1-3. (a) Ɛhe na nkɛntɛnso bɔne a ɛde abusua to asiane mu no fi ba? (b) Dɛn na ehia sɛ awofo kari pɛ wom bere a wɔbɔ wɔn abusua ho ban no?

WODE wo ba abarimaa bi rebɛkɔ sukuu, na osu retɔ. Ɔkwan bɛn so na wudi tebea no ho dwuma? Wobɛma wahuruw asi adiwo a ɔnhyɛ biribi a ɛremma osu no mfɔw no? Anaa wobɛhyɛ no ntade a ɛmma ɔmfɔw bebree araa ma ontumi ntu ne nan mpo? Nokwarem no, wonyɛ emu biara. Wode nea obehia na wamfɔw nkutoo na ɛbɛma no.

² Saa ara na ɛsɛ sɛ awofo hwehwɛ ɔkwan a ɛkari pɛ a wɔbɛfa so abɔ wɔn mma ho ban wɔ nkɛntɛnso a ɛsɛe ade a efi mmeae pii ba wɔn mma so​—nnwuma a wɔyɛ anigyede, nsɛm ho amanneɛbɔfo, atipɛnfo, ne ɛtɔ mmere bi a, sukuu ahorow mpo, no ho. Awofo binom nyɛ nneɛma pii mfa mmɔ wɔn abusua ho ban anaasɛ wɔnyɛ hwee koraa. Afoforo a ɛkame ayɛ sɛ wobu abɔnten so nkɛntɛnso nyinaa sɛ edi awu no yɛ katee araa ma mmofra no te nka sɛ wonnya wɔn ho atwaye. So wobetumi akari pɛ?

³ Yiw, wobetumi ayɛ saa. Ade a woyɛ tra so no mma wunnya nea wohwehwɛ no, na ebetumi de asiane aba. (Ɔsɛnkafo 7:​16, 17) Nanso ɔkwan bɛn so na Kristofo awofo bɛkari pɛ bere a wɔbɔ wɔn abusua ho ban no? Susuw nneɛma abiɛsa yi ho: nhomasua, fekubɔ, ne anigyede.

4. Ɛsɛ sɛ awofo Kristofo bu nhomasua dɛn?

⁴ Awofo Kristofo bu nhomasua sɛ ɛsom bo paa. Wonim sɛ sukuu boa mmofra ma wohu akenkan ne akyerɛw, na wotumi di nkitaho ne ɔhaw ahorow ho dwuma nso. Ɛsɛ sɛ ɛkyerɛ wɔn sɛnea wosua ade nso. Nimdeɛ a mmofra nya wɔ sukuu no betumi aboa wɔn ma asi wɔn yiye a nnɛ wiase no mu nsɛnnennen mfa ho. Afei nso, nhomasua a ɛkɔ anim betumi aboa wɔn ma wɔayɛ adwuma a eye kyɛn so.​—Mmebusɛm 22:29.

5, 6. Ɔkwan bɛn so na mmofra a wɔkɔ sukuu betumi ate ɔbarima ne ɔbea nna ho atosɛm?

⁵ Nanso, sukuu ma mmofra ne mmofra foforo a wɔn mu pii kura adwene a akyinkyim​—yɛ ade bom. Sɛ nhwɛso no, susuw adwene a wokura wɔ ɔbarima ne ɔbea nna ne abrabɔ ho no ho. Wɔ Nigeria ntoaso sukuu bi mu no, na abeawa aguaman bi taa de ɔbarima ne ɔbea nna ho afotu ma ne mfɛfo sukuufo. Wɔde anigye kɛse tiee no, ɛwom mpo sɛ na ne nsusuwii no yɛ nkwaseasɛm nkutoo a  wakenkan afi aguamansɛm nhoma mu de. Mmeawa no bi de n’afotu no dii dwuma. Nea efii mu bae ne sɛ, abeawa biako ne ne mpena nyinsɛnee na yafunu no a n’ankasa tu gui no kum no.

