Wɔsɛee Wiase Mũ Bi Nyinaa!

Twa w’ani hwɛ wiase ne emu nkuropɔn, amammerɛ, nneɛma a nyansahu ayɛ, ne nnipa ɔpepepem pii no hwɛ. Ɛnyɛ den koraa sɛ wubenya tra a ebetumi atra hɔ daa no mu ahotoso, anaa ɛnte saa? So wubetumi asusuw sɛ saa wiase yi betumi afi hɔ da bi? Ebia ɛbɛyɛ den sɛ wubehu. Nanso, so wunim sɛ adanse a edi mũ wɔ hɔ a kyerɛ sɛ, wɔsɛee wiase bi koraa ansa na saa wiase yi reba?

ƐNYƐ wiase bi a na anibue nni mu ho asɛm koraa na yɛreka no. Na wiase a wɔsɛee no no ani abue, wɔwɔ nkuropɔn, adwinni ahorow a wɔadi, ne nyansahu ho nimdeɛ. Nanso, Bible kyerɛwtohɔ ka kyerɛ yɛn sɛ, wɔ mfe 352 ansa na wɔrewo tete agya Abraham no, ɔsram a ɛto so abien, da a ɛto so 17 mu no, mpofirim ara na nsuyiri bi bɛfaa wiase mũ no nyinaa kɔe. *

So saa kyerɛwtohɔ no yɛ nokware? So biribi a ɛte saa sii ampa? So na tete wiase bi wɔ hɔ a edii yiye ankasa na afei wɔsɛee no ansa na wiase yi reba? Sɛ saa a, dɛn nti na ɛbaa awiei? Dɛn na ɛtotoe? Na so yebetumi asua biribi afi ne sɛe no mu?

So Wɔsɛee Tete Wiase Bi Ampa?

Sɛ asiane kɛse a ɛte saa sii ampa a, ɛnde na werɛ remfi da. Ɛno nti na wɔ aman pii mu no, wɔwɔ saa ɔsɛe no ho nkaesɛm bi no. Sɛ nhwɛso no, susuw bere pɔtee a wɔayɛ ho kyerɛwtohɔ wɔ Kyerɛwnsɛm mu no ho hwɛ. Wɔ tetefo kalenda so no ɔsram a ɛto so abien no fi ase fi nea seesei yɛfrɛ no October no mfinimfini kosi November mfinimfini. Enti da a ɛto so 17 no ne da a edi kan wɔ November no reyɛ ahyia. Ɛnde na ɛnyɛ asɛm a ɛne asɛm bi hyia ara kɛkɛ nti na wɔ aman pii so no wɔyɛ awufo afahyɛ saa bere no wɔ afe no mu no.

Nsuyiri no ho adanse foforo da so ara hyehyɛ adesamma atetesɛm ahorow mu. Ɛkame ayɛ sɛ nnipa a wɔatra ase tete no nyinaa wɔ atetesɛm bi a ɛkyerɛ sɛ wɔn nananom fi nsuyiri bi a ɛbaa asase nyinaa so mu kae. Sɛ yɛbɛbobɔ eyinom kakra din a, Afrikafo a wɔyɛ ntiantia, Europa Celtfo, ne Amerika Anafo Fam Incasfo—nyinaa wɔ atetesɛm a edi nsɛ, te sɛ nea nnipa a wofi Alaska, Australia, China, India, Lithuania, Mexico, Micronesia, New Zealand, ne ebinom a wofi Amerika Atifi fam wɔ no.

