adwenem. Ná ‘ɔwɔ adwempa,’ nanso na ne kunu Nabal de, “ɔyɛ den, na ne nneyɛe nye.” Bere a Nabal ammoa Dawid ne ne mmarima no, wɔyɛe sɛ wɔbɛtɔre Nabal ne ne fiefo nyinaa ase. Nanso Abigail yɛɛ ade de gyee ne fiefo nkwa. Abigail hyehyɛɛ nnuan de soaa mfurum kohyiaa Dawid ne ne mmarima no wɔ kwan so. Bere a Abigail huu Dawid no, ofi n’afurum so sii fam kotow Dawid, na ɔpaa no kyɛw sɛ mma ɔnyɛ bɔne. Eyi kaa Dawid paa ma ɔkae sɛ: “Nhyira nka [Yehowa, NW] Israel Nyankopɔn a ɔsomaa wo behyiaa me nnɛ yi. Na nhyira nka w’adwempa.”—1 Samuel 25:2-33.
18. Sɛ ɔbarima foforo ka kyerɛ ɔbea warefo sɛ ɔpɛ no a, nhwɛso bɛn na obetumi asusuw ho, na dɛn ntia?
18 Obi foforo a ɔyerenom betumi asuasua no ne Sulamit ababaa no a ɔkɔɔ so dii nokware maa oguanhwɛfo hiani a na wahyɛ no bɔ sɛ ɔbɛware no no. Ɔdɔ a na ɔwɔ ma no no mu kɔɔ so yɛɛ den ɛmfa ho sɛ na ɔhene sikani bi pɛ no no. Bere a ɔreka sɛnea ɔte nka wɔ aberante oguanhwɛfo no ho no, ɔkae sɛ: “Fa me si wo koma so sɛ nsɔanode, fa me si wo basa so sɛ nsɔanode. Na ɔdɔ yɛ den sɛ owu . . . Nsu pii ntumi nnum ɔdɔ, na nsubɔnten ntumi nsram so.” (Nnwom mu Dwom 8:6, 7) Ɛnde, ɛmmra sɛ mmea a wɔpene so sɛ wɔbɛware obi no nso besi wɔn bo sɛ wɔbɛkɔ so adi wɔn kununom nokware na wɔabu wɔn kɛse.
Kyerɛwnsɛm mu Afotu Foforo
19, 20. (a) Dɛn nti na ɛsɛ sɛ ɔyerenom brɛ wɔn ho ase ma wɔn kununom? (b) Nhwɛso pa bɛn na wɔayɛ ama ɔyerenom?
19 Awiei koraa no, susuw nsɛm a kyerɛwsɛm a yɛn adesua yi gyina so no fa ho no ho: ‘Ɔyerenom, mommrɛ mo ho ase mma mo ankasa mo kununom.’ (Efesofo 5:22) Dɛn nti na ahobrɛase a ɛte saa ho hia? Nkyekyɛm a edi hɔ no toa so sɛ: “Efisɛ okunu yɛ ne yere ti, sɛnea Kristo nso yɛ asafo no ti no.” Enti wɔhyɛ ɔyerenom nkuran sɛ: “Sɛnea asafo no brɛ ne ho ase ma Kristo no, saa ara na momma ɔyerenom nyɛ mma wɔn kununom wɔ biribiara mu.”—Efesofo 5:23, 24, 33.
20 Sɛ ɔyerenom betumi adi ahyɛde yi so a, ehia sɛ wosuasua Kristo akyidifo asafo a wɔasra wɔn no nhwɛso. Yɛsrɛ sɛ kenkan 2 Korintofo 11:23-28 na hwɛ nea asafo no muni baako, ɔsomafo Paulo faa mu de dii ne Ti, Yesu Kristo nokware no. Ehia sɛ ɔyerenom ne asafo no nyinaa kɔ so fi nokwaredi mu brɛ wɔn ho ase ma Yesu sɛnea Paulo yɛe no. Ɔyerenom nam wɔn ho ase a wɔbrɛ ma wɔn kununom so yɛ eyi.
21. Dɛn na ebetumi ahyɛ ɔyerenom nkuran ma wɔabrɛ wɔn ho ase ama wɔn kununom?
21 Ɛwom sɛ ebia ɛnnɛ mmea pii ani nnye ho sɛ wɔbɛhyɛ obi ase de, nanso ɔbea nyansafo besusuw ɛso mfaso ho. Sɛ nhwɛso no, wɔ okunu a ɔnyɛ gyidini fam no, brɛ a ɔbea no bɛbrɛ ne ho ase ama ne tiyɛ wɔ biribiara mu, gye sɛ nea ɛbɛto Onyankopɔn mmara nkutoo no, betumi ama wanya mfaso a ɛne sɛ ‘obegye ne kunu nkwa.’ (1 Korintofo 7:13, 16) Bio nso obetumi anya akomatɔyam sɛ Yehowa Nyankopɔn pene ne nneyɛe so, na obehyira no pii sɛ wasuasua ne Dɔba no nhwɛso.
So Wokae?
• Dɛn nti na ebetumi ayɛ den ama ɔyere sɛ obebu ne kunu?
• Dɛn nti na pene a ɔbea bi bɛpene so aware obi no yɛ aniberesɛm saa?
• Nhwɛso bɛn na Yesu yɛ maa ɔyerenom, na mfaso bɛn na ebetumi afi ne nhwɛso akyi a wobedi no mu aba?
[Adesua no ho Nsɛmmisa]
[Mfonini wɔ kratafa 19]
Dɛn nti na gyinae a ɔbea bi besi apene so aware obi no yɛ aniberesɛm saa?
[Mfonini wɔ kratafa 21]
Dɛn na ɔyerenom betumi asua afi Bible mu nnipa te sɛ Abigail hɔ?