1, 2. Dɛn na ɔsomafo Paulo yɛe de kyerɛe sɛ n’ani sɔ Onyankopɔn adom?

 ƆSOMAFO Paulo tumi kaa no pefee sɛ: ‘Onyankopɔn adom a wadom me no anyɛ kwa.’ (Kenkan 1 Korintofo 15:9, 10.) Esiane sɛ Paulo de ɔtaa baa Kristofo so nti, na onim yiye paa sɛ ɔmfata sɛ Onyankopɔn da mmɔborɔhunu kɛse a ɛte saa adi kyerɛ no.

² Aka kakra ama Paulo awu no, ɔkyerɛw ne yɔnko dwumayɛni Timoteo sɛ: “Meda yɛn Awurade Kristo Yesu a ɔhyɛɛ me den no ase, efisɛ wabu me ɔnokwafo de me ahyɛ ɔsom adwuma bi mu.” (1 Tim. 1:12-14) Dɛn ne saa ɔsom adwuma no? Paulo kyerɛkyerɛɛ mu kyerɛɛ Efeso asafo mu mpanyimfo no sɛ: “Me kra ho nhia me pii sɛ wie a mewie me mmirikatu ne ɔsom adwuma a minya fii Awurade Yesu hɔ sɛ minni Onyankopɔn adom ho asɛmpa no ho adanse fefeefe no.”—Aso. 20:24.

3. Ɔsom adwuma titiriw bɛn na wɔde hyɛɛ Paulo nsa? (Hwɛ mfonini a ɛwɔ adesua yi mfiase no.)

 ³ “Asɛmpa” bɛn na Paul kae a ɛma yehu Yehowa adom? Ɔka kyerɛɛ Kristofo a wɔwɔ Efeso no sɛ: “Moate Onyankopɔn adom ho ofiehwɛ adwuma a mo nti wɔde adom me no.” (Efe. 3:1, 2) Wɔde hyɛɛ Paulo nsa sɛ ɔnka asɛmpa no nkyerɛ wɔn a wɔnyɛ Yudafo, na ɔmma wonhu sɛ wobetumi de wɔn nso akɔka Kristo ho wɔ Mesia Ahenni no mu. (Kenkan Efesofo 3:5-8.) Esiane nsi a Paulo de yɛɛ ne som adwuma no nti, wayɛ nhwɛso pa ama Kristofo a wɔwɔ hɔ nnɛ. Nea ɔyɛe no kyerɛ sɛ adom a Onyankopɔn de dom no no “anyɛ kwa.”

4, 5. Dɛn nti na yebetumi aka sɛ ‘Ahenni ho asɛmpa’ no, ɛno ara ne “Onyankopɔn adom ho asɛmpa” no?

⁴ Awiei bere yi mu no, wɔde ahyɛ Yehowa nkurɔfo nsa sɛ wɔnka ‘Ahenni ho asɛmpa no wɔ asase nyinaa so mfa nni amanaman nyinaa adanse.’ (Mat. 24:14) Asɛm a yɛka no, ɛno ara ne “Onyankopɔn adom ho asɛmpa” no. Nea enti a ɛte saa ne sɛ, nhyira a yɛhwɛ kwan sɛ yebenya wɔ Ahenni no ase no, Yehowa nam Kristo so na ɛbɛma yɛn nsa aka. (Efe. 1:3) Yɛn mu biara mmisa ne ho sɛ, misuasua Paulo de nsi ne ahokeka ka asɛmpa no de kyerɛ sɛ m’ani sɔ adom a Yehowa de adom me no anaa?—Kenkan Romafo 1:14-16.

