1, 2. (a) Kaia e mafai ei o faigata ke talitonu ki te Palataiso e pelā me se pulega tonu? (e) Ne a mea e mafai o fesoasoani mai ke fakamalosi aka ‵tou fakatuanaki ki folafolaga a te Atua?

KO OKO atu se taina fakamaoni ki te fakatasiga, ko fi‵ta ona ko te uke o ana fakalavelave i te ao. Ne sē ‵lei a faifaiga a tena pule ki a ia, ne fi‵ta i tulaga faiga‵ta o te tausi atu ki tena kāiga, mo te manavase ki te masaki fakalogo‵mae o tena avaga. I te taimi ne tagi aka ei a te pese muamua, ne ‵pusi tena manava mo te fiafia me ko nofo atu a ia i te Kingdom Hall fakatasi mo ana taina mo tuagane. A te pese, se pese e uiga ki te fakamoemoega i te Palataiso, kae e fai atu i pati o te pese ke fakaataata i tena mafaufau a te fakamoemoega tenā e pelā me e nofo atu a ia i ei. Ne fiafia faeloa a ia ki te pese tenei, kae i te taimi e usu fakatasi atu ei a ia mo tena kāiga, ne fakamafanafana atu te fakamoemoega ki tena loto.

² Kai mafaufau aka eiloa koe penā? E penā foki loa a te tokoukega o tatou. A te ‵tonuga loa, a te ola i te olaga masei tenei e mafai o faigata ke talitonu tatou ki te Palataiso e pelā me se mea tonu. Konei eiloa a “taimi faiga‵ta,” kae ko te lalolagi e ola nei tatou e se tāitāi eiloa o fai pelā me se palataiso. (2 Tim. 3:1) Ne a mea e mafai o fesoasoani mai ke ‵kilo atu tatou ki te fakamoemoega e pelā me se mea tonu? E iloa pefea ne tatou me i te mea tenā me ko pili o pule mai te Malo o te Atua ki tino katoa? Ke na mafau‵fau tatou ki nai valoaga mai i a Ieova kolā ne lavea ne ana tino te fakataunuga i aso mua. Ka oti, ko onoono aka ei tatou ki te auala ko fakataunu nei a valoaga konā mo nisi valoaga tai ‵pau i se auala gali. A ko te ‵toe mea, fakatasi mo ‵tou fakatuanaki telā ko oti ne fakamalosi aka, ka ‵saga atu eiloa tatou ki te uiga o valoaga penā mō ‵tou olaga i aso mai mua.

3. Se a te folafolaga ne fakamafanafana atu ki te kau Iutaia kolā ne ‵nofo fakapagota i Papelonia?

³ Mafaufau la ki te olaga o tino Iutaia kolā ne ‵nofo fakapagota i Papelonia i aso mua i te ono senitenali T.L.M. Ne ola aka a tino e tokouke i te olaga tenā, penā foki loa mo olotou mātua, kae ne faigata ‵ki eiloa te olaga. Ne fakatauemu atu a te kau Papelonia ki a latou mō te lotou fakatuanaki ki a Ieova. (Sala. 137:1-3) I te fia sefulu tausaga, ne tumau eiloa i te ‵piki ‵mau o tino Iutaia a‵lofa fakamaoni ki te fakamoemoega mautinoa tenei: Ne  folafola mai a Ieova ke toe fakamaopoopo atu ana tino ki te lotou fenua. Ne fai mai a Ieova me ka ‵gali ‵ki eiloa a fakanofonofoga i konā. Ne fakatusa foki ne ia a te fenua o Iuta telā ka toe fakafou ki te fatoaga o Etena​—se palataiso! (Faitau te Isaia 51:3.) Ne fakatoka faka‵lei a vaegā tautoga penā ke fakatalitonu atu ki tino o te Atua, kae fakasino atu ki manatu fakalotolotolua kolā e mafai o fakalavelave atu ki olotou loto. E pefea la? Mafaufau ki nisi valoaga konei.

