Nhyira Ne Wɔn A Wɔhyɛ Onyankopɔn Anuonyam
Nhyira Ne Wɔn A Wɔhyɛ Onyankopɔn Anuonyam
‘Wɔbɛkotow w’anim, Yehowa, na wɔbɛhyɛ wo din anuonyam.’—DWOM 86:9.
1. Dɛn nti na yetumi hyɛ Onyankopɔn anuonyam wɔ akwan a ɛboro nea abɔde a nkwa nnim tumi yɛ so?
ƐFATA sɛ Yehowa abɔde nyinaa yi no ayɛ. Bere a n’abɔde a nkwa nnim hyɛ no anuonyam a ɔkasa nnim no, yɛn nnipa de yetumi susuw nneɛma ho, te nsɛm ase, kyerɛ nneɛma ho anisɔ, na yɛsom nso. Ɛnde, ɛyɛ yɛn na odwontofo no ka kyerɛ yɛn sɛ: “Asase nyinaa, munni ahurusi mmɔ ose mma Onyankopɔn, monto dwom mma ne din anuonyam, monhyɛ no anuonyam nyi no ayɛ.”—Dwom 66:1, 2.
2. Henanom na wɔagye ahyɛde a ɛne sɛ wɔbɛhyɛ Onyankopɔn anuonyam no atom, na dɛn ntia?
2 Adesamma mu nnipa dodow no ara nnye ntom sɛ Onyankopɔn wɔ hɔ, na saa ara nso na wɔnhyɛ no anuonyam. Nanso, wɔ nsase 235 so no, Yehowa Adansefo bɛboro ɔpepem nsia da no adi sɛ wɔnam Onyankopɔn nneɛma a wayɛ so hu ne ‘su horow a wonhu’ no, na ‘wɔate’ adanse a ɔkasa nnim a abɔde di no. (Romafo 1:20; Dwom 19:2, 3) Wɔnam Bible no a wɔasua so nso abehu Yehowa, na wɔanya ne ho dɔ. Dwom 86:9, 10 ka siei sɛ: “Amanaman a woyɛe nyinaa bɛba abɛkotow w’anim, [Yehowa, NW] na wɔabɛhyɛ wo din anuonyam. Na woyɛ kɛse, na woyɛ anwonwade, wo nkutoo ne Nyankopɔn.”
3. Ɔkwan bɛn so na “nnipakuw kɛse” no som “awia ne anadwo”?
3 Saa ara nso na Adiyisɛm 7:9, 15 ka “nnipakuw kɛse” bi ho asɛm sɛ “wɔsom [Onyankopɔn] awia ne anadwo n’asɔredan mu.” Ɛnyɛ sɛ Onyankopɔn hwehwɛ sɛ n’asomfo beyi no ayɛ a wonnye wɔn ahome, na mmom n’asomfo wɔ asase so baabiara a wɔresom no. Enti bere a ade asa wɔ aman bi so no, na Onyankopɔn asomfo a wɔwɔ aman foforo so nso reyɛ asɛnka adwuma no denneennen. Enti yebetumi aka sɛ ade nsa wɔn a wɔhyɛ Yehowa anuonyam no da. Ɛrenkyɛ “nea ɛhome nyinaa” bɛma wɔn nne so ayi Yehowa ayɛ. (Dwom 150:6) Nanso, seesei, dɛn na yɛn mu biara betumi ayɛ de ahyɛ Onyankopɔn anuonyam? Nsɛnnennen bɛn na yebetumi ahyia? Na nhyira bɛn na ɛwɔ hɔ ma wɔn a wɔhyɛ Onyankopɔn anuonyam no? Nea ɛbɛyɛ na yɛanya ho mmuae no, momma yensusuw Bible mu kyerɛwtohɔ a ɛfa Israelfo a wofi Gad abusua mu no ho.
Ɔhaw Bi a Ɛsɔree Tete Mmere Mu
4. Ɔhaw bɛn na Gad abusua no hyiae?