⁵ Adesua a edi wei anim no, yehuu sɛnea yɛn a yɛyɛ abɔnefo no renya Yehowa adom so mfaso wɔ akwan pii so. Ɛno nti, ɛsɛ sɛ yɛyɛ nea yebetumi biara ma nnipa nyinaa hu ɔkwan a Yehowa nam so reda n’adɔe adi. Afei nso, ehia sɛ yɛma wohu nea wɔn ankasa yɛ a ɛbɛma wɔanya so mfaso. Onyankopɔn adom ho nsɛm bɛn na ɛsɛ sɛ yɛboa nkurɔfo ma wohu?

6, 7. Sɛ yɛka agyede no ho asɛm kyerɛ nkurɔfo a, dɛn na ɛkyerɛ sɛ na yɛreka Onyankopɔn adom ho asɛmpa?

⁶ Ɛnnɛ wiase yi mu no, nnipa bebree yɛ nea wɔpɛ, enti sɛ wɔyɛ bɔne mpo a, wɔn ahonim nhaw wɔn anaa ɛnyɛ wɔn aniwu. Wei ama nnipa pii nhu mpo sɛ ehia sɛ wogye wɔn fi bɔne mu. Bere koro no ara no, nnipa pii nso abehu sɛ, sɛ wɔyɛ nea wɔn ankasa pɛ a, ɛmma wɔn ani nnye. Nnipa pii nnim ade a yɛfrɛ no bɔne, ne sɛnea ɛteetee yɛn no. Bio nso, wonnim nea ɛsɛ sɛ yɛyɛ na ama wɔagye yɛn afi bɔne mu. Wei nyinaa, gye sɛ Yehowa Adansefo ne wɔn kɔbɔ nkɔmmɔ ansa na wɔahu. Ɔdɔ kɛse a Yehowa wɔ, ne n’adom nti na ɔsomaa ne Ba no baa asase so. Ɔbae sɛ ɔrebewu de agye yɛn afi bɔne ne owu mu. Sɛ nnipa komapafo hu wei a, ɛma wɔn koma tɔ wɔn yam.—1 Yoh. 4:9, 10.

⁷ Paulo kaa Yehowa Dɔba no ho asɛm sɛ: “Ɛnam [Yesu] so na yɛanya ogye wɔ ne mogya mu, yiw, yɛn mfomso ho fafiri sɛnea [Yehowa adom] mu ahonya no te.” (Efe. 1:7) Kristo agyede afɔre no yɛ adanse a ɛsen biara a ɛkyerɛ sɛ Onyankopɔn dɔ yɛn. Wei ma yehu sɛ n’adom no yɛ soronko koraa. Sɛ yenya Yesu mogya a ohwie gui no mu gyidi a, wɔde yɛn bɔne bɛkyɛ yɛn na wɔatew yɛn ahonim ho. Hwɛ sɛnea saa asɛm yi a yɛahu no ama yɛn koma atɔ yɛn yam! (Heb. 9:14) Anokwa, wei yɛ asɛmpa a ɛsɛ sɛ yɛma obiara te!

8. Adɛn nti na ehia sɛ wɔka abɔnefo ne Onyankopɔn bom bio?

⁸ Ɛyɛ yɛn asɛyɛde sɛ yɛma nkurɔfo hu sɛ wobetumi ne wɔn Bɔfo no afa adamfo. Onyankopɔn bu nkurɔfo a wonnya nnyaa Yesu afɔrebɔ no mu gyidi no sɛ n’atamfo. Ɔsomafo Yohane kae sɛ: “Nea ogye Ɔba no di no wɔ daa nkwa; nea ontie Ɔba no renhu nkwa, na Onyankopɔn abufuhyew wɔ no so.” (Yoh. 3:36) Anigyesɛm ne sɛ, Kristo afɔrebɔ no aka yɛne Onyankopɔn abom bio. Paulo kae sɛ: “Mo a anka bere bi na moyɛ ananafo ne atamfo esiane mo adwene a na ɛwɔ nnwuma bɔne so nti no, afei de waka mo ne no abom bio denam obiako no honam nipadua so wɔ ne wu mu.”—Kol. 1:21, 22.

