1. Asɛm bɛn na odiyifo Yesaia ka kyerɛɛ ne mfɛfo Israelfo?

 ODIYIFO Yesaia kaa Yehowa ho asɛm sɛ ɔyɛ “nokware Nyankopɔn.” Asɛmfua a wɔakyerɛ ase “nokware” no, ne nkyerɛase tee ne “Amen.” (Yes. 65:​16, ase hɔ asɛm) “Amen” kyerɛ “ɛnyɛ hɔ,” anaa “ɛmmra mu.” Sɛ wɔde asɛmfua “amen” di dwuma wɔ Bible mu, na ɛfa Yehowa anaa Yesu ho a, ɛyɛ adanse a ɛkyerɛ sɛ nea wɔaka no yɛ nokware turodoo. Enti asɛm a Yesaia ka kyerɛɛ ne mfɛfo Israelfo no mu da hɔ fann. Ɛne sɛ: Asɛm biara a Yehowa ka no, bere biara ɛbam. Yehowa ama ada adi sɛ saa asɛm yi yɛ nokware efisɛ ɛbɔ biara a ɔhyɛe no, ne nyinaa baam; baako mpo anka mu.

2. Nea Yehowa ahyɛ bɔ sɛ ɔbɛyɛ ama yɛn daakye no, adɛn nti na yebetumi anya ahotoso sɛ ɛbɛbam, na nsɛmmisa bɛn na yebesusuw ho?

² Nneɛma a Yehowa ahyɛ ho bɔ sɛ ɔbɛyɛ daakye no, yɛn nso yebetumi anya awerɛhyem sɛ ɛbɛbam anaa? Yesaia wu akyi bɛyɛ mfe 800 no, nea enti a Onyankopɔn bɔhyɛ bam bere nyinaa no, ɔsomafo Paul kyerɛkyerɛɛ mu. Paul kaa sɛ: “Onyankopɔn ntumi nni atoro.” (Heb. 6:18) Sɛnea asuti baako rentumi mpuw nsu a ɛyɛ dɛ ne nsu nkyenenkyene no, saa ara na Yehowa a ɔno ne nokware Farebae no nso rentumi nni atoro. Enti, yebetumi anya ahotoso paa sɛ asɛm biara a Yehowa aka ne nea wahyɛ ho bɔ sɛ ɔbɛyɛ daakye nyinaa bɛbam. Adesua yi mu no, yebesusuw nsɛmmisa yi ho: Dɛn na Yehowa ahyɛ bɔ sɛ ɔbɛyɛ ama yɛn daakye? Awerɛhyem bɛn na Yehowa ama yɛanya sɛ ne bɔhyɛ bɛbam ɔkwan biara so?

3. (a) Bɔhyɛ bɛn na ɛda Onyankopɔn asomfo koma so paa? (Adiyisɛm 21:​3, 4) (b) Sɛ yɛka saa bɔhyɛ yi ho asɛm kyerɛ ebinom a, dɛn na wɔka?

³ Bɔhyɛ a yɛrebesusuw ho no, ɛda Onyankopɔn asomfo a ɛwɔ wiase nyinaa koma so paa. (Kenkan Adiyisɛm 21:​3, 4.) Yehowa ahyɛ bɔ sɛ, bere bi bɛba a “owu nni hɔ bio, na awerɛhow ne osu ne yaw nso nni hɔ bio.” Yɛn mu pii wɔ hɔ a, sɛ yɛreka asɛmpa no akyerɛ nkurɔfo a, yɛkenkan Bible mu asɛm a ɛma awerɛkyekye yi kyerɛ wɔn, na yɛma wɔhu sɛnea Paradise asetena bɛyɛ. Sɛ yɛka saa bɔhyɛ yi ho asɛm kyerɛ ebinom a, dɛn na wɔka? Wɔtumi ka sɛ, “Nea woreka yi de, wugye di sɛ ɛbɛbam?”

4. (a) Bere a Yehowa hyɛɛ Paradise ho bɔ no, dɛn na na onim sɛ ebesi wɔ yɛn bere yi so? (b) Ɛbɔ a Yehowa hyɛe akyi no, dɛn bio na ɔyɛ kaa ho?

