1. Wote nka sɛn wɔ nokware no ho?

 NOKWARE a ɛwɔ Bible mu no, ɛda Yehowa asomfo koma so paa. Ɛno na yɛn gyidi gyina so. (Rom. 10:17) Yɛabehu sɛ, Kristofo asafo no a Yehowa ahyehyɛ no, ɛno ne “nokware no dum ne ne nnyinaso.” (1 Tim. 3:15) Afei nso, nokware a ɛwɔ Bible mu no, wɔn a ‘wodi yɛn anim no’ kyerɛkyerɛ mu kyerɛ yɛn, na wɔma yɛn akwankyerɛ a ɛboa yɛn ma yɛyɛ Onyankopɔn apɛde. Enti yɛbrɛ yɛn ho ase tie wɔn.—Heb. 13:17.

2. Sɛnea Yakobo 5:19 kyerɛ no, sɛ yehu nokware no mpo a, anhwɛ a dɛn na yebetumi ayɛ?

² Bere a yɛabehu nokware no, na yɛagye atom mpo sɛ Onyankopɔn ahyehyɛde no na ɛde akwankyerɛ a edi mu ma yɛn no, anhwɛ a, yebetumi aman afi ho. (Kenkan Yakobo 5:19.) Satan mpɛ yɛn yiye, enti ɔmpɛ sɛ yegye Bible no di, na akwankyerɛ a Onyankopɔn ahyehyɛde no de ma yɛn nso, ɔmpɛ sɛ yɛde yɛ adwuma.—Efe. 4:14.

3. Adɛn nti na ɛsɛ sɛ yeso nokware no mu denneennen? (Efesofo 6:​13, 14)

³ Kenkan Efesofo 6:​13, 14. Ɛrenkyɛ, Ɔbonsam nam atosɛm so bɛdaadaa amanaman no ma wɔasɔre atia Yehowa. (Adi. 16:​13, 14) Yebetumi ahwɛ kwan nso sɛ mmɔden a Satan rebɔ sɛ ɔbɛdaadaa Yehowa nkurɔfo no, obemia mu. (Adi. 12:9) Ɛno nti, ɛho hia sɛ yesua sɛnea yebehu nsonsonoe a ɛda nokware ne atoro ntam, sɛnea ɛbɛyɛ a yebetumi ayɛ osetie ama nokware no. (Rom. 6:17; 1 Pet.  1:22) Sɛ yebenya yɛn ti adidi mu wɔ ahohiahia kɛse no mu a, ɛho hia sɛ yɛyɛ saa!

4. Dɛn na yebesusuw ho wɔ adesua yi mu?

⁴ Adesua yi mu no, yɛbɛhwɛ suban mmienu bi a ehia sɛ yenya na aboa yɛn ma yɛahu nokware a ɛwɔ Bible mu no. Afei nso akwankyerɛ a Onyankopɔn ahyehyɛde no de ma yɛn no, yɛbɛhwɛ sɛnea saa suban no bɛboa yɛn ma yɛde ayɛ adwuma. Ɛno akyi no, yɛbɛhwɛ nneɛma mmiɛnsa bi a ɛsɛ sɛ yɛyɛ na aboa yɛn ma yɛakɔ so aso nokware no mu denneennen.

SUBAN A EHIA SƐ YENYA NA ABOA YƐN AMA YƐAHU NOKWARE NO

5. Sɛn na Yehowa ho suro boa yɛn ma yehu nokware no?

⁵ Yehowa ho suro. Sɛ yesuro Yehowa a, ɛkyerɛ sɛ yɛdɔ no paa na yɛmpɛ sɛ yɛbɛyɛ biribiara a ɛnsɔ n’ani. Enti yɛyere yɛn ho sua ade sɛnea ɛbɛyɛ a yebehu papa ne bɔne mu nsonsonoe. Afei nso, adesua a ɛte saa boa yɛn ma yehu atosɛm ne nokwasɛm mu nsonsonoe sɛnea ɛbɛyɛ a yɛbɛsɔ Yehowa ani. (Mmeb. 2:​3-6; Heb. 5:14) Ɔdɔ a yɛwɔ ma Yehowa no, ɛsɛ sɛ emu yɛ den koraa sen nnipa ho suro, efisɛ nea nnipa ani gye ho no, mpɛn pii no ɛnsɔ Yehowa ani.