9, 10. (a) Adwuma bɛn na Kristo de hyɛɛ ne nuanom a wɔasra wɔn no nsa? (b) Dɛn na “nguan foforo” no reyɛ de aboa wɔn nuanom a wɔasra wɔn no?

⁹ Kristo ama ne nuanom a wɔasra wɔn a wɔwɔ asase so no adwuma bi. Paulo frɛɛ saa adwuma no “mpata som adwuma.” Kristofo a wɔasra wɔn a na wɔwɔ asomafo no bere so no, Paulo kyerɛw wɔn sɛ: “Nneɛma nyinaa fi Onyankopɔn a ɔnam Kristo so apata yɛne no ntam na wama yɛn mpata som adwuma no hɔ, kyerɛ sɛ, ná Onyankopɔn nam Kristo so repata wiase bi aba ne nkyɛn a ommu wɔn mfomso ngu wɔn so, na ɔde mpata asɛm no ahyɛ yɛn nsa. Enti yɛyɛ ahemmɔfo a yesi Kristo ananmu, te sɛ nea Onyankopɔn nam yɛn so resrɛ. Yegyina Kristo ananmu srɛ sɛ: ‘Momma wɔmpata mo mmra Onyankopɔn nkyɛn.’”—2 Kor. 5:18-20.

¹⁰ “Nguan foforo” no bu no sɛ ɛyɛ hokwan kɛse sɛ wɔreboa wɔn nuanom a wɔasra wɔn no ama wɔayɛ ɔsom adwuma ano. (Yoh. 10:16) Nguan foforo no resom sɛ nnipa a Kristo asoma wɔn. Wɔde Onyankopɔn asɛm no rekyerɛkyerɛ nnipa pii, na wɔreboa nkurɔfo ama wɔne Yehowa ntam ayɛ kama. Ɛho hia paa sɛ yedi Onyankopɔn adom ho asɛmpa no ho adanse fefeefe.

11, 12. Adɛn nti na ɛyɛ anigye sɛ nkurɔfo behu sɛ wobetumi abɔ Yehowa mpae?

¹¹ Nnipa bebree bɔ mpae efisɛ ɛma wɔn ho dwo wɔn, nanso wonnye nni ankasa sɛ Onyankopɔn tie wɔn mpaebɔ. Ehia sɛ wohu sɛ Yehowa yɛ “mpaebɔ Tiefo.” Odwontofo Dawid kyerɛwee sɛ: “O mpaebɔ Tiefo, wo nkyɛn na ɔhonam nyinaa bɛba. Mfomso aboro me so. Yɛn mmarato de, wo na wobɛkata so.”—Dw. 65:2, 3.

¹² Yesu ka kyerɛɛ n’asuafo no sɛ: “Sɛ mubisa biribiara me din mu a, mɛyɛ.” (Yoh. 14:14) Ɛda adi sɛ, asɛmfua “biribiara” no kyerɛ biribiara a ɛne Yehowa apɛde hyia. Yohane maa yɛn awerɛhyem sɛ: “Ahotoso a yɛwɔ wɔ ne mu ne sɛ biribiara a yebisa sɛnea n’apɛde te no, otie yɛn.” (1 Yoh. 5:14) Hwɛ sɛnea ɛyɛ anigye sɛ yɛbɛkyerɛkyerɛ nkurɔfo ama wɔahu sɛ mpaebɔ yɛ ɔkwan a eye sen biara a yɛnam so kɔ Yehowa “adom ahengua” no anim! Enti ɛsɛ sɛ yɛboa nkurɔfo ma wohu sɛ mpaebɔ nyɛ biribi a ɛma yɛn ho dwo yɛn bere tiaa bi mu kɛkɛ. (Heb. 4:16) Momma yɛnkyerɛkyerɛ nkurɔfo ma wonhu sɛnea wɔbɛbɔ mpae ɔkwampa so. Bio nso, momma yɛmmoa wɔn mma wɔmmɔ Onii a ɔfata no mpae, na wɔmmɔ nneɛma pa ho  mpae. Sɛ yɛboa wɔn saa a, wobetumi abɛn Yehowa, na sɛ wɔkɔ ahokyere mu a, wɔanya awerɛkyekye.—Dw. 4:1; 145:18.

