Yehowa Asɛm Wɔ Nkwa

Esra Nhoma no Mu Nsɛntitiriw

BIBLE mu nhoma a ɛne Esra no toaa nsɛm a Beresosɛm Nhoma a Ɛto So Abien ka kosii so no so. Ɔsɔfo Esra a ɔne nhoma no kyerɛwfo no de Persia Hene Kores ahyɛde a ɛne sɛ Israelfo nkaefo a na wɔwɔ nnommumfa mu wɔ Babilon nsan nkɔ wɔn kurom no na efii ase. Esra de akwan a ɔfaa so tew wɔn a na wɔde asase no sofo agu wɔn ho fĩ ho no na ewiee n’asɛm no. Ne nyinaa mu no, nhoma no ka nea esii wɔ mfe 70 ntam—efi afe 537 besi afe 467 A.Y.B.—no ho asɛm.

Ná Esra wɔ botae titiriw a enti ɔkyerɛw nhoma no: sɛ ɔbɛkyerɛ sɛnea Yehowa dii Ne bɔhyɛ a ɛne sɛ ɔbɛma Ne nkurɔfo afi Babilon nnommumfa mu aba no so ne nokware som a na wɔbɛsan de asi hɔ wɔ Yerusalem no mu. Enti Esra de n’adwene sii nsɛm a ɛfa saa botae yi ho nkutoo so. Esra nhoma no ka sɛnea wɔsan sii asɔrefie no ne Yehowa som a wɔsan de sii hɔ ɛmfa ho ɔsɔretia ne sintɔ a na Onyankopɔn nkurɔfo wɔ no ho nsɛm. Asɛm no fa yɛn ho efisɛ yɛn nso yɛte bere a wɔde nokware som asi hɔ bio mu. Nnipa resen yuu ba ‘Yehowa bepɔw’ so, na ‘Yehowa anuonyam a wobehu no’ reyɛ ahyɛ asase so nyinaa ma.—Yesaia 2:2, 3; Habakuk 2:14.

WƆSAN SI ASƆREFIE NO

(Esra 1:1–6:22)

Bere a Kores hyɛe sɛ Israelfo a wɔwɔ nnommumfa mu no nsan nkɔ Yerusalem no, nnipa bɛyɛ 50,000 dii Amrado Serubabel, anaa Sesbasar akyi kɔe. Ntɛm ara na wɔn a wɔsan bae no sii afɔremuka wɔ baabi a na esi kan no, na wofii ase bɔɔ afɔre maa Yehowa.

Afe a edi hɔ no, Israelfo no fii ase too Yehowa fie no fapem. Atamfo kɔɔ so twitwaree adansi no mu na awiei koraa no wotumi maa ɔhene no hyɛe sɛ wonnyae adwuma no. Ɛmfa ho sɛ na wɔde wɔn nsa ato adwuma no so no, odiyifo Hagai ne Sakaria nyinaa hyɛɛ nkurɔfo no nkuran sɛ womfi ase nsi asɔrefie no. Ahyɛde a na Persiani Kores adi kan de ama a na wontumi nsesa no ho hu maa atamfo no antumi ammɛn wɔn. Nhwehwɛmu a wɔhyɛɛ da yɛe ma wohuu mmara a Kores hyɛe wɔ “Onyankopɔn fi a ɛwɔ Yerusalem” no ho. (Esra 6:3) Adwuma no kɔɔ so kama kosii sɛ wowiei.

Kyerɛwnsɛm mu Nsɛmmisa a Wɔabua:

1:3-6—So na Israelfo a wɔankɔ wɔn kurom no gyidi ayɛ mmerɛw? Ebetumi aba sɛ adedodowpɛ anaa nokware som ho anisɔ a na ebinom nni nti na wɔampɛ sɛ wɔsan kɔ Yerusalem, nanso na ɛnyɛ saa na asɛm no te wɔ wɔn nyinaa fam. Nea edi kan no, na akwansin 1,000 kwan a wobetwa akɔ Yerusalem no begye asram anan anaa anum. Bio nso, na asase a ada mpan mfe 70 a na wɔbɛkɔ akɔtra so ne adan a na wobesisi no gye honam fam ahoɔden. Enti tebea bɔne bi te sɛ ɔyare, onyin ne abusua mu asɛyɛde ahorow na ɛbɛyɛ sɛ amma wɔansan ankɔ wɔn nkyi no.