⁶ Awerɛhosɛm ne sɛ ɔbarima ne ɔbea nna ho atosɛm no bi fi akyerɛkyerɛfo hɔ mmom na ɛnyɛ mmofra hɔ. Ɛhaw awofo pii yiye bere a sukuu ahorow kyerɛkyerɛ mmofra ɔbarima ne ɔbea nna ho ade na wɔnka abrabɔ ho gyinapɛn ne asɛyɛde ho asɛm nkyerɛ wɔn no. Abeawa bi a wadi mfe 12 maame kae sɛ: “Yɛte baabi a wɔpɛ nyamesom yiye na wokura tetefo adwene, nanso wɔkyekyɛ kɔndɔm ma sukuufo no wɔ ɛha ntoaso sukuu no mu!” Ɛhaw ɔne ne kunu bere a wɔtee sɛ wɔn babea atipɛnfo mmarimaa se no pɛ no. Dɛn na awofo betumi ayɛ de abɔ wɔn abusua ho ban wɔ saa nkɛntɛnso bɔne no ho?

7. Ɔkwan pa bɛn so na wobetumi ako atia ɔbarima ne ɔbea nna ho atosɛm?

⁷ Eye sɛ wɔremmɔ ɔbarima ne ɔbea nna ho asɛm biara so nkyerɛ mmofra? Dabi. Ɛyɛ papa sɛ w’ankasa wobɛkyerɛkyerɛ wo mma ɔbarima ne ɔbea nna ho ade. (Mmebusɛm 5:1) Ɛwom, awofo pii kwati asɛm yi wɔ Europa ne Amerika Kusuu fam mmeae bi. Saa ara nso na wɔ Afrika aman bi mu no, awofo ntaa ne wɔn mma nka ɔbarima ne ɔbea nna ho asɛm. Agya bi a ɔwɔ Sierra Leone ka sɛ: “Ɛnyɛ Afrikafo amammerɛ sɛ wɔbɛyɛ saa.” Awofo bi te nka sɛ ɔbarima ne ɔbea nna ho ade a wɔbɛkyerɛkyerɛ wɔn mma no bɛma wɔanya adwene a ɛbɛma wɔabu bra bɔne! Nanso adwene bɛn na Onyankopɔn kura wɔ ho?

8, 9. Bɔbeasu ho nsɛm a eye bɛn na ɛwɔ Bible mu?

⁸ Bible da no adi pefee sɛ aniwusɛm biara nni ɔbarima ne ɔbea nna ho asɛm a wɔbɛka wɔ ɔkwan a  ɛfata so no mu. Wɔ Israel no, wɔka kyerɛɛ Onyankopɔn nkurɔfo sɛ wɔmmom nhyiam, a wɔn “mmofra” ka ho, na wontie Mose Mmara a wɔkenkan no den no. (Deuteronomium 31:​10-12; Yosua 8:​35) Mmara no kaa ɔbarima ne ɔbea bɔbeasu ho nsɛm bi pefee, a ebi ne nsabu, ahosen, aguamammɔ, awaresɛe, mmarima anaa mmea a wɔne wɔn ho da, mogyafra, ne aboa a wɔne no da. (Leviticus 15:​16, 19; 18:​6, 22, 23; Deuteronomium 22:​22) Akyinnye biara nni ho sɛ na awofo nya nneɛma pii a wɔbɛkyerɛkyerɛ mu akyerɛ wɔn mma a wɔpɛ biribi ahu no bere a wɔakenkan nneɛma a ɛte saa ho asɛm awie no.

⁹ Nsɛm wɔ Mmebusɛm atiri a ɛto anum, asia, ne ason mu a ɛda afotu a ɔdɔ wom a awofo de ma wɔ ɔbarima ne ɔbea nna ho ɔbrasɛe mu asiane ahorow ho adi. Nkyekyem ahorow yi kyerɛ sɛ ɛtɔ mmere bi a, ɔbrasɛe betumi asum obi afiri. (Mmebusɛm 5:3; 6:​24, 25; 7:​14-21) Nanso ɛkyerɛ sɛ ɛmfata na asiane fi mu ba, na ɛde akwankyerɛ ma na aboa mmofra ma wɔakwati ɔbrasɛe akwan. (Mmebusɛm 5:​1-14, 21-23; 6:​27-35; 7:​22-27) Afei nso, ɛkyerɛ sɛ ɔbrasɛe ne ɔbarima ne ɔbea nna mu anigye a wonya wɔ ɔkwampa so, wɔ aware mu, no bɔ abira. (Mmebusɛm 5:​15-20) Ɔkyerɛkyerɛ ho nhwɛso pa a ɛsɛ sɛ awofo di akyi bɛn ara ni!

