1. Sɛn na Bible ka ɔdɔ kann ho asɛm?

 ƆDƆ te “sɛ ogya a ɛredɛw brambrambram, Yah gyaframa. Nsu a ɛrebu fa so rentumi nnum ɔdɔ, na nsubɔnten rentumi nhohoro nkɔ.” b (Nmd. 8:6, 7) Ɔdɔ kann ho nkyerɛkyerɛmu yi yɛ dɛ paa! Saa asɛm no ma awarefo nya awerɛhyem sɛ wɔbetumi adodɔ wɔn ho afebɔɔ.

2. Dɛn na ɛsɛ sɛ awarefo yɛ na wɔn dɔ ano annwo?

² Sɛ awarefo bi bɛdɔ wɔn ho afebɔɔ a, egyina wɔn so. Yɛmfa anyina a yɛde asɔ gya nyɛ nhwɛso. Sɛ ogya no betumi adɛw bere nyinaa a, ɛwɔ hɔ ara a ɛsɛ sɛ yɛde anyina no bi hyehyɛ mu. Sɛ yɛanyɛ saa a, nkakrankakra ogya no bedum. Ɔdɔ a ɛwɔ okunu ne ɔyere ntam nso, saa ara na ɛte. Sɛ emu betumi ayɛ den afebɔɔ a, gye sɛ wɔyɛ ho adwuma. Ɛtɔ da a, awarefo bi betumi ate nka sɛ wɔn dɔ ano redwo, ɛnkanka bere a wɔn sikasɛm nkɔ yiye, yare reteetee wɔn anaa wɔrehyia abatete mu haw. Enti sɛ woaware a, wobɛyɛ dɛn ama “Yah gyaframa” no akɔ so adɛw wɔ w’aware mu? Adesua yi mu no, yɛbɛhwɛ nneɛma mmiɛnsa a ɛbɛboa wo ama w’aware asɔ, na anigye aba mu. c

3. Sɛ awarefo no mu biara ne Yehowa ayɔnkofa mu yɛ den a, sɛn na ɛboa na wɔn dɔ ano annwo? (Ɔsɛnkafo 4:12) (Hwɛ mfoni no nso.)

³ Sɛ “Yah gyaframa” no bɛkɔ so adɛw wɔ aware bi mu a, ɛsɛ sɛ awarefo no mu biara yere ne ho fa Yehowa adamfo denneennen. Sɛn na saa ayɔnkofa yi boa wɔn aware no? Ayɔnkofa a awarefo no ne wɔn soro Agya no wɔ no, sɛ ɛsom bo ma wɔn a, wɔntwentwɛn wɔn nan ase sɛ wɔde n’afotu bɛyɛ adwuma. Ɛba saa a, ɔhaw a ebetumi ama wɔn dɔ ano adwo no, wɔtumi kwati anaa wɔtumi gyina ano. (Kenkan Ɔsɛnkafo 4:12.) Afei nso, wɔn a wɔne Yehowa wɔ ayɔnkofa a emu yɛ den no, wɔbɔ mmɔden sɛ wɔbesuasua ne su te sɛ ayamye, abotare, ne bɔnefakyɛ. (Efe. 4:32–5:1) Awarefo a wɔda su a ɛte saa adi no, ɛnyɛ den sɛ ɔdɔ a ɛwɔ wɔn ntam no bɛkɔ so anyin. Onuawa bi a ne din de Lena a waware bɛboro mfe 25 ka sɛ, “Obi a ɔdɔ Yehowa de, ɛnyɛ den sɛ wobɛdɔ no, na woabu no.”