2:43—Na henanom ne Netinimfo no? Ná eyinom yɛ  nnipa a womfi Israel a na wɔsom sɛ nkoa anaa asomfo wɔ asɔrefie hɔ. Na wɔn mu bi yɛ Gibeonfo a na wɔwɔ Yosua bere so no asefo ne afoforo a “Dawid ne akunini no de wɔn maa Lewifo som no.”—Esra 8:20.

2:55—Na Salomo nkoa mma no yɛ henanom? Na eyinom yɛ wɔn a wɔnyɛ Israelfo a wɔde hokwan titiriw bi maa wɔn wɔ Yehowa som mu no. Ɛbɛyɛ sɛ na wɔsom sɛ akyerɛwfo wɔ asɔrefie hɔ anaa na wɔwɔ gyinabea sɛ ahwɛfo.

2:61-63—So nnommum a wɔsan bae no nsa kaa Urim ne Tumim a na wɔde pɛ mmuae bi fi Yehowa hɔ no? Na wobetumi de Urim ne Tumim no adi dwuma de agye wɔn a na wɔkyerɛ sɛ wofi asɔfo abusua mu nanso wonnim wɔn abusua anato no nsɛm atom. Esra kyerɛ sɛ na anka wobetumi de eyi adi dwuma. Eyi akyi no, Kyerɛwnsɛm no nka Urim ne Tumim a wɔde dii dwuma saa bere no anaa ɛno akyi ho asɛm wɔ baabiara. Sɛnea Yudafo atetesɛm kyerɛ no, Urim ne Tumim no yerae bere a wɔsɛe asɔrefie no wɔ afe 607 A.Y.B. no.

3:12—Dɛn nti na ‘mmarima a wɔanyinyin a wohuu kan fie’ a wosi maa Yehowa no sui? Na mmarima yi betumi akae sɛnea na asɔrefie a Salomo sii no yɛ fɛ fa. Sɛ na wɔde kan asɔrefie no toto nea na wɔreto ne fapem no ho a, na ‘ɛnyɛ hwee wɔ wɔn ani so.’ (Hagai 2:2, 3) So na wɔn mmɔdenbɔ bɛma asɔrefie no asan anya ne kan anuonyam no? Ɛbɛyɛ sɛ wɔn abam bui ma enti wosui.

3:8-10; 4:23, 24; 6:15, 16—Mfe ahe na wɔde sii asɔrefie no? Wɔtoo asɔrefie no fapem wɔ afe 536 A.Y.B.—‘wɔn sanba afe a ɛto so abien.’ Wɔ Ɔhene Artasasta bere so, afe 522 A.Y.B. mu no, wogyaee adwuma no. Anohyeto no toam ara besii afe 520 A.Y.B., Ɔhene Dario ahenni afe a ɛto so abien. Wowiee asɔrefie no wɔ n’ahenni afe a ɛto so asia, anaa wɔ afe 515 A.Y.B. (Hwɛ adaka a wɔato din “Persia Ahemfo Fi Afe 537 besi 467 A.Y.B.”) Enti wɔde mfe bɛyɛ 20 na esii asɔrefie no wiei.

4:8–6:18—Dɛn nti na wɔde Aram kasa kyerɛw saa nkyekyɛm yi? Nsɛm a ɛwɔ ɔfã yi mu no yɛ nkrataa a na aban no kyerɛw kɔma ahemfo ne ɛho mmuae a ahemfo no de kɔma aban no. Esra hwɛɛ nsɛm a na ɔmanfo ayɛ ho kyerɛwtohɔ wɔ Aram kasa mu, a saa bere no na ɛno ne kasa a wɔde di gua na wɔka wɔ aban mu no so na ɛkyerɛwee. Bible no afã foforo a wɔde Aram kasa kyerɛwee no bi ne Esra 7:12-26, Yeremia 10:11, ne Daniel 2:4b–7:28.