6. Dɛn na ɛmaa Israel mpanyimfo du kyinkyim nokware no?

⁶ Sɛ yesuro nnipa sen Onyankopɔn a, anhwɛ a ɛbɛma yɛatwe yɛn ho afi nokware no ho. Mpanyimfo 12 a wɔkɔhwɛɛ asaase a Yehowa de hyɛɛ Israelfo no bɔ no, momma yɛmfa wɔn asɛm no nyɛ nhwɛso. Wɔn mu du de, wɔmaa Kaananfo no ho hu tɔɔ wɔn so, efisɛ na ɔdɔ a wɔwɔ ma Yehowa no mu nyɛ den. Wɔka kyerɛɛ wɔn nuanom Israelfo no sɛ: “Yɛrentumi mforo nkɔ nkɔtow nhyɛ nkurɔfo no so, efisɛ wɔn ho yɛ den sen yɛn.” (Num. 13:​27-31) Nnipa ani so de, ɛyɛ ampa sɛ na Kaananfo no ho yɛ den sen Israelfo no. Nanso ka  a wɔkaa sɛ Israelfo no rentumi nni wɔn atamfo so nkonim no kyerɛ sɛ na wɔayi Yehowa asi nkyɛn. Nea na Yehowa pɛ sɛ Israelfo no yɛ no, ɛno na anka ɛsɛ sɛ mpanyimfo du no de wɔn adwene si so. Ná ɛnkyɛe koraa na Yehowa ama wɔn nea wɔhia, enti anka ɛsɛ sɛ wɔdwinnwen ɛno nso ho. Wɔyɛɛ saa a, anka wɔbehu sɛ tumi a Yehowa wɔ no, Kaananfo no ahoɔden nnu ho hwee. Ná Yosua ne Kaleb pɛ sɛ Yehowa gye wɔn tom; ná wɔnte sɛ mpanyimfo du a wɔnni gyidi no. Wɔka kyerɛɛ ɔman no sɛ: “Sɛ Yehowa agye yɛn atom a, ɛnde nea ɛte biara ɔde yɛn bɛkɔ asaase yi so na ɔde ama yɛn.”—Num. 14:​6-9.

7. Dɛn na yɛyɛ a ɛbɛma yɛakɔ so asuro Yehowa? (Hwɛ mfoni no nso.)

⁷ Gyinae biara a yebesi no, ɛsɛ sɛ yɛhwɛ sɛ ɛsɔ Yehowa ani. Yɛyɛ saa a ɛbɛma yɛakɔ so asuro Yehowa. (Dw. 16:8) Sɛ wokenkan Bible mu asɛm bi a, bisa wo ho sɛ, ‘Me na saa asɛm yi too me a, gyinae bɛn na anka mesi?’ Fa no sɛ bere a Israel mpanyimfo du no bɛbɔɔ amanneɛ sɛ wɔrentumi nni Kaananfo no so nkonim no, na wowɔ hɔ bi. Nnipa ho suro nti, anka wubegye wɔn asɛm no adi, anaa ɔdɔ a wowɔ ma Yehowa nti, anka wobɛyɛ nea ɔpɛ? Israelfo a na ɛwɔ hɔ saa bere no annye anni sɛ nokware na na Yosua ne Kaleb reka no. Ɛno nti, Yehowa amma saa Israelfo no ankɔ Bɔhyɛ Asaase no so bi.—Num. 14:​10, 22, 23.

8. Suban bɛn na ɛsɛ sɛ yɛyere yɛn ho nya, na adɛn ntia?

⁸ Ahobrɛase. Wɔn a wɔbrɛ wɔn ho ase na Yehowa ma wɔhu nokware no. (Mat. 11:25) Yɛbrɛɛ yɛn ho ase ma obi kyerɛkyerɛɛ yɛn nokware no. (Aso. 8:​30, 31) Nanso ɛsɛ sɛ yɛhwɛ yiye na yɛanyɛ ahomaso. Sɛ yɛyɛ ahomaso a, anhwɛ a yɛbɛte nka sɛ yɛn adwenkyerɛ ne Bible nnyinasosɛm anaa akwankyerɛ a efi Yehowa ahyehyɛde no hɔ no, ne nyinaa yɛ pɛ.