⁴ Nokwasɛm ne sɛ, bere a Yehowa maa ɔsomafo Yohane kyerɛw sɛnea asetena bɛyɛ wɔ Paradise ho asɛm no, na Yehowa nim sɛ, sɛ yɛreka Ahenni no ho asɛm akyerɛ nkurɔfo nnɛ a, yɛbɛka saa anidaso yi nso ho asɛm. Ná Yehowa nim nso sɛ ɛbɛyɛ den ama nnipa pii sɛ ‘nneɛma foforo’ a wahyɛ ho bɔ yi, wɔbegye adi. (Yes. 42:9; 60:2; 2 Kor. 4:​3, 4) Enti, yɛbɛyɛ dɛn ama afoforo anya awerɛhyem sɛ nhyira a ɛwɔ Adiyisɛm 21:​3, 4 no bɛbam ɔkwan biara so? Yɛn nso, ahotoso a yɛwɔ sɛ Yehowa bɔhyɛ nyinaa bɛbam no, yɛbɛyɛ dɛn ahyɛ mu den? Saa bɔhyɛ a ɛka koma yi, Yehowa anka no saa ara kɛkɛ, na mmom ɔmaa yɛn adanse a edi mu a ɛkyerɛ sɛ yebetumi agye adi. Adanse bɛn na ɔde mae?

5. Kyerɛwnsɛm bɛn na ɛma yehu sɛ ɛbɔ a Onyankopɔn ahyɛ sɛ ɔde Paradise bɛba no bɛbam, na asɛm bɛn na ɛwɔ hɔ?

⁵ Adanse a ɛkyerɛ sɛ ɛbɔ a Yehowa ahyɛ sɛ Paradise bɛba no, yebehu wɔ Adiyisɛm 21:​5, 6a. Ɛhɔ kan sɛ: “Nea ɔte ahengua no so no kae sɛ: ‘Hwɛ! mereyɛ nneɛma nyinaa foforo.’ Ɔsan kae sɛ: ‘Kyerɛw, efisɛ nsɛm yi yɛ nokware, na ɛrenni huammɔ.’ Afei ɔka kyerɛɛ me sɛ: ‘Aba mu awie! Mene Alfa ne Omega, mfiase ne awiei.’”

6. Ahotoso a yɛwɔ sɛ Onyankopɔn bɔhyɛ bɛbam no, sɛn na asɛm a ɛwɔ Adiyisɛm 21:​5, 6 no hyɛ mu den?

⁶ Ahotoso a yɛwɔ wɔ Onyankopɔn bɔhyɛ mu no, adɛn nti na Bible mu asɛm yi hyɛ mu den? Adiyisɛm Awiei nhoma no ka kyerɛwsɛm yi ho asɛm sɛ: ‘Ɛte sɛ nea Yehowa ankasa de ne nsa rehyɛ adanse, anaasɛ krataa bi ase sɛ nhyira horow a adasamma anokwafo benya daakye no, ɛbɛbam ɔkwan biara so.’ b Onyankopɔn bɔhyɛ no wɔ Adiyisɛm 21:​3, 4. Nanso, asɛm a ɛwɔ nkyekyɛm 5 ne 6 no di adanse sɛ, Yehowa de ne stamp atim so anaa ɔde ne nsa ahyɛ ase, a ɛkyerɛ sɛ ɛbɔ a wahyɛ no yɛ nokware na ɛbɛbam ɔkwan biara so. Afei, momma yɛnhwɛ sɛnea Yehowa ma yɛn awerɛhyem sɛ yebetumi agye no adi.

7. Bere a Onyankopɔn rema yɛn awerɛhyem wɔ Adiyisɛm 21:5 no, dɛn na ɛma asɛm a ɔde fii ase no yɛ soronko, na adɛn nti na saa asɛm no ho hia?

