Ɛrenkyɛ Onyankopɔn Ahenni a yɛatwɛn akyɛ no bɛba, na ɛde asomdwoe ne ahotɔ bɛbrɛ wiase nnipa nyinaa. Ɛyɛ aban a Onyankopɔn ankasa ahyehyɛ. Sɛnea Onyankopɔn ahyɛ bɔ wɔ Dwom 72:7 no, “asomdwoe bebu so.” Bere bɛn na Onyankopɔn Ahenni bedi asase nyinaa so tumi? Ɔkwan bɛn na ɛbɛfa so ayɛ saa? Nhyira a Onyankopɔn Ahenni no de bɛba no, wobɛyɛ dɛn anya bi?

Bible ka too hɔ sɛ, nneɛma akɛse akɛse besisi a ɛbɛma yɛahu sɛ Onyankopɔn Ahenni abɛn. Saa nneɛma no bi ne akokoakoko, ɔkɔm, nyarewa, asasewosow, ne amumɔyɛsɛm a ɛbɛdɔɔso. Nneɛma a ebesisi no nyinaa na ɛka bom yɛ “sɛnkyerɛnne” a ɛbɛkyerɛ sɛ Ahenni no abɛn no.—Mateo 24:3, 7, 12; Luka 21:11; Adiyisɛm 6:2-8.

Nkɔmhyɛ foforo ka sɛ: “Nna a edi akyiri mu no, mmere a emu yɛ den bɛba. Efisɛ nnipa bɛyɛ ahopɛ, sikanibere, . . . awofo so asoɔdenfo, bonniayɛfo, wɔn a wonni nokware, wɔn a wonni tema, wɔn a wontumi ne wɔn nyɛ apam, dinsɛefo, wɔn a wontumi nni wɔn ho so, wɔn a wɔyɛ keka, wɔn a wɔmpɛ papa, . . . wɔn a wɔyɛ ahomaso, wɔn a wɔdɔ anigyede sen Onyankopɔn.” (2 Timoteo 3:1-4) Nnipa binom ada saa subammɔne yi adi fi teteete. Nanso nnɛ, nnipa pii suban asɛe.

Afe 1914 mu na saa nkɔmhyɛ no nyinaa fii ase baa mu. Nea ɛte ne sɛ, abakɔsɛm akyerɛwfo, amanyɔfo, ne nhoma akyerɛwfo pii aka sɛ, saa afe no akyi no, wiase sesae pa ara. Ɛho nhwɛso ne sɛ, abakɔsɛm kyerɛwfo Peter Munch a ɔyɛ Denmarkni no kyerɛwee sɛ: “Wiase nyinaa kõ a efii ase afe 1914 no de nsakrae kɛse bae. Ansa na ɔko no refi ase no, na nnipa pii susuw sɛ nneɛma rekɔ yiye wɔ wiase. . . . Nanso ɔko no akyi no, amanehunu, ahude, ɔtan ne akomatusɛm buu so wɔ baabiara.”

Anigyesɛm ne sɛ, saa nneɛma yi nyinaa sisi wie a, asomdwoe bɛba asase so. Enti ɛrenkyɛ koraa Ahenni no bɛba abedi asase nyinaa so. Bere a na Yesu reka nneɛma a ebesisi ansa na awiei no aba ho asɛm no, ɔkaa biribi pa bi a ɛbɛkɔ so ho asɛm. Ɛne sɛ: “Wɔbɛka ahenni ho asɛmpa yi wɔ asase so nyinaa de adi amanaman nyinaa adanse; ɛno ansa na awiei no bɛba.”—Mateo 24:14.

Saa asɛmpa no, ɛno ne asɛntitiriw a Yehowa Adansefo ka ho asɛm. Nhoma titiriw a wɔde di dwuma no mpo, edin a ɛda so ne Ɔwɛn-Aban​—Ɛka ­Yehowa Ahenni Kyerɛ. Ɛka nneɛma pa a Onyankopɔn Ahenni bɛyɛ ama nnipa ne yɛn asase yi ho asɛm.

