Wɔkasa Tia Mose

YUDAFO, Kristofo, ne Nkramofo adwene ntaa nhyia wɔ nneɛma pii ho. Nanso, ɛmfa ho nyamesomfo yi nsɛmnsɛm no, wɔn nyinaa adwene hyia wɔ ade biako ho: obu kɛse a wɔwɔ ma ɔbarima a wɔfrɛ no Mose no. Yudafo bu no sɛ nea “ɔsen Yudafo akyerɛkyerɛfo nyinaa”—nea ɛnam no so ma wɔkyekyee Yuda man. Kristofo bu no sɛ nea ɔkyerɛɛ Yesu Kristo so kwan. Nkramofo bu Mose sɛ ɔka wɔn adiyifo atitiriw paa a wodi kan no ho.

Ne saa nti, Mose yɛ abakɔsɛm mu mmarima a wɔagye din sen biara no mu biako. Nanso, bɛboro mfe ɔha a abɛsen kɔ no, nhomanimfo ne asɔfo akasa atia Mose. Wɔn mu pii wɔ hɔ a, ɛnyɛ anwonwade a Mose yɛe ne yi a oyii Israelfo no fii Misraim no ho akyinnye nko na wogye, na mmom wogye tra a Mose atra ase pɛn no nso ho akyinnye. Moses—A Life (Mose asetra), nhoma a Jonathan Kirsch kyerɛwee no ka sɛ: “Nea yebetumi aka afa Mose a ɔyɛ abakɔsɛm mu nipa ho ara ne sɛ ɛbɛyɛ sɛ obi a ɔte saa a wɔkaa ne ho asɛm wɔ Bible mu no atra ase pɛn wɔ tete bere bi, ne beae bi a obiara nnim, na ɛbɛyɛ sɛ nneɛma a otumi yɛe no na wɔde anansesɛm ne atetesɛm batabataa ho nkakrankakra ma ɛyɛɛ dɛ kosii sɛ ɔbɛyɛɛ nipa titiriw a ɔwɔ nkɛntɛnso a yɛkenkan ne ho asɛm wɔ Bible mu no.”

Sɛ wote asɛm yi bere a edi kan a, ɛte sɛ nea aba bi wom. Sɛ nhwɛso no, akasatiafo kyerɛ sɛ tetefo nneɛma a wɔatutu fam ahu foa tra a Bible mu nipa te sɛ Israelfo hene Yehu traa ase pɛn no so. Nso wontutuu fam nhuu adanse biara a ɛkyerɛ sɛ Mose atra ase pɛn. Nanso eyi nkyerɛ sɛ Mose yɛ anansesɛm mu nipa. Akasatiafo gyee akyinnye bere bi sɛ, nnipa a wɔabobɔ wɔn din wɔ Bible mu, te sɛ Babilon hene Belsasar ne Asiria hene Sargon, nso yɛ anansesɛm mu nnipa—kosii sɛ akyiri yi fam a wotutu hwehwɛ tetefo nneɛma mu sii so dua sɛ wɔatra ase pɛn.

Enti nhomakyerɛwfo Jonathan Kirsch bɔ yɛn nkae sɛ: “Israelfo a wɔtraa ase wɔ Bible bere so no ho nsɛm ne wɔn ho nkaede sua ara ma enti ɛnyɛ nwonwa sɛ wonhu Mose ho asɛm wɔ nhoma biara mu gye Bible no nkutoo mu.” Sɛnea Kirsch kyerɛ no, ebinom gye kyim sɛ ɛrentumi mma sɛ obi na ɔbɔɔ ne tirim kɛkɛ kaa Mose ho asɛm saa, efisɛ “obi ntumi mmɔ ne tirim nkyerɛw asetram nsɛm a ɛdɔɔso saa a nsɛm a ɛkɔ akyiri . . . , wom.”

Sɛ́ ebia woyɛ nyamesomni anaa sɛ wonyɛ bi no, anyɛ yiye koraa no wunim Mose asetra mu nsɛntitiriw kakra: bere a ɔne Onyankopɔn kasae wɔ nwura a ɛrehyew ho, Israelfo akwantu a wɔde fii Misraim nkoasom mu, ne Po Kɔkɔɔ a wɔpaee mu no. Nanso so ntease wom sɛ yebegye adi sɛ nsɛm yi mu bi sisii ankasa? Anaasɛ Mose yɛ anansesɛm mu nipa bi ara kwa? Asɛm a edi hɔ no bebua nsɛmmisa a ɛkanyan adwene yi.