1-2. Dɛn ne ade baako a ɛho hia Yehowa paa, na dɛn na ɔpɛ sɛ yɛyɛ?

 SƐNEA yɛne nnipa di no, ɛyɛ ade baako a ɛho hia Yehowa paa. Yesu kyerɛkyerɛɛ yɛn sɛ, yɛnnɔ yɛn yɔnko sɛ yɛn ho. (Mat. 22:​37-39) Wei kyerɛ sɛ, wɔn a ɛsono wɔn gyidi no mpo, ɛsɛ sɛ yɛne wɔn di no yiye. Yɛyɛ saa a, na yɛresuasua Yehowa efisɛ “ɔma n’awia pue nnipa bɔne ne nnipa papa so, na ɔma osu tɔ gu atreneefo ne abɔnefo so.”—Mat. 5:45.

² Yehowa dɔ nnipa nyinaa, nanso wɔn a wɔyɛ nea ɛtene no de, onsi wɔn fam koraa. (Yoh. 14:21) Yehowa pɛ sɛ yesuasua no. Ɔhyɛ yɛn nkuran sɛ ‘yɛnnɔ yɛn nuanom denneennen,’ na ‘yɛmpɛ wɔn asɛm paa.’ (1 Pet. 4:8; Rom. 12:10) Saa ɔdɔ yi, ɛte sɛ nea yɛda no adi kyerɛ yɛn busuani anaa yɛn yɔnko berɛbo bi.

3. Dɛn na ɛsɛ sɛ yehu fa ɔdɔ ho?

³ Ɔdɔ te sɛ afifide. Ehia sɛ yɛyɛ ho adwuma na atumi anyin. Ɔsomafo Paul tuu Kristofo fo sɛ: “Monkɔ so nkyerɛ onuadɔ.” (Heb. 13:1) Yehowa pɛ sɛ yɛkɔ so da ɔdɔ adi kyerɛ afoforo. Adesua yi bɛboa yɛn ama yɛahu nea enti a ɛsɛ sɛ yɛbɛn yɛn nuanom Kristofo ne sɛnea yɛbɛkɔ so ayɛ saa.

 ADƐN NTI NA ƐSƐ SƐ YƐBƐN YƐN NUANOM KRISTOFO

4. Baakoyɛ a ɛwɔ Yehowa asomfo mu a ɛho asɛm wɔ Dwom 133:1 no, yɛbɛyɛ dɛn akɔ so akyerɛ sɛ ɛsom bo ma yɛn? (Hwɛ mfoni no nso.)

⁴ Kenkan Dwom 133:1. Odwontofo no kaa sɛ, wɔn a wɔdɔ Yehowa no, sɛ yɛfa wɔn nnamfo a, “eye” na “ɛyɛ fɛ.” Nea ɔkae no, yɛne no yɛ adwene. Sɛ dua kɛse bi si baabi na yehu no da biara a, anhwɛ a yɛrenhu sɛ ɛsom bo. Baakoyɛ a ɛwɔ Yehowa asomfo mu no nso, sɛnea ɛsom bo no, anhwɛ a yebebu yɛn ani agu so. Yɛtaa hu yɛn nuanom Kristofo; nnawɔtwe no mu no, ebia yebehu wɔn mpɛn pii. Yɛbɛyɛ dɛn akyerɛ sɛ wɔsom bo ma yɛn? Obiara a ɔwɔ asafo no mu no, sɛnea ɔsom bo no, sɛ yɛpɛ bere de dwinnwen ho a, ɛbɛma ɔdɔ a yɛwɔ ma wɔn no anyin.

