1. Dɛn na Yesu ka kyerɛɛ n’asuafo fa bere a awiei no bɛba no ho, na kɔkɔbɔ bɛn na ɔde maa wɔn?

 AKA nna kakra ama Yesu awu no, n’asuafo baanan kobisaa no sɛ: “Sɛ wiase yi awiei bere no du a, dɛn na ɛbɛyɛ ho sɛnkyerɛnne?” (Mat. 24:3) Ɛbɛyɛ sɛ na asuafo no rebisa na ama wɔahu bere a Yerusalem ne asɔrefie no bɛsɛe. Bere a Yesu reyi ano no, ɛnyɛ bere a Yerusalem ne asɔrefie no bɛsɛe nko ara ho asɛm na ɔkae, na mmom ɔkaa “wiase yi awiei bere” a yɛte mu yi nso ho asɛm. Bere a awiei no bɛba de, Yesu kaa sɛ: “Ɛdefa saa da no anaa dɔn no ho de, obiara nnim, ɔsoro abɔfo ne Ɔba no nso nnim, gye Agya no.” Afei ɔbɔɔ n’asuafo nyinaa kɔkɔ sɛ: “Monkɔ so nwɛn.”—Mar. 13:32-37.

2. Adɛn nti na na ehia sɛ tete Kristofo no kɔ so wɛn?

² Ná ehia sɛ Kristofo a wɔte Yudea no kɔ so wɛn, efisɛ ɛno na na ebegye wɔn nkwa. Yesu maa n’akyidifo no huu nea ɛbɛma wɔahu sɛ Yerusalem ne asɔrefie no rebɛsɛe. Ɔkaa sɛ: “Sɛ muhu sɛ asraafodɔm atwa Yerusalem ho ahyia a, ɛnde munhu sɛ ne sɛe abɛn.” Sɛ wɔhu saa pɛ, na ɛsɛ sɛ wɔtie Yesu kɔkɔbɔ no, na ‘wɔfi ase guan kɔ mmepɔw so.’ (Luka 21:20, 21) Wɔn a wɔtiee kɔkɔbɔ no nyaa wɔn ti didii mu bere a Romafo bɛsɛee Yerusalem no.

3. Dɛn na yebesusuw ho wɔ adesua yi mu?

³ Wiase bɔne a yɛte mu yi, ɛrenkyɛ na akɔ awiei. Enti, yɛn nso ɛsɛ sɛ yɛma yɛn ani da hɔ, na yɛkɔ so wɛn. Adesua yi mu no, yɛbɛhwɛ sɛnea yebetumi ama yɛn ani ada  hɔ, na yɛakɔ so awɛn bere a yɛrehwɛ nea ɛrekɔ so wɔ wiase no. Bio nso, yɛbɛhwɛ sɛnea yebetumi ahwɛ yɛn ho so yiye, ne sɛnea yebetumi de bere a aka no ayɛ nneɛma a ɛho hia.

4. Sɛnea nsɛm a ɛresisi wɔ wiase ma Bible nkɔmhyɛ ba mu no, adɛn nti na ɛsɛ sɛ ehia yɛn?

⁴ Yɛwɔ nea enti paa a nsɛm a ɛresisi wɔ wiase a ɛma Bible nkɔmhyɛ ba mu no, ehia yɛn saa. Sɛ yɛbɛyɛ nhwɛso a, Yesu kyerɛɛ nneɛma pɔtee bi a ebesisi a ɛbɛboa yɛn ma yɛahu sɛ Satan wiase no reba awiei. (Mat. 24:3-14) Ɔsomafo Petro hyɛɛ yɛn nkuran sɛ yɛmma yɛn ani nku nkɔmhyɛ a ɛreba mu no ho, sɛnea ɛbɛyɛ a yɛn gyidi bɛkɔ so ayɛ den. (2 Pet. 1:19-21) Nhoma a etwa to wɔ Bible mu no fi ase sɛ: “Yesu Kristo adiyisɛm; Onyankopɔn de maa no sɛ ɔnkyerɛ ne nkoa nneɛma a ɛsɛ sɛ ɛba ntɛm.” (Adi. 1:1) Enti nea ɛresisi wɔ wiase nnɛ, a ebetumi ama yɛahu sɛ Bible nkɔmhyɛ reba mu no, ɛho hia yɛn paa. Ebia yɛn ho bɛpere yɛn sɛ yɛne yɛn ho yɛn ho bɛbɔ nsɛm a ɛte saa ho nkɔmmɔ.