9. Yɛbɛyɛ dɛn akɔ so abrɛ yɛn ho ase?

⁹ Sɛ yebetumi akɔ so abrɛ yɛn ho ase a, ɛsɛ sɛ yɛkae sɛ, sɛ yɛde yɛn ho toto Yehowa a, yɛnsɛ hwee koraa. (Dw. 8:​3, 4) Yebetumi nso asrɛ Yehowa sɛ ɔmmoa yɛn ma yɛmmrɛ yɛn ho ase na ɔnkyerɛkyerɛ yɛn. Yɛyɛ saa a, akwankyerɛ a ɔnam Bible ne n’ahyehyɛde no so de ma yɛn no, ɔbɛboa yɛn ma yɛde ayɛ adwuma, na yɛde nea yɛpɛ ato nkyɛn. Sɛ woreyɛ wo Bible akenkan a, hwehwɛ nneɛma a ɛkyerɛ sɛ Yehowa dɔ ahobrɛasefo, na ɔtan wɔn a wɔyɛ ahantan ne ahomaso. Afei nso, sɛ wunya hokwan bi wɔ Yehowa som mu na ɛkɔba sɛ ɛma wugye din a, ɛsɛ sɛ woyere wo ho paa brɛ wo ho ase.

SƐNEA YEBESO NOKWARE NO MU DENNEENNEN

10. Efi tete besi nnɛ, henanom na Yehowa afa wɔn so de akwankyerɛ ama ne nkurɔfo?

¹⁰ Kɔ so nya awerɛhyem sɛ akwankyerɛ a Yehowa ahyehyɛde no de ma yɛn no ye paa. Tete no, Yehowa nam Mose ne Yosua so de akwankyerɛ maa ne man Israel. (Yos. 1:​16, 17) Ná saa mmarima yi yɛ Yehowa Nyankopɔn ananmusifo, enti sɛ Israelfo no tie wɔn a, na Yehowa hyira wɔn. Mfe pii akyi no, bere a Kristofo asafo no bae no, asomafo 12 no na na wɔde akwankyerɛ ma. (Aso. 8:​14, 15) Akyiri yi, mpanyimfo a na wɔwɔ Yerusalem no bi bɛkaa mmarima a na wɔde akwankyerɛ ma no ho. Bere a anuanom no de wɔn akwankyerɛ yɛɛ adwuma no, “asafo ahorow no kɔɔ so yɛɛ den wɔ gyidi no mu, na wɔn dodow kɔɔ anim daa.” (Aso. 16:​4, 5) Ɛnnɛ, sɛ yɛn nso yɛde akwankyerɛ a  Yehowa ahyehyɛde no de ma yɛn no yɛ adwuma a, ohyira yɛn. Nanso, wɔn a Yehowa apaw wɔn sɛ wɔnni nneɛma anim no, sɛ yɛantie wɔn a, ɔbɛte nka sɛn? Sɛ yebenya saa asɛm no ho mmuae a, gye sɛ yɛhwɛ nea esii bere a na Israelfo nam kwan so rekɔ Bɔhyɛ Asaase no so no.