5. Baakoyɛ a ɛwɔ Yehowa asomfo mu no, sɛ afoforo hu a, etumi ka wɔn sɛn?

⁵ Wɔn a wɔba yɛn adesua bere a edi kan no, sɛ wɔn mu bi behu sɛnea yɛdodɔ yɛn ho no a, ɛma wɔn ani gye paa. Ɛno nko ara tumi ma wɔgye di sɛ wɔahu nokware no. Yesu kaa sɛ: “Sɛ mododɔ mo ho a, ɛno na ɛbɛma nnipa nyinaa ahu sɛ moyɛ m’asuafo.” (Yoh. 13:35) Momma yɛmfa Chaithra asɛm no nyɛ nhwɛso. Ná ɔne Yehowa Adansefo sua ade, na wɔtoo nsa frɛɛ no ma ɔkɔɔ ɔmantam nhyiam bi. Da a edi kan no baa awiei no, ɔka kyerɛɛ nea ɔne no sua ade no sɛ: “M’awofo nyɛɛ me atuu da. Nanso mebaa mo nhyiam yi, da a edi kan no nko ara nnipa pɔrepɔre 52  na ɛyɛɛ me atuu! Metee nka sɛ Yehowa nam Adansefo yi so reyi ne dɔ adi akyerɛ me. Mepɛ sɛ mebɛka mo ho.” Chaithra kɔɔ so suaa ade, na ɔyɛɛ nsakrae biara a ehia, na ɔbɔɔ asu afe 2024. Nokwasɛm ne sɛ, sɛ anigyefo hu yɛn nnwuma pa te sɛ ɔdɔ a yɛdodɔ yɛn ho no a, mpɛn pii no, ɛkanyan wɔn ma wɔbɛsom Yehowa.—Mat. 5:16.

6. Sɛ yɛbɛn yɛn nuanom a, sɛn na ebetumi abɔ yɛn ho ban?

⁶ Sɛ yɛbɛn yɛn nuanom a, ebetumi abɔ yɛn ho ban. Paul hyɛɛ ne mfɛfo Kristofo nkuran sɛ: “Monkɔ so nhyehyɛ mo ho nkuran da biara . . . na bɔne nnaadaa amma mo mu biara ansen ne kɔn.” (Heb. 3:13) Sɛ yɛn abam bu ara ma ɛkɔba sɛ yɛreyɛ aman afi adetreneeyɛ ho a, Yehowa betumi aka yɛn nua Kristoni bi koma ma wabɛhyɛ yɛn nkuran. (Dw. 73:​2, 17, 23) Nkuranhyɛ a ɛte saa no betumi aboa yɛn paa.

7. Twaka bɛn na ɔdɔ ne baakoyɛ wɔ? (Kolosefo 3:​13, 14)

⁷ Yɛyɛ anuanom a yɛn mu biara rebɔ mmɔden sɛ ɔbɛda ɔdɔ adi akyerɛ ne yɔnko. Wei ma yenya nhyira pii. (1 Yoh. 4:11) Yɛbɛyɛ nhwɛso a, ɔdɔ kanyan yɛn ma ‘yɛkɔ so nya yɛn nuanom ho abotare,’ na wei boa yɛn ma yɛyɛ baako. (Kenkan Kolosefo 3:​13, 14; Efe. 4:​2-6) Enti sɛ yehyiam wɔ adesua ase a, anigye a yenya wɔ hɔ de, ebi nni wiase baabiara.

OBIARA MFA NIDI MMA NE YƆNKO

8. Dɛn na Yehowa yɛ de boa yɛn ma yɛyɛ baako?

⁸ Baakoyɛ a ɛwɔ yɛne yɛn nuanom ntam wɔ wiase baabiara no, ɛyɛ anwanwade. Ɛmfa ho sɛ bɔne ne sintɔ wɔ yɛn ho no, Yehowa aboa ama atumi ayɛ yiye. (1 Kor. 12:25) Bible ka sɛ, ‘Onyankopɔn akyerɛkyerɛ yɛn sɛ yɛnnodɔ yɛn ho.’ (1 Tes. 4:9) Sɛ yɛbɛka no ɔkwan foforo so a, Yehowa nam Kyerɛwnsɛm no so ama yɛahu nneɛma pɔtee a yɛyɛ a ɛbɛma obiara abɛn ne yɔnko. Sɛ yɛto yɛn bo ase sua Kyerɛwnsɛm no, na yɛde nea yesua no yɛ adwuma a, ɛbɛkyerɛ sɛ yɛama ‘Onyankopɔn rekyerɛkyerɛ’ yɛn. (Heb. 4:12; Yak. 1:25) Ɛno pɛpɛɛpɛ na Yehowa Adansefo bɔ mmɔden sɛ wɔbɛyɛ.