4. Adɛn nti na Yosef ne Maria na Yehowa paw wɔn sɛ wɔnyɛ Mesia a na ɔbɛba daakye no awofo?

⁴ Yɛnhwɛ Bible mu nhwɛso bi. Bere a na Yehowa pɛ sɛ ɔpaw awarefo a na wɔbɛyɛ Mesia no awofo no, Dawid asefo no mu hena na ɔpaw wɔn? Ɔpaw Yosef ne Maria. Adɛn ntia? Ná wɔn mu biara yɛ Yehowa adamfo, na na Yehowa nim sɛ ɔdɔ a wɔwɔ ma no no bedi hene wɔ wɔn aware mu. Awarefo, dɛn na mubetumi asua afi Yosef ne Maria hɔ?

5. Dɛn na okununom betumi asua afi Yosef hɔ?

⁵ Ná Yosef ntwentwɛn ne nan ase sɛ ɔde Yehowa akwankyerɛ bɛyɛ adwuma, enti ɔbɛyɛɛ okunu pa. Anyɛ yiye koraa no, onyaa akwankyerɛ a ɛfa n’abusua ho mprɛnsa fii Onyankopɔn hɔ. Emu biara no, wantenatena ho koraa, bere mpo a na ehia sɛ ɔyɛ nsakrae akɛse no. (Mat. 1:20, 24; 2:13-15, 19-21) Esiane sɛ Yosef tiee Onyankopɔn akwankyerɛ nti, otumi bɔɔ Maria ho ban, ɔboaa no, na ɔhwɛɛ no. Nea Yosef yɛe yi, wunhu sɛ na ɛbɛma Maria adɔ no na wabu no kɛse? Okununom, sɛ mohwehwɛ Bible mu afotu a ɛbɛboa mo ama moahwɛ mo abusua a, ɛkyerɛ sɛ moresuasua Yosef. d Sɛ ehia sɛ moyɛ nsakrae mpo na mode saa afotu no ayɛ adwuma, na moyɛ a, ɛbɛma mo yerenom ahu sɛ modɔ wɔn, na ɛbɛma mo aware asɔ. Onuawa bi a ɔwɔ Vanuatu a waware bɛboro mfe 20 ka sɛ: “Sɛ me kunu hwehwɛ Yehowa akwankyerɛ na ɔde yɛ adwuma a, ɛma minya obu kɛse ma no. Ɛma me koma tɔ me yam, na ɛmma m’adwene nhinhim wɔ ne gyinaesi ho.”

6. Dɛn na ɔyerenom betumi asua afi Maria hɔ?

 ⁶ Ná Maria ankasa nso dɔ Yehowa; na ne gyidi nnyina Yosef so. Ná onim Kyerɛwnsɛm no mu yiye. Ogyee bere nso dwinnwen nea osuae no ho. (Luka 2:19, 51) Ɛda adi sɛ sɛnea na Maria dɔ Yehowa nti, ɔbɛyɛɛ ɔyere pa. Ɛnnɛ, ɔyerenom pii bɔ mmɔden sɛ wɔbesuasua Maria. Sɛ yɛbɛyɛ nhwɛso a, onuawa bi a ne din de Emiko ka sɛ: “Menwaree no, na me ara mewɔ nhyehyɛe a ɛboa ma me ne Yehowa ntam yɛ kama. Nanso mewaree no, mihui sɛ esiane sɛ na me kunu na edi anim bɔ mpae, na ɔno ara nso na edi anim ma yɛyɛ nneɛma a ɛfa Yehowa som ho nti, na akɔyɛ sɛ me gyidi gyina no so. Mibehui sɛ, ɛba me ne Yehowa ntam ayɔnkofa a, ɛsɛ sɛ me ara mesoa m’adesoa. Enti seesei, ɛyɛ a mepɛ bere de bɔ Onyankopɔn mpae, kenkan Kyerɛwnsɛm no, na midwinnwen nea makenkan no ho.” (Gal. 6:5) Ɔyerenom, sɛ mokɔ so hyɛ mo ne Yehowa ayɔnkofa mu den a, ɛbɛma mo kununom anya nneɛma pii a wɔbegyina so ayi mo ayɛ, na wɔadɔ mo.—Mmeb. 31:30.

