Bere a Yesu kɔɔ soro no, nna du akyi, honhom kronkron baa n’asuafo no so. Ná ɛyɛ Pentekoste afe 33 Y.B., na na nnipa fi mmeae mmeae rebedi afahyɛ wɔ Yerusalem. Ná Yesu asuafo bɛyɛ 120 ahyiam wɔ abansoro dan bi mu. Prɛko pɛ na anwanwasɛm bi sii. Biribi te sɛ ogya besisii asuafo no ti so, na wɔn nyinaa fii ase kaa kasa horow. Nnyigyei kɛse bi a ɛte sɛ mframa a ano yɛ den bɛhyɛɛ dan no mu mã.

Ahɔho a wɔfi aman foforo so baa Yerusalem no tee dede no, enti wɔtuu mmirika kɔɔ fie no mu kɔhwɛɛ nea ɛrekɔ so. Wɔtee sɛ asuafo no reka kasa horow, na ɛyɛɛ wɔn nwanwa paa. Ahɔho no kaa sɛ: ‘Nnipa a wɔrekasa yi, wɔnyɛ Galileafo? Ɛbaa no sɛn na wɔreka yɛn kurom kasa yi?’

Afei Petro ne asomafo a aka no gyinaa nnipadɔm no anim. Petro kaa nea ɛyɛe a wɔkum Yesu, na afei Yehowa nyan no no ho asɛm kyerɛɛ nkurɔfo no. Petro kaa sɛ: ‘Seesei, Yesu te Onyankopɔn nsa nifa so wɔ soro, na wahwie honhom kronkron a ɔde hyɛɛ yɛn bɔ no agu yɛn  so. Ɛno nti na moahu na moate anwanwasɛm yi no.’

Asɛm a Petro kae no maa nnipadɔm no ho dwiriw wɔn paa, na wɔbisaa sɛ: “Dɛn na yɛnyɛ?” Petro ka kyerɛɛ wɔn sɛ: ‘Monsakra mfi mo bɔne ho, na momma wɔmmɔ mo asu wɔ Yesu din mu. Mo nso, mubenya honhom kronkron no bi sɛ akyɛde.’ Enti da no ara, nnipa bɛyɛ 3,000 bɔɔ asu. Efi saa da no, asuafo no hyɛɛ ase sɛ wɔredɔɔso ntɛmntɛm wɔ Yerusalem. Honhom kronkron no boaa asomafo no ma wɔtew nsafo bebree sɛnea ɛbɛyɛ a wɔbetumi akyerɛkyerɛ asuafo no ama wɔadi Yesu ahyɛde so.