5. Dɛn na ɛnsɛ sɛ yɛyɛ, na dɛn mmom na ɛsɛ sɛ yɛyɛ? (Hwɛ mfoni ahorow no nso.)

⁵ Sɛ yɛne nkurɔfo resusuw Bible nkɔmhyɛ ho a, ɛnsɛ sɛ yɛbɔ yɛn tirim ka nea ebesi daakye. Adɛn ntia? Efisɛ yɛmpɛ sɛ yɛbɛka biribiara a ɛde mpaepaemu bɛba asafo no mu. Ebia yɛbɛte sɛ wiase atumfoɔ no reka sɛnea wɔbetumi ama ɔko agyae wɔ baabi, na wɔama asomdwoe ne ahotɔ aba. Sɛ́ anka yɛbɛbɔ yɛn tirim aka sɛ saa asɛm no na ɛma nkɔmhyɛ a ɛwɔ 1 Tesalonikafo 5:3 ba mu no, ehia sɛ ntease a Yehowa ahyehyɛde no ama yɛanya nnansa yi no, yehu ɛno mmom. Sɛ yɛde nea yɛka ho asɛm biara gyina nhoma a Yehowa ahyehyɛde no ayɛ so a, yɛboa ma asafo no yɛ baako wɔ “nsusuwii koro mu.”—1 Kor. 1:10; 4:6.

6. Dɛn na yebetumi asua afi 2 Petro 3:11-13 mu?

⁶ Kenkan 2 Petro 3:11-13. Ɔsomafo Petro boa yɛn ma yɛma yɛn ani da hɔ bere a yɛresusuw Bible nkɔmhyɛ ho no. Ɔhyɛ yɛn nkuran sɛ ‘yɛmma Yehowa da a ɛreba no nyɛ ntɛm wɔ yɛn adwenem.’ Adɛn ntia? Ɛnyɛ sɛ yɛpɛ sɛ yɛsese hu “da no ne dɔn” a Yehowa de Armagedon bɛba, na mmom sɛnea ɛbɛyɛ a yɛde bere a aka no ‘bɛma yɛn abrabɔ ho atew na yɛde onyamesom pa atena ase.’ (Mat. 24:36; Luka 12:40) Sɛ yɛbɛka a, yɛpɛ sɛ yekura abrabɔ pa mu, na yɛhwɛ hu sɛ ɔdɔ kann a yɛwɔ ma Yehowa no na ɛkanyan yɛn ma yɛbɔ yɛn ho mmɔden wɔ ne som mu. Sɛ yebetumi ayɛ saa a, ɛsɛ sɛ yɛhwɛ yɛn ho so yiye.

7. Dɛn na yɛyɛ de kyerɛ sɛ yɛrehwɛ yɛn ho so yiye? (Luka 21:34)

⁷ Nsɛm a ɛresisi wɔ wiase no, ɛnyɛ ɛno nko ara na Yesu ka kyerɛɛ n’asuafo sɛ wɔmma wɔn adwene nkɔ so, mmom ɔkaa nso sɛ wɔnhwɛ wɔn ho so yiye. Kɔkɔbɔ a ɛwɔ Luka 21:34 (Kenkan.) no si saa asɛm yi so dua. Hyɛ asɛm a Yesu kae yi nsow: “Monhwɛ mo ho so yiye.” Sɛ obi rehwɛ ne ho so yiye a, nea ɛkyerɛ ne sɛ, biribiara a ebetumi asɛe ɔne Yehowa ntam no, ɔma n’ani kɔ ho, na otu anammɔn de twe ne ho fi ho. Ɔyɛ saa a, ɛma ɔkɔ so de ne ho sie Onyankopɔn dɔ mu.—Mmeb. 22:3; Yuda 20, 21.

8. Afotu bɛn na ɔsomafo Paul de maa Kristofo no?

 ⁸ Ɔsomafo Paul tuu Kristofo fo sɛ wɔnhwɛ wɔn ho so yiye. Yɛbɛyɛ nhwɛso a, ɔka kyerɛɛ Kristofo a na ɛwɔ Efeso no sɛ: “Monhwɛ mo abrabɔ yiye paa na sɛnea monantew no anyɛ sɛ wɔn a wonnim nyansa na mmom sɛ anyansafo.” (Efe. 5:15, 16) Daa, Satan pɛ sɛ ɔsɛe yɛne Yehowa ntam, enti Bible tu yɛn fo sɛ ‘yɛnkɔ so mpɛɛpɛɛ mu nhu Yehowa apɛde,’ sɛnea ɛbɛyɛ a Satan afiri biara renyi yɛn.—Efe. 5:17.