⁷ Nkyekyɛm 5 no fi ase sɛ: “Nea ɔte ahengua no so no kae sɛ.” (Adi. 21:5a) Saa asɛm yi yɛ soronko efisɛ mprɛnsa pɛ a Yehowa kasae wɔ Adiyisɛm nhoma no  mu no, saa asɛm yi na ɔkyerɛwfo no de fii emu baako ase. Enti, ɛnyɛ ɔbɔfo bi anaa Yesu mpo na ɔkaa saa asɛm a ɛma yenya awerɛhyem yi, na mmom ɛyɛ Yehowa ankasa! Wei ma yehu sɛ, asɛm a edi so a Yehowa kae no yɛ nokware turodoo. Adɛn nti na yɛreka saa? Efisɛ Yehowa ‘rentumi nni atoro.’ (Tito 1:2) Enti asɛm a ɛwɔ Adiyisɛm 21:​5, 6 no bɛbam ɔkwan biara so.

8. Asɛm bɛn na Yehowa kae a ɛkyerɛ sɛ ke ara ne ke ne bɔhyɛ bɛbam? (Yesaia 46:10)

⁸ Afei Yehowa kaa sɛ, “Hwɛ!” (Adi. 21:5) Greek asɛmfua a wɔakyerɛ ase “hwɛ!” no, wɔde adi dwuma mpɛn pii wɔ Adiyisɛm nhoma no mu. Nhoma bi ka sɛ, bere biara a wɔde asɛmfua “hwɛ!” bedi dwuma no, “na ɛrema ɔkenkanfo no ahu sɛ, asɛm a edi hɔ no, ɔmfa n’adwene nkɔ so yiye.” Asɛm bɛn na edi hɔ a Onyankopɔn kae? Ɔkaa sɛ: “Mereyɛ nneɛma nyinaa foforo.” Ɛwom, na Yehowa reka nneɛma a ɔbɛyɛ daakye ho asɛm, nanso ne fam de na onim sɛ ke ara ne ke nea waka biara bɛbam, enti ɔkaa ho asɛm te sɛ nea abam dedaw.—Kenkan Yesaia 46:10.

9. (a) Asɛm a ɛne “mereyɛ nneɛma nyinaa foforo” no, ɛma yehu sɛ nneɛma mmienu bɛn na Yehowa bɛyɛ? (b) Dɛn na ɛbɛba ‘ɔsoro’ ne “asaase” a ɛwɔ hɔ yi so?

⁹ Momma yɛnhwɛ asɛm a edi hɔ a ɛwɔ Adiyisɛm 21:5 no. Ɛne sɛ: “Mereyɛ nneɛma nyinaa foforo.” Bible mu asɛm yi ma yehu nneɛma mmienu a Yehowa rebɛyɛ. Nea edi kan, ɔbɛsɛe wiase dedaw yi. Nea ɛtɔ so mmienu, ɔde wiase foforo bɛba. Yɛkenkan wɔ Adiyisɛm 21:1 sɛ: “Ná kan soro ne kan asaase no atwam.” “Kan soro” no gyina hɔ ma nnipa aban a Satan ne ahonhommɔne no taa akyi. (Mat. 4:​8, 9; 1 Yoh. 5:19) Sɛ wɔde “asaase” di dwuma wɔ Bible mu a, etumi kyerɛ nnipa a ɛte so. (Dw. 66:4; 96:1) Enti “kan asaase” no gyina hɔ ma nnipa abɔnefo a wɔwɔ hɔ nnɛ no. ‘Ɔsoro’ ne “asaase” a ɛwɔ hɔ yi, ɛnyɛ sɛ Yehowa rebesiesie, na mmom obeyi afi hɔ korakora. Sɛ oyi ɔsoro ne asaase a ɛwɔ hɔ seesei yi fi hɔ a, ɔde “ɔsoro foforo ne asaase foforo” bɛhyɛ anan, kyerɛ sɛ, ɔbɛma aban foforo adi nnipa asoɔmmerɛwfo so.

10. Dɛn na Yehowa bɛyɛ no foforo?

¹⁰ Ɔkwan bɛn bio na Yehowa bɛfa so ayɛ nneɛma nyinaa foforo? (Adi. 21:5) Yehowa beyi bɔne afi hɔ, na ama asaase ne nnipa asi wɔn dedaw mu. Sɛnea Yesaia hyɛɛ nkɔm no, Yehowa bɛma asaase nyinaa ayɛ fɛfɛɛfɛ te sɛ Eden turo no. Yɛn nso, obesiesie yɛn ama yɛn mu biara ayɛ foforo. Ɔbɛsa mpakye, anifuraefo, ne wɔn a wɔn aso asiw yare, na obenyan awufo mpo.—Yes. 25:8; 35:​1-7.