4. Ne fakatalitonu atu pefea ne Ieova ki te kau Iutaia me ka tokagamalie latou i te lotou fenua?

⁴ Tokagamalie. Ka toe ‵foki atu a tino ne ave fakapagota ki se fenua ‵mao telā ne fakamaofagina i tausaga e 70, se fenua telā ne lavea fua ne nai tino, kae e sē se palataiso tonu. Ne malaku eiloa a leona i fenua o te Tusi Tapu i aso konā, e pelā mo kuli vao, lepoti, mo nisi manu fe‵kai. E mafai o mafaufau penei se tagata fai kāiga, ‘Ka puipui pefea ne au taku avaga mo tama‵liki? Kae e a mamoe mo tamā pulumakau​—ka puipui pefea ne au latou?’ Se mea masani ke manava‵se ki vaegā mea penā. Mafaufau la ki te folafolaga a te Atua i te Isaia 11:6-9 mo te lasi o te fakamafanafana loto ne maua mai i ei. (Faitau.) Mai i te fakaaoga o kupu ‵gali konā, ne fakatalitonu atu a Ieova me ka puipui faka‵lei eiloa a latou mo olotou lafu manu. Ka ‵kai a leona ki mouku, telā e fakauiga i ei me ka se kai ne latou a tamā pulumakau a te kau Iutaia. E seai se mea e ‵tau o ma‵taku ki ei a tino fakamaoni mai i manu fe‵kai. Ne folafola mai a Ieova me ka puipui faka‵lei ana tino i te fenua o Iuta telā ka toe fakafou, ke oko foki eiloa ki koga lavaki mo togāvao.​—Eseki. 34:25.

5. Ne a valoaga ne fesoasoani atu ki te kau kolā ko toe ‵foki atu ke maua te loto talitonu me ka tuku atu eiloa ne Ieova a mea e lava kae ‵toe ke tausi ei latou?

⁵ E lava kae ‵toe valevale. E mafai o ‵sae aka a nisi mea e manava‵se ki ei. ‘E mata, e mafai ne au o tausi ki toku kāiga i te fenua telā ka toe fakafou? Tefea te koga ka ‵nofo matou i ei? E mata, ka isi ne galuega, kae e mata, ka ‵lei atu te olaga i lō te ‵nofo pologa mai lalo i te pulega a omotou tino pule?’ E auala i valoaga fakaosofia, ne tali faka‵lei mai foki eiloa ne Ieova a fesili konā. Ne tauto mai a Ieova me ka maua eiloa ne ana tino faka‵logo a vaiua e manakogina; ne fai penā “ko te mea ke ola [olotou] lakau kaina.” (Isa. 30:23) E pelā mo fale mo galuega aoga, ne folafola mai a Ieova e uiga ki ana tino: “A tino ka faite olotou fale ko nofo ei i ei - ka se toe fakaaoga eiloa ne nisi tino fakaa‵tea. Ka toki olotou togāvine kae inu fiafia i te uaina mai i olotou togāvine konā, kae se toe inu ne nisi tino fakaa‵tea.” (Isa. 65:21, 22) Ao, ka gali ‵ki eiloa te olaga i auala e uke māfai e fakatusa ki te lotou ‵nofoga fakapagota i te fenua fapaupau o Papelonia. Kae e a olotou toe fakalavelave ‵lasi​—ko mea kolā ne takitaki atu ei latou ki te avega fakapagota i te taimi muamua?

6. Ne a vaegā fakalavelave i mea tau masaki ko leva ne logo‵mae i ei a tino o te Atua, kae se a te mea ne fakatalitonu atu ne Ieova ki a latou kolā ne ave fakapagota kae ko toe ‵foki atu?

⁶ Malosi faka-te-agaga. Ne kamata o gasolo aka o ma‵saki a tino o te Atua i te feitu faka-te-agaga kae seki tāitāi o ave fakapagota a latou. E auala i te pelofeta ko Isaia, ne fai atu a Ieova ki ana tino: “A tou ulu ko leva ne ‵fonu i pakiaga, kae ko masaki foki tou loto.” (Isa. 1:5) Ne ‵kivi kae ‵tuli latou i te feitu faka-te-agaga, me ne ‵pono faeloa olotou taliga ki pati fakatonutonu a Ieova kae ‵moe olotou mata ki akoakoga ne tuku mai ne ia. (Isa.  6:10; Iele. 5:21; Eseki. 12:2) Kafai koi fakalogo‵mae atu eiloa a fakalavelave konā ki tino kolā ko toe ‵foki atu, e mafai la pefea o maua ne latou a te tokagamalie? E mata, ka toe galo atu i a latou a te taliaga a Ieova? Ko oko eiloa i te fakatalitonu mai o te folafolaga tenei a Ieova: “Kafai e oko mai te aso tena, a tino taliga tuli ka mafai o lagona ne latou se tino e faitau atu se tusi ki a latou i se leo maluga, mo tino ‵kivi kolā ne ‵nofo faeloa i te pouliga, ka pula olotou mata kae matea ne latou a mea.” (Isa. 29:18) Ao, ka aumai ne Ieova a te faka‵leiga i te feitu faka-te-agaga ki ana tino ‵ma kae sala‵mō. Kafai e tumau latou i te ‵saga tonu atu kae faka‵logo, ka tuku mai ne ia a takitakiga mo akoakoga kolā e maua ei te ola.