Ɛwom, bere a bere rekɔ so no, na wɔregugu atetesɛm no mu de, nanso wɔn nyinaa kura adwene koro a ɛkyerɛ sɛ: Adesamma abɔnefosɛm maa Onyankopɔn bo fuwii. Ɔde nsuyiri kɛse bi bae. Wɔsɛee adesamma nyinaa. Nanso, wɔkoraa treneefo kakraa bi so. Eyinom yɛɛ hyɛn bi a wɔnam so de gyee nnipa ne mmoa nkwa. Bere bi akyi no, wɔsomaa nnomaa sɛ wɔnkɔhwɛ sɛ asase no so awo anaa. Awiei koraa no, hyɛn no kosii bepɔw bi so. Bere a wɔn a wonyaa wɔn ti didii mu no fii adaka no mu no, wɔbɔɔ afɔre.

Dɛn na eyi kyerɛ? Ɛrentumi mma da sɛ eyinom di nsɛ ara kɛkɛ. Atetesɛm ho adanse yi nyinaa foa adanse a ɛwɔ Bible mu fi tete a ɛkyerɛ sɛ nnipa nyinaa yɛ wɔn a wonyaa wɔn ti didii mu wɔ nsuyiri a ɛsɛee wiase bi no mu no asefo no so. Ne saa nti, yenhia atetesɛm anaa anansesɛm na ama yɛahu nea esii. Yɛwɔ ɛho kyerɛwtohɔ a wɔakora so yiye wɔ Hebri Kyerɛwnsɛm a ɛwɔ Bible mu no mu.—Genesis, ti 6-8.

Bible no kura asetra mfiase pɛɛ ho abakɔsɛm a efi honhom mu. Nanso adanse horow  kyerɛ sɛ ɛsen abakɔsɛm ara kwa. Emu nkɔmhyɛ ahorow a enni huammɔ ne nyansa a emu dɔ no da no adi sɛ edi bem wɔ nea ɛka no ho—nea Onyankopɔn nam so ne adesamma di nkitaho. Nea ɛnte sɛ anansesɛm no, Bible no ka din ahorow ne nna ne anato ne asase ne ɛho abakɔsɛm nyinaa ho kyerɛwtohɔ ho asɛm. Ɛma yehu sɛnea na asetra te ankasa ansa na Nsuyiri no reba ne nea enti a wiase mũ bi nyinaa baa awiei mpofirim no.

Dɛn na ɛtotoe wɔ saa wiase no mu ansa na Nsuyiri no reba? Asɛm a edi hɔ no susuw saa asɛm no ho. Ɛyɛ asɛmmisa a ɛho hia ma wɔn a ebia wontumi nhu nea ebetumi aba yɛn mprempren anibue yi so daakye no.

[Ase hɔ asɛm]

 [Nsɛm a wɔahyehyɛ wɔ kratafa 4]

(Wopɛ nsɛm a wɔahyehyɛ awie no a, hwɛ nhoma no mu)

Nsuyiri Ho Anansesɛm a Ɛwɔ Wiase Nyinaa

Ɔman Mmeae a Efi 1 2 3 4 5 6 7 8 9 10

Greece 7 ◆ ◆ ◆ ◆ ◆ ◆ ◆

Rome 6 ◆ ◆ ◆ ◆ ◆ ◆

Lithuania 6 ◆ ◆ ◆ ◆ ◆ ◆

Assyria 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

New Zealand - Maori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington U.S.A. - Yakima 7 ◆ ◆ ◆ ◆ ◆ ◆ ◆

Mississippi U.S.A. - Choctaw 7 ◆ ◆ ◆ ◆ ◆ ◆ ◆

Mexico - Michoacan 5 ◆ ◆ ◆ ◆ ◆

South America - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: Abɔnefosɛm na ɛmaa Onyankopɔn bo fuwii

2: Nsuyiri a wɔde sɛee ade

3: Onyankopɔn na ɔhyɛe

4: Wɔde ɔsoro kɔkɔbɔ mae

5: Nnipa kakraa bi na wonyaa nkwa

6: Wɔkoraa wɔn so wɔ hyɛn bi mu

7: Wɔkoraa mmoa so

8: Woyii nnomaa anaa abɔde foforo fii adi

9: Awiei koraa no ebesii bepɔw bi so

10: Afɔre a wɔbɔe