11. Dɛn na Yehowa ka kyerɛɛ Yohane sɛ ɔnyɛ, na adɛn nti na ɔkaa sɛ ɔnyɛ saa?

¹¹ Dɛn bio na Yehowa kae a ɛma yenya awerɛhyem sɛ yebetumi agye no adi? Yehowa ka kyerɛɛ Yohane sɛ: “Kyerɛw, efisɛ nsɛm yi yɛ nokware, na ɛrenni huammɔ.” (Adi. 21:5) Yehowa anka ankyerɛ Yohane sɛ ‘ɔnkyerɛw’ saa asɛm no kɛkɛ, na mmom ɔkyerɛɛ no nea enti a ɔnkyerɛw nso. Yehowa kaa sɛ: “Efisɛ nsɛm yi yɛ nokware, na ɛrenni huammɔ.” Wei kyerɛ sɛ yebetumi de yɛn ho ato Onyankopɔn asɛm so; ɛbɛbam ɔkwan biara so. Ɛyɛ yɛn dɛ paa sɛ bere a Yehowa ka kyerɛɛ Yohane sɛ ‘ɔnkyerɛw’ no, otiei. Wei nti,  yetumi kenkan Onyankopɔn bɔhyɛ a ɛfa Paradise ho no, na yedwinnwen nhyira nwanwaso a ɛda hɔ retwɛn yɛn no ho.

12. Adɛn nti na Yehowa tumi kaa sɛ: “Aba mu awie!”?

¹² Asɛm bɛn na Onyankopɔn san kae? Ɔkaa sɛ: “Aba mu awie!” (Adi. 21:6) Ɛha yi, Onyankopɔn kasa te sɛ nea Paradise a wahyɛ ho bɔ no aba dedaw. Adɛn ntia? Obetumi aka no saa, efisɛ obiara ntumi nso ne nsa sɛ ɔremma ɔnyɛ nea wabɔ ne tirim sɛ ɔbɛyɛ no. Afei Yehowa san kaa asɛm foforo a ɛma yenya awerɛhyem sɛ ɛbɔ a wahyɛ no bɛbam ɔkwan biara so. Ɛyɛ asɛm bɛn?

13. Adɛn nti na Yehowa kaa sɛ: “Mene Alfa ne Omega”?

¹³ Sɛnea yɛadi kan aka no, Yehowa ankasa kasae mprɛnsa wɔ anisoadehu a ɔmaa Yohane nyae no mu. (Adi. 1:8; 21:​5, 6; 22:13) Mprɛnsa no nyinaa, Yehowa kaa asɛm koro no ara wɔ emu biara mu sɛ: “Mene Alfa ne Omega.” Greek nkyerɛwde no, nea edi kan ne Alfa, na nea etwa to ne Omega. Enti ka a Yehowa kaa sɛ “Mene Alfa ne Omega” no kyerɛ sɛ, sɛ ofi biribi ase a, ɔmfa nkɔso kwan mu; ɔyɛ wie.

14. (a) Sɛ yɛbɛka a, bere bɛn na Yehowa kaa sɛ “Mene Alfa,” na bere bɛn na ɔbɛka sɛ “Mene Omega”? (b) Sɛn na Genesis 2:​1-3 ma yenya awerɛhyem?

