Wɔhwehwɛɛ Ɔkwan Hihiaa No

BƐYƐ mfe 550 a atwam ni no, akuw nketewa a wɔfrɛ wɔn ho sɛ Kristofo a wɔtete Prague, Chelčice, Vilémov, Klatovy, ne nkurow afoforo a ɛwɔ beae a wɔfrɛ no Czech Republic nnɛ no tu fii wɔn afie mu. Wɔkɔtra bɛn Kunwald akuraa, wɔ Bohemia kusuu fam apuei bon bi mu, beae a wɔbɔɔ asese, dɔw mfuw, kenkan wɔn Bible, na wɔfrɛɛ wɔn ho Anuanom Koroyɛ Kuw, anaa Unitas Fratrum wɔ Latin mu.

Na atubrafo no yɛ nkurɔfo a wɔn nsɛm tebea gu ahorow. Na wɔyɛ hamufo, atitiriw, sukuupɔn adesuafo, adefo ne ahiafo, mmarima ne mmea, akunafo ne nyisaa, a na wɔn nyinaa kura botae biako. Wɔkyerɛw sɛ: “Yɛdan kɔɔ Onyankopɔn Ankasa nkyɛn wɔ mpaebɔ mu, na yɛsrɛɛ No sɛ ɔnna ne dom apɛde adi wɔ nneɛma nyinaa mu. Na yɛpɛ sɛ yɛnantew N’akwan so.” Nokwarem no, saa Anuanom Koroyɛ Kuw, anaa Czech Anuanom, sɛnea wɔbɛfrɛɛ saa gyidifo man yi no, hwehwɛɛ ‘ɔkwan hihiaa a ɛkɔ nkwa mu’ no. (Mateo 7:13, 14) Nokwasɛm bɛn na wɔn Bible mu nhwehwɛmu no maa wohui? Ɔkwan bɛn so na na wɔn gyidi ahorow yɛ soronko wɔ nea na wɔagye atom wɔ wɔn bere so no ho, na dɛn na yebetumi asua afi mu?

Wɔpoo Basabasayɛ—Wɔannyae Wɔn Ho Mu Ansiesie

Nyamesom akuw pii na ɛboae ma wɔtew Anuanom Koroyɛ Kuw no wɔ afeha a ɛto so 15 no mfinimfini mu. Wɔn mu biako ne Waldenfo, fekuw bi a wɔtew no wɔ afeha ɛto so 12 no mu no. Mfiase no, Waldenfo  no twee wɔn ho fii Roma Katoleksom a na ɛyɛ Ɔman som wɔ Europa Mfinimfini fam no ho. Nanso, akyiri yi, wɔsan gyee Katolek nkyerɛkyerɛ fã bi toom. Kuw foforo a wogyee din ne Husfo, a wɔyɛ Jan Hus akyidifo no. Na wɔne ɔsom a emufo dɔɔso wɔ Czech man no mu, nanso na biakoyɛ nni wɔn mu koraa. Kuw biako dii asetra mu nsɛm ho apere, na kuw foforo nso nam nyamesom so hyɛɛ amammuisɛm ho nkuran. Mfirihyia apem akuw ahorow ne mpɔtam hɔ ne amannɔne Bible nhomanimfo nso nyaa Anuanom no so nkɛntɛnso.

Na Peter Chelčický (1390-1460), Czechni Bible ho ɔbenfo ne ɔsesɛwfo no nim Waldenfo ne Husfo no nkyerɛkyerɛ. Ɔpoo Husfo no esiane wɔn fekuw no a ɛdan basabasayɛ nti, na ɔtwee ne ho fii Waldenfo no ho esiane wɔn ho mu a wogyaee asiesie nti. Ɔkasa tiaa akodi sɛ ɛmfata Kristofo. Ɔtee nka sɛ “Kristo mmara” na ɛsɛ sɛ edi Kristoni asetra so, ɛmfa ho nea ebefi mu aba no. (Galatifo 6:2; Mateo 22:37-39) Wɔ 1440 mu no, Chelčický kyerɛw ne nkyerɛkyerɛ wɔ nhoma Net of the Faith no mu.

Nhomanimfo Chelčický nkyerɛkyerɛ no nyaa Gregory a ofi Prague, a ɔyɛ wɔn a wɔtraa ase wɔ ne bere so no mu akumaa no so nkɛntɛnso araa ma ofii Husfo fekuw no mu. Wɔ 1458 mu no, Gregory daadaa kan Husfo akuw nketewa no ma wotu fii wɔn afie mu wɔ Czechia mmeae ahorow. Na wɔka wɔn a wodii n’akyi kɔɔ Kunwald akuraa ase no ho, beae a  wɔtew nyamesom kuw foforo no. Akyiri yi, Czech ne German Waldenfo akuw ahorow kɔkaa wɔn ho wɔ hɔ.