10. Dɛn nti na Onyankopɔn nimdeɛ a wɔbɛma mmofra anya wɔ ɔbarima ne ɔbea nna ho no mma wommu ɔbra bɔne?

¹⁰ So saa nkyerɛkyerɛ no ma mmofra bu bra bɔne? Nea ɛne eyi bɔ abira no, Bible no kyerɛkyerɛ sɛ: “Treneefo nimdeɛ na wɔde beyi wɔn.” (Mmebusɛm 11:9) So wopɛ sɛ wugye wo mma fi wiase yi nkɛntɛnso no mu? Agya bi kae sɛ: “Yɛabɔ mmɔden sɛ yɛbɛka ɔbarima ne ɔbea nna ho nsɛm pefee akyerɛ yɛn mma no fi bere a wosusua no. Ɛno nti, sɛ wɔte sɛ mmofra ka ɔbarima ne ɔbea nna ho asɛm a, wɔmfa wɔn adwene nkɔ so. Ɛnyɛ ahintasɛm biara.”

11. Ɔkwan bɛn so na wobetumi akyerɛkyerɛ mmofra asetra mu kokoam nneɛma no nkakrankakra?

 ¹¹ Sɛnea yɛahu wɔ atiri a edi kan no mu no, ɛsɛ sɛ wofi ɔbarima ne ɔbea nna ho adesua ase ntɛm. Sɛ worekyerɛkyerɛ mmofra ma wɔabobɔ nipadua no akwaa din a, mmɔ ntra wɔn awode te nea ɛyɛ aniwude wɔ ɔkwan bi so. Kyerɛ wɔn eyinom din ankasa. Bere bi akyi no, ɛho hia sɛ wokyerɛ wɔn nneɛma bi a ɛsɛ sɛ wɔyɛ wɔ kokoam ne nea ɛnsɛ sɛ wɔma ho kwan. Ɛbɛyɛ papa sɛ awofo baanu no nyinaa kyerɛ mmofra no sɛ nnipa nkwaa yi yɛ soronko, na ɛnsɛ sɛ wɔma afoforo so mu anaa woyi kyerɛ wɔn, na ɛnsɛ sɛ wɔka ho asɛm wɔ ɔkwan a ɛmfata so da. Bere a mmofra renyin no, ɛsɛ sɛ wɔka sɛnea ɔbarima ne ɔbea hyiam ma wonyinsɛn abofra kyerɛ wɔn. Ebedu bere a wɔn ankasa nipadua bedu baabi a wobetumi awo no, na ɛsɛ sɛ wɔahu nsakrae a wɔhwɛ kwan no dedaw. Sɛnea wɔkae wɔ Ti 5 no, saa adesua no betumi aboa ma wɔabɔ mmofra ho ban wɔ mmonnaato ho.​—Mmebusɛm 2:​10-14.

12. Nsɛm a wɔakyinkyim no bɛn na wɔtaa kyerɛkyerɛ wɔ sukuu?

¹² Ɛho hia sɛ awofo siesie wɔn ho sɛ wɔbɛbɔ atosɛm foforo a ebia wɔbɛkyerɛkyerɛ wɔ sukuu​—wiase nyansapɛ te sɛ adannandi, ɔmampɛ, anaa adwene a ɛne sɛ nokware turodoo biara nni hɔ​—no agu. (1 Korintofo 3:​19; Fa toto Genesis 1:​27; Leviticus 26:1; Yohane 4:​24; 17:​17 ho.) Sukuu mpanyimfo pii a wokura adwempa si sɛnea ɛho hia sɛ wɔtoa sukuu so so dua dodo. Ɛwom sɛ obi ankasa na obesi gyinae sɛ ɔbɛtoa ne sukuu so de, nanso akyerɛkyerɛfo bi ka sɛ ɛne ade biako pɛ a ɛbɛma asi obi yiye. *​—Dwom 146:​3-6.

13. Ɔkwan bɛn so na wobetumi abɔ mmofra a wɔkɔ sukuu ho ban wɔ nsusuwii a ɛmfata ho?