9. Sɛnea Romafo 12:​9-13 kyerɛ no, dɛn na yebetumi ayɛ de akyerɛ sɛ yɛredi yɛn yɔnko ni?

⁹ Sɛn na Onyankopɔn Asɛm no kyerɛkyerɛ yɛn sɛ yɛn mu biara mmɔ mmɔden mmɛn ne yɔnko? Momma yɛnhwɛ nea Paul ka faa wei ho wɔ Romafo 12:​9-13. (Kenkan.) Hyɛ asɛm a edi so yi nsow: “Obiara nni kan mfa nidi mma ne yɔnko.” Ɛno kyerɛ sɛn? Ɛsɛ sɛ yedi kan tu anammɔn de yɛn nuanom bɔne kyɛ wɔn, yɛda ahɔhoyɛ ne ayamye adi kyerɛ wɔn, na yɛyɛ nneɛma afoforo nso ma wɔn. Yɛyɛ saa a, ɛbɛkyerɛ sɛ ‘yɛpɛ wɔn asɛm’ paa. (Efe. 4:32) Ɛnsɛ sɛ wotwɛn sɛ wo nua mmom nni kan mmɛn wo. Wo nso wubetumi atu anammɔn a edi kan no. Kae sɛ, Yesu kaa sɛ, “ɔma mu wɔ anigye pii sen ogye.”—Aso. 20:35.

10. Sɛ yɛka sɛ yɛnyere yɛn ho nyɛ adwuma mfa nkyerɛ sɛ ‘yedi yɛn yɔnko ni’ a, ɛkyerɛ sɛn? (Hwɛ mfoni no nso.)

¹⁰ Hyɛ no nsow sɛ, bere a Paul kaa sɛ obiara nni kan mfa nidi mma ne yɔnko no, ɛno akyi pɛɛ na ɔhyɛɛ yɛn nkuran sɛ ‘yɛnyere yɛn ho nyɛ adwuma, na ɛnsɛ sɛ yɛyɛ anihaw.’ Sɛ obi yere ne ho yɛ adwuma a, ɛkyerɛ sɛ ɔnyɛ akwadworɔ. Sɛ wɔma no adwuma a, oyi ne yam yɛ no yiye. Mmebusɛm 3:​27, 28 hyɛ yɛn nkuran sɛ: “Wɔn a ɛsɛ sɛ woyɛ wɔn papa no, mfa nkame wɔn, bere a wowɔ tumi a  wode bɛboa no.” Enti sɛ obi hia mmoa a, yɛyɛ nea yebetumi biara de boa no. Yɛntwentwɛn yɛn nan ase, na yennya adwene sɛ obi bɛkɔ akɔboa no.—1 Yoh. 3:​17, 18.

11. Dɛn na ɛbɛboa yɛn ma yɛn mu biara abɛn ne yɔnko?

¹¹ Ade foforo a yebetumi ayɛ de akyerɛ sɛ yedi afoforo ni ne sɛ, sɛ wɔyɛ yɛn bɔne a, yɛbɛyɛ ntɛm de akyɛ wɔn. Efesofo 4:26 ka sɛ: “Mommma abufuw no nntena hɔ nnkosi sɛ owia bɛtɔ.” Adɛn ntia? Nkyekyɛm 27 no ka sɛ, sɛ yɛanyɛ saa a, ‘yɛbɛma Ɔbonsam kwan.’ Bible mu no, Yehowa ka kyerɛ yɛn mpɛn pii sɛ obiara mfa ne yɔnko bɔne nkyɛ no. Kolosefo 3:13 hyɛ yɛn nkuran sɛ ‘obiara nkɔ so mfa ne yɔnko bɔne nkyɛ no korakora.’ Nneɛma a ɛboa ma yɛbɛn afoforo paa no, emu baako ne sɛ yebebu yɛn ani agu wɔn mfomso so. Sɛ yɛyɛ saa a, ɛboa yɛn ma ‘yekura baakoyɛ a honhom no ama yɛanya no mu, na yɛtena asomdwoe a aka yɛn abom no mu.’ (Efe. 4:3) Ne tiaatwa mu ara ne sɛ, sɛ yɛde afoforo mfomso kyɛ wɔn a, ɛde baakoyɛ ne asomdwoe ba.