7. Dɛn na awarefo betumi asua afi Yosef ne Maria hɔ?

⁷ Afei nso, Yosef ne Maria boom yɛɛ nea ɛbɛma wɔne Yehowa ayɔnkofa mu akɔ so ayɛ den. Wɔhui sɛ ehia sɛ wɔbom som Yehowa sɛ abusua. (Luka 2:22-24, 41; 4:16) Ebetumi aba sɛ na ɛnyɛ mmerɛw sɛ wɔbɛyɛ saa, ɛnkanka bere a na abusua no reyɛ kɛse no, nanso wɔbɔɔ wɔn ho mmɔden yɛe. Wei yɛ nhwɛso pa paa ma awarefo a ɛwɔ hɔ nnɛ! Sɛ mowɔ mma te sɛ nea na Yosef ne Maria wɔ no a, ebia ɛbɛyɛ den ama mo sɛ mobɛkɔ adesua anaa mobɛpɛ bere de ayɛ abusua som. Ebetumi mpo ayɛ den ama mo sɛ mubenya bere de asua ade, anaa moabom abɔ mpae sɛ awarefo. Nanso, monkae sɛ, sɛ mobom som Yehowa a, ɛma mobɛn no, na ɛma mo mu biara nso bɛn ne yɔnko. Enti momfa Yehowa som nni kan wɔ biribiara mu.

8. Sɛ awarefo bi aware agyigya a, dɛn na wɔbetumi ayɛ na wɔanya abusua som so mfaso kɛse?

⁸ Sɛ w’aware agyigya nso ɛ? Ɛnde, ebia abusua som a mobɛbom ayɛ no renyɛ wo akɔnnɔ. Sɛ saa a, ahyɛase no, mubetumi apɛ biribi tiawa bi a ɛyɛ anigye na mo adwene hyia wɔ ho asusuw ho. Wei bɛhyɛ mo aware no mu gya, na ɛbɛma mo ani agye ho paa sɛ mobɛbom asom Yehowa.

9. Adɛn nti na ɛsɛ sɛ okunu ne ɔyere nya bere ma wɔn ho?

⁹ Awarefo, ade foforo nso a ɛbɛboa mo ma moahyɛ mo aware mu gya ne sɛ mubenya bere ama mo ho. Sɛ moyɛ saa a, ɛremma sɛ mote dan baako mu nso obiara nam ne kwan. (Gen. 2:24) Lilia ne Ruslan aware bɛboro mfe 15. Hwɛ nokwasɛm bi a wɔwaree ara pɛ wɔhui. Ɔbea no ka sɛ: “Yehui sɛ, sɛnea na yɛn adwene yɛ yɛn sɛ yebenya bere ama yɛn ho paa no, sɛɛ na ɛnte saa. Adwumasɛm, efie nnwuma, ne akyiri yi mma a yɛwoo wɔn no gyee yɛn bere nyinaa. Yehui sɛ, sɛ yɛannya bere amma yɛn ho sɛ awarefo a, wobɛhwɛ na yɛte bom nso na obiara nam ne kwan.”