 ¹³ Sɛ awofo betumi abɔ atoro nkyerɛkyerɛ agu a, ɛsɛ sɛ wohu nkyerɛkyerɛ a wɔde ma wɔn mma. Enti, awofo, monkae sɛ mo nso mowɔ sukuu adwuma a wɔyɛ wɔ fie! Monkyerɛ mo mma sukuukɔ ho anigye ankasa. Mo ne wɔn mmɔ nkɔmmɔ bere a wɔapɔn sukuu no. Mummisa nea wosua, nea wɔpɛ sen biara, ne nea wohu sɛ egye mmɔdenbɔ kɛse paa. Monhwɛ nnwuma a wɔde ma sɛ wɔmmɛyɛ wɔ fie, nea wosua a wɔakyerɛw ato hɔ, ne nea wotumi yɛe wɔ sɔhwɛ mu. Mommɔ mmɔden sɛ mubehu wɔn akyerɛkyerɛfo. Momma akyerɛkyerɛfo nhu sɛ mo ani sɔ wɔn adwuma na mopɛ sɛ moboa wɔn wɔ ɔkwan biara a mubetumi so.

14. Dɛn nti na ɛho hia sɛ mmofra a wosuro Onyankopɔn paw nnamfo pa?

¹⁴ “Wusuaa saa ade no wɔ he?” Awofo baahe na wommisaa saa asɛm no bere a biribi a wɔn ba aka anaa wayɛ a ɛte sɛ nea ɛmfata koraa no ma wɔn ho dwiriw wɔn no? Na mpɛn ahe na mmuae no nkyerɛ sɛ efi n’adamfo foforo bi a ɔne no kɔ sukuu anaa ɔte mpɔtam hɔ hɔ? Yiw, yɛn ayɔnkofo nya yɛn so tumi kɛse, sɛ ebia yɛyɛ mmofra anaa mpanyin no. Ɔsomafo Paulo de kɔkɔbɔ mae sɛ: “Mommma wɔnnnaadaa mo! Nkɔmmɔ bɔne [fekubɔne, NW] sɛe ɔbra pa.” (1 Korintofo 15:​33; Mmebusɛm 13:​20) Mmofra titiriw na atipɛnfo nhyɛso nya wɔn so tumi. Wɔntaa nnye wɔn ho nni, na ɛtɔ mmere bi a ɔpɛ a wɔwɔ sɛ wɔbɛsɔ wɔn ayɔnkofo ani no bunkam wɔn so. Ɛnde, hwɛ sɛnea ɛho hia sɛ wɔpaw nnamfo pa!

15. Awofo bɛyɛ dɛn atumi akyerɛ wɔn mma kwan wɔ nnamfo paw mu?

¹⁵ Sɛnea ɔwofo biara nim no, mmofra rempaw adepa bere nyinaa; wohia akwankyerɛ bi. Ɛnkyerɛ sɛ ɛsɛ  sɛ wɔpaw wɔn nnamfo ma wɔn. Mmom bere a wonyin no, monkyerɛ wɔn nhumu na mommoa wɔn ma wonhu su horow a ɛsom bo wɔ wɔn nnamfo ho. Su titiriw no ne ɔdɔ a wobenya ama Yehowa na wɔayɛ nea ɛteɛ wɔ n’ani so. (Marko 12:​28-30) Monkyerɛkyerɛ wɔn ma wɔnnɔ nnipa anokwafo, ayamyefo, ne nsiyɛfo. Wɔ abusua adesua no mu no, mommoa mmofra ma wonhu saa su horow no wɔ Bible mu nnipa ho, na afei wɔnhwehwɛ saa su koro no ara wɔ afoforo ho wɔ asafo no mu. Monyɛ nhwɛso denam nnyinasode koro no ara a mode bɛpaw mo nnamfo no so.

16. Ɔkwan bɛn so na awofo betumi ahwɛ nnamfo a wɔn mma paw no?

