Yesaia 37:1-38
37 Bere a Ɔhene Hesekia tee asɛm no pɛ, osuan n’ataade mu, na ofuraa awerɛhow ntama* kɔɔ Yehowa fi hɔ.+
2 Afei ɔsomaa Eliakim a ofi* no hyɛ ne nsa, ne ɔkyerɛwfo Sebna ne asɔfo no mu mpanyimfo no kɔɔ Amus ba odiyifo Yesaia+ nkyɛn, na na wofurafura awerɛhow ntama.
3 Na wɔka kyerɛɛ no sɛ: “Nea Hesekia aka ni, ‘Ɛnnɛ yɛ ahokyere ne animka* ne animguase da; efisɛ yɛayɛ sɛ ɔbea a awo aka no* nanso onni ahoɔden a ɔde bɛwo.+
4 Ebia Yehowa, wo Nyankopɔn bɛte nsɛm a Rabsake aka no; ɔno na ne wura Asiria hene asoma no sɛ ommebu Onyankopɔn teasefo no animtiaa.+ Na nsɛm a Yehowa, wo Nyankopɔn ate no nti, ɔbɛma wabu ho akontaa. Ɛno nti bɔ mpae+ ma wɔn a wɔaka a wɔwɔ ha no.’”+
5 Enti Ɔhene Hesekia nkoa no kɔɔ Yesaia nkyɛn.+
6 Na Yesaia ka kyerɛɛ wɔn sɛ: “Monkɔka nkyerɛ mo wura sɛ, ‘Nea Yehowa aka ni: “Mma nsɛm a wotee no mmmɔ wo hu,+ abususɛm a Asiria hene nkoa aka atia me no.+
7 Mede adwene bi bɛhyɛ ne tirim,* na ɔbɛte amanneɛbɔ bi, na wasan akɔ n’ankasa asaase so;+ na mɛma wɔde sekan akum no wɔ n’ankasa asaase so.”’”+
8 Bere a Rabsake tee sɛ Asiria hene afi Lakis no, ɔkɔɔ ne nkyɛn, na ɔkɔtoe sɛ ɔne Libna reko.+
9 Afei ɔhene no tee sɛ Etiopia hene Tirhaka aba sɛ ɔne no rebɛko. Ɔtee saa no, ɔsan somaa nnipa* bi sɛ wɔnkɔ Hesekia nkyɛn.+ Ɔka kyerɛɛ wɔn sɛ:
10 “Monkɔka nkyerɛ Yuda hene Hesekia sɛ, ‘Mma wo Nyankopɔn a wode wo ho ato no so no nnnaadaa wo sɛ: “Wɔremfa Yerusalem nhyɛ Asiria hene nsa.”+
11 Nea Asiria ahemfo de yɛɛ nsaase no nyinaa ne sɛnea wɔsɛee wɔn pasaa no, woate dedaw.+ Wo na wubenya wo ti adidi mu anaa?
12 Aman a m’agyanom sɛee wɔn no anyame tumi gyee wɔn anaa?+ Ɛhe na Gosan, Haran,+ Resef, ne Edenfo a na wɔwɔ Tel-Asar no wɔ?
13 Ɛhe na Hamat hene ne Arpad hene ne Sefarwayim+ ne Hena ne Iwa nkurow so ahemfo no wɔ?’”
14 Ɛnna Hesekia gyee nhoma no fii nkurɔfo a wɔsomaa wɔn no nsam kenkanee, na Hesekia kɔɔ Yehowa fi kɔtrɛw mu wɔ Yehowa anim.+
15 Na Hesekia bɔɔ Yehowa mpae+ sɛ:
16 “O asafo Yehowa,+ Israel Nyankopɔn a wote kerubim so,* wo nko ara ne nokware Nyankopɔn wɔ asaase so ahenni nyinaa so. Wo na woyɛɛ ɔsoro ne asaase.
17 O Yehowa, yɛ aso na tie!+ O Yehowa, bue w’aniwa na hwɛ!+ Tie nsɛm a Senaherib asoma sɛ wɔmfa mmebu Onyankopɔn teasefo no animtiaa no nyinaa.+
18 O Yehowa, ɛyɛ nokware sɛ Asiria ahemfo asɛe nsaase nyinaa+ ne wɔn ankasa asaase.
19 Afei nso, wɔatow wɔn anyame agu ogya mu,+ efisɛ wɔnyɛ anyame, na mmom nnipa nsa ano adwuma,+ nnua ne abo; ɛno nti na wotumi sɛee wɔn no.
20 Enti afei, O Yehowa, yɛn Nyankopɔn, gye yɛn fi ne nsam na asaase so ahenni nyinaa nhu sɛ wo, Yehowa, wo nko ara ne Onyankopɔn.”+
21 Na Amus ba Yesaia soma kɔka kyerɛɛ Hesekia sɛ: “Nea Israel Nyankopɔn Yehowa aka ni, ‘Asiria hene Senaherib ho mpae a wobɔɔ me no nti,+
22 Yehowa asɛm a waka atia no ni:
“Sion babea, ɔbaabun no, abu wo animtiaa, na wo ho yɛ no serew.