4 Ansa na Israelfo redu Bɔhyɛ Asase no so no, Gad abusua no mufo srɛe sɛ wɔmma wɔntra Yordan apuei fam wɔ baabi a wobetumi ahwɛ wɔn anantwi no. (Numeri 32:1-5) Na ɛhɔ a wɔbɛtra no bɛkyerɛ sɛ ɛsɛ sɛ wogyina ɔhaw a emu yɛ den ano. Na Yordan Subon no bɛyɛ ahobammɔ ama abusua a wɔbɛtra atɔe fam no—ade a na ɛbɛbɔ wɔn ho ban afi asraafo a wɔbɛtow ahyɛ wɔn so ho. (Yosua 3:13-17) Nanso, ɛdefa nsase a na ɛwɔ Yordan apuei fam ho no, The Historical Geography of the Holy Land, (Asase Kronkron no Ho Nsɛm Ho Abakɔsɛm) a George Adam Smith, kyerɛwee no ka sɛ: “[Nsase] no nyinaa yɛ tɛtrɛɛ, na ɛkame ayɛ sɛ na biribiara nni hɔ a ɛbɛbɔ wɔn ho ban wɔ Arabia asase tɛtrɛɛ no so. Esiane eyi nti, atutrafo a ɔkɔm de wɔn tow hyɛɛ wɔn so bere nyinaa. Ebinom de wɔn mmoa baa adidi wɔ hɔ bɛhaw wɔn afe biara.”
5. Dɛn na Yakob hyɛɛ Gad asefo no nkuran sɛ wɔnyɛ bere a wɔatow ahyɛ wɔn so no?
5 Na Gad abusua no bɛyɛ dɛn agyina ɔhaw a ɛte saa a wɔde bɛba wɔn so bere nyinaa no ano? Mfehaha pii ansa na wɔn nana Yakob rewu no, ɔka siei sɛ: “Gad, asafo bi retoa no, na ɔno nso atoa wɔn aka wɔn nantin.” (Genesis 49:19) Sɛ wofa asɛm no sɛnea ɛte no ara a, ɛte sɛ nea ɛyɛ hu. Nanso, nokwarem no, na ɛyɛ ahyɛde a ɛkyerɛ sɛ ɛsɛ sɛ Gadfo no ko tia wɔn atamfo no. Yakob maa Gadfo no awerɛhyem sɛ sɛ wɔko tia a, wɔn atamfo no de animguase beguan, na Gadfo no atiw wɔn asɛe wɔn koraa.
Ɔhaw a Yehyia Wɔ Yɛn Som Mu Nnɛ
6, 7. Ɔkwan bɛn so na Kristofo tebea a wɔwom nnɛ ne Gad abusua no de di nsɛ?
6 Kristofo a wɔwɔ hɔ nnɛ nso hyia Satan nhyehyɛe yi mu nhyɛso ne ɔhaw te sɛ Gad abusua no. Biribiara nni hɔ a ɛbɔ yɛn ho ban anwonwakwan so fi ɔhaw yi ho. (Hiob 1:10-12) Ɛsɛ sɛ yɛn mu pii gyina nhyɛso a ɛwɔ sukuu mu, yɛn ho a yɛbɛhwɛ, ne yɛn mma a yɛbɛtete wɔn ano. Nea ɛnsɛ sɛ yebu yɛn ani gu so nso ne ɔhaw a yɛn ankasa hyia no. Ɛsɛ sɛ ebinom gyina “ɔhonam mu nsɔe” a ebi yɛ dɛmdi a ɛhaw adwene anaa yare a emu yɛ den ano. (2 Korintofo 12:7-10) Ebinom nso te nka sɛ wɔn ho nni mfaso. Ebia onyin mu “nna bɔne” anaa ɔhaw bɛma Kristofo a wɔanyinyin no ntumi nsom Yehowa sɛnea na wɔyɛ, bere a na wɔwɔ ahoɔden no.—Ɔsɛnkafo 12:1.
7 Ɔsomafo Paulo nso kae yɛn sɛ ‘yɛne ahonhommɔne a ɛwɔ ɔsoro hɔnom na anya.’ (Efesofo 6:12) Yehu “wiase honhom” no, atuatew honhom ne ɔbrasɛe a Satan ne n’adaemone hyɛ ho nkuran no bere nyinaa. (1 Korintofo 2:12; Efesofo 2:2, 3) Te sɛ Lot a na osuro Onyankopɔn no, ɛnnɛ nneɛma bɔne a nnipa a yɛne wɔn te ka ho asɛm ne nea wɔyɛ no betumi ahaw yɛn. (2 Petro 2:7) Satan tow hyɛ yɛn so tee nso. Satan ne wɔn a wɔasra wɔn a wɔaka “a wodi Nyankopɔn ahyɛde so na wokura Yesu Kristo adanse no” reko. (Adiyisɛm 12:17) Satan de sɔhwɛ ba Yesu “nguan foforo” no so denam bara a wɔbara wɔn adwuma no ne ɔtaa a wɔde ba wɔn so no so.—Yohane 10:16.