Nsɛm a Atwam a Wɔma Yehu

Efi 1464 kosi 1467 mu no, saa kuw foforo a ɛkɔɔ so dɔe yi yɛɛ asɔre bagua nhyiam ahorow wɔ Kunwald ɔmantam no mu na wogyee tirimbɔ ahorow pii a ɛdaa wɔn nyamesom fekuw foforo no adi no toom. Wɔde ahwɛyiye paa yɛɛ tirimbɔ no ho kyerɛwtohɔ ahorow nyinaa wɔ nhoma a wɔfrɛ no Acta Unitatis Fratrum (Anuanom Koroyɛ Kuw no Nnwuma) no mu, a ɛwɔ hɔ de besi nnɛ. Acta no maa wohuu nneɛma a atwam, na ɛmaa nneɛma a Anuanom no gye dii no mu daa hɔ fann. Nkrataa a wɔde dii nkitaho, ɔkasa ahorow ho kyerɛwtohɔ ne akyinnye a wogye ho nsɛm nyinaa mpo wɔ nhoma no mu.

Ɛdefa Anuanom no gyidi ho no, Acta no ka sɛ: “Yɛasi gyinae sɛ yɛbɛyɛ yɛn afisiesie adwuma no denam Bible Akenkan nkutoo ne yɛn Awurade ne asomafo kronkron no nhwɛso ahorow no ho dwen so, wɔ ahobrɛase ne abodwokyɛre mu, na yɛadɔ yɛn atamfo, ayɛ wɔn papa, na yɛabɔ mpae ama wɔn.” Kyerɛwtohɔ  no da no adi sɛ mfitiase no Anuanom no kaa asɛm no. Wotuu kwan baanu baanu, na mmea nyaa nkɔso wɔ asɛmpatrɛw adwuma no mu wɔ wɔn mpɔtam hɔ. Anuanom no twee wɔn ho fii amammui dibea ho, wɔanka ntam, na wɔn mu biara amfa ne ho anhyɛ sraadi mu anaa wɔankura akode.

Wɔn Mu Paapae

Nanso, mfe du du pii akyi no, Anuanom Koroyɛ Kuw no antumi ankɔ so antra ase ma ɛne wɔn din no anhyia. Akyinnyegye a ɛfa sɛnea ɛsɛ sɛ wɔde wɔn gyidi di dwuma no de mpaapaemu baa wɔn mu. Wɔ 1494 mu no, Anuanom no mu kyɛɛ abien—Kuw a Wɔdɔɔso ne Kuw a Wosua. Bere a Kuw a Wɔdɔɔso no gow ne gyidi a okura fii mfitiase no mu no, Kuw a Wosua no kyerɛkyerɛe sɛ ɛsɛ sɛ Anuanom no kura wɔn gyinae a ɛfa amammuisɛm ho no mu pintinn.—Hwɛ adaka “Na Kuw a Wɔdɔɔso No Nso Ɛ?”

Sɛ nhwɛso no, Kuw a Wosua no muni bi kyerɛwee sɛ: “Nnipa a wɔnam akwan abien so nni ahotoso sɛ wɔne Onyankopɔn bɛnantew,  esiane sɛ nneɛma a ɛntaa mma ne nneɛma nketewa mu pɛ na wofi wɔn pɛ mu sɛ wɔbɛbrɛ wɔn ho ase ama No, bere a wɔ nneɛma akɛse mu no wɔyɛ nea wɔpɛ. . . . Wɔn a wɔn nsusuwii di mu na wɔwɔ ahonim pa—na wɔde wɔn mmeamudua di Awurade Kristo akyi da biara da wɔ ɔkwan hihiaa no so—no mu na yɛpɛ sɛ yɛfra.”

Kuw a Wosua no mufo buu honhom kronkron no sɛ Onyankopɔn adeyɛ tumi, ne “nsateaa.” Ná ntease a wokura wɔ Yesu agyede no ho ne sɛ onipa a ɔyɛ pɛ Yesu de ne desani nkwa tuaa nea ɔbɔnefo Adam hweree no. Wɔansom Yesu maame Maria. Wɔsan de gyidifo nyinaa asɔfodi nkyerɛkyerɛ san sii hɔ a ntamka a ɛfa sigyadi ho nka ho. Wɔhyɛɛ asafo mma no nyinaa nkuran sɛ wɔnka asɛm no wɔ baguam na wotuu nnebɔneyɛfo a wɔnkyerɛ ahonu no. Wɔtwee wɔn ho fii sraadi ne amammuisɛm ho koraa. (Hwɛ adaka “Nea Anuanom Kuw a Wosua no Mufo Gye Dii” no.) Esiane sɛ Kuw a Wosua no bataa Acta mu tirimbɔ ahorow no ho nti, wobuu wɔn ho sɛ wɔne mfitiase Anuanom Koroyɛ Kuw no ananmusifo ankasa.

