Ɛrenkyɛ koraa, abotare a Yehowa anya ama saa wiase yi bɛba awiei. Wɔbɛsɛe atorosom, wiase aman bi bɛka wɔn ho abom atow ahyɛ Onyankopɔn nkurɔfo so, na Yehowa bekunkum abɔnefo nyinaa wɔ Armagedon. Saa nsɛm akɛseakɛse a ɛrebesisi yi, Kristofo rehwɛ kwan paa.

Ɛwom, ahohiahia kɛse no, yennim ɛho nsɛm nyinaa. Ɛho nhwɛso ne sɛ, yennim bere pɔtee a ahohiahia kɛse no befi ase. Yennim asɛm a aban ahorow no bɛka de ayɛ nnyinaso atow ahyɛ ɔsom ahorow so. Sɛ amanaman no tow hyɛ Onyankopɔn nkurɔfo so a, dɛn na wɔde bɛyɛ yɛn, na ɛbɛkɔ so bere tenten sɛn? Ɛno nso yennim. Saa ara nso na yennim ɔkwan pɔtee a Yehowa bɛfa so akunkum abɔnefo wɔ Armagedon.

Nanso biribiara a ɛbɛboa yɛn ama yɛanya ahotoso, na yɛde akokoduru ahwɛ nneɛma a ebesisi daakye no kwan no, kyerɛwnsɛm no ka kyerɛ yɛn. Ɛho nhwɛso ne sɛ, yenim sɛ yɛte “awiei mmere” no nna a etwa to mu. (2Ti 3:1) Yenim sɛ, sɛ amanaman no tow hyɛ ɔsom ahorow no so a, “wobetwa nna no so” sɛnea ɛbɛyɛ a wɔrensɛe nokware som nka ho. (Mt 24:22) Yenim sɛ Yehowa begye ne nkurɔfo. (2Pe 2:9) Na yenim nso sɛ, Onii a Yehowa apaw no sɛ ɔnsɛe abɔnefo na ɔmfa nnipakuw kɛse no ntwa Armagedon no, ɔyɛ ɔtreneeni, na ɔwɔ tumi kɛse.—Adi 19:11, 15, 16.

Nneɛma a ebesisi daakye no bɛyɛ ‘hu, na ɛbɛma nnipa atwitwa ahwe.’ Nanso sɛ yɛkenkan sɛnea tete no Yehowa gyee ne nkurɔfo ne nea waka afa daakye ho, na yɛto yɛn bo ase dwinnwen ho a, yebetumi ‘asɔre agyina na yɛama yɛn ti so,’ efisɛ yenim sɛ yɛn nkwagye abɛn.—Lu 21:26, 28.