Ɛsɛ sɛ Yegyae Yɛn Ho Mu Anaa Ɛsɛ sɛ Yɛko Tia?
8. Dɛn na ɛsɛ sɛ yɛyɛ wɔ Satan nhyɛso ho, na dɛn ntia?
8 Dɛn na ɛsɛ sɛ yɛyɛ wɔ Satan nhyɛso ho? Ɛsɛ sɛ yɛyɛ den wɔ Onyankopɔn som mu na yɛfa Onyankopɔn akwankyerɛ so ko tia te sɛ tete Gad abusua no. Awerɛhosɛm ne sɛ, esiane asetra mu nhyɛso nti, ebinom afi ase regyae wɔn ho mu na wobu wɔn ani gu asɛyɛde a wɔwɔ wɔ Onyankopɔn som mu no so. (Mateo 13:20-22) Nea Ɔdansefo bi ka faa nea nti a anuanom ntaa mma nhyiam wɔ n’asafo mu ho ne sɛ: “Anuanom no rebrɛ ankasa. Wɔn nyinaa ahaw paa.” Ampa, nneɛma pii na ɛma nnipa brɛ nnɛ. Enti, ɛnyɛ den koraa sɛ yebebu Onyankopɔn som sɛ ɛyɛ ɔhaw foforo, asɛyɛde bi a emu yɛ duru. Nanso, so ɛno yɛ adwempa anaa adwene a ɛteɛ?
9. Ɔkwan bɛn so na Kristo kɔndua a yɛbɛfa ato yɛn ho so no bɛma yɛanya ɔhome?
9 Susuw nea Yesu ka kyerɛɛ nnipakuw a na wɔwɔ ne bere so a na asetra mu nhyɛso ama wɔabrɛ saa ara no ho hwɛ: “Mo a moayɛ adwuma abrɛ na wɔasoa mo nnosoa nyinaa, mommra me nkyɛn, na mɛma moahome.” So Yesu kyerɛe sɛ, sɛ obi brɛ ɔsom a ɔde ma Onyankopɔn no ase a obenya ɔhome anaa? Nea ɛne eyi bɔ abira no, Yesu kae sɛ: “Momfa me kɔndua nto mo ho so, na munsua me, sɛ midwo na mebrɛ me ho ase koma mu; na mubenya ɔhome ama mo kra.” Kɔndua yɛ dua anaa dade bi a nnipa anaa aboa tumi de soa nneɛma a emu yɛ duru. Ɛnde, adɛn nti na obi bɛpɛ sɛ ɔfa kɔndua a ɛte saa to ne ho so? So ‘wɔnsoaa yɛn nnesoa’ dedaw? Yiw, nanso Hela nkyerɛwee no nso betumi akyerɛ sɛ: “Mone me mmɛhyɛ me kɔndua ase.” Wode susuw ho hwɛ: Yesu ka sɛ ɔbɛboa yɛn ma yɛasoa yɛn adesoa! Ɛnyɛ yɛn ankasa ahoɔden na ɛsɛ sɛ yɛde soa.—Mateo 9:36; 11:28, 29; 2 Korintofo 4:7.
10. Dɛn na efi mmɔden a yɛbɔ sɛ yɛbɛhyɛ Onyankopɔn anuonyam no mu ba?
10 Sɛ yegye kɔndua a Yesu de ma yɛn sɛ n’asuafo no to yɛn ho so a, na yɛreko atia Satan. Yakobo 4:7 ma yɛn awerɛhyem sɛ, “Munsiw ɔbonsam kwan, na obeguan afi mo nkyɛn.” Eyi nkyerɛ sɛ ne yɛ yɛ mmerɛw. Onyankopɔn a yɛbɛsom no no gye mmɔdenbɔ kɛse. (Luka 13:24) Nanso Bible no hyɛ yɛn bɔ wɔ Dwom 126:5 sɛ: “Wɔn a wɔde nusu gu de ahurusi betwa.” Yiw, Onyankopɔn a yɛsom no no nyɛ bonniayɛ. Ɔyɛ “wɔn a wɔhwehwɛ n’akyi kwan no katuafo,” na ohyira wɔn a wɔhyɛ no anuonyam.—Hebrifo 11:6.