13, 14. (a) Ɔsom hokwan kɛse bɛn na wɔn a wɔasra wɔn no benya daakye? (b) Adwuma pa bɛn na wɔn a wɔasra wɔn no bɛyɛ ama adesamma?

¹³ Sɛ wiase bɔne yi kɔ awiei mpo a, Yehowa bɛkɔ so adom yɛn. Paulo kaa hokwan soronko bi a Onyankopɔn de ama nnipa 144,000 ho asɛm. Wɔn na Kristo ne wɔn bedi ade wɔ ɔsoro Ahenni no mu. Paulo kyerɛwee sɛ: “Onyankopɔn a ne mmɔborɔhunu dɔɔso no nam ɔdɔ kɛse a ɔdɔɔ yɛn no so, ama yɛaka Kristo ho anya nkwa, bere a na yɛawu wɔ mfomso mu mpo no—wɔnam adom so na agye mo na wanyan yɛne no na ɔde yɛn abom atena ɔsoro atenae wɔ Kristo Yesu mu, sɛnea ɛbɛyɛ na bere a ɛreba no mu no, wobeyi n’adom ahonyade a ɛboro so wɔ n’ayamye mu no adi akyerɛ yɛn wɔ Kristo Yesu mu.”—Efe. 2:4-7.

¹⁴ Bere a Kristofo a wɔasra wɔn no ne Kristo te nhengua so wɔ soro redi ade no, ɛbɛyɛ den sɛ yɛde yɛn adwene bebu nneɛma akɛse a Yehowa bɛyɛ ama wɔn no. (Luka 22:28-30; Filip. 3:20, 21; 1 Yoh. 3:2) Kristofo a wɔasra wɔn no titiriw na Yehowa ‘beyi n’adom ahonyade a ɛboro so no adi akyerɛ’ wɔn. Wɔn na wɔbɛyɛ “Yerusalem foforo” anaa Kristo ayeforo no. (Adi. 3:12; 17:14; 21:2, 9, 10) Wɔbɛka Yesu ho ama ‘wɔasa amanaman no yare,’ na wɔama nnipa a bɔne ne owu de wɔn ayɛ nkoa no anya ahofadi, na wɔde wɔn akɔ pɛyɛ mu.—Kenkan Adiyisɛm 22:1, 2, 17.

15, 16. Dɛn na Yehowa bɛyɛ daakye de ada n’adom adi akyerɛ “nguan foforo” no?

¹⁵ Yehu wɔ Efesofo 2:7 sɛ, Onyankopɔn bɛda n’adom adi wɔ “bere a ɛreba no mu.” Akyinnye biara nni ho sɛ, Yehowa ‘adom ahonyade a ɛboro so’ no, yebehu wɔ asase so wɔ wiase foforo no mu. (Luka 18:29, 30) Yehowa benyan nnipa afi “Adamoa” mu, na ɛno bɛyɛ ayamye kɛse baako a ɔbɛda no adi wɔ asase so. (Hiob 14:13-15; Yoh. 5:28, 29) Wobenyan mmarima ne mmea anokwafo a wowui ansa na Kristo de ne nkwa rebɔ afɔre no. “Nguan foforo” a wobedi nokware akosi owu mu wɔ nna a edi akyiri yi mu no nso, wobenyan wɔn aba nkwa mu. Wɔn nyinaa bɛkɔ so asom Yehowa.