Asuade a Ɛwom Ma Yɛn:

1:2. Nea odiyifo Yesaia hyɛɛ ho nkɔm bɛyɛ mfe 200 a na atwam no baa mu. (Yesaia 44:28) Nkɔmhyɛ a ɛwɔ Onyankopɔn Asɛm mu renni huammɔ da.

 1:3-6. Sɛnea Israelfo binom kaa Babilon no, Yehowa Adansefo pii wɔ hɔ a wɔrentumi nyɛ bere nyinaa som adwuma no anaa wɔrentumi nkɔsom wɔ baabi a mmoa ho hia kɛse no. Nanso wɔboa wɔn a wobetumi ayɛ no na wɔhyɛ wɔn nkuran. Woyi wɔn yam yi ntoboa de trɛw Ahenni asɛnka ne asuafoyɛ adwuma no nso mu.

3:1-6. Ɔsram a ɛto so ason wɔ afe 537 A.Y.B. mu (Tishri, a ɛne nnɛ September/October) dui no, anokwafo a wɔsan bae no bɔɔ afɔre a edi kan. Babilonfo no hyɛn Yerusalem wɔ ɔsram a ɛto so anum mu (Ab, a ɛne nnɛ July/August) wɔ afe 607 A.Y.B. mu. Na wɔ asram abien akyi no, wɔsɛee kurow no pasaa. (2 Ahene 25:8-17, 22-26) Sɛnea na wɔahyɛ ho nkɔm no, na mfe 70 a Yerusalem bɛda mpan no bɛba awiei wɔ bere wɔahyɛ mu pɛpɛɛpɛ. (Yeremia 25:11; 29:10) Biribiara a Yehowa Asɛm hyɛ ho nkɔm no bam bere nyinaa.

4:1-3. Nkaefo anokwafo no powee sɛ wɔne wɔn a wɔsom atoro anyame no bɛyɛ nyamesom mu apam. (Exodus 20:5; 34:12) Yehowa asomfo a wɔwɔ hɔ nnɛ mfa wɔn ho nhyɛ gyidi afrafra mu.

5:1-7; 6:1-12. Yehowa betumi adan nneɛma ani ama asi ne nkurɔfo yiye.

6:14, 22. Nsi a yɛde bɛyɛ Yehowa adwuma no bɛma yɛanya n’anim dom ne mfaso.

6:21. Bere a Samariafo a na wɔte Yudafo asase so ne wɔn a wɔsan baa wɔn nkyi a na wɔde wɔn ho ahyɛ abosonsom mu no huu sɛnea Yehowa adwuma renya nkɔso no, ɛkaa wɔn ma wɔyɛɛ nsakrae a ehia wɔ wɔn abrabɔ mu. So ɛnsɛ sɛ yɛde anigye yɛ adwuma a Onyankopɔn de ahyɛ yɛn nsa, a Ahenni asɛmpaka adwuma no ka ho no?

ESRA BA YERUSALEM

(Esra 7:1–10:44)

Ná mfe 50 atwam fi bere a wɔhyɛɛ ase sɛ wɔresan asi Yehowa fie no. Ná ɛyɛ afe 468 A.Y.B. Esra ne Onyankopɔn nkurɔfo a na wɔaka Babilon no fii hɔ kɔɔ Yerusalem. Ɔde sika a na ɔmanfo ayi no nso kɔe. Dɛn na okohui?

Mmapɔmma no ka kyerɛɛ Esra sɛ: “Israel man ne asɔfo ne Lewifo no ntew wɔn ho mfii nsase so aman . . . akyide ho.” Bio nso, “na mmapɔmma ne amampanyin no na edi mmarato yi mu kan.” (Esra 9:1, 2) Esra ho dwiriw no. Wɔhyɛ no nkuran sɛ ‘ɔmma ne ho nyɛ den na ɔnyɛ ho biribi.’ (Esra 10:4) Esra hwehwɛɛ kwan a ɔbɛfa so asiesie nneɛma, na nkurɔfo no yii wɔn yam tiee no.