11. Israelfo a wɔsɔre tiaa Mose a na Onyankopɔn apaw no sɛ onni wɔn anim no, dɛn na ɛtoo wɔn? (Hwɛ mfoni no nso.)

¹¹ Bere a Israelfo no nam kwan so rekɔ Bɔhyɛ Asaase no so no, mmarima a wɔwɔ wɔn mu a wɔwɔ din no, wɔn mu bi sɔre tiaa Mose a na Yehowa apaw no sɛ onni wɔn anim no. Wɔkaa sɛ: “Asafo yi nyinaa nso yɛ nnipa kronkron, obiara yɛ kronkron, na Yehowa wɔ wɔn mu.” (Num. 16:​1-3) Ɛwom, Yehowa ani so de, na ‘asafo no nyinaa’ yɛ nnipa kronkron, nanso Mose na na Yehowa apaw no sɛ onni ne nkurɔfo anim. (Num. 16:28) Enti bere a atuatewfo yi kasa tiaa Mose no, na ɛyɛ Yehowa ankasa na na wɔrekasa tia no. Ɛnyɛ nea Yehowa pɛ na na ehia wɔn, mmom nea wɔpɛ na na ehia wɔn; na wɔn ani bere tumidi ne anuonyam. Wɔn a wɔdii anim tew atua no ne nnipa mpempem pii a wɔkɔkaa wɔn ho no, Onyankopɔn kunkum wɔn nyinaa. (Num. 16:​30-35, 41, 49) Ɛnnɛ nso, obiara a onni akwankyerɛ a Yehowa ahyehyɛde no de ma yɛn akyi no, yenim paa sɛ Yehowa nnye no ntom.

12. Adɛn nti na yebetumi akɔ so de yɛn ho ato Yehowa ahyehyɛde no so?

¹² Yebetumi akɔ so de yɛn ho ato Yehowa ahyehyɛde no so. Sɛ ɛbɛda adi sɛ sɛnea yɛte Bible mu asɛm bi ase no, ɛsɛ sɛ yɛsesa no anaa ɔkwan a yɛfa so yɛ Yehowa som adwuma no, ɛsɛ sɛ yɛyɛ mu nsakrae a, Akwankyerɛ Kuw no ntwentwɛn wɔn nan ase sɛ wɔbɛyɛ. (Mmeb. 4:18) Nea enti a wɔyɛ saa ne sɛ, wɔn koma so ade paa ne sɛ wɔbɛyɛ nea ɛsɔ Yehowa ani. Afei nso, wɔyɛ nea wɔbetumi biara sɛ gyinae biara a wɔbesi no, wɔde begyina Onyankopɔn Asɛm so, efisɛ emu nsɛm  na ɛsɛ sɛ Yehowa asomfo nyinaa de yɛ adwuma.

13. Dɛn ne “nsɛmpa ho nhwɛso” no, na dɛn na ɛsɛ sɛ yɛyɛ wɔ ho?

¹³ ‘Kɔ so kura nsɛmpa ho nhwɛso no mu.’ (2 Tim. 1:13) “Nsɛmpa ho nhwɛso” no, ɛno ne Kristofo nkyerɛkyerɛ a ɛwɔ Bible mu no. (Yoh. 17:17) Biribiara a yegye di no, ɛno na saa nkyerɛkyerɛ no gyina so. Yehowa ahyehyɛde no ama yɛahu sɛ, ɛsɛ sɛ yekura saa nkyerɛkyerɛ no mu denneennen. Sɛ yɛyɛ saa a, Yehowa behyira yɛn.

14. “Nsɛmpa ho nhwɛso” no, ɛyɛɛ dɛn na Kristofo binom ankɔ so ankura mu?

¹⁴ Sɛ yɛankɔ so ankura “nsɛmpa ho nhwɛso” no mu a, dɛn na ebetumi ato yɛn? Yɛnhwɛ nhwɛso bi. Asomafo no bere so no, ɛbɛdaa adi sɛ na Kristofo no bi rekeka sɛ Yehowa da no aba. Ɛbɛyɛ sɛ wɔn nsa kaa krataa bi a ɛkaa biribi saa, na wɔfaa no sɛ Ɔsomafo Paul na ɔkyerɛwee. Kristofo a na ɛwɔ Tesalonika no, wɔn mu bi gyee saa asɛm no dii a wɔanhwehwɛ mu nokware, na wɔkeka kyerɛɛ afoforo mpo. Sɛ wɔkaee nsɛm a Paul ka kyerɛɛ wɔn bere a na ɔwɔ wɔn nkyɛn no a, anka wɔremma saa asɛm no nnaadaa wɔn. (2 Tes. 2:​1-5) Paul tuu ne nuanom fo sɛ, ɛnyɛ asɛm biara a wɔbɛte na ɛsɛ sɛ wɔgye di. Afei nso sɛnea ɛbɛyɛ a daakye wɔn ani bɛda hɔ no, bere a Paul kyerɛw ne krataa a ɛtɔ so mmienu kɔmaa Tesalonikafo no, owiee n’asɛm no sɛ: “Me nkyia a mede m’ankasa me nsa kyerɛwee ni. Ɛyɛ ahyɛnsode wɔ me krataa biara mu; sɛɛ na mekyerɛw.”—2 Tes. 3:17.