Wɔkaa Nsɛm Penpen na Wɔtaa Wɔn

Kuw a Wosua no kasa tiaa ɔsom afoforo, a Kuw a Wɔdɔɔso no ka ho, wɔ akokoduru so. Wɔkyerɛw faa saa ɔsom ahorow no ho sɛ: “Mokyerɛkyerɛ sɛ ɛsɛ sɛ wɔbɔ mmofra a wɔn ankasa nni gyidi asu, na wɔ eyi mu no mudi nhyehyɛe a ɔsɔfopanyin bi a wɔfrɛ no Dionysius de sii hɔ akyi, ɔsɔfopanyin a nnipa bi a wonnim nyansa piapiaa no ma osii nkokoaa asubɔ so dua no . . . Saa ara na ɛkame ayɛ sɛ akyerɛkyerɛfo ne aduruyɛfo Luther, Melanchthon, Bucerus, Korvín, Jiles̆, Bullinger nyinaa yɛe, . . . Kuw a Wɔdɔɔso no mufo nyinaa gye dii.”

Ɛnyɛ nwonwa sɛ, wɔtaa Kuw a Wosua no mufo. Wɔ 1524 mu no, wɔhwee wɔn kannifo biako, Jan Kalenec, na wɔde no too awia so ma owia hyee no. Ɛkame ayɛ sɛ Kuw a Wosua no yerae bɛyɛ 1550 mu, bere a wɔn kannifo a otwa to no wui no.

Ne saa mpo no, Kuw a Wosua no mu gyidifo no gyaw wɔn nkɛntɛnso wɔ nyamesom mu wɔ Europa wɔ mfinimfini mmere no mu. Nokwarem no, esiane sɛ na “nokware nimdeɛ no” nnya nnɔɔso wɔ Kuw a Wosua no bere so nti, wɔantumi anyi honhom fam sum a atra hɔ bere tenten no amfi hɔ. (Daniel 12:4) Nanso, ɔpɛ a emu yɛ den a wonyae sɛ wɔbɛhwehwɛ ɔkwan hihiaa no, na wodii akyi ɛmfa ho ɔsɔretia no yɛ ade a ɛsɛ sɛ Kristofo kae nnɛ.

[Asɛm a wɔafa aka wɔ kratafa 13]

Wɔka sɛ Anuanom Koroyɛ Kuw no mufo na wɔkyerɛw Bohemiafo [Czech] nhoma 60 a wotintimii fi 1500 kosi 1510 no mu 50.

[Adaka wɔ kratafa 11]

Na Kuw a Wɔdɔɔso no Nso Ɛ?

Dɛn na ɛbaa Kuw a Wɔdɔɔso no so? Bere a Kuw a Wosua no tu yerae no, Kuw a Wɔdɔɔso no kɔɔ so tra hɔ sɛ ɔsom fekuw a wɔkɔɔ so frɛɛ no Anuanom Koroyɛ kuw. Bere kɔɔ so no, saa kuw yi yɛɛ nsakrae wɔ wɔn mfitiase gyidi no mu. Wɔ afeha a ɛto so 16 no awiei no, Anuanom Koroyɛ kuw no ne Czech Utraquistfo * a wɔyɛ Lutherfo ankasa no tew kuw bi. Nanso, Anuanom Koroyɛ kuw no kɔɔ so de nnamyɛ kyerɛɛ Bible ne nyamesom nhoma afoforo ase tintim bi. Nea yebetumi ahyɛ no nsow no, na Tetragrammaton no, sɛnea wonim Hebri nkyerɛwde anan a ɛyɛ Onyankopɔn din ankasa no, wɔ wɔn nhoma ahorow a edi kan no nkratafa a wɔahyehyɛ nsɛmti wɔ hɔ no mu.

Wɔ 1620 mu no, wɔnam ɔhyɛ so san de Czech ahenni no hyɛɛ Roma Katolek tumidi ase. Ne saa nti, Kuw a Wɔdɔɔso no mu Anuanom no pii fii ɔman no mu kɔtoaa wɔn dwumadi no so wɔ amannɔne. Ɛhɔ no, wɔbɛfrɛɛ kuw no sɛ Moraviafo Asɔre (Moravia yɛ Czech nsase no fa) akyiri yi, a ɛda so wɔ hɔ.