7. Ne fakataunu pefea a folafolaga a te Atua ki ana tino kolā ne ave fakapagota, kae kaia e ‵tau ei o fakamalosi mai ki ‵tou fakatuanaki a te fakataunuga tenā?

⁷ E mata, ne ola a Ieova e ‵tusa mo ana folafolaga? E tali mai eiloa ne tala ‵tonu a te fesili tenei. Ne fakamanuiagina a te kau Iutaia kolā ne ‵foki atu ki te lotou fenua ki te tokagamalie, te lava kae ‵toe valevale o mea, mo te malosi faka-te-agaga. E pelā mo te puipui ne Ieova latou mai i olotou tuakoi kolā ne gasolo aka o ma‵losi kae tokouke atu i a latou. Ne seki fakaseai atu ne manu fe‵kai a lafu manu a te kau Iutaia. E tonu, ne lavea atu fua ne te kau Iutaia se tamā fakataunuga o valoaga e uiga ki te palataiso telā ne tusi ki lalo ne tāgata e pelā mo Isaia, Ielemia, mo Esekielu​—kae ko oko eiloa i te gali o te fakataunuga tenā kae ko te mea foki eiloa telā ne manakogina ne tino o te Atua i te taimi tenā. I te taimi e mafau‵fau ei tatou ki mea ne fai ne Ieova mō ana tino i aso konā, e gasolo aka eiloa o malosi ‵tou fakatuanaki. Kafai ne gali ‵ki a te tamā fakataunuga muamua o valoaga konā, ka pefea la te gali atu o te fakataunuga o mea konā i se auala tai lasi atu? Mafaufau ki mea ko oti ne fai ne Ieova mō tatou i aso nei.

8. Se a te vaegā ‘fenua’ telā e maua ne tino o te Atua i aso nei?

⁸ E se aofia a tino o Ieova i se fenua tonu i aso nei, io me e fai mō latou se fenua e tasi. I lō te fai penā, e aofia a Kelisiano fakaekegina i te fenua faka-te-agaga, ko “te Isalaelu a te Atua.” (Kala. 6:16) E ‵kau atu olotou taugasoa ko “nisi mamoe” ki a latou i te “malo,” io me se fenua faka-te-agaga, se koga e ga‵lue ei latou kae tapuaki fakatasi atu ki a Ieova te Atua. A te tapuakiga tenā ko te lotou vaegā olaga eiloa. (Ioa. 10:16; Isa. 66:8) Kae se a te vaegā ‘fenua’ ne tuku mai ne Ieova ki a tatou? Se palataiso faka-te-agaga. A folafolaga konei a te Atua e uiga ki fakanofonofoga e pelā mo Etena ne lavea atu se fakataunuga gali i te feitu faka-te-agaga. Mafaufau ki nisi fakaakoakoga.

9, 10. (a) Ne fakataunu pefea a te valoaga i te Isaia 11:6-9 i aso nei? (e) Se a te fakamaoniga o te filemu e maua i va o tino o te Atua?

⁹ Tokagamalie. I te valoaga telā ne fakamau i te Isaia 11:6-9, e maua ne tatou se ata gali o te fealofani mo te filemu​—i te va o manu fe‵kai, kae penā foki loa a tino mo olotou manu fagai. E mata, e lavea atu a te fakataunuga o te ata tenā i te feitu faka-te-agaga i aso nei? Ao! I te fuaiupu e 9, e iloa ei ne tatou a te pogai ka se toe fakama‵taku a vaegā manu penā: “A te laukele ka fonu i te malamalama i uiga o te Aliki, e pela mo te tai telā e ‵fonu i te  suatai.” E mata, e ‵fuli ne “te malamalama i uiga o [Ieova],” a uiga o manu? Ikai, ko tino kolā ne ‵fuli ona ko te iloa ne latou a te Atua Tafasili i te Maluga kae fakamasani o fakaakoako ki ana auala filemu. Tenā eiloa te pogai e lavea atu ne tatou i te ‵tou palataiso faka-te-agaga i aso nei, a te fakataunuga gali o te valoaga tenā. Mai lalo i te pulega a te Malo, e fakamasani a soko o Keliso ke ‵kalo keatea mai i olotou uiga kaitaua, uiga manu kae ola i te filemu mo te fealofani mo olotou taina mo tuagane faka-te-agaga.