Anuonyam a Yɛbɛhyɛ Onyankopɔn sɛ Ahenni Asɛnkafo
11. Ɔkwan bɛn so na asɛnka adwuma no bɔ yɛn ho ban fi Satan nhyɛso ho?
11 Yesu hyɛe sɛ: “Enti monkɔ nkɔyɛ amanaman nyinaa m’asuafo.” Asɛnka adwuma no ne ɔkwan titiriw a yebetumi afa so abɔ “ayeyi afɔre” ama Onyankopɔn. (Mateo 28:19; Hebrifo 13:15) Yɛn ‘anan a yɛde asomdwoe asɛmpa no ho ahodaso bɛhyehyɛ’ no yɛ ade a ɛho hia wɔ yɛn “akode no nyinaa” mu—yɛn ho ban a yɛbɛbɔ afi Satan nhyɛso ho. (Efesofo 6:11-15) Onyankopɔn a yebeyi no ayɛ wɔ asɛnka mu no yɛ ɔkwan pa a yebetumi afa so ahyɛ yɛn gyidi den. (2 Korintofo 4:13) Ɛboa yɛn ma yeyi yɛn adwene fi nsusuwii a ɛnteɛ so. (Filipifo 4:8) Asɛnka a yɛbɛkɔ no bɛma yɛne yɛn mfɛfo asomfo anya fekubɔ a ɛhyɛ den.
12, 13. Ɔkwan bɛn so na asɛnka adwuma a mmusua bɛyɛ no daa no betumi aboa wɔn? Kyerɛkyerɛ mu.
12 Asɛnka adwuma no nso betumi ayɛ adwuma pa ama abusua no. Ɛwom, mmofra hia agodie a ɛfata. Nanso, ɛnsɛ sɛ bere a abusua no de yɛ asɛnka adwuma no yɛ mfonoe. Sɛ awofo tete wɔn mma ma wohu sɛnea wɔbɛyɛ wɔn asɛnka adwuma yiye a wɔn ani begye paa. So mmofra ani nnye nneɛma a wɔyɛ no yiye ho? Sɛ awofo yɛ wɔn ade wɔ ɔkwan a ɛfata so, na wɔanhwehwɛ pii amfi mmofra hɔ a, wobetumi aboa wɔn ma wɔanya anigye wɔ asɛnka mu.—Genesis 33:13, 14.
13 Bio nso, abusua a wɔbom yi Onyankopɔn ayɛ no abusuabɔ mu tumi yɛ den. Susuw onuawa bi a ne kunu a ɔnyɛ gyidini gyaw ɔne ne mma baanum hɔ no ho hwɛ. Ɛno nti na ɛsɛ sɛ ɔkɔhwehwɛ adwuma yɛ na ɔhwɛ ne mma nso ka ho. So ɔhaw no hyɛɛ no so dodo ma obuu n’ani guu ne mma a ɔbɛboa wɔn ma wɔasom Onyankopɔn no so? Ɔka sɛ: “Mede nsi suaa Bible no ne Bible ho nhoma ahorow, na mebɔɔ mmɔden sɛ mede nea masua no bɛyɛ adwuma. Mede mmofra no kɔɔ asafo nhyiam ne afie afie asɛnka daa. Dɛn na efii me mmɔdenbɔ no mu bae? Me mma baanum no nyinaa abɔ asu.” Asɛnka adwuma no a wode wo ho behyem kɛse no betumi aboa wo wɔ mmɔden a wobɔ sɛ wobɛtete wo mma wɔ “[Yehowa, NW] kasakyerɛ ne nyansakyerɛ mu” no mu.—Efesofo 6:4.
14. (a) Ɔkwan bɛn so na mmofra betumi ayi Onyankopɔn ayɛ wɔ sukuu mu? (b) Dɛn na ebetumi aboa mmofra na wɔn ani ‘anwu asɛmpa no ho’?
