Nnwom 22:1-31
Wɔde ma dwom kyerɛfo; ɔkwan a wɔfa so to no: “Adekyee Wansan.”* Dawid dwom.
22 Me Nyankopɔn, me Nyankopɔn, adɛn nti na woagyaw me?+
Adɛn nti na wummegye me?Adɛn nti na wuntie me sufrɛ?+
2 Me Nyankopɔn, mefrɛ wo adekyee, nanso wummua me;+Edu anadwo nso a, menka m’ano ntom.
3 Ne nyinaa mu no, woyɛ kronkron,+Na Israel ayeyi atwa wo ho ahyia.*
4 Wo na yɛn agyanom de wɔn ho too wo so;+Wɔde wɔn ho too wo so, na wugyee wɔn.+
5 Wo na wosu frɛɛ wo, na wugyee wɔn nkwa;Wɔde wɔn ho too wo so, na wɔn nsa ansi fam.*+
6 Nanso me de, meyɛ osunson, menyɛ onipa.Nkurɔfo dii me ho fɛw,* na aman buu me animtiaa.+
7 Wɔn a wohu me nyinaa di me ho fɛw;+Wɔtweetwee me wosow wɔn ti+ ka sɛ:
8 “Ɔde ne ho ato Yehowa so. Ma onnye no ɛ!
Ma onnye no nkwa, efisɛ ne ho hia no!”+
9 Wo na wuyii me fii yafunu mu;+Bere a mitua me maame nufu ano no, womaa me koma tɔɔ me yam.
10 Wɔwoo me ara pɛ na wɔde me hyɛɛ wo nsa;*Wone me Nyankopɔn fi me maame yam.
11 Ntwe wo ho mfi me ho, efisɛ ahohia abɛn me,+Na minni ɔboafo foforo biara.+
12 Anantwinini bebree atwa me ho ahyia;+Basan anantwinini a wɔn ho yɛ den atwa me ho kanko.+
13 Wɔbaabae wɔn anom kyerɛ me+Te sɛ gyata a ɔrebobom na ɔretetew nam mu.+
14 Wɔahwie me agu sɛ nsu,Na me nnompe nyinaa ahunhuan.
Me koma ayɛ sɛ ɛwokyɛm;+Anan wɔ me mu tɔnn.+
15 M’ahoɔden asa; mete sɛ ayowa sin,+Me tɛkrɛma afam me dodom;+Woretwe me akɔ owu mu akɔhyɛ dɔte mu.+
16 Nkraman atwa me ho ahyia;+Wɔaka me ahyem sɛnea nnebɔneyɛfo asafodɔm yɛ.+Wɔrekeka me nsa ne me nan te sɛ gyata.+
17 Mitumi kan me nnompe nyinaa.+
Wɔtɛɛ wɔn anom hwɛ me hãã.
18 Wɔkyekyɛ me ntaade mu fa,Na wɔbɔ m’ataade so ntonto.+
19 O Yehowa, wo de, mma me ne wo ntam kwan nnware.+
Wone m’ahoɔden, enti yɛ ntɛm bɛboa me.+
20 Gye me* fi sekan ano;Me nkwa* a ɛsom bo no, gye fi ɔkraman nsam.+
21 Gye me fi gyata anom;+Tie me na gye me fi ɛkoɔ* mmɛn mu.
22 Mɛbɔ wo din akyerɛ me nuanom;+Meyi wo ayɛ wɔ asafo no mu.+
23 Mo a musuro Yehowa nyinaa, munyi no ayɛ!
Yakob asefo,* mo nyinaa monhyɛ no anuonyam!+
Israel asefo* nyinaa, mo ho mpopo n’anim.
24 Ɔno na wammu mmɔborɔwa animtiaa, na wammu n’ani angu n’amanehunu so;+Wamfa n’anim anhintaw no.+
Bere a osu frɛɛ no no, otiei.+
25 Meyi wo ayɛ wɔ asafo kɛse mu;+Metua me bɔhyɛ ade wɔ wɔn a wosuro wo no anim.
26 Ahobrɛasefo bedidi amee;+Wɔn a wɔhwehwɛ Yehowa no beyi no ayɛ.+
Montena ase daa na mo ani nnye.*
27 Asaase ano nyinaa bɛkae, na wɔadan aba Yehowa nkyɛn.
Amanaman mmusuakuw nyinaa bɛkotow w’anim.+
28 Yehowa na ahenni wɔ no;+Ɔno na odi amanaman no so hene.
29 Asaase so asikafo* nyinaa bedidi na wɔakotow;Wɔn a wɔkɔ dɔte mu nyinaa bɛkotow n’anim;Wɔn mu biara rentumi nkora ne nkwa* so.
30 Wɔn asefo* bɛsom no;Wɔbɛka Yehowa ho asɛm akyerɛ awo ntoatoaso a ɛbɛba.
31 Wɔbɛba abɛka ne trenee ho asɛm.
Wɔbɛka nea wayɛ akyerɛ nkyirimma.
Ase Hɔ Nsɛm
^ Ebetumi aba sɛ ɛyɛ nnwom nnyigyei anaa sɛnea wɔto dwom no.
^ Anaa “Israel ayeyi ntam (so) na wote.”
^ Anaa “wɔn ani anwu.”
^ Anaa “bɔɔ me ahohora.”
^ Nt., “wɔtow me too wo so.”
^ Anaa “me kra.”
^ Nt., “M’ade koro.” Ɛkyerɛ ne kra anaa ne nkwa.
^ Anaa “wuram nantwi.”
^ Nt., “aba.”
^ Nt., “aba.”
^ Nt., “Mo koma nnya nkwa daa.”
^ Nt., “akɛsefo.”
^ Anaa “ne kra.”
^ Nt., “aba.”