10. Sɛn na awarefo betumi de nnyinasosɛm a ɛwɔ Efesofo 5:15, 16 no ayɛ adwuma?

¹⁰ Dɛn na awarefo betumi ayɛ na wɔanya bere ama wɔn ho? Ebia ɛho behia sɛ mopɛ bere anaa moyɛ nhyehyɛe a ɛbɛma  moayɛ nneɛma abom. (Kenkan Efesofo 5:15, 16.) Onua bi a ɔwɔ Nigeria a ne din de Uzondu ka sɛ: “Sɛ mereyɛ nhyehyɛe a mede bɛyɛ me nneɛma a, ɛyɛ a mede bere a me ne me yere de bɛyɛ nneɛma abom ka ho, na mehwɛ sɛ meremfa biribiara nhyɛ hɔ.” (Filip. 1:10) Yɛnhwɛ sɛnea Anastasia de ne bere di dwuma yiye. Ɔyɛ ɔmansin sohwɛfo bi yere wɔ Moldova. Ɔka sɛ: “Sɛ me kunu redi n’asɛde ho dwuma a, me nso mede saa bere no yɛ me nneɛma. Ɛno ma akyiri yi yetumi nya bere ma yɛn ho.” Nanso sɛ nnwuma a egu mo so nti, ɛyɛ den sɛ mubenya bere ama mo ho nso ɛ?

11. Nnwuma bɛn na Akwila ne Priskila boom yɛe?

¹¹ Awarefo betumi asuasua Akwila ne Priskila. Ná wɔyɛ awarefo a tete Kristofo no bu wɔn paa. (Rom. 16:3, 4) Ɛmfa ho sɛ Bible no nka wɔn aware ho asɛm nkɔ akyiri no, ɛma yehu sɛ wɔboom yɛɛ adwuma, wɔboom kaa asɛmpa no, na wɔboaa afoforo. (Aso. 18:2, 3, 24-26) Nokwasɛm ne sɛ, bere biara a Bible bɛbɔ Akwila din no, na Priskila ka ne ho.

12. Dɛn na okunu ne ɔyere betumi abom ayɛ na ama wɔanya bere pii ama wɔn ho? (Hwɛ mfoni no nso.)

¹² Sɛn na awarefo betumi asuasua Akwila ne Priskila? Wo de, nneɛma pii a ɛsɛ sɛ wo ne wo kunu anaa wo yere yɛ no, susuw ho hwɛ. Mubetumi abom ayɛ saa nneɛma no bi anaa? Sɛ yɛbɛyɛ nhwɛso a, Akwila ne Priskila boom kaa asɛmpa no. Mo nso, ɛyɛ a motaa bom yɛ saa? Akwila ne Priskila boom yɛɛ adwuma nso. Ebia ɛsono adwuma a woyɛ, ɛnna ɛsono wo hokafo nso de, nanso mubetumi abom ayɛ fie nnwuma no bi anaa? (Ɔsɛnk. 4:9) Sɛ mobom yɛ adwuma bi a, ɛma muhu sɛ moyɛ baako, na munya hokwan bɔ nkɔmmɔ. Robert ne Linda aware bɛboro mfe 50. Robert ka sɛ: “Nokwasɛm ne sɛ, yennya bere pii mfa nnye yɛn ani. Nanso sɛ merehohoro nkyɛnsee mu na me yere repopa mu, anaa sɛ mewɔ abɔnten redɔw na ɔbɛboa me a, ɛma m’ani gye paa. Sɛ yɛbom yɛ nneɛma a, ɛma yɛyɛ baako, na ɛma ɔdɔ a ɛwɔ yɛn ntam no yɛ kɛse.”

13. Sɛ okunu ne ɔyere betumi ayɛ baako a, dɛn na ɛsɛ sɛ wɔyɛ?

¹³ Monkae sɛ, te a mote bom no ara kɛkɛ nkyerɛ sɛ mobɛyɛ baako. Ɔbea warefo bi a ɔwɔ Brazil ka sɛ: “Nnansa yi, nneɛma a ɛtwetwe nnipa adwene adɔɔso, enti mahu sɛ yebetumi anya adwene sɛ bɔ a yɛabom te dan baako mu no ara kɛkɛ kyerɛ sɛ yenya bere ma yɛn ho. Mahu sɛ te a yɛte bom akyi no, biribi foforo wɔ hɔ a ɛsɛ sɛ meyɛ. Ɛne sɛ menya bere ama me kunu.” Yɛnhwɛ Bruno ne ne yere Tays nso. Wɔhwɛ sɛ obiara benya bere ama ne yɔnko. Ɔbarima no ka sɛ: “Sɛ yɛregye yɛn ahome a, yɛpɛ baabi de  yɛn fon to sɛnea ɛbɛyɛ a yebenya bere ama yɛn ho.”

