E TALITONU au me ka lotomalie koe me e ma‵luga, io me sili kae ma‵losi atu a nisi tino i a koe mo au. Ko oi e mafai o mafaufau koe ki ei?— Ko Ieova te Atua. Kae e a tena Tama, te Faiakoga Sili? E mata, e maluga atu a ia i a tatou?— Ao, e mautinoa eiloa.

Ne ola a Iesu fakatasi mo te Atua i te lagi. A ia se Tama faka-te-agaga, io me se agelu. E mata, ne faite ne te Atua a nisi agelu, io me ko tama faka-te-agaga?— Ao, ne faite ne ia a te fia miliona o latou. E ma‵luga kae ma‵losi atu foki a agelu konei i a tatou.—Salamo 104:4; Tanielu 7:10.

E mata, e masaua ne koe te igoa o te agelu telā ne faipati atu ki a Malia?— Ko Kapilielu. Ne fai atu a ia ki a Malia me i tena pepe ka fai mo fai te Tama a te Atua. Ne tuku atu ne te Atua te ola o tena Tama faka-te-agaga ki loto i a Malia ko te mea ke mafai o fanau mai e pelā me se pepe ki te lalolagi.—Luka 1:26, 27.

E mata, e talitonu koe ki te vavega tenā? E talitonu koe me ne ola a Iesu mo te Atua i te lagi?— Ko Iesu eiloa ne fai mai ne ia. Ne iloa pefea ne Iesu a mea penā? Ia, i te taimi koi foliki ei a ia, kāti ne fai atu ne Malia ki a ia a muna a Kapilielu. Kāti ne fai atu foki ne Iosefa ki a Iesu me i tena Tamana ko te Atua.

I te taimi ne papatiso ei a Iesu, ne faipati mai te Atua mai te lagi, ana muna: “Tenei eiloa taku Tama.” (Mataio 3:17) Kae i te po mai mua o tena mate, ne ‵talo atu a Iesu: “Tamana, ke faka‵malu ne  koe au i ou tafa e pelā eiloa mo te ‵malu telā ne maua ne au i ou tafa a koi tuai o faite te lalolagi.” (Ioane 17:5) Ao, ne akai atu a Iesu ke toe fakafoki atu a ia ke ‵nofo fakatasi mo te Atua i te lagi. Ne mafai pefea o ola a ia i konā?— Māfai fua e toe ‵fuli ne Ieova te Atua a ia ki se tino faka-te-agaga sē matea, io me se agelu.

Nei la, e fia ‵sili atu ne au ki a koe se fesili tāua? E mata, e ‵lei a agelu katoa? Se a tau faka‵tau?— Ia, i se vaitaimi e tasi, ne ‵lei eiloa a latou katoa. Ona ko te mea ne faite ne Ieova a latou, kae ne ‵lei a mea katoa ne faite ne ia. Kae ne kamata o masei a te agelu e tokotasi. Ne tupu pefea te mea tenei?

Ke maua te tali, e ‵tau o toe ‵foki atu tatou ki te taimi ne faite ei ne te Atua a te tagata mo te fafine muamua, ko Atamu mo Eva. E fai mai a nisi tino me i te tala tenei se tala ‵kai fua. Kae ne iloa ne te Faiakoga sili me se tala tonu eiloa.

I te taimi ne faite ei ne te Atua a Atamu mo Eva, ne tuku atu ne ia a lāua ki loto i se fatoaga gali telā ne fakaigoa ki a Etena. Se fatoaga gali, kae se palataiso foki. Ne mafai o fai ne lāua a tama‵liki e tokouke, se kāiga lasi, kae ‵nofo i te Palataiso ki te se-gata-mai. Kae e isi se akoakoga tāua e ‵tau o tauloto ne tatou mai i ei. Ko te mea telā ko oti ne sau‵tala muamua tatou ki ei. Ke onoono aka tatou me e masaua ne tatou io me ikai.

 Ne fai atu a Ieova ki a Atamu mo Eva me e mafai ne lāua o ‵kai ki fuaga katoa e ma‵nako lāua ki ei mai i lakau i te fatoaga. Kae e tasi fua te lakau telā e se ‵tau o ‵kai lāua mai i ei. Ne fai atu ne te Atua a te mea ka tupu māfai e ‵kai lāua ki ei. Ana muna: “A koe e mate eiloa.” (Kenese 2:17) Tela la, se a te akoakoga ne ‵tau o tauloto ne Atamu mo Eva?—

Ko te akoakoga e uiga ki te fakalogo. Ao, e fakalagolago eiloa a te ola ki te fakalogo ki a Ieova te Atua! E se lava fua ke fai atu a Atamu mo Eva me ka faka‵logo lāua ki a ia. Ne ‵tau o fakaasi atu ne lāua mai i mea kolā ne fai ne lāua. Kafai e faka‵logo lāua ki te Atua, e fakaasi atu ei me e a‵lofa lāua ki a ia kae ma‵nako o fai a Ia mo fai te lā Pule. Ko mafai ei o ola lāua ki te se-gata-mai i te Palataiso. Kae kafai ne ‵kai lāua mai i te lakau tenā, se a te mea e fakaasi atu i ei?—