12. Ɔkwan bɛn so na Yehowa boa yɛn ma yɛde bɔne kyɛ?

¹² Nokwasɛm ne sɛ, sɛ obi yɛ yɛn ade ma ɛhaw yɛn paa a, ebetumi ayɛ den sɛ yɛde bɛkyɛ no. Nanso Onyankopɔn honhom betumi aboa yɛn. Bere a Bible no kaa sɛ, “obiara mpɛ ne yɔnko asɛm paa,” na ‘yɛnyere yɛn ho nyɛ adwuma’ no, ɛno akyi no ɛkaa sɛ: “Monyɛ hyew honhom mu.” Sɛ obi yɛ “hyew” a, ɛkyerɛ sɛ honhom kronkron boa no ma ɔde nsi ne ahokeka yɛ Onyankopɔn apɛde. Enti Onyankopɔn honhom betumi aboa yɛn ma yɛapɛ afoforo asɛm paa, na yɛde wɔn bɔne akyɛ wɔn korakora. Ɛno nti, ɛsɛ sɛ yefi yɛn koma nyinaa mu srɛ Yehowa sɛ ɔmmoa yɛn.—Luka 11:13.

“MOMMMA MPAAPAEMU MMMA MO MU”

13. Dɛn na ebetumi de mpaapaemu aba yɛn mu?

¹³ “Nnipa ahorow nyinaa” bi wɔ asafo  no mu. (1 Tim. 2:​3, 4) Enti nneɛma bi wɔ hɔ a, ɛsono nea obiara ani gye ho. Ebi ne ntaadehyɛ ne ahosiesie, ayaresa ne nneɛma a yɛde gyigye yɛn ani. Sɛ yɛanhwɛ yiye a, nneɛma a ɛtete saa betumi akɔfa mpaapaemu aba. (Rom. 14:4; 1 Kor. 1:10) Esiane sɛ Onyankopɔn akyerɛkyerɛ yɛn sɛ yɛnnodɔ yɛn ho nti, ɛsɛ sɛ yɛhwɛ yiye na yɛanyɛ biribiara amfa ankyerɛ sɛ nea yɛpɛ no, ɛyɛ papa kyɛn afoforo de.—Filip. 2:3.

14. Dɛn na ɛsɛ sɛ yɛyere yɛn ho sɛ yɛbɛyɛ, na adɛn ntia?

¹⁴ Bere nyinaa, sɛ yɛyere yɛn ho sɛ yɛbɛma afoforo ho adwo wɔn, na yɛhyɛ wɔn nkuran a, ɛremma mpaapaemu mma asafo no mu. (1 Tes. 5:11) Nnansa yi, anuanom bi a na wɔagyae asɛnkakɔ anaa wɔayi wɔn afi asafo no mu no, wɔasan aba. Yefi yɛn koma nyinaa mu ma wɔn akwaaba! (2 Kor. 2:8) Onuawa bi gyaee asɛnkakɔ mfe 10. Bere a ɔsan baa Ahenni Asa so no, yɛnhwɛ nea ɔkae. Ɔkaa sɛ, “Obiara bekyiaa me serew kyerɛɛ me.” (Aso. 3:19) Ɔdɔ a wɔyii no adi kyerɛɛ no no, ɛkaa no sɛn? Ɔka sɛ, “Metee nka sɛ Yehowa rekyerɛ me kwan asan akɔ baabi a anigye wɔ.” Sɛ yɛbɔ mmɔden sɛ yɛbɛhyɛ obiara nkuran a, ‘wɔn a wɔabrɛ na wɔde nnesoa asoa wɔn’ no, Kristo betumi afa yɛn so ama wɔn ho adwo wɔn.—Mat. 11:​28, 29.