¹⁶ Nnipa ɔpepem pii a wɔannya Onyankopɔn ho nimdeɛ ansa na wɔrewu no, wobenyan wɔn nso. Wɔbɛsan anya hokwan de abrɛ wɔn ho ase ahyɛ Yehowa tumidi ase. Yohane kyerɛwee sɛ: “Mihuu awufo, akɛse ne nketewa, sɛ wogyinagyina ahengua no anim, na wobuebuee nhoma mmobɔwee mu. Na wobuee nhoma foforo mu; ɛno ne nkwa nhoma no. Na wɔde nsɛm a wɔakyerɛw wɔ nhoma ahorow no mu no buu awufo no atɛn sɛnea wɔn nnwuma te. Na ɛpo yii emu awufo mae, na owu ne Adamoa yii emu awufo mae, na wobuu wɔn atɛn mmiako mmiako sɛnea wɔn nnwuma te.” (Adi. 20:12, 13) Wɔbɛboa wɔn a wobenyan wɔn no ama wɔahu sɛnea wɔde Onyankopɔn nnyinasosɛm a ɛwɔ Bible mu no bɛbɔ wɔn bra. Afei nso, akwankyerɛ pa foforo a wɔde bɛma yɛn wɔ “nhoma mmobɔwee” no mu no, ɛho behia sɛ wɔde bɔ wɔn bra. Saa akwankyerɛ no bɛyɛ ahwehwɛde a yɛde bɛbɔ yɛn bra wɔ wiase foforo no mu. Nhoma  mmobɔwee no mu nsɛm a wɔbɛma yɛahu no nso bɛyɛ adom foforo a Yehowa bɛda no adi akyerɛ yɛn.

17. Sɛ yɛreyɛ asɛnka adwuma no a, dɛn na ɛnsɛ sɛ yɛn werɛ fi?

¹⁷ Awiei no abɛn paa, enti ɛnnɛ na ɛsɛ sɛ yɛka Ahenni ho asɛmpa no sen bere biara! (Marko 13:10) Nokwasɛm ne sɛ, asɛmpaka adwuma no da Yehowa adom adi. Sɛ yɛreyɛ asɛnka adwuma no a, ɛnsɛ sɛ yɛn werɛ fi sɛ yɛbɛhyɛ Yehowa anuonyam. Nhyira a yebenya wɔ wiase foforo no mu nyinaa yɛ ayamye a Yehowa bɛda no adi akyerɛ yɛn, na ɛsɛ sɛ yɛboa nkurɔfo ma wohu.

18, 19. Dɛn na yɛyɛ de kamfo Yehowa wɔ n’adom ho?

¹⁸ Sɛ yɛredi nkurɔfo adanse a, yebetumi ama wɔahu sɛ Kristo Ahenni no mu na adesamma benya agyede no so mfaso paa. Afei, nkakrankakra adesamma bɛkɔ pɛyɛ mu. Bible ka sɛ: “Abɔde no ankasa nso benya ahofadi afi ɔporɔw nkoasom mu akɔ Onyankopɔn mma anuonyam ahofadi mu.” (Rom. 8:21) Sɛ ɛnyɛ Yehowa ayamye a, anka nhyira yi nyinaa bɛbɔ yɛn.

¹⁹ Bɔhyɛ bi a ɛma akomatɔyam wɔ Adiyisɛm 21:4, 5. Yɛanya hokwan sɛ yɛbɛka ho asɛm akyerɛ obiara a obetie. Asɛm a ɛwɔ hɔ ne sɛ: “[Onyankopɔn bɛpopa] wɔn aniwam nusu nyinaa, na owu nni hɔ bio, na awerɛhow ne osu ne yaw nso nni hɔ bio. Kan nneɛma no atwam.” Yehowa, nea ɔte ahengua no so no kae sɛ: “Hwɛ! mereyɛ nneɛma nyinaa foforo.” Ɔsan kae sɛ: “Kyerɛw, efisɛ nsɛm yi wom, na ɛyɛ nokware.” Sɛ yɛde nsi ne ahokeka ka saa asɛmpa no kyerɛ nkurɔfo a, na yɛrekamfo Yehowa wɔ n’adom ho!