Kyerɛwnsɛm mu Nsɛmmisa a Wɔabua:

7:1, 7, 11—So saa nkyekyɛm yi nyinaa fa Artasasta a ɔma wogyae adansi adwuma no ho? Dabi. Artasasta yɛ din anaa abodin a Persiafo ahemfo baanu na na wokura. Ná wɔn mu baako ne Bardiya anaa Guamata, a ɔhyɛ ma wogyae asɔrefie no ho adwumayɛ wɔ afe 522 A.Y.B. no. Artasasta a na ɔwɔ hɔ bere a Esra baa Yerusalem no ne Artasasta Longimanus.

7:28–8:20—Dɛn nti na na Yudafo pii a wɔwɔ Babilon no mpɛ sɛ wɔne Esra bɛkɔ Yerusalem? Ɛwom sɛ na Yudafo a wodii kan no akɔtra wɔn kurom bɛboro mfe 60 de, nanso na nnipa a wɔte Yerusalem no sua koraa. Ná Yerusalem a wɔbɛsan akɔ no kyerɛ sɛ wɔrekofi bra ase wɔ tebea a ɛyɛ den na ɛyɛ hu mu. Sɛ Yudafo a na nneɛma rekɔ yiye ma wɔn wɔ Babilon no hwɛ a, na tebea a ɛwɔ Yerusalem saa bere no ntumi mmoa wɔn ɔkwan biara so. Ɛnsɛ sɛ yebu yɛn ani gu sɛnea na akwantu no yɛ hu fa no so. Ná ɛsɛ sɛ wɔn a wɔbɛsan aba no nya Yehowa mu gyidi a ɛyɛ den, wɔyɛ nsi wɔ  nokware som mu na wonya akokoduru de kɔ Yerusalem. Na mpo Yehowa nsa a na ɛwɔ Esra so no na ɛhyɛɛ no den. Bere a Esra hyɛɛ wɔn nkuran no, mmusua 1,500—a ebia wɔn dodow si 6,000—ne no kɔe. Ɛno akyi no, akwan foforo a Esra faa so no maa Lewifo 38 ne Netinimfo 220 nso bɛkaa ne ho.

9:1, 2—Aniberesɛm bɛn na na ɛwɔ asase no so nnipa a na wɔne wɔn di ayeware no mu? Ná ɔman a wɔasan agye wɔn yi na wɔbɛkora nokware som so akosi sɛ Mesia no bɛba. Ná ayeware a wɔne nnipa afoforo bedi no betumi de ɔhaw paa aba nokware som mu. Esiane sɛ na ebinom ne nnipa a wɔsom abosom adi ayeware nti, na ebetumi aba sɛ ɛde nkakrankakra bɛka ɔman mũ no nyinaa ma wɔakɔsom abosom. Ná ebetumi ama nokware som ayera koraa afi asase no so. Ende na henanom nkyɛn na Mesia no bɛba? Ɛnyɛ nwonwa sɛ Esra ho dwiriw no wɔ nea na asi no ho!

10:3, 44—Dɛn nti na wɔpam mmea no ne wɔn mma nyinaa? Sɛ wɔampam mmofra no a, anka ɛrenyɛ den koraa sɛ wɔn yerenom a wɔapam wɔn no bɛsan aba wɔn mma no nkyɛn. Bio nso, mmea no na na wɔtaa hwɛ mmofra no.

Asuade a Ɛwom Ma Yɛn:

7:10. Esra yɛɛ nhwɛso pa maa yɛn sɛ obi a n’ani gye Onyankopɔn Asɛm sua ho na onim nkyerɛkyerɛ. Osiesiee ne koma sɛ ɔbɛhwehwɛ Yehowa Mmara mu. Bere a Esra hwehwɛɛ mu no, ɔde n’adwene nyinaa sii nea na Yehowa reka no so. Esra de nea osuae no bɔɔ ne bra na ɔbɔɔ mmɔden de kyerɛkyerɛɛ afoforo.

