Hagai 1:1-15
1 Ɔhene Dario ahenni afe a ɛto so abien, bosome a ɛto so asia no da a edi kan no, Yehowa faa odiyifo Hagai* so+ ka kyerɛɛ Sealtiel ba Serubabel+ a ɔyɛ Yuda amrado, ne Yehosadak ba Yosua a ɔyɛ ɔsɔfo panyin no sɛ:
2 “Nea asafo Yehowa aka ni, ‘Ɔman yi ka sɛ, “Bere nnya nsoe sɛ yesi* Yehowa fi* no.”’”+
3 Na Yehowa asɛm san faa odiyifo Hagai+ so bae sɛ:
4 “Mo de, bere aso ama mo sɛ motena adan a mode nnua asiesie mu no mu bere a ofi yi abubu, ɛnte saa?+
5 Enti nea asafo Yehowa aka ni, ‘Nea moreyɛ no, munnwen ho yiye.*
6 Mudua aba pii, nanso nnɔbae kakraa bi na mutwa.+ Mudidi, nanso mommee. Monom, nanso ɛnso mo. Mufura ntama, nanso mo ho nyɛ mo hyew. Ɔpaani de n’akatua gu kotoku a ase nyinaa atutu ntokuru mu.’”
7 “Nea asafo Yehowa aka ni, ‘Nea moreyɛ no, munnwen ho yiye.’*
8 “‘Momforo nkɔ bepɔw so nkobu nnua mmra,+ na munsi ofi no,+ na m’ani begye ho, na ɛbɛhyɛ me anuonyam,’+ Yehowa asɛm ni.”
9 “‘Mohwɛɛ nneɛma pii kwan, nanso kakraa bi na mo nsa kae; na bere a mode baa fie no, mihuw gui.+ Adɛn ntia?’ asafo Yehowa asɛm ni. ‘Efisɛ me fi abubu, nanso mo de, obiara di akɔneaba de hwɛ ne fi yiye.+
10 Ɛno nti, ɔsoro amma mo obosu, na asaase nso amma mo nnɔbae.
11 Na mefrɛɛ ɔpɛ fitaa baa asaase so, ne mmepɔw so, ne hwiit,* ne bobesa foforo so, ne ngo so, ne asaase so afifide so, ne onipa so, ne nyɛmmoa so, ne mo nsa ano adwuma nyinaa so.’”
12 Sealtiel ba+ Serubabel,+ ne Yehosadak+ ba Yosua a ɔyɛ ɔsɔfo panyin, ne ɔmanfo a aka no nyinaa tiee Yehowa wɔn Nyankopɔn, na wotiee odiyifo Hagai nsɛm no, efisɛ Yehowa wɔn Nyankopɔn na ɔsomaa no; na Yehowa nti, nkurɔfo no fii ase suroe.
13 Ɛnna Yehowa somafo Hagai de asɛm a Yehowa de asoma no no too ɔman no anim sɛ: “‘Meka mo ho,’+ Yehowa asɛm ni.”
14 Afei Yehowa kanyan+ Sealtiel ba Serubabel a ɔyɛ Yuda amrado+ no, ɔkanyan Yehosadak ba Yosua+ a ɔyɛ ɔsɔfo panyin no, na ɔkanyan ɔmanfo a aka no nyinaa. Na wɔbae, na wofii ase yɛɛ asafo Yehowa wɔn Nyankopɔn fi no ho adwuma.+
15 Ná ɛyɛ Ɔhene Dario+ ahenni afe a ɛto so abien, bosome a ɛto so asia no da a ɛto so 24.
Ase Hɔ Nsɛm
^ Ɛkyerɛ, “Nea Wɔwoo No Afahyɛ Da.”
^ Anaa “yɛsan si.”
^ Anaa “asɔrefi.”
^ Anaa “momfa mo koma nsi mo akwan so.”
^ Anaa “momfa mo koma nsi mo akwan so.”
^ Ebetumi aba sɛ ɛyɛ baali.
