Nsɛmmisa a Efi Akenkanfo Hɔ

Dɛn na ná Paulo kyerɛ bere a ɔkae sɛ: “[Na mber biara, Fanti Bible] a mubedi abodoo yi na mobɛnom kuruwa yi ano no”?

Paulo reka Yesu wu ho Nkaedi ho nhyehyɛe a wɔde sii hɔ ho asɛm no, ɔkyerɛwee sɛ: “[Na mber biara, Fanti Bible] a mubedi abodoo yi na mobɛnom kuruwa yi ano no, monka Awurade wu no nkosi sɛ ɔbɛba.” (1 Korintofo 11:25, 26) Ebinom te nka sɛ asɛm [“mber biara,” Fanti Bible] a ɛwɔ ha no kyerɛ sɛ ɛsɛ sɛ wɔkae Kristo wu no mpɛn dodow bi, a ɛkyerɛ sɛ mmere pii. Enti, wɔkae no mpɛn pii a ɛboro pɛnkoro wɔ afe no mu. So saa na ná Paulo kyerɛ?

Ɛreyɛ adi mfe 2,000 fi bere a Yesu de ne wu ho Nkaedi no sii hɔ. Ɛno nti no, Nkae a wodi no pɛnkoro afe biara mpo no kyerɛ sɛ wɔadi no mpɛn pii fi afe 33 Y.B. mu. Nanso, wɔ nsɛm a ɛfa 1 Korintofo 11:25, 26 ho mu no, na ɛnyɛ mpɛn dodow ho asɛm na Paulo reka, na mmom ɔkwan a ɛsɛ sɛ wɔfa so di Nkae no. Wɔ mfitiase Hela kasa mu no, wamfa asɛmfua pol·laʹkis, a ɛkyerɛ “mpɛn dodow” anni dwuma. Mmom no, ɔde asɛmfua ho·saʹkis, a ɛkyerɛ [“mber biara,” Fanti Bible] kasakoa a asekyerɛ ne “bere biara,” sɛnea Fanti Bible kyerɛ ase no. Ná Paulo reka sɛ: ‘Bere biara a mobɛyɛ eyi no, monkɔ so nka Awurade wu no nkosi sɛ ɔbɛba.’ *

Ɛnde, ná mpɛn ahe na ɛsɛ sɛ wɔhyɛ Yesu wu ho Nkaedi no ho fa? Ɛfata sɛ wodi no pɛnkoro wɔ afe mu. Ɛyɛ nkaedi ankasa, na wɔtaa hyɛ nkaedi ahorow ho fa afe afe. Afei nso, Yesu wui wɔ Yudafo Twam afahyɛ da, a na wodi no pɛnkoro afe mu no. Enti, sɛnea ɛfata no, Paulo kaa Yesu ho asɛm sɛ “yɛn twam guan Kristo no,” esiane sɛ Yesu afɔrebɔ wu no buee nkwa kwan maa honhom fam Israel sɛnea Twam afahyɛ afɔre a edi kan no koraa honam fam Israelfo no abakan so wɔ Misraim, na ebuee kwan ma woyii ɔman no fii nkoasom mu no nti. (1 Korintofo 5:7; Galatifo 6:16) Saa abusuabɔ a ɛda Yudafo afe afe Twam no ne Yesu wu ho Nkaedi ntam yi yɛ adanse foforo a ɛkyerɛ sɛ ɛsɛ sɛ wɔhyɛ Nkaedi no ho fa pɛnkoro pɛ wɔ afe no mu.

Bio nso, Paulo de Yesu wu no totoo Yudafo afe afe afahyɛ foforo, Mpata Da, no ho. Yɛkenkan wɔ Hebrifo 9:25, 26 no sɛ: ‘Nanso Yesu anhyɛn hɔ sɛ ɔde ne ho bɛbɔ afɔre mpɛn pii, sɛnea ɔsɔfo panyin de obi mogya hyɛn kronkronbea daa afirihyia Mpata Da. Na afei a wiase mmere rewie du yi, wayi ne ho adi prɛko sɛ ɔnam afɔre a ɔde ne ho bɔe so beyi bɔne.’ Esiane sɛ Yesu afɔrebɔ no besii afe afe Mpata Da afɔrebɔ no ananmu nti, wodi ne wu ho Nkae no afe afe ma ɛfata. Kyerɛwnsɛm mu ntease biara nni hɔ a ɛsɛ sɛ ɛma wodi Nkaedi no mpɛn pii sen saa.

Nea ɛne eyi hyia no, abakɔsɛm kyerɛwfo John Laurence von Mosheim bɔ amanneɛ sɛ ná afeha a ɛto so abien mu Kristofo a wɔwɔ Asia Kumaa no taa di Yesu wu Nkaedi no “wɔ Yudafo ɔsram a edi kan [Nisan] no da a ɛto so dunnan.” Ɛyɛ mfe a edi akyiri mu nkutoo na ɛbɛyɛɛ amanne wɔ Kristoman mu sɛ wodi boro pɛnkoro wɔ afe mu.

[Ase hɔ asɛm]