14 Mo mmofra, sɛ mote ɔman bi a mmara ma ho kwan ma moka ɔsom ho asɛm wɔ baguam a, so ɛyɛ a mudi adanse wɔ sukuu mu de hyɛ Onyankopɔn anuonyam anaa moma nnipa ho suro twe mo san? (Mmebusɛm 29:25) Ɔdansefo bi a wadi mfe 13 a ɔwɔ Puerto Rico kyerɛwee sɛ: “Ɛnyɛɛ m’aniwu da sɛ mɛka asɛm no wɔ sukuu mu efisɛ minim sɛ eyi ne nokware no. Bere nyinaa mema me nsa so wɔ sukuu ka nea masua wɔ Bible no mu ho asɛm. Sɛ minya bere a mekɔ sukuu nhomakorabea kɔkenkan Young People Ask (Mmofra Bisa Sɛ) nhoma no.” * So Yehowa ahyira ne mmɔdenbɔ no so? Abeawa no ka sɛ: “Ɛtɔ da bi a me mfɛfo sukuufo bisa me nsɛm na wɔka sɛ memma wɔn nhoma no bi.” Sɛ ɛyɛ den ma wo sɛ wobɛyɛ eyi a, ebia ɛsɛ sɛ wode nsi yɛ kokoam adesua na ama woasɔ “nea Onyankopɔn pɛ a eye, na ɛsɔ ani, na ɛyɛ pɛ no ahwɛ.” (Romafo 12:2) Sɛ wubegye di sɛ nea woasua no yɛ nokware a, w’ani “nwu asɛmpa no ho” da.—Romafo 1:16.
Ɔsom Hokwan Bi Bue
15, 16. “Ɔpon kɛse a emu adwumayɛ bɛsow aba” bɛn na Kristofo binom de wɔn ho ahyem, na nhyira bɛn na afi mu aba?
15 Ɔsomafo Paulo kyerɛwee sɛ wɔabue “ɔpon kɛse a emu adwumayɛ bɛsow aba” ama no. (1 Korintofo 16:9) So wo tebea bɛma wo kwan ma woafi adwuma foforo ase? Sɛ nhwɛso no, sɛ wobɛyɛ daa akwampae anaa akwampaefo boafo adwuma a, ɛhwehwɛ sɛ wode nnɔnhwerew 70 anaa 50 yɛ asɛnka adwuma no ɔsram biara. Ɛda adi sɛ, mfɛfo Kristofo ani gye nokwaredi a akwampaefo de yɛ wɔn som adwuma no ho. Nanso bere pii a wɔde yɛ asɛnka adwuma no mma wɔnte nka sɛ wɔkorɔn sen wɔn nuanom mmarima ne mmea a aka no. Mmom no, wonya su a Yesu hyɛɛ ho nkuran no: “Yɛyɛ nkoa a mfaso nni yɛn ho; yɛayɛ nea ɛsɛ sɛ yɛyɛ.”—Luka 17:10.
16 Akwampae adwuma no hwehwɛ sɛ wobɛhyɛ wo ho so, ahyehyɛ wo bere yiye, na woanya ɔpɛ sɛ wode nneɛma bɛbɔ afɔre. Nanso, emu nhyira yɛ nea ɛsɔ ani. Ɔkwampaefo kumaa bi a wɔfrɛ no Tamika ka sɛ: “Sɛ wutumi kura Onyankopɔn Asɛm a ɛyɛ nokware no mu pɛpɛɛpɛ a, ɛyɛ nhyira ankasa.Sɛ woyɛ akwampae adwuma a, wotaa de Bible no yɛ adwuma. Seesei sɛ mekɔ afie afie asɛnka a, mitumi hu kyerɛw nsɛm a ɛbɛfata ofiewura biara.” (2 Timoteo 2:15) Ɔkwampaefo bi a wɔfrɛ no Mica ka sɛ: “Hu a wuhu sɛnea nokware no ka afoforo asetra no yɛ nhyira foforo a ɛyɛ nwonwa.” Aberante bi a wɔfrɛ no Matthew nso ka sɛ, sɛ “mihu sɛ obi ba nokware no mu a, ɛma m’ani gye. Anigye biara nni hɔ a ɛte sɛ eyi.”
17. Ɛyɛɛ dɛn na Kristoni bi tumi dii adwene a ɛnteɛ a na ɔwɔ wɔ akwampae adwuma ho no so?