14. Sɛ awarefo bi ani nnye ho sɛ wɔbɛbom ayɛ nneɛma a, dɛn na wɔbetumi ayɛ?

¹⁴ Na sɛ wo ne wo kunu anaa wo yere ani nnye ho sɛ mobɛbom ayɛ nneɛma nso ɛ? Ebia ɛsono nea mo mu biara ani gye ho, anaa ebia obiara ho yɛ ne yɔnko ahi. Sɛ saa a, dɛn na mubetumi ayɛ? Momma yɛnsan nhwɛ anyina a yɛde asɔ gya a yedii kan kaa ho asɛm no. Ɛnyɛ sɛ wosɔɔ gya no ara a na afi ase redɛw brambrambram. Ehia sɛ wode anyina no bi hyehyɛ mu nkakrankakra. Mo nso, saa ara na da biara mubetumi apɛ bere kakra de ayɛ nneɛma bi abom. Monhwɛ sɛ mobɛyɛ biribi a mo mmienu nyinaa ani gye ho, na ɛnyɛ biribi a ɛbɛkɔ akɔfa akasakasa aba. (Yak. 3:18) Mufi ase nkakrankakra a, ebetumi ama moasan ahyɛ mo dɔ no mu gya.

15. Sɛ awarefo betumi ahyɛ wɔn dɔ mu gya a, adɛn nti na ehia paa sɛ obiara bu ne yɔnko?

¹⁵ Obu ho hia paa wɔ aware mu. Ɛte sɛ mframa a ɛma ogya dɛw. Sɛ ogya annya mframa a, ɛnkyɛ koraa na adum. Aware nso, sɛ obu nni mu a, ɛnkyɛ na ɔdɔ no ano adwo. Nanso sɛ awarefo no mu biara bɔ mmɔden da obu adi kyerɛ ne yɔnko a, na wɔrehyɛ wɔn dɔ no mu gya. Kae sɛ, ɛnyɛ wo na wobɛkyerɛ sɛ wubu wo kunu anaa wo yere, na mmom ɔno na ɔbɛkyerɛ sɛ wubu no anaa wummu no. Penny ne Aret aware bɛboro mfe 25. Ɔbea no ka sɛ: “Obu a yɛn mu biara wɔ ma ne yɔnko nti, ɛma fie yɛ dɛ. Obiara tumi fi ne koma mu kasa efisɛ yenim sɛ yɛn mu biara remmɔ ne yɔnko asɛm ngu.” Enti, dɛn na wubetumi ayɛ na ama wo kunu anaa wo yere ate nka paa sɛ wubu no? Yɛnhwɛ Abraham ne Sara.