¹⁴ Bere a Yehowa bɔɔ Adam ne Hawa wiei no, ɔkaa nea wabɔ ne tirim sɛ ɔbɛyɛ ama adasamma ne asaase no kyerɛɛ wɔn. Bible ka sɛ: “Onyankopɔn hyiraa wɔn, na Onyankopɔn ka kyerɛɛ wɔn sɛ: ‘Monwo na monnɔɔso na monhyɛ asaase so ma na munnya so tumi.’” (Gen. 1:28) Sɛ yɛbɛka a, saa bere no Yehowa kaa sɛ “Mene Alfa,” kyerɛ sɛ, mfiase no ara na ɔmaa nea wabɔ ne tirim sɛ ɔbɛyɛ no mu daa hɔ  pefee. Ɛne sɛ: Bere bi bɛba a Adam ne Hawa asefo a wɔyɛ asoɔmmerɛw a bɔne biara nni wɔn ho bɛhyɛ asaase so ma na wɔama adan paradise. Ebedu saa bere no, na Yehowa atirimpɔw abam, enti sɛ yɛbɛka a, Yehowa bɛka sɛ “Mene Omega.” Bere a Yehowa bɔɔ “ɔsoro ne asaase ne emu nneɛma nyinaa” wiei no, ɔmaa yɛn awerɛhyem sɛ sɛnea ɛte biara, n’atirimpɔw bɛbam. Yebehu wei wɔ Genesis 2:​1-3. (Kenkan.) Yehowa yii da a ɛtɔ so nson no sii hɔ sɛ ɛyɛ da kronkron. Ɛno kyerɛ sɛn? Ɛkyerɛ sɛ Yehowa ama yɛn awerɛhyem sɛ sɛnea ɛte biara, nea wabɔ ne tirim sɛ ɔbɛyɛ ama adasamma ne asaase no, ɛbɛbam. Da a ɛtɔ so nson no bɛba awiei no, na nea wabɔ ne tirim sɛ ɔbɛyɛ no nyinaa abam.

15. Onyankopɔn atirimpɔw a ɔwɔ ma adasamma no, adɛn nti na na akɔyɛ sɛ nea Satan asɛe no?

¹⁵ Bere a Adam ne Hawa tew atua no, wɔbɛyɛɛ abɔnefo, na wɔde bɔne ne owu gyaw wɔn asefo. (Rom. 5:12) Ɛno nti, Onyankopɔn atirimpɔw a ɛne sɛ nnipa a bɔne biara nni wɔn ho bɛhyɛ asaase so ma no, na akɔyɛ sɛ Satan asɛe no. Ná ɛte sɛ nea Satan asiw Yehowa kwan sɛ ɔremma ɔnka sɛ, “Mene Omega” da. Ɛbɛyɛ sɛ Satan nyaa adwene sɛ Yehowa ani atutu aka ne nsam. Ebia onyaa adwene sɛ Yehowa bekum Adam ne Hawa, na wabɔ awarefo foforo a bɔne biara nni wɔn ho, na ama n’atirimpɔw a ɔwɔ ma adasamma no aba mu. Nanso sɛ Onyankopɔn yɛɛ saa a, anka Ɔbonsam bɛka sɛ ɔyɛ ɔtorofo. Adɛn ntia? Efisɛ, sɛnea Genesis 1:28 ka no, na Yehowa aka akyerɛ Adam ne Hawa sɛ wɔn asefo na ɛbɛhyɛ asaase so ma.

16. Adɛn nti na ɛbɛyɛ sɛ Satan nyaa adwene sɛ obetumi abɔ Yehowa sobo sɛ ne nsa asi fam?

¹⁶ Ɛbɛyɛ sɛ dɛn bio na Satan nyaa adwene sɛ anka Onyankopɔn bɛyɛ? Ɛbɛyɛ sɛ Satan nyaa adwene sɛ Yehowa bɛma Adam ne Hawa awo mma, na wagyaa wɔn ma wɔde wɔn bɔne ne wɔn sintɔ atena asaase no so afebɔɔ. (Ɔsɛnk. 7:20; Rom. 3:23) Ɛbaa saa a, ɔkwan biara so anka Ɔbonsam bɛbɔ Yehowa sobo sɛ ne nsa asi fam. Adɛn ntia? Efisɛ na Onyankopɔn atirimpɔw paa ne sɛ Adam ne Hawa asefo a wɔyɛ asoɔmmerɛw a bɔne biara nni wɔn ho na ɛbɛtena Paradise asaase so afebɔɔ.

17. Bere a Satan ne Adam ne Hawa tew atua no, ɔkwan bɛn na Yehowa faa so siesiee asɛm no, na ebewie sɛn? (Hwɛ mfoni no nso.)

