A te ‵toe fili sili o te Atua ko Satani te Tiapolo. A ia se tino faka-te-agaga telā ne ‵teke atu ki a Ieova. E taua atu faeloa a Satani ki te Atua kae e faka‵tupu foki ne ia a fakalavelave ki tino. E matagā a amioga a Satani. A ia se tino loi kae se tino tatino foki.—Ioane 8:44.

Ne ‵kau atu foki a nisi tino faka-te-agaga ki a Satani i tena ‵tekeatuga ki te Atua. E fakaigoa ne te Tusi Tapu latou ko temoni. E pelā mo Satani, a temoni konā ne fili o tino. E fia fakapa‵kia sāle ne latou a tino. (Mataio 9:32, 33; 12:22) Ka fakaseai ne Ieova a Satani mo ana temoni ki te se-gata-mai. E toetoe fua te taimi e ‵toe mai mō latou ke faka‵tupu ei a fakalavelave ki tino.—Fakaasiga 12:12.

Kafai e fia fai koe mo fai se taugasoa o te Atua, e se ‵tau o fai ne koe a mea kolā e manako Satani ke fai ne koe. E takalia‵lia Satani mo ana temoni ki a Ieova. A latou katoa ne fili o te Atua, kae e ma‵nako foki latou ke fai koe mo fai se fili o te Atua. E ‵tau o filifili aka koe me ko oi te tino e fia fakafiafia atu koe ki ei—ko Satani io me ko Ieova. Kafai e fia maua ne koe te ola se-gata-mai, e ‵tau o filifili aka ne koe ke fai te loto o te Atua. E uke a togafiti mo aofaga a Satani ke fakaloiloi aka ne ia a tino. E fakaloiloi sāle ne ia te tokoukega o tino.—Fakaasiga 12:9.