9. Yɛbɛyɛ dɛn ahu Yehowa apɛde?

⁹ Ɛnyɛ biribiara a ebetumi asɛe yɛne Yehowa ntam na Bible ka ho asɛm. Mpɛn pii no, nneɛma bebree wɔ hɔ a ɛsɛ sɛ yesisi ho gyinae a Kyerɛwnsɛm no nka ho asɛm tee. Sɛ yebetumi asisi gyinae pa a, gye sɛ yehu “Yehowa apɛde.” Yebetumi ayɛ saa a, ɛsɛ sɛ yɛkenkan Onyankopɔn Asɛm, na yedwinnwen ho da biara. Sɛ yenni akwankyerɛ pɔtee a ɛsɛ sɛ yɛde bɔ yɛn bra wɔ biribi mu mpo a, mpɛn dodow a yɛrete Yehowa apɛde ase, na yɛrenya “Kristo adwene” no, mpɛn dodow no ara na ɛbɛyɛ mmerɛw ama yɛn sɛ yɛbɛnantew sɛ “anyansafo.” (1 Kor. 2:14-16) Nneɛma a ebetumi asɛe yɛne Yehowa ntam no, ebi wɔ hɔ a, ɛyɛ mmerɛw sɛ yebehu; ebi nso wɔ hɔ a, ɛnna fam sɛ yebehu.

10. Nneɛma a ebetumi asɛe yɛne Yehowa ntam bɛn na ɛsɛ sɛ yɛkwati?

¹⁰ Nneɛma a ebetumi asɛe yɛne Yehowa ntam no, ebi ne sɛ obi de ne ho bɛhyehyɛ obi a ɔnyɛ ne hokafo, asanom bebrebe, adidi ntraso, nseku anaa kasafi, anigyede a basabasayɛ wom, ponografi, ne nneɛma a ɛtete saa. (Dw. 101:3) Daa, yɛn tamfo Bonsam hwehwɛ akwan a ɔbɛfa so asɛe yɛne Yehowa ntam. (1 Pet. 5:8) Sɛ yɛamma yɛn ani anna hɔ a, Satan betumi de ahoɔyaw, atorodi, anibere, ɔtan, ahomaso, ne afoforo ho menasepɔw adua yɛn adwene anaa yɛn koma mu. (Gal. 5:19-21) Mfiase no, ebia ɛbɛyɛ yɛn sɛ atenka a ɛte saa no nhyɛ da nyɛ bɔne. Nanso sɛ yɛanyɛ ntɛm antu ase a, ebegye ntini na ɛde ɔhaw abrɛ yɛn.—Yak. 1:14, 15.

11. Ade baako a ɛyɛ den sɛ yebehu sɛ ebetumi asɛe yɛne Yehowa ntam bɛn na ɛsɛ sɛ yɛkwati, na adɛn ntia?

¹¹ Ade baako a ɛyɛ den sɛ yebehu sɛ ebetumi asɛe yɛne Yehowa ntam ne fekubɔne. Momma yensusuw tebea yi ho nhwɛ. Yɛmfa no sɛ wo ne obi a ɔnyɛ Yehowa Danseni na ɛyɛ adwuma. Wopɛ sɛ wo yɔnko dwumayɛni no nya Yehowa Adansefo ho adwempa, enti ɛyɛ a woda ayamye adi kyerɛ no, na woboa no. Ɛtɔ da na sɛ moregye mo ahome wɔ adwumam a, wo ne no kodidi. W’ani bɛba wo ho so no, na ayɛ biribi a woyɛ no daa. Ɛwom ara na wo ne no rebɔ nkɔmmɔ a, wobɛhwɛ no na ɔrekeka ahuhusɛm, nanso ahyɛase no de, wonsosɔ so. Nanso ebedu baabi no, na saa nkɔmmɔ no agyigye w’aso mu ara ma ɛnhaw wo bio. Afei da koro, ɔka kyerɛ wo sɛ, mopɔn adwuma a, monkɔnom biribi kakra, na wo nso wopene so. Ebewie ase no, na wudwen te sɛ wo yɔnko dwumayɛni no. Seesei a wudwen te sɛ ɔno yi, wohwɛ a ebedi nna sɛn na woafi ase ayɛ w’ade sɛ ɔno? Ɛwom, yɛpɛ sɛ yɛda ayamye ne obu adi kyerɛ obiara, nanso ɛsɛ sɛ yɛkae sɛ wɔn a yɛne wɔn bɔ no de, wɔn suban betumi anya yɛn so tumi paa. (1 Kor. 15:33) Sɛnea Yesu kae no, sɛ yɛhwɛ yɛn ho so  yiye a, wɔn a wɔmfa Yehowa mmara mmɔ wɔn bra no, yɛbɛkwati sɛ yɛne wɔn bɛbɔ. (2 Kor. 6:15) Yebehu ade a ebetumi asɛe yɛne Yehowa ntam, na yɛatwe yɛn ho afi ho.