17 So wubetumi de wo ho ahyɛ akwampae adwuma mu? Ebia a wowɔ ɔpɛ sɛ wobɛyɛ, nanso wote nka sɛ wo nimdeɛ sua. Onuawa kumaa bi a wɔfrɛ no Kenyatte gye tom sɛ: “Na mewɔ adwene a ɛnteɛ wɔ akwampae adwuma no ho. Na mete nka sɛ memfata. Na minnim sɛnea mesiesie nsɛm a mɛka wɔ pon ano anaa sɛnea me ne afoforo besusuw Kyerɛwnsɛm ho.” Nanso, mpanyimfo no de no maa onuawa kwampaefo bi a ne ho akokwaw sɛ ɔne no nyɛ asɛnka adwuma. Kenyatte ka sɛ, “m’ani gyei sɛ me ne no yɛɛ asɛnka adwuma no. Ɛno maa minyaa ɔpɛ sɛ mɛyɛ akwampae aduwma no bi.” Sɛ wunya nkuranhyɛ ne ntetee kakra a, ebia wo nso wobɛpɛ sɛ woyɛ akwampae adwuma no bi.
18. Nhyira bɛn na wɔn a wɔde wɔn ho hyɛ asɛmpatrɛw som adwuma mu no betumi anya?
18 Akwampae adwuma no betumi abue ɔsom hokwan foforo ama wo. Sɛ nhwɛso no, awarefo binom betumi afata ama asɛmpatrɛw ntetee na wɔde wɔn akɔ ɔman foforo so akɔka asɛm no. Ɛho behia sɛ asɛmpatrɛwfo sua ɔman foforo so asetra, ebia wobesua kasa foforo, amammerɛ foforo, ne nnuan foforo di. Nanso anigye a ɛwom no ma ahokyere a ɛtete saa no bɛyɛ ketewaa koraa. Mildred a ɔyɛ ɔsɛmpatrɛwfo a ne ho akokwaw a ɔwɔ Mexico ka sɛ: “Minnuu me ho da sɛ misii gyinae sɛ mɛyɛ ɔsɛmpatrɛwfo. Efi bere a na meyɛ abeawa ketewaa no na minyaa ɔpɛ sɛ mɛyɛ.” Nhyira bɛn na wanya? “Na ɛyɛ den sɛ menya Bible adesua ayɛ wɔ me kurom. Nanso, ɛha de, matumi anya asuafo anan a wofii asɛnka ase wɔ bere koro mu!”
19, 20. Ɔkwan bɛn so na Betel som adwuma ne amanaman ntam som adwuma ne Asomfo Ntetee Sukuu no ama nnipa pii anya nhyira?
19 Wɔn a wɔresom wɔ Betel wɔ Yehowa Adansefo dwumadibea ahorow nso nya nhyira pii. Sven, onua aberantewaa bi a ɔresom wɔ Germany, ka fa n’adwuma a ɔyɛ wɔ Betel no ho sɛ: “Mete nka sɛ mereyɛ biribi a ɛsom bo daa. Ná anka metumi de me nimdeɛ no ayɛ adwuma wɔ wiase no mu. Nanso anka ɛbɛyɛ te sɛ nea mede sika rekosie sikakorabea bi a ɛrenkyɛ na agu.” Nokwarem no, sɛ́ wobɛsom sɛ otuhoamafo a onnye akatua no gye afɔrebɔ. Nanso Sven ka sɛ: “Sɛ wokɔ fie a, wunim sɛ biribiara a woyɛɛ no saa da no woyɛ maa Yehowa, na ɛno ma w’ani gye ‘yiye.’”
20 Anuanom binom anya amanaman ntam som adwuma mu anigye wɔ nsase a wɔresisi baa dwumadibea ahorow wɔ hɔ no so. Awarefo bi a wɔasom wɔ aman ahorow awotwe so kyerɛwee sɛ: “Anuanom a wɔwɔ ha no ho yɛ anika. Ɛbɛyɛ yaw sɛ yebefi ha akɔ—yɛn koma ‘abubu’ mpɛn awotwe. Osuahu a ɛyɛ anigye a yɛanya bɛn ni!” Afei nso Asomfo Ntetee Sukuu no wɔ hɔ. Ɛde Onyankopɔn som mu ntetee ma anuanom mmarima ahokwafo a wɔfata. Wɔn a wowiee sukuu no biako kyerɛwee sɛ: “Minhu sɛnea menkyerɛkyerɛ anisɔ a manya wɔ sukuu no ho no mu. Ahyehyɛde foforo bɛn na ɛbɛbɔ mmɔden pii de ntetee a ɛte saa ama?”