E fakaasi atu i ei me e seai se lā loto fakafetai ki mea ko oti ne tuku atu ne te Atua. Ka fakalogo eiloa koe ki a Ieova moi ne nofo atu koe i konā?— Muamua la, ne faka‵logo eiloa a Atamu mo Eva. Kae ne fakaloiloi a Eva ne se tino telā ne maluga atu ki a ia. Ne fai ne tou tagata ke se fakalogo tou fafine ki a Ieova. Ko oi tenā?—

E fai mai te Tusi Tapu me ne faipati atu a te gata ki a Eva.  Kae e iloa ne koe me e se mafai o faipati a te gata. Tela la, ne mafai pefea o faipati te gata?— Ne fakafoliga atu ne se agelu me e faipati te gata. Kae ko te agelu eiloa telā ne faipati atu. Ne kamata o mafaufau a te agelu ki mea ma‵sei. Ne manako ke tapuaki atu a Atamu mo Eva ki a ia. Ne manako foki ke fai ne lāua a mea kolā ne fai atu ne ia. Ne manako a ia ki te tulaga o te Atua.

Tela la, ne tuku atu ne te agelu masei a manatu ‵se ki te mafaufau o Eva. E auala i te gata, ne fai atu tou tagata: ‘Ne seki faipati ‵tonu atu te Atua. Ka se mate koe māfai e kai koe mai te lakau tenā. Ka poto koe e pelā mo te Atua.’ E mata, ka talitonu koe ki pati mai te leo tenā?—

Ne kamata o manako a Eva ki se mea telā ne seki tuku atu ne te Atua ki a ia. Ne kai a ia ki te fuaga mai i te lakau telā ne fakatapu. Kae ne tuku atu ne ia a nisi vaega o te fuaga ki a Atamu. Ne seki talitonu a Atamu ki pati a te gata. Kae ko tena manakoga ke ‵nofo fakatasi mo Eva ne malosi atu i lō tena alofa ki te Atua. Telā ne kai foki ei a ia mai te lakau.—Kenese 3:1-6; 1 Timoteo 2:14.

Se a te ikuga?— Ne kamata o se ‵lei katoatoa a Atamu mo Eva, gasolo o ma‵tua, kae ‵mate. Kae ona ko te sē ‵lei katoatoa o lāua, ne sē ‵lei katoatoa foki lā tama‵liki  katoa kae fakamuli loa ne gasolo o ma‵tua kae ‵mate. Ne seki loi te Atua! E fakalagolago eiloa a te ola ki te fakalogo ki a ia. (Loma 5:12) E fai mai te Tusi Tapu me i te agelu telā ne fakaloiloi ne ia a Eva e fakaigoa ki a Satani te Tiapolo, kae ko nisi agelu kolā ne kamata o ma‵sei foki e fakaigoa ki temoni.—Iakopo 2:19; Fakaasiga 12:9.

Nei la, e mata, e malamalama koe i te pogai ne kamata ei o masei a te agelu ‵lei telā ne faite ne te Atua?— Ona ko te mea ne kamata o mafaufau a ia ki mea ma‵sei. Ne manako ke Tulaga Muamua eiloa a ia. Ne iloa ne ia me ne fai atu te Atua ki a Atamu mo Eva ke fai lā tama‵liki, kae ne manako foki a ia ke tapuaki atu a latou katoa ki a ia. E manako te Tiapolo ke fai a tino katoa ke se faka‵logo ki a Ieova. Tela la, e taumafai a ia o faulu mai a manatu ma‵sei ki ‵tou mafaufau.—Iakopo 1:13-15.

E fai mai te Tiapolo me e seai eiloa se tino e alofa tonu ki a Ieova. E fai mai a ia me i a koe mo au e se a‵lofa ki te Atua kae e se ma‵nako tonu foki tāua o fai a mea kolā e fai mai ne te Atua. E fai mai a ia me e faka‵logo fua tatou ki a Ieova māfai e ‵lei a mea katoa ki a tatou. E mata, e tonu te Tiapolo? E mata, e fai tatou penā?

Ne fai mai te Faiakoga Sili me i te Tiapolo se tino loi! Ne fai atu a Iesu me e alofa tonu eiloa a ia ki a Ieova mai i te fakalogo ki a Ia. Kae ne seki fakalogo fua a Iesu ki te Atua māfai ne faigofie ke fai penā. Ne fai eiloa a ia penā i taimi katoa, ke oko foki eiloa māfai e fakafaigata ne nisi tino tena fakalogo. Ne alofa fakamaoni a ia ki a Ieova ke oko eiloa ki tena mate. Tenā te pogai ne toe fakafoki mai ei a ia ne te Atua ki te ola ko te mea ke ola ki te se-gata-mai.

Tela la, ko oi te tino e mafaufau koe me ko te ‵toe fili sili o tatou?— Ao, ko Satani te Tiapolo. E mata, e mafai o lavea ne koe a ia?— Ikai! Kae e iloa ne tatou me e ola a ia kae e maluga kae malosi atu foki a ia i a tatou. Kae ko oi e maluga atu i te Tiapolo?— Ko Ieova te Atua. Tela la, e iloa ne tatou me e mafai eiloa o puipui tatou ne te Atua.