¹⁶ So munim nnipa ko a mo mma nnamfo yɛ? Dɛn nti na momma mo mma mfa wɔn mma fie na ama moahu wɔn? Mubetumi abisa mo mma nso nea mmofra foforo susuw wɔ saa nnamfo yi ho. Wonim wɔn sɛ wodi nokware anaa wɔwɔ asetra akwan abien? Sɛ wɔwɔ asetra akwan abien a, mommoa mo mma no ma wonsusuw nea enti a saa fekubɔ no betumi adi wɔn awu no ho. (Dwom 26:​4, 5, 9-12) Sɛ muhu sɛ nsakrae a ɛmfata wɔ mo ba suban, ntadehyɛ, anaa kasa ho a, ebia ɛho behia sɛ mo ne no susuw ne nnamfo ho. Ebia mo ba no ne n’adamfo bi a onya ne so nkɛntɛnso bɔne na ɛbɔ.​—Fa toto Genesis 34:​1, 2 ho.

17, 18. Wɔ kɔkɔbɔ a awofo de bɛma wɔ nnamfo bɔne ho akyi no, mmoa pa bɛn na wobetumi de ama?

¹⁷ Nanso ɛnnɔɔso sɛ mobɛkyerɛkyerɛ mo mma kɛkɛ sɛ wɔnkwati nnamfo bɔne. Mommoa wɔn ma wonnya nnamfo pa. Agya bi ka sɛ: “Na yɛbɔ mmɔden bere nyinaa sɛ yebenya bi ahyɛ ananmu ama no. Enti bere a sukuu no pɛe sɛ yɛn ba no bɛka bɔɔlbɔ  kuw no ho no, me ne me yere ne no traa ase susuw nea enti a ɛrenyɛ adepa ho​—esiane ayɔnkofo foforo a ɔne wɔn bɛbɔ no nti. Nanso afei yɛkae sɛ yɛbɛhwehwɛ asafo no mu mmofra foforo bi na yɛne wɔn nyinaa akɔ agumadibea akɔbɔ bɔɔl. Ɛno maa asɛm no twae.”

¹⁸ Awofo a wɔn ani da hɔ boa wɔn mma ma wonya nnamfo pa na afei wɔne wɔn goru agoru pa. Nanso, wɔ awofo pii fam no, agodie de nsɛnnennen ba.

19. Bible mu nhwɛso ahorow bɛn na ɛkyerɛ sɛ ɛnyɛ bɔne sɛ mmusua begye wɔn ani?

¹⁹ So Bible kasa tia yɛn ani a yebegye? Ɛnkasa ntia koraa! Bible ka sɛ “ɔserew wɔ ne bere . . . na asaw wɔ ne bere.” * (Ɔsɛnkafo 3:4) Onyankopɔn nkurɔfo a wɔtraa tete Israel no de nnwom ne asaw, agodie, ne aborɔme gyee wɔn ani. Yesu Kristo kɔɔ ayeforohyia apontow kɛse bi ne “pon kɛse bi” a Mateo Lewi tow maa no no ase. (Luka 5:​29; Yohane 2:​1, 2) Ɛda adi pefee sɛ na Yesu nyɛ obi a ɔsɛe afoforo anigye. Mommmu serew ne anigye sɛ bɔne wɔ mo fie da!

20. Dɛn na ɛsɛ sɛ awofo ma ɛtra wɔn adwene mu bere a wɔde anigyede ma wɔn abusua no?

²⁰ Yehowa “yɛ anigye Nyankopɔn.” (1 Timoteo 1:​11, NW) Enti ɛsɛ sɛ Yehowa som ma yenya anigye, ɛnyɛ ade a ɛma yɛyɛ bosoo wɔ asetra mu. (Fa toto Deuteronomium 16:​15 ho.) Mmofra ani gye wɔn ho mmoroso na wɔwɔ ahoɔden a edi mu a wobetumi ada no adi wɔ agumadi ne agodie mu. Agoru pa a wɔpaw no nyɛ anigyede kɛkɛ. Ɛyɛ ɔkwan a abofra fa so sua ade na ne ho kokwaw. Ɛyɛ abusua ti asɛyɛde sɛ ɔde biribiara a ne fifo hia bɛma wɔn, a agodie ka ho. Nanso ɛho hia sɛ wɔkari pɛ.