15. Dɛn bio na yebetumi ayɛ na ama baakoyɛ atena asafo no mu? (Hwɛ mfoni no nso.)

 ¹⁵ Yebetumi de yɛn anom kasa nso aboa ama baakoyɛ atena asafo no mu. Hiob 12:11 ka sɛ: “Ɛnyɛ aso na ɛsɔ nsɛm hwɛ sɛnea tɛkrɛma ka aduan hwɛ no?” Sɛ obi noa aduan a, ansa na ɔde bɛma afoforo no, odi kan ka hwɛ sɛ ɛyɛ dɛ anaa. Yɛn nso, ansa na asɛm bi bepue afi yɛn anom no, ɛsɛ sɛ yedi kan dwen ho. (Dw. 141:3) Bere biara, ansa na yɛbɛka asɛm bi no, ɛsɛ sɛ yɛhwɛ hu sɛ asɛm a yɛrebɛka no bɛhyɛ nkuran, ɛbɛma afoforo ho adwo wɔn, na ɛbɛma “wɔn a wotie no anya so mfaso.”—Efe. 4:29.

16. Henanom paa na ɛsɛ sɛ wɔma wɔn anom kasa yɛ dɛ?

¹⁶ Okununom ne awofo paa na ɛsɛ sɛ wɔhwɛ hu sɛ wɔn anom kasa yɛ dɛ bere nyinaa. (Kol. 3:​19, 21; Tito 2:4) Asafo mu mpanyimfo nso, ɛsɛ sɛ wɔde wɔn anom kasa boa ma afoforo ho dwo wɔn, na wɔkyekye wɔn werɛ, efisɛ wɔyɛ ahwɛfo a Yehowa de ne nguan ahyɛ wɔn nsa. (Yes. 32:​1, 2; Gal. 6:1) Bible mu abebusɛm bi ka sɛ: “Asɛm a wɔka wɔ bere a ɛfata mu de, eye paa!”—Mmeb. 15:23.

“YƐMFA YƐN NNEYƐE NKYERƐ YƐN DƆ, NA YƐNNƆ WƆ NOKWARE MU”

17. Ɔdɔ a yɛwɔ ma yɛn nuanom no, yɛbɛyɛ dɛn ahwɛ ahu sɛ ɛyɛ ɔdɔ kann?

¹⁷ Ɔsomafo Yohane hyɛ yɛn nkuran sɛ “yɛmmfa ano anaa tɛkrɛma nnnɔ, na mmom yɛmfa yɛn nneyɛe nkyerɛ yɛn dɔ, na yɛnnɔ wɔ nokware mu.” (1 Yoh. 3:18) Yɛpɛ sɛ yefi yɛn komam dɔ yɛn nuanom. Yɛbɛyɛ dɛn ayɛ saa? Sɛ yɛtaa ne yɛn nuanom bɔ a, ɛbɛma yɛabɛn wɔn, na ɔdɔ a obiara wɔ ma ne yɔnko no mu bɛyɛ den. Enti pɛ bere na wo ne anuanom mmɔ wɔ adesua ase na wo ne wɔn nkɔ asɛnka. Ɛyɛ a kɔsra afoforo. Yɛyɛ saa a, ɛbɛda no adi sɛ ‘Onyankopɔn akyerɛkyerɛ yɛn sɛ yɛnnodɔ yɛn ho.’ (1 Tes. 4:9) Wei bɛma yɛn ara yɛahu “sɛnea eye na ɛyɛ fɛ sɛ anuanom bom de baakoyɛ tena!”—Dw. 133:1.