[Ase hɔ asɛm]

[Adaka wɔ kratafa 12]

Nea Anuanom Kuw a Wosua no Mufo Gye Dii

Nsɛm a efi afeha a ɛto so 15 ne 16 Acta Unitatis Fratrum mu a edidi so yi da gyidi a na Kuw a Wosua no mufo wɔ no mu bi adi. Nsɛm no, a Kuw a Wosua no mu akannifo kyerɛwee no, yɛ nea wɔkyerɛw kɔmaa Kuw a Wɔdɔɔso no mufo titiriw.

Baasakoro: “Sɛ wode w’ani fa Bible mũ no nyinaa mu a, worenhu sɛ wɔakyekyɛ Onyankopɔn mu ayɛ no Baasakoro bi, nnipa baasa a obiara wɔ ne din, sɛnea nkurɔfo bobɔɔ wɔn tirim kae no.”

Honhom kronkron: “Honhom kronkron no yɛ Onyankopɔn nsateaa ne n’akyɛde, anaa ɔwerɛkyekyefo, anaa Onyankopɔn Tumi a Agya no de ma gyidifo denam Kristo afɔrebɔ no so. Yenhu wɔ Kyerɛw Kronkron no mu sɛ ɛsɛ sɛ wɔfrɛ honhom kronkron no Onyankopɔn anaa Onipa; saa ara nso na asomafo no nkyerɛkyerɛ nkyerɛ saa.”

Asɔfodi: “Wɔde abodin, “ɔsɔfo,” no ma nkurɔfo wɔ ɔkwan a ɛnteɛ so; sɛ wuyi w’asɔfo kyɛw ne wo nsa ano aduru no to hɔ a, wunni hwee a wode kyɛn obi a ɔyɛ ɔpapahwekwa koraa no. Ɔhotefo Petro hwehwɛ sɛ Kristofo nyinaa bɛyɛ asɔfo, na ɔkae sɛ: Moyɛ asɔfokuw kronkron a mobɔ honhom mu afɔre. (1 Petro 2)”

Asubɔ: “Awurade Kristo ka kyerɛɛ n’asomafo no sɛ: Monkɔ wiase nyinaa, monka Asɛmpa no nkyerɛ abɔde nyinaa, nkyerɛ wɔn a wobegye adi. (Marko, ti 16) Na bere a wɔadi saa nsɛm yi so nkutoo: na wɔagye asubɔ no na wobenya nkwa. Na mokyerɛkyerɛ sɛ wɔmmɔ mmofra nketewa a wɔn ankasa nni gyidi asu.”

Ɔfã biara a wonni: “Nea mo nuanom a wodii kan no susuwii sɛ ɛyɛ bɔne ne nea ɛho ntew, sɛ obi de ne ho bɛhyɛ sraadi ne awudi mu anaa ɔde akode bɛhyehyɛ ne ho anantew akwan so, mubu saa nneɛma yi nyinaa sɛ eye . . . Enti yɛte nka sɛ mo ani biako pɛ na mo ne akyerɛkyerɛfo foforo de hwɛ nkɔmhyɛ nsɛm a ɛka nea edi so yi no: Enti obubuu tumi a ta wɔ no mu, ɔkyɛm ne nkrante ne ɔsa. (Dwom 75 [Dwom 76 wɔ Twi Bible mu]) Na bio nso: Wɔrenyɛ bɔne anaa wɔrensɛe ade wɔ me bepɔw kronkron no nyinaa so, esiane sɛ ɔsoro nimdeɛ bɛhyɛ Awurade asase no nyinaa so mã, ne nea ɛkeka ho. (Yesaia, ti 11).”

Asɛnka: “Yenim yiye sɛ, efi mfiase no, mmea aboa nnipa pii aba adwensakra mu sen asɔfo no nyinaa a ɔsɔfo panyin bi da wɔn ano. Na mprempren de asɔfo no tete wɔn afie ne mmeae a wɔde ama wɔn no. Mfomso bɛn ara ni! Monkɔ wiase nyinaa. Monka asɛm . . . nkyerɛ abɔde nyinaa.”

[Asase mfonini ahorow a ɛwɔ kratafa 10]

(Wopɛ nsɛm a wɔahyehyɛ awie no a, hwɛ nhoma no mu)

GERMANY

POLAND

CZECH REPUBLIC

MORAVIA

Kunwald

Vilémov

Klatovy

Chelčice

PRAGUE

BOHEMIA

Elbe Asubɔnten

Vltava Asubɔnten

Danube Asubɔnten

[Mfonini ahorow wɔ kratafa 10, 11]

Benkum: Peter Chelčický; ase hɔ: kratafa a efi “Net of the Faith” mu

[Mfonini wɔ kratafa 11]

Gregory a ofi Prague

[Mfonini Fibea wɔ kratafa 13]

Ahoni no nyinaa: S laskavým svolením knihovny Národního muzea v Praze, C̆esko