21. Anigyede mu asiane ahorow bɛn na ɛwɔ hɔ nnɛ?

²¹ Wɔ ɔhaw bere yi “nna a edi akyiri” mu no, nnipa a “wɔdɔ anigyede sen Onyankopɔn” ayɛ adesamma abusua no mu ma, sɛnea wɔhyɛɛ nkɔm wɔ Bible no mu no. (2 Timoteo 3:​1-5) Wɔ nnipa pii fam no, anigyede ne asetra mu ade titiriw. Anigyede bebree wɔ hɔ araa ma ɛyɛ mmerɛw sɛ ebetumi ama wɔabu wɔn ani agu nneɛma a ɛho hia kɛse no so. Afei nso, ɔbarima ne  ɔbea nna ho ɔbrasɛe, basabasayɛ, nnuru a wɔde di dwuma ɔkwammɔne so, ne nneyɛe foforo a edi awu kɛse da adi wɔ nnɛyi anigyede pii mu. (Mmebusɛm 3:​31) Dɛn na wobetumi ayɛ de abɔ mmofra ho ban afi anigyede a ɛmfata ho?

22. Ɔkwan bɛn so na awofo betumi atete wɔn mma ma wɔasi anigyede ho gyinae a nyansa wom?

²² Ɛho hia sɛ awofo twa ɔhye na wɔde anohyeto ma. Nanso nea ɛsen saa no, ɛho hia sɛ wɔkyerɛ wɔn mma ɔkwan a wɔbɛfa so ahu agodie a edi awu ne nea ɛboro so. Saa ntetee no gye bere ne mmɔdenbɔ. Susuw nhwɛso bi ho. Agya bi a ɔwɔ mmarimaa baanu hui sɛ ne ba panyin no taa tie radio foforo bi dwumadi. Enti  da koro bi bere a wɔn papa no reka ne lɔre akɔ adwuma no, otiee saa radio dwumadi no. Na ogyina wɔ bere ne bere mu kyerɛw nnwom bi mu nsɛm to hɔ. Akyiri yi ɔne ne mma no traa ase susuw nea na wate no ho. Obisaa nsɛm a ɔde behu wɔn adwene, na ofii emu biara ase sɛ, “Mususuw dɛn?” na afei ɔde ntoboase tiee wɔn mmuae. Bere a ɔne mmarimaa no de Bible no susuw asɛm no ho wiei no, wɔpenee so sɛ wontie saa dwumadi no bio.

23. Ɔkwan bɛn so na awofo betumi abɔ wɔn mma ho ban wɔ anigyede a ɛmfata ho?

²³ Awofo Kristofo a wɔyɛ ade nyansam hwehwɛ nnwom. TV so dwumadi, video, aseresɛm nhoma, video so agodie, ne sini a wɔn mma ani gye ho mu hwɛ sɛ eye anaa. Wɔhwɛ akyi mfonini no, emu nsɛm, adaka a ɛhyem, na wɔkenkan nea atesɛm nkrataa ka wɔ ho hwɛ emu nsɛm kakra. “Anigyede” a wɔyɛ ma nnɛyi mmofra no bi ma wɔn mu pii ho dwiriw wɔn. Wɔn a wɔpɛ sɛ wɔbɔ wɔn mma ho ban wɔ nkɛntɛnso a ɛho ntew ho ne wɔn abusua tra ase de Bible ne Bible ho nhoma te sɛ Questions Young People Ask​—Answers That Work ne Ɔwɛn-Aban ne Nyan! nsɛmma nhoma no susuw emu asiane ahorow no ho. * Sɛ awofo de anohyeto pintinn ma, na wosi pi bere nyinaa da ntease adi a, wɔtaa hu sɛ nnepa fi mu ba.​—Mateo 5:​37; Filipifo 4:5.

24, 25. Agoru a ɛfata a mmusua betumi abom adi no bi ne dɛn?