¹⁷ Bere a Satan ne Adam ne Hawa tew atua no, ɔkwan a Yehowa faa so siesiee  asɛm no, ɛbɛyɛ sɛ ɛyɛɛ Satan nwanwa paa. (Dw. 92:5) Yehowa maa Adam ne Hawa woo mma, na ɛno maa n’asɛm baa mu. Wei kyerɛ sɛ Yehowa nyɛ ɔtorofo, efisɛ ne nsa ansi fam. Ɔhwɛe sɛ ɔbɛma n’atirimpɔw abam, enti nea ɔyɛe ne sɛ, ɔmaa ‘aseni’ bi bae sɛ ommegye Adam ne Hawa asefo a wɔyɛ asoɔmmerɛw. (Gen. 3:15; 22:18) Agyede no ho nhyehyɛe a Yehowa yɛe no, ɛbɛyɛ sɛ ɛmaa Satan ho dwiriw no! Adɛn nti na yɛreka saa? Efisɛ saa nhyehyɛe no gyina ɔdɔ kann so. (Mat. 20:28; Yoh. 3:16) Satan de, ɔdɔ biara nni ne mu; ɔyɛ pɛsɛmenkominya. Ɛnde, agyede no nti, dɛn na ebesi? Sɛ Mfirihyia Apem Nniso no ba awiei a, Adam ne Hawa asefo asoɔmmerɛwfo a bɔne biara nni wɔn ho no bɛtena paradise asaase so, sɛnea Yehowa bɔɔ ne tirim mfiase no. Saa bere no, sɛ yɛbɛka a, Yehowa bɛka sɛ “Mene Omega.”

18. Nsɛm mmiɛnsa bɛn na Onyankopɔn aka a ɛma yenya ne mu awerɛhyem? (Hwɛ adaka a ɛne “ Nsɛm Mmiɛnsa a Ɛma Yenya Awerɛhyem Sɛ Yehowa Bɔhyɛ Bɛbam” no nso.)

¹⁸ Adesua yi mu no, yɛahu nea enti a yebetumi agye adi sɛ asaase no bɛyɛ Paradise. Dɛn na yebetumi aka akyerɛ nkurɔfo ama wɔagye adi sɛ ɛbɛba ampa? Nea edi kan, Yehowa ankasa na wahyɛ bɔ no. Adiyisɛm nhoma no ka sɛ: “Nea ɔte ahengua no so no kae sɛ: ‘Hwɛ! mereyɛ nneɛma nyinaa foforo.’” Ɔwɔ nyansa ne tumi a ɔde bɛma ne bɔhyɛ no abam, na ɔpɛ sɛ ɔyɛ saa nso. Nea ɛtɔ so mmienu, Yehowa ani so de, ɛbɔ a ɔhyɛe no abam dedaw. Ɛno nti na ɔkaa sɛ: “Nsɛm yi yɛ nokware, na ɛrenni huammɔ. . . . Aba mu awie!” no. Nea ɛtɔ so mmiɛnsa, sɛ Yehowa fi biribi ase a, ɔmfa nkɔso kwan mu; ɔyɛ wie. Ɛno nti na ɔkaa sɛ: “Mene Alfa ne Omega” no. Yehowa bɛma ada adi sɛ Satan yɛ ɔtorofo na wadi nkogu pɔtɔɔ.

19. Sɛ nkurɔfo nnye nni sɛ Paradise a Onyankopɔn ahyɛ ho bɔ no bɛba a, dɛn na wubetumi ayɛ?

¹⁹ Awerɛhyem a Onyankopɔn ama yɛanya no, kae sɛ bere biara a wobɛka ho asɛm akyerɛ nkurɔfo wɔ asɛnka mu no, ɛma gyidi a wowɔ sɛ Yehowa bɔhyɛ bɛbam no mu yɛ den. Enti Paradise a ɛreba ho bɔhyɛ a ɛwɔ Adiyisɛm 21:4 no, bere foforo a wobɛkan akyerɛ obi a ɔbɛka sɛ, “Nea woreka yi de, wugye di sɛ ɛbɛbam?” no, dɛn na wubetumi ayɛ? Wubetumi akenkan Adiyisɛm 21:​5, 6 no na woakyerɛkyerɛ mu akyerɛ no. Ma onhu sɛnea ɛbɔ a Yehowa ahyɛ no, ɔde ne nsa ahyɛ ase de akyerɛ sɛ ɔkwan biara so ɛbɛbam.—Yes. 65:16.