Wɔtaa ka sɛ, ‘Wowɔ nkwa a, wowɔ ade.’ Ɛwom, ɛtɔ da a, yetumi hyia ɔhaw wɔ yɛn asetena mu, nanso ne nyinaa mu no, nneɛma bi wɔ hɔ a ɛma yɛn ani gye. Ɛnde, yɛbɛyɛ dɛn akyerɛ sɛ yɛn ani sɔ akyɛde a Onyankopɔn de ama yɛn yi? Dɛn nti paa na ɛsɛ sɛ yɛma nkwa som bo ma yɛn?

1. Adɛn nti na ɛsɛ sɛ yɛma nkwa som bo ma yɛn?

Ɛsɛ sɛ yɛma nkwa som bo ma yɛn, efisɛ ɛyɛ akyɛde a efi yɛn Agya a ɔdɔ yɛn no hɔ. Yehowa na ‘nkwa fi no,’ kyerɛ sɛ, biribiara a nkwa wom no, ɔno na ɔbɔe. (Dwom 36:9) “Ɔno na ɔma nnipa nyinaa nkwa ne ahome ne nneɛma nyinaa.” (Asomafo Nnwuma 17:25, 28) Yehowa ama yɛn biribiara a yehia na ama yɛatumi akɔ so atena nkwa mu. Na wunim? Nneɛma a ɔde ama yɛn no, ɛnyɛ sɛ ɛma yɛtena nkwa mu kɛkɛ o, ɛsan ma yɛn ani gye.—Kenkan Asomafo Nnwuma 14:17.

2. Yɛbɛyɛ dɛn akyerɛ sɛ nkwa a Yehowa de ama yɛn no, yɛn ani sɔ?

Wosom bo ma Yehowa. Ɛno nti da a wo maame nyinsɛn wo ara pɛ, ɛnna ofii ase de n’ani dii w’akyi. Onyankopɔn de ne honhom kaa ne somfo bi a wɔfrɛ no Dawid ma ɔkaa sɛ: “Meyɛ mogyatɔw mpo no, w’aniwa huu me.” (Dwom 139:16) Wei kyerɛ sɛ, wo nkwa som bo ma Yehowa paa. (Kenkan Mateo 10:29-31.) Sɛ obi hyɛ da kum obi anaa okum ne ho a, ɛyɛ a ɛyɛ no yaw paa. a (Exodus 20:13) Afei nso, sɛ yɛyɛ nneɛma bi a ɛkyerɛ sɛ yemmu yɛn nkwa anaa afoforo nkwa a, ɛma odi awerɛhow. Sɛ yɛhwɛ yɛn ho so yiye, na yɛma afoforo nkwa ho hia yɛn a, ɛkyerɛ sɛ nkwa a Yehowa de akyɛ yɛn no, yɛn ani sɔ paa.

 SUA PII KA HO

3. Hwɛ w’apɔwmuden yiye

Kristofo ahyɛ Yehowa bɔ sɛ, nea waka biara, wɔbɛyɛ. Ɛno nti biribiara a yɛyɛ wɔ yɛn asetena mu no, yɛbɔ mmɔden sɛ yɛbɛma asɔ Yehowa ani. Sɛ yɛbɛka a, ɛte sɛ nea yɛde yɛn nipadua abɔ afɔre ama Onyankopɔn. Monkenkan Romafo 12:1, 2. Muwie a munsusuw nsɛmmisa yi ho:

• Dɛn nti paa na ɛsɛ sɛ wohwɛ w’apɔwmuden yiye?

• Nneɛma bɛn na woyɛ a ɛkyerɛ sɛ worehwɛ w’apɔwmuden yiye?

 5. Kyerɛ sɛ abofra a ɔhyɛ yafunu mu nkwa som bo ma wo

Dawid kyerɛw anwensɛm bi. Anwensɛm no mu no, ɔkaa sɛ abofra a ɔhyɛ yafunu mu nkwa som bo ma Yehowa. Monkenkan Dwom 139:13-17. Muwie a munsusuw asɛmmisa yi ho:

• Yehowa ani so no, bere bɛn na obi nkwa fi ase—ɛyɛ da a ne maame nyinsɛn no, anaa da a wɔbɛwo no?

Mmara a Yehowa de maa tete Israelfo no, na ɛbɔ apemfo ne mmofra a wɔhyɛ yafunu mu no ho ban. Monkenkan Exodus 21:22, 23. Muwie a munsusuw nsɛmmisa yi ho:

• Sɛ obi anhyɛ da na ɔyɛ biribi ma abofra a ɔhyɛ yafunu mu wu a, Yehowa hu onii no sɛn?

• Sɛ obi hyɛ da kum abofra a ɔhyɛ yafunu mu a, Yehowa bɛte nka sɛn? b

• Wohwɛ sɛnea abofra a ɔhyɛ yafunu mu nkwa som bo ma Onyankopɔn no a, ɛma wote nka sɛn?

Hwɛ VIDEO yi.

Ɛtɔ da a, biribi betumi asi ama ɔpemfo a nkwa som bo ma no mpo anya adwene sɛ, nea adu no de, gye sɛ otu nyinsɛn no gu. Ɛba saa a, dɛn na ɔbɛyɛ? Monkenkan Yesaia 41:10. Muwie a munsusuw nsɛmmisa yi ho:

• Sɛ afoforo tutu gu ɔpemfo bi asom sɛ, ontu ne nyinsɛn ngu a, hena na ɛsɛ sɛ ɔhwehwɛ mmoa fi ne hɔ? Adɛn ntia?

 NEA YƐASUA

Nkwa a Yehowa de akyɛ yɛn no, Bible ma yehu sɛ, ɛsɛ sɛ yebu no sɛ biribi a ɛsom bo. Afei nso ɛma yehu sɛ, ɛsɛ sɛ yɛkyerɛ ho anisɔ, na yɛbɔ ho ban. Enti ɛnsɛ sɛ yɛyɛ biribiara a ɛde yɛn nkwa anaa afoforo nkwa bɛto asiane mu.

Ntimu

• Adɛn nti na onipa nkwa som bo ma Yehowa?

• Sɛ obi hyɛ da kum obi a, ɛyɛ a Yehowa te nka sɛn?

• Adɛn nti na w’ani sɔ nkwa a Yehowa de akyɛ wo no?