12. Bere a na Yesu asuafo no retwɛn sɛ wɔbɛsɛe Yerusalem ne asɔrefie no, dɛn na na ɛsɛ sɛ wɔyɛ?

¹² Bere a na Yesu asuafo no retwɛn sɛ wɔbɛsɛe Yerusalem ne asɔrefie no, na ɛnsɛ sɛ wɔtena hɔ kwa. Ná Yesu ama wɔn adwuma a ɛsɛ sɛ wɔyɛ. Ɔka kyerɛɛ wɔn sɛ wɔnka asɛmpa no ‘wɔ Yerusalem ne Yudea ne Samaria nyinaa nkɔ asaase ano noho.’ (Aso. 1:6-8) Yesu de adwumasono paa na ɛhyɛɛ wɔn nsa! Esiane sɛ wɔkum wɔn ho yɛɛ adwuma no nti, ɛma wɔde wɔn bere yɛɛ nea ehia.

13. Dɛn nti na ɛsɛ sɛ yɛde yɛn bere yɛ nea ehia? (Kolosefo 4:5)

¹³ Kenkan Kolosefo 4:5. Sɛ yebetumi ahwɛ yɛn ho so yiye a, sɛnea yɛde yɛn bere di dwuma no, ɛsɛ sɛ yɛhwɛ no yiye paa. “Asiane” betumi ato yɛn mu biara. (Ɔsɛnk. 9:11) Yɛn nkwa betumi aba awiei prɛko pɛ.

14-15. Yɛbɛyɛ dɛn de yɛn bere adi dwuma yiye? (Hebrifo 6:11, 12) (Hwɛ mfoni no nso.)

¹⁴ Yɛbɛyɛ dɛn de yɛn bere adi dwuma  yiye? Ɛne sɛ, yɛde bɛyɛ Yehowa apɛde, na ayɔnkofa a yɛne no wɔ no, yɛde ahyɛ mu den. (Yoh. 14:21) Ɛsɛ sɛ ‘yetintim a yennhinhim, na yɛyɛ pii wɔ Awurade adwuma no mu daa.’ (1 Kor. 15:58) Afei sɛ yɛn nkwa ba awiei, anaa sɛ wiase bɔne yi ba awiei a, yɛrennu yɛn ho da.—Mat. 24:13; Rom. 14:8.

¹⁵ Ɛnnɛ, Yesu da so ara rekyerɛ n’asuafo kwan ma wɔaka Onyankopɔn Ahenni no ho asɛmpa wɔ asaase so nyinaa. Wadi bɔ a ɔhyɛe no so. Yesu nam Yehowa ahyehyɛde no so tete yɛn, na ɔma yɛn nnwinnade a yehia na yɛatumi aka asɛmpa no. (Mat. 28:18-20) Yɛn nso yɛyere yɛn ho yɛ asɛmpaka ne ɔkyerɛkyerɛ adwuma no, na yɛma yɛn ani da hɔ bere a yɛretwɛn Yehowa ma wabɛsɛe saa wiase yi. Sɛ yɛde afotu a ɛwɔ Hebrifo 6:11, 12 no yɛ adwuma a, ɛbɛboa yɛn ma yɛakura yɛn anidaso mu denneennen “akosi sɛ ɛbɛba mu.”—Kenkan.

16. Dɛn na yɛasi yɛn bo sɛ yɛbɛyɛ?

¹⁶ Yehowa ahyɛ da ne dɔn a ɔde bɛsɛe Satan wiase yi. Sɛ saa da no du a, wiase foforo no ho nkɔmhyɛ a Yehowa ama wɔakyerɛw wɔ n’Asɛm mu nyinaa, ɔbɛma abam. Nanso seesei de, ɛtɔ mmere bi a, ebetumi ayɛ yɛn sɛ wiase awiei no akyɛ. Nanso Yehowa da no “renka akyi.” (Hab. 2:3) Enti momma yensi yɛn bo sɛ ‘Yehowa ara na yɛbɛhwɛ no kwan,’ na yɛmfa ‘ntoboase ntwɛn yɛn nkwagye Nyankopɔn no.’—Mika 7:7.