16. Dɛn na okununom betumi asua afi Abraham hɔ? (1 Petro 3:7) (Hwɛ mfoni no nso.)

¹⁶ Ná Abraham bu Sara. Ná otie Sara, na na ɔyɛ no brɛbrɛ. Da bi a na Sara abotow no, ɔde abufuw kaa nea ɛhaw no kyerɛɛ Abraham, na ɔde nea na asi no ho sobo mpo bɔɔ Abraham. Wohwɛ a, Abraham nso bo fuwii, na ɔkekaa n’adwene kyerɛɛ no anaa? Daabi. Ná onim sɛ Sara taa n’akyi, na ɔyɛ ɔbea a ɔbrɛ ne ho ase. Abraham tiee Sara, na ɔbɔɔ mmɔden sɛ obesiesie asɛm a aba no. (Gen. 16:5, 6) Dɛn na yebetumi asua afi mu? Okununom, mo na ɛsɛ sɛ musisi gyinae wɔ abusua no mu. (1 Kor. 11:3) Nanso sɛ okunu dɔ ne yere a, obebisa n’adwene ansa na wasi gyinae, ɛnkanka sɛ gyinae no bɛfa ne yere nso ho a. (1 Kor. 13:4, 5) Ɛtɔ da nso a, ebia na nneɛma bi haw wo yere na ebehia sɛ ɔka ho asɛm kyerɛ wo.  Ɛba saa a, woyɛ aso tie no de kyerɛ sɛ wote nea ɔrefa mu no ase anaa? (Kenkan 1 Petro 3:7.) Angela ne Dmitry aware bɛyɛ mfe 30. Angela kyerɛ nea ɛma ohu sɛ ne kunu bu no. Ɔka sɛ: “Sɛ biribi haw me na mepɛ sɛ meka ho asɛm kyerɛ Dmitry, anaa mepɛ sɛ me ne no bɔ nkɔmmɔ kɛkɛ mpo a, bere nyinaa wayɛ krado sɛ obetie me. Sɛ mekasa hatuhatu mpo a, onya me ho abotare.”

17. Dɛn na ɔyerenom betumi asua afi Sara hɔ? (1 Petro 3:5, 6)

¹⁷ Gyinae a Abraham sisii no, Sara gye toom de kyerɛe sɛ obu no. (Gen. 12:5) Bere bi, Abraham nyaa ahɔho bi a na ɔnhwɛ kwan, na na ɔpɛ sɛ ɔsom wɔn hɔho. Ɔka kyerɛɛ Sara sɛ onnyae nea ɔreyɛ no, na ɔnyɛ paanoo mma wɔn; ná paanoo a ɔbɛyɛ no dɔɔso. (Gen. 18:6) Ɛhɔ ara Sara tiei, na ɔyɛɛ nea Abraham kae no. Ɔyerenom, mubetumi agye gyinae a mo kununom sisi atom de asuasua Sara. Moyɛ saa a, ɛbɛhyɛ mo aware mu den. (Kenkan 1 Petro 3:5, 6.) Dmitry kyerɛ nea ɛma ohu sɛ ne yere bu no. Ɔka sɛ: “Sɛ misi gyinae bi na Angela ne me nyɛ adwene mpo a, ogye tom. Wei yɛ biribi a ɛyɛ me fɛ paa wɔ ne ho. Sɛ gyinaesi no ankɔ yiye mpo a, ɔnkasa ntia me.” Nokwasɛm ne sɛ, sɛ wo hokafo bu wo a, ɛnyɛ den koraa sɛ wobɛdɔ no!

18. Sɛ awarefo yere wɔn ho hyɛ wɔn aware mu gya a, sɛn na ɛboa wɔn?

¹⁸ Ɛnnɛ, ɔdɔ a ɛredɛw te sɛ gya wɔ Kristofo aware mu no, Satan pɛ sɛ odum no. Onim sɛ ɔdɔ a awarefo wɔ ma wɔn ho no, sɛ ano dwo a, ebia wɔbefi ase atwe wɔn ho afi Yehowa ho. Nanso ɔdɔ kann a ɛte sɛ ogya de, ennum da! Yɛn mpaebɔ ne sɛ, ɔdɔ a ɛwɔ w’aware mu no bɛyɛ te sɛ ɔdɔ a Solomon Dwom ka ho asɛm no. Munsi mo bo sɛ mode Yehowa bedi kan wɔ mo aware mu. Afei nso, munnya bere mma mo ho, obiara nnya obu mma ne yɔnko, obiara nte ne yɔnko ase, na ɔmfa nea ne yɔnko hia mma no. Moyɛ saa a, mo aware bɛhyɛ Yehowa anuonyam, efisɛ ɔno ne ɔdɔ kann Farebae. Ɛba saa a, mo dɔ no bɛyɛ sɛ ogya a wɔka hyem bere nyinaa, ɛrennum da.