²⁴ Nokwarem no, agobɔne a mobɛbara no yɛ akodi no fã bi kɛkɛ. Ɛsɛ sɛ wɔde papa no siw bɔne no ano, anyɛ saa a ebetumi atwetwe mmofra no akɔfa ɔkwammɔne so. Kristofo mmusua pii de anigye kae nneɛma a wɔboom de gyee wɔn ani no mpɛn pii​—wɔn ani a wokogyee  wɔ baabi, mpasetu, ahomegye wɔ baabi, agodie ne agumadi, akwan a wotu kɔsrasraa abusuafo anaa nnamfo. Ebinom ahu sɛ ade a wɔbom kenkan no den kɛkɛ sɛ agodie ma wonya anigye ne awerɛkyekye kɛse. Afoforo ani gye ho sɛ wobeyi aseresɛm anaa wɔbɛka anigyesɛm bi. Afoforo nso abom asua nnwuma bi, sɛ nhwɛso no, nnua a wɔde di adwini ne nnwuma foforo a wɔde nsa yɛ, ne mfiri a wɔde bɔ nnwom, mfoniniyɛ anaa Onyankopɔn abɔde ho adesua. Mmofra a wosua sɛ wobenya saa anigyede foforo yi mu kyɛfa no nya ahobammɔ wɔ anigyede a ɛho ntew ho, na wohu sɛ agodie kyerɛ pii sen sɛ wɔbɛtra ase kɛkɛ na wɔagye wɔn ani. Biribi mu a obi de ne ho hyɛ no taa ma n’ani gye pii sen sɛ ebinom bɛyɛ ma wahwɛ.

²⁵ Apontow nso betumi ayɛ anigyede a mfaso wɔ so. Sɛ mohwɛ so yiye na anyɛ kɛse dodo anaa annye bere pii a, mo mma betumi anya pii asen anigye kɛkɛ. Ebetumi aboa ma ɔdɔ a ɛwɔ asafo no mu no mu ayɛ den kɛse.​—Fa toto Luka 14:​13, 14; Yuda 12 ho.

26. Su bɛn na ɛho hia paa na wɔatumi abɔ mmusua ho ban wɔ nkɛntɛnso bɔne ahorow ho?

²⁶ Akyinnye biara nni ho sɛ mo abusua no a mobɛbɔ ho ban wɔ wiase nkɛntɛnso a ɛsɛe ade ho no hwehwɛ sɛ moyɛ adwumaden. Nanso ade biako bi wɔ hɔ a ɛbɛma atumi ayɛ yiye sen ade foforo biara. Ɛne ɔdɔ! Abusua mu abusuabɔ a ɔdɔ a emu yɛ den wom bɛma mo fie ayɛ baabi a ahobammɔ wɔ na moatumi abɔ nkɔmmɔ, na abɔ mo ho ban afi nkɛntɛnso bɔne ho. Afei nso, ɔdɔ foforo bi a wubenya no ho hia sen saa mpo​—ɔdɔ ma Yehowa. Sɛ saa ɔdɔ no wɔ abusua mu a, ɛda adi kɛse sɛ mmofra no benyin a wɔmpɛ sɛ wɔbɛyɛ nea Onyankopɔn mpɛ denam wiase nkɛntɛnso a wɔbɛda no adi so. Na awofo a wofi wɔn komam dɔ  Yehowa no bɛbɔ mmɔden sɛ wobesuasua ne nipasu a ɛda ɔdɔ adi, ɛfata na ɛkari pɛ no. (Efesofo 5:1; Yakobo 3:​17) Sɛ awofo yɛ saa a, wɔn mma rennya hwee nnyina so mmu Yehowa som sɛ nneɛma bi a ɛnsɛ sɛ wɔyɛ ara kwa anaa asetra kwan a ɛkwati anigye anaa ɔserew, a sɛ wonya kwan a, wɔpɛ sɛ woguan fi mu ntɛm ara. Mmom no, wobehu sɛ Onyankopɔn som yɛ anigye ne asetra kwan a akomatɔyam wom sen biara.

27. Ɔkwan bɛn so na abusua bi betumi adi wiase so nkonim?

²⁷ Mmusua a wɔyɛ biako wɔ ɔsom a anigye wom na ɛkari pɛ a wɔde ma Onyankopɔn mu, wofi koma nyinaa mu bɔ mmɔden sɛ wɔbɛyɛ nnipa a “wonni nkekae ne dɛm” wɔ wiase yi mu nkɛntɛnso a aporɔw no ho no ma Yehowa ani gye. (2 Petro 3:​14; Mmebusɛm 27:​11) Saa mmusua no di Yesu Kristo a ɔko tiaa mmɔden biara a Satan wiase no bɔe sɛ ɛbɛma ne ho agu fĩ no anammɔn akyi. Ɛrekɔ Yesu asetra sɛ ɔdesani awiei no, otumi kae sɛ: “Madi wiase so nkonim.” (Yohane 16:​33) Ɛmmra sɛ mo abusua nso bedi wiase so nkonim na moanya asetra mu anigye daa!