¹⁰ E pelā mo te tusi tenei, ko oti ne fakamatala mai i ei a te sē ‵kau ki se feitu a Kelisiano​—te fakavae faka-te-Tusi Tapu mō te ‵tou malamalama mo te fakasauaga o tino o te Atua telā ne iku mai i ei ona ko te puke ‵mautakitaki o latou ki te tulaga tenā. E a, e se fakaofoofogia a te manatu me i te lalolagi fakasaua tenei, e isi eiloa se tamā ‘fenua’ o tino kolā e ita fitifiti ma aofia latou i so se faifaiga fakasaua ke oko foki loa māfai e tamate latou? Ko oko eiloa i te fakaofoofogia o te fakamaoniga sili tenei me e maua eiloa ne tino o te Tupu faka-Mesia a te filemu e pelā mo te mea ne fakamatala mai ne Isaia! Ne folafola mai ne Iesu me ka lauiloa ana soko i te alofa telā ka maua ne latou. (Ioane 13:34, 35) I loto i te fakapotopotoga, e fakaaoga eiloa mo te kufaki ne Keliso tena “tavini fakamaoni kae poto” ke akoako atu a Kelisiano ‵tonu katoa ke uiga filemu, a‵lofa, kae agamalu.​—Mata. 24:45-47.

11, 12. Se a te vaegā ogegā meakai telā e fakalogo‵mae atu ki te lalolagi i aso nei, kae ne tuku mai pefea ne Ieova a mea e lava kae ‵toe mō ana tino?

¹¹ E lava kae ‵toe valevale. E logo‵mae a te lalolagi i te ogegā  meakai faka-te-agaga. Ne fakailoa mai te Tusi Tapu: “‘Ko pili mai te taimi ka aumai ei ne au te oge ki te fenua. A tino ka fia‵kai kae se ko te fia‵kai ki falaoa; ka fiainu foki kae se ko te fiainu ki vai. Ka fia‵kai kae fiainu latou ki te muna a te Aliki.’ Ko au ko te Aliki Sili ko faipati atu.” (Amo. 8:11) E mata, e logo‵mae foki a tino o te Malo o te Atua i te ogegā meakai tenei? Ne ‵valo mai ne Ieova a te ‵kese i te va o ana tino mo ana fili: “Me i tino kolā e tapuaki kae faka‵logo mai ki a au ka uke olotou meakai mo meainu, ka ko koutou ka fia‵kai kae fiainu. Ka fia‵fia latou, ka ko koutou ka fakamasiasigina.” (Isa. 65:13) Kai lavea ne koe te fakataunuga o pati konā?

¹² E ‵tafe mai a fakatokaga faka-te-agaga e pelā me se vaitafe telā e ‵tafe malosi kae ‵poko. A ‵tou tusi faka-te-Tusi Tapu​—e pelā foki mo mea fakalogo‵logo mo vitio, ‵tou fakatasiga mo fono, mo tusi ne ‵lomi aka i te ‵tou fakatuatusi i te Itaneti​—e fai eiloa pelā me se lōfiaga o mea‵kai faka-te-agaga telā e ‵tafe mai faeloa i te lalolagi telā e fia‵kai i te feitu faka-te-agaga. ((Eseki. 47:1-12; Ioelu 3:18) E a, e se fiafia koe ke lavea atu te fakatuanuga o folafolaga a Ieova i te lava kae ‵toe valevale o mea e tausi ei tou olaga i aso katoa? E mata, e fakamautinoa aka ne koe me e kai faeloa koe i te taipola a Ieova?

13. Ne lavea pefea ne koe te fakataunuga o te folafolaga a Ieova e uiga ki mata ‵kivi kolā ka ‵kite, mo taliga ‵tuli kolā ka ‵logo?