7:13. Yehowa pɛ sɛ n’asomfo yi wɔn yam som no.

7:27, 28; 8:21-23. Esra de anuonyamhyɛ maa Yehowa, na ofi komam de n’adesrɛ too n’anim ansa na ɔretu kwantenten a ɛso yɛ hu no akɔ Yerusalem, na esiane sɛ na ɔpɛ sɛ ɔhyɛ Onyankopɔn anuonyam nti, ɔde ne nkwa too asiane mu. Ɔnam eyi so ayɛ nhwɛso pa ama yɛn.

9:2. Ɛsɛ sɛ yɛfa afotusɛm a ese yɛnware “Awurade mu nkutoo” no aniberesɛm.—1 Korintofo 7:39.

9:14, 15. Fekubɔne betumi ama yɛahwere Yehowa anim dom.

10:2-12, 44. Nnipa a na wɔaware ahɔho no fi ahobrɛase mu sakrae na wosiesiee mfomso a na wɔadi no. Su a wɔdaa no adi ne wɔn nneyɛe yɛ nhwɛso pa ma yɛn.

Yehowa Di Ne Bɔhyɛ So

Hwɛ sɛnea Esra nhoma no som bo ma yɛn! Yehowa maa bɔ a na wahyɛ sɛ obeyi ne nkurɔfo afi Babilon nkoasom mu ma wɔasan de nokware som asi hɔ wɔ Yerusalem no baa mu wɔ bere ano pɛpɛɛpɛ. So eyi nhyɛ gyidi a yɛwɔ wɔ Yehowa ne ne bɔhyɛ ahorow mu no mu den?

Susuw nhwɛso a ɛwɔ Esra nhoma no mu ho hwɛ. Ahofama a Esra ne nkaefo a wɔsan bae no daa no adi wɔ Onyankopɔn som ho no yɛ nhwɛso pa. Wɔboae ma wɔsan de nokware som sii hɔ wɔ Yerusalem. Nhoma yi ma yehu gyidi a na amanfrafo a wosuro Nyankopɔn no wɔ ne ahobrɛase a abɔnefo a wɔasakra no daa no adi no. Nokwarem no, Esra nhoma a efi honhom mu no de adanse a emu da hɔ ma ma yehu sɛ “Onyankopɔn asɛm wɔ nkwa, na tumi wɔ mu.”—Hebrifo 4:12.

[Nsɛm a wɔahyehyɛ/Mfonini wɔ kratafa 18]

Persia Ahemfo Fi Afe 537 Besi 467 A.Y.B.

Kores Ɔkɛseɛ (Esra 1:1) wui wɔ afe 530 A.Y.B.

Cambyses, anaa Ahasweros (Esra 4:6) 530-522 A.Y.B.

Artasasta—Bardiya (Esra 4:7) 522 A.Y.B. (Odii ade

anaa Gaumata asram ason pɛ akyi no,

wokum no)

Dario I (Esra 4:24) 522-486 A.Y.B.

Xerxes, anaa Ahasweros * 486-475 A.Y.B.(Ɔne

Dario I boom dii ade fi

496-486 A.Y.B.)

Artasasta Longimanus (Esra 7:1) 475-424 A.Y.B.

[Ase hɔ asɛm]

[Mfonini wɔ kratafa 18]

Ahasweros

[Mfonini wɔ kratafa 17]

Kores

[Mfonini wɔ kratafa 17]

Anwenne: Photograph taken by courtesy of the British Museum

[Mfonini wɔ kratafa 17]

Wɔakyerɛw Kores ahyɛde a ese nnommum no nsan nkɔ wɔn kurom no agu anwenne yi ho

[Mfonini wɔ kratafa 20]

So wunim nea ɛmaa Esra yɛɛ ɔkyerɛkyerɛfo a otu mpɔn no?