15. Atosɛm bi a asɛ ɛyɛ nokware no, yɛbɛyɛ dɛn na annaadaa yɛn? Ma ho nhwɛso. (Hwɛ mfoni no nso.)

¹⁵ Asɛm a Paul kyerɛw kɔmaa Tesalonikafo no, dɛn na yebetumi asua afi mu? Sɛ yɛte asɛm bi a ɛne nea yɛasua wɔ Bible mu no nhyia, anaa nkurɔfo haahaa wɔn ani keka nsɛm bi a, ɛsɛ sɛ yɛhwehwɛ mu yiye. Bere bi, yɛn atamfo a wɔwɔ kan Soviet Union de krataa bi kɔmaa anuanom, na wɔma ɛyɛɛ te sɛ nea efi asafo ti no hɔ. Krataa no mu no, wɔka kyerɛɛ anuanom  no bi sɛ wɔntew wɔn ho mfi asafo no ho na wɔnkɔtew wɔn kuw. Wohwɛ krataa a wɔkyerɛwee no a, na asɛ asɛm biara nni ho. Nanso anuanom anokwafo amma wei annaadaa wɔn. Wɔhui sɛ nsɛm a ɛwɔ krataa no mu ne nea wɔasua no nhyia. Ɛnnɛ, ɛtɔ da a yɛn atamfo bɔ mmɔden sɛ wɔbɛfa abɛɛfo mfiri so ama yɛn adwene mu ayɛ yɛn naa, na wɔde mpaapaemu aba yɛn mu. Sɛ yɛte anaa yɛkenkan asɛm bi a, ɛnsɛ sɛ ‘yɛma ɛsɛe yɛn adwene ntɛm,’ na mmom ɛsɛ sɛ yɛde toto nea yɛasua dedaw no ho hwɛ sɛ ɛyɛ nokware a. Yɛyɛ saa a, ɛbɛbɔ yɛn ho ban.—2 Tes. 2:2; 1 Yoh. 4:1.

16. Sɛnea Romafo 16:​17, 18 kyerɛ no, sɛ obi man fi nokware no ho a, dɛn na ɛsɛ sɛ yɛyɛ?

¹⁶ Wɔn a wɔdi Yehowa nokware no, wo ne wɔn nyɛ baako. Onyankopɔn pɛ sɛ yɛde baakoyɛ bom som no. Sɛ yeso nokware no mu denneennen a, ɛbɛma yɛakɔ so ayɛ baako. Obi man fi nokware no ho a, obetumi de mpaapaemu aba asafo no mu. Sɛ obi yɛ saa a, Onyankopɔn pɛ sɛ ‘yɛtwe yɛn ho fi ne ho.’ Anyɛ saa a, wɔbetumi atwe yɛn afi nokware no ho.—Kenkan Romafo 16:​17, 18.

17. Sɛ yehu nokware no na yeso mu denneennen a, ɛboa yɛn sɛn?

¹⁷ Sɛ yehu nokware no na yeso mu denneennen a, ɛbɛboa yɛn ma yɛakɔ so ayɛ Yehowa nnamfo na yɛn gyidi nso ayɛ den. (Efe. 4:​15, 16) Ɛba saa a, Satan atoro nkyerɛkyerɛ ne ne nnaadaasɛm no renwiawia yɛn, na sɛ ahohiahia kɛse no ba a, Yehowa bɛhwɛ yɛn so abɔ yɛn ho ban. Momma yɛnkɔ so nso nokware no mu denneennen, ‘na asomdwoe Nyankopɔn no ne yɛn bɛtena.’—Filip. 4:​8, 9.