So Nimdeɛ a Ɛwɔ Hɔ no Boro Yɛn So?

Na asɛmpatrɛwfo awarefo bi tete Afrika Atɔe fam mpoano bi rehwɛ ɔsram a apae wɔ wim. Ɔbarima no bisae sɛ: “Dɛn na nnipa nim fa ɔsram no ho, na dɛn na ɛwɔ ho a ɛsɛ sɛ yehu?”

Ɔbea no buae sɛ: “Fa no sɛ sɛ yetumi hu asase sɛ ɛresen akɔ sɛnea yehu sɛ ɔsram rekɔ yi a, ɛnde na nimdeɛ ahe na nnipa wɔ dedaw, na dɛn bio na ɛsɛ sɛ yesua? Na wo de susuw ho hwɛ! Ɛnyɛ asase nko na etwa owia ho hyia, mmom no yɛn okyinnsoromma kuw no nyinaa di kyinhyia. Eyi kyerɛ sɛ ebia anka yɛrensan mma beae koro yi ara wɔ amansan yi mu. Nokwasɛm ne sɛ, owia, ɔsram, ne nsoromma a ɛwɔ wim no na ɛma yehu baabi a yɛwɔ seesei. Yɛwɔ nneɛma ahorow bi ho nimdeɛ pii, nanso sɛ yɛbɛka a, yennim faako a yɛwɔ mpo!”

SAA nsɛm no fa nokwasɛm atitiriw bi ho. Ɛkame ayɛ sɛ yɛwɔ pii sua. Nokwarem no, yɛn mu biara sua ade foforo da biara. Nanso, ɛmfa ho nneɛma dodow a yesua no, ɛte sɛ nea yentumi nsua biribiara a yɛpɛ sɛ yesua no nwie.

Nokwarem no, sɛ mmɔden a yɛbɔ sɛ yebehu nneɛma foforo no da nkyɛn a, yɛanya akwan pii a yebetumi afa so de akora nimdeɛ so. Ɛdenam nyansahu mu nimdeɛ so no, nimdeɛ a adesamma aboaboa ano no ayɛ kɛse. Seesei kɔmputa disk a wɔkora nsɛm wɔ so no tumi fa nsɛm pii ara ma gye sɛ wɔde akontaahyɛde ahorow na ɛkyerɛ nsɛm dodow a ɛbɛkɔ so. Wobetumi akora nsɛm pii a enni ano wɔ CD-ROM biako pɛ so; wɔkyerɛ sɛ ebetumi afa nsɛmfua ɔpepem pii. Na CD-ROM so nsɛm mmɔho ason bɛkɔ DVD biako pɛ so, na nea ɛsen saa wɔ hɔ.

Yɛrentumi nte akwan a nnipa fa so di nkitaho nnɛ no ase nwie ara da. Mfiri a wɔde tintim nhoma yɛ adwuma ntɛmntɛm de tintim atesɛm nkrataa, nsɛmma nhoma, ne nhoma ahorow. Sɛ obi pɛ biribi ho asɛm wɔ intanɛt so a, obetumi anya ɛho nsɛm pii a enni ano wɔ Kɔmputa so a ɔremmrɛ koraa. Wɔnam akwan a ɛtete saa so ma nsɛm trɛw ntɛmntɛm sen nea onipa biara adwene betumi akyere. Ɛtɔ mmere bi a wɔde nsɛm a ɛdɔɔso saa no toto po ho ka sɛ ɛdɔɔso araa ma, sɛnea yɛbɛka no no, ɛsɛ sɛ yesua sɛ yɛbɛguare wom sen sɛ yɛbɛbɔ mmɔden sɛ yɛbɛnom po no nyinaa. Nimdeɛ a ɛdɔɔso saa no hyɛ yɛn ma yeyiyi nsɛm mu.

 Nea enti nso a ɛsɛ sɛ yeyiyi nsɛm mu ne sɛ ɛnyɛ bere nyinaa na mfaso wɔ nsɛm a yɛn nsa ka no so. Nokwarem no, emu bi ho nhia, na mfaso nni so sɛ yebehu. Kae sɛ, nimdeɛ fa biribi ho, sɛ ɛyɛ asɛmpa anaa asɛmmɔne, sɛ mfaso wɔ so anaa mfaso nni so. Nea ɛsɛe asɛm no koraa ne sɛ, nsɛm bi a nnipa pii bu no sɛ nokwasɛm no ntaa nyɛ nokware. Mpɛn pii no atumfoɔ a wobu wɔn no taa ka nsɛm bi ma akyiri yi ɛbɛda adi sɛ ɛyɛ nkontomposɛm! Sɛ nhwɛso no, wo de susuw Efeso ɔman kyerɛwfo, a na wobu no sɛ otumfoɔ nimdefo ankasa no ho hwɛ. Ɔkae sɛ: “Ɔdesani bɛn ara na onnim sɛ Efesofo kurow na ɛhwɛ Artemi ɔkɛse no ne ohoni a ɛtew fii soro no asɔredan so?” (Asomafo Nnwuma 19:35, 36) Ɛwom sɛ ɛte sɛ nea na nnipa nyinaa nim asɛm yi,—na pii mpo bɛka sɛ ɛyɛ nokwasɛm turodoo—nanso na ɛnyɛ nokware sɛ ohoni no fi soro na ɛbae. Ɛfata koraa sɛ Kyerɛw Kronkron Bible no bɔ Kristofo kɔkɔ sɛ wɔnhwɛ wɔn ho yiye wɔ nea “wodi atoro frɛ no ‘nimdeɛ’” no ho.—1 Timoteo 6:20.

Ntease titiriw bi nti a ɛsɛ sɛ yɛyɛ nyiyim wɔ nimdeɛ ho ne sɛ yɛn nkwa a yɛwɔ no yɛ tiaa. Sɛnea wo mfe te biara no, akyinnye biara nni ho sɛ nimdeɛ ahorow pii wɔ hɔ a anka wobɛpɛ sɛ wohwehwɛ mu, nanso wuhu sɛ worennyin nkyɛ na woatumi ayɛ saa.

So ɔhaw titiriw yi bɛsesa da bi? So nimdeɛ bi bɛba a ebetumi ama nnipa anyin akyɛ, anaasɛ yɛbɛtra ase daa mpo? So ebetumi aba sɛ nimdeɛ a ɛte saa no wɔ hɔ dedaw? Sɛ ɛte saa a, so obiara nsa betumi aka saa nimdeɛ no? So da bi bɛba a nimdeɛ nyinaa bɛyɛ nokware sɛnea yɛpɛ sɛ ɛyɛ no? Asɛmpatrɛwfo awarefo a yɛkaa wɔn ho asɛm mfiase no anya asɛmmisa no ho mmuae a ɛma akomatɔyam, wo nso wubetumi anya. Yɛsrɛ sɛ kenkan asɛm a edi hɔ a ɛbɛma woanya hokwan a wode benya nimdeɛ daa no.