Yerusalem babea no awosow ne ti akyerɛ wo.
23 Hena na woabu no animtiaa+ aka abususɛm atia no yi?
Hena na woateɛteɛm agu no so+Na woama w’ani atra w’ani ntɔn wɔ ne so yi?
Ɛyɛ Israel Kronkronni no!+
24 Wonam wo nkoa so abu Yehowa animtiaa+ aka sɛ,‘Ɔko nteaseɛnam bebree a mewɔ no,Mede bɛforo akɔ mmepɔw atifi,+Lebanon akyirikyiri.
Metwitwa sida nnua atenten ne ɔpopaw nnua fɛfɛ a ɛwɔ hɔ no agu.
Mɛforo akɔ mmeae a ɛwɔ soro paa, ne ne kwaebirentuw mu.
25 Metutu mmura na manom nsu;Mede me nan* bɛma Egypt nsubɔnten* ayow.’
26 Wontee anaa? Efi tete na mebɔɔ me tirim sɛ mɛyɛ.*
Mehyɛ too hɔ nyɛ nnɛ.+
Afei mɛma aba mu.+
Wobɛma nkurow a wɔabɔ ho ban adan amamfo.*+
27 Emu nnipa bɛyɛ mmɔbɔ;Ehu bɛka wɔn na wɔn anim agu ase.
Wɔbɛyɛ sɛ asaase so wura ne sare momono,Wɔbɛyɛ sɛ ɔdan so sare a apuei mframa ama ahyew.*
28 Bere a wote hɔ ne bere a worekɔ ba nyinaam’ani tua,+Na w’ani bere me so nso a, mihu,+
29 Efisɛ sɛnea w’ani abere me so+ na worebobom no, mate.+
Enti mede me darewa bewura wo hwenem, na mede me nnareka+ ato w’ano,
Na ɔkwan a wofaa so bae no, ɛno ara so na mɛma woafa akɔ.”
30 “‘Eyi bɛyɛ sɛnkyerɛnne ama wo:* Afe yi, mubedi hwiit* a ɛno ara afifi;* afe a ɛto so abien no nso, mubedi hwiit a ɛno ara afifi; nanso afe a ɛto so abiɛsa no de, mubegu aba na moatwa, na moayeyɛ bobefuw* na moadi mu aba.+
31 Yuda fifo a wobefi mu aka, wɔn a wɔbɛka no,+ wɔn ntini bewurawura fam, na wobenyin akɔ soro na wɔasow aba.
32 Na nkaefo bi befi Yerusalem aba, na wɔn a wɔanya wɔn ti adidi mu no befi Sion Bepɔw so aba.+ Asafo Yehowa ahokeka nti na ɔbɛyɛ eyi.+
33 “‘Enti nea Yehowa aka afa Asiria hene ho ni:+
“Ɔremma kurow yi mu,+Na ɔrentow agyan mma ha;Ɔremfa ɔkyɛm mma ha,Na ɔrensi akoban* wɔ ho.”’+
34 ‘Ɔkwan a ɔfaa so bae no ara so na ɔbɛfa akɔ,Na ɔremma kurow yi mu,’ Yehowa na waka.
35 ‘Me din+ ne m’akoa Dawid nti,+Mɛko agye kurow yi.’”+
36 Na Yehowa bɔfo pue kɔɔ Asiriafo asoɛe hɔ kokunkum mmarima 185,000. Bere a nkurɔfo sɔree anɔpatutuutu no, wohui sɛ afunu ayɛ hɔ ma.+
37 Enti Asiria hene Senaherib fii hɔ, na ɔsan kɔɔ Niniwe+ kɔtenaa hɔ.+
38 Na bere a ɔkɔɔ ne nyame Nisrok fi* kɔkotowee no, ɔno ara ne mma mmarima Adramelek ne Sareser de sekan kum no,+ na woguan kɔɔ Ararat+ asaase so. Na ne ba Esar-Haddon+ bedii n’ade.
Ase Hɔ Nsɛm
^ Anaa “atweaatam.” Hwɛ Nkyerɛkyerɛmu afã hɔ.
^ Anaa “ahemfi.”
^ Anaa “adapaatwa.”
^ Nt., “ɔbea a mma abedu n’awotwaa ano.”
^ Nt., “Mede honhom bi bɛhyɛ ne mu.”
^ Anaa “ɔsan tuu abɔfo.”
^ Ebetumi nso akyerɛ, “wote kerubim mfinimfini.”
^ Anaa “nammuromu; nammɔn mu.”
^ Anaa “Nil nsuka.”
^ Nt., “Efi tete na meyɛe.”
^ Anaa “adan afabo akuwakuw.”
^ Anaa “awo.”
^ Anaa “bobeturo.”
^ Anaa “hwiit aba a agu fam afifi.”
^ Kyerɛ sɛ, Hesekia.
^ Ebetumi aba sɛ ɛyɛ baali.
^ Esiw anaa ɔfasu a wogyina so ko anaa wɔde bɔ kurow ho ban.
^ Anaa “abosomfi.”