Sɛ yebenya asɛmmisa yi ho mmuae a, ɛsɛ sɛ yehu nokwasɛm nnan a ɛho hia yi:

1. Aban mpanyimfo a wɔwɔ hɔ nnɛ no, wɔn mu biara nni hɔ a obedi tumi wɔ saa Ahenni no mu.

2. Amanyɔfo a wɔwɔ wiase no, esiane sɛ wɔmpɛ sɛ wogyaa wɔn tumidi mu nti, wɔrenyɛ ade nyansam, mmom wɔbɛko atia Onyankopɔn Ahenni no.—Dwom 2:2-9.

3. Aban ahorow a wɔpɛ sɛ wɔkɔ so ara di nnipa so no, Onyankopɔn Ahenni no bɛsɛe wɔn nyinaa. (Daniel 2:44; Adiyisɛm 19:17-21) Saa ɔsɛe no, ɛno ne ɔko a etwa to a wɔbɛko wɔ wiase nyinaa, na wɔfrɛ no Harmagedon.—Adiyisɛm 16:14, 16.

4. Wɔn a wɔbrɛ wɔn ho ase hyɛ Onyankopɔn Ahenni ase nyinaa, wobenya ahobammɔ atwa Harmagedon akɔ wiase foforo a asomdwoe wom no mu. Saafo no na Bible frɛ wɔn “nnipakuw kɛse” no. Ɛda adi sɛ wɔbɛyɛ nnipa ɔpepem bebree.—Adiyisɛm 7:9, 10, 13, 14.

Sɛ obi pɛ sɛ ɔkɔ Onyankopɔn Ahenni no mu a, ade a edi kan a ɛsɛ sɛ ɔyɛ ne sɛ obesua ade. Nea ɛwom ne sɛ, bere bi a Yesu rebɔ Onyankopɔn mpae no, ɔkaa sɛ: “Eyi ne daa nkwa, sɛ wobehu wo, nokware Nyankopɔn koro pɛ no, yiye, ne nea wosomaa no no, Yesu Kristo.”—Yohane 17:3.

Sɛ nnipa hu Yehowa Nyankopɔn yiye a, wonya so mfaso pii. Wo de, susuw emu mmienu ho hwɛ: Nea edi kan, ɛma wonya Onyankopɔn mu gyidi kɛse. Saa gyidi a egyina adanse so yi ma wohu sɛ Onyankopɔn Ahenni no wɔ hɔ ankasa, na ɛrenkyɛ ebedi asase nyinaa so. (Hebrifo 11:1) Nea ɛto so mmienu, wonya ɔdɔ a emu yɛ den ma Onyankopɔn ne wɔn yɔnko nnipa. Ɔdɔ a wɔwɔ ma Onyankopɔn no ka wɔn ma wofi wɔn koma nyinaa mu tie no. Ɔdɔ a wɔwɔ ma wɔn yɔnko nnipa no ka wɔn ma wɔde Yesu afotusɛm yi yɛ adwuma. Yesu kaa sɛ: “Sɛnea mopɛ sɛ nnipa yɛ mo no, monyɛ wɔn saa ara.”—Luka 6:31.

Sɛnea agya pa biara dɔ ne mma no, saa ara na Onyankopɔn a ɔbɔɔ yɛn no dɔ yɛn. Ɔpɛ sɛ yenya nea Bible frɛ no “nkwa ankasa” no bi. (1 Timoteo 6:19) Asetena a yɛwɔ mu nnɛ no de, yɛrentumi nka sɛ ɛyɛ “nkwa ankasa.” Nnipa pii rebrɛ pa ara; nneɛma mu ayɛ den ama wɔn. Nea ɛbɛyɛ a wubehu sɛnea “nkwa ankasa” no te no, hwɛ nneɛma a Onyankopɔn Ahenni bɛyɛ ama ne manfo no bi.