21. Asɛyɛde bɛn na Kristofo nyinaa wɔ wɔ ɔsom a wɔde ma Onyankopɔn no mu?
21 Yiw, ɔsom adwuma hokwan pii abue. Nokwarem no, yɛn mu dodow no ara na yentumi nkɔsom wɔ Betel anaa amannɔne asase bi so. Yesu ankasa kae sɛ Kristofo bɛsow “aba” a egu ahorow esiane sɛ ɛsonosono wɔn nsɛm tebea nti. (Mateo 13:23) Ɛnde, yɛn asɛyɛde sɛ Kristofo ne sɛ yɛbɛyɛ nea yebetumi biara wɔ tebea a yɛwom no mu—sɛ yɛbɛyɛ nea yɛn tebea bɛma yɛn kwan ma yɛayɛ wɔ Yehowa som mu no yiye. Sɛ yɛyɛ saa a na yɛrehyɛ Yehowa anuonyam, na yebetumi anya awerɛhyem sɛ n’ani sɔ yiye. Susuw Ethel, onuawa bi a n’ani afi a ɔwɔ fie bi a wɔhwɛ nnipa a wɔn mfe akɔ anim ne wɔn a wɔayɛ ayarefo mu no ho hwɛ. Odi afoforo a ɔne wɔn te fie hɔ no adanse daa, na odi adanse wɔ telefon so nso. Ɛmfa ho sɛ ontumi nyɛ pii no, ofi ne kra nyinaa mu yɛ ne som adwuma.—Mateo 22:37.
22. (a) Akwan foforo bɛn na yebetumi afa so ahyɛ Onyankopɔn anuonyam? (b) Akwanhwɛ a ɛyɛ anigye bɛn na ɛda yɛn anim?
22 Nanso, kae sɛ asɛnka adwuma no yɛ ɔkwan biako pɛ a yɛnam so hyɛ Yehowa anuonyam. Sɛ yɛbɔ ɔbra pa na yɛma yɛn ahosiesie yɛ papa bere a yɛwɔ adwumam, sukuu mu, ne fie a, yɛma Yehowa koma tɔ ne yam anaa n’ani gye. (Mmebusɛm 27:11) Mmebusɛm 28:20 hyɛ bɔ sɛ: “Onipa ɔnokwafo nhyira bɛdɔɔso.” Ɛnde ɛsɛ sɛ ‘yedua no bafuu’ wɔ ɔsom a yɛde ma Onyankopɔn no mu, na yenim sɛ yebenya nhyira pii. (2 Korintofo 9:6, Asante Twi Bible) Sɛ yɛyɛ saa a yebenya hokwan atra ase wɔ saa anigye bere a “nea ɛhome nyinaa” de anuonyamhyɛ kɛse a ɛfata Yehowa bɛma no no mu!—Dwom 150:6.
[Ase hɔ asɛm]
^ nky. 14 Yehowa Adansefo na wotintim Questions Young People Ask—Answers That Work nhoma no.
So Wokae?
• Ɔkwan bɛn so na Onyankopɔn nkurɔfo som Yehowa “awia ne anadwo”?
• Ɔhaw bɛn na Gad abusua no hyiae, na dɛn na ɛno kyerɛ ma Kristofo nnɛ?
• Ɔkwan bɛn so na asɛnka adwuma no bɔ yɛn ho ban fi Satan nhyɛso ho?
• ‘Ɔpon a abue’ bɛn na ebinom anya mu kwan, na nhyira bɛn na wɔanya?
[Adesua no ho Nsɛmmisa]
[Mfonini wɔ kratafa 15]
Sɛnea Gadfo no ko tiaa wɔn ntuafo no, ɛsɛ sɛ Kristofo ko tia Satan ntua ahorow
[Mfonini wɔ kratafa 17]
Yenya fekubɔ a ɛhyɛ den wɔ asɛnka adwuma no mu
[Mfonini ahorow wɔ kratafa 18]
Akwampae adwuma no betumi abue ɔsom hokwan foforo ama yɛn, na ebi ne:
1. Amanaman ntam som adwuma
2. Betel som adwuma
3. Asɛmpatrɛw som adwuma