¹³ Malosi faka-te-agaga. Ko salalau eiloa i aso nei a ma‵saki ko te ‵kivi mo te ‵tuli i te feitu faka-te-agaga. (2 Koli. 4:4) Kae ko faka‵lei aka ne Keliso a masaki mo famai i te lalolagi kātoa. Kai lavea aka eiloa ne koe a mata ‵kivi ko ‵pula mo taliga ‵tuli ko ‵logo? Kafai ko oti ne lavea ne koe a tino ko malamalama faka‵lei i te munatonu i te Muna a te Atua, a te fulitua atu ki loi fakalotu kolā ne fai ei latou ke ‵kivi kae ‵tuli ki te munatonu, ne mafai ei o lavea ne koe te fakataunuga o te folafolaga tenei: “Kafai e oko mai te aso tena, a tino taliga ‵tuli ka mafai o lagona ne latou se tino e faitau atu se tusi ki a latou i se leo maluga, mo tino ‵kivi kolā ne ‵nofo faeloa i te pouliga, ka ‵pula olotou mata kae matea ne latou a mea.” (Isa. 29:18) I te lalolagi kātoa, e lau i selau afe o tino i tausaga katoa e maua ne latou a faka‵leiga penā i te feitu faka-te-agaga. A tino katoa kolā e fulitua atu ki Papelonia te Sili, kae ‵kau mai ki a tatou ke tapuaki atu i te ‵tou palataiso faka-te-agaga, se fakamaoniga ola me ko taunu eiloa a folafolaga a Ieova!

14. Se a te fakamaoniga ne mafau‵fau ‵loto ki ei telā ka fakamalosi aka ei ‵tou fakatuanaki?

¹⁴ I mataupu takitasi o te tusi tenei e maua i ei a fakamaoniga ‵mana me ko oti ne avatu ne Keliso ana soko ki loto i se palataiso faka-te-agaga tonu i te taimi tenei o te gataga. Ke na tumau eiloa tatou i te mafaufau ‵loto ki auala e uke ne fakamanuia ei tatou i te palataiso tenā i aso nei. Kafai e fai tatou penā, ka tumau eiloa i te gasolo aka o malosi a te ‵tou fakatuanaki ki folafolaga a Ieova mō aso mai mua.

15. Kaia e mafai ei o mautinoa i a tatou me ka fai te lalolagi mo fai se palataiso?

¹⁵ Ko leva loa ne manako a Ieova ke fai te lalolagi mo fai se palataiso i te lalolagi kātoa. Ne tuku atu ne Ia a Atamu mo Eva ki loto i te fatoaga ko te palataiso, kae ne tuku atu ne ia ki a lāua  a te fakatonuga ke faka‵fonu te lalolagi ki lā tama‵liki kae ke tausi atu ki mea katoa. (Kene. 1:28) I lō te fai penā, ne tau‵tali atu a Atamu mo Eva ki te ‵tekeatuga a Satani kae tuku atu ei ne lāua ki lā tama‵liki a te tulaga sē ‵lei katoatoa, te agasala, mo te mate. Kae e seki ‵fuli eiloa te fuafuaga a te Atua. Kafai eiloa ko oti ne taku atu ne ia tena fuafuaga, ka fakataunu katoatoa faeloa ne ia ana muna. (Faitau te Isaia 55:10, 11.) E mafai eiloa o mautinoa i a tatou me i tamaliki a Atamu mo Eva ka faka‵fonu ne latou a te lalolagi kae ‵nofo i ei, kae tausi atu mo te alofa ki mea ne faite ne Ieova i te lalolagi palataiso. I te taimi tenā, ka fakataunu katoatoa mai i ei, a valoaga e uiga ki te olaga gali i fakanofonofoga fakapalataiso, kolā ne fai atu ki te kau Iutaia kolā ne ave fakapagota! Mafaufau ki fakaakoakoga konei.

16. E fakamatala mai pefea ne te Tusi Tapu a te tokagamalie telā ka maua i te Palataiso?

¹⁶ Tokagamalie. Ka lavea atu eiloa te fakataunuga katoatoa tonu o te ata gali tenā i te Isaia 11:6-9, telā ko leva eiloa ne fakatali‵tali ki ei. A tāgata, fāfine, mo tama‵liki ka puipui kae tokagamalie i so se koga e olo atu latou ki ei i te lalolagi. E seai se mea ola ne faite, se tino io me se manu, ka fai ne latou so se mea fakamataku. Mafaufau ki te taimi telā ka lavea atu ne koe a te paneta kātoa ko fai mo fai tou fale, vaitafe ke kou‵kou i ei, namo, mo te tai; te sa‵sale atu i mauga; kae sa‵sale atu i koga moukua mo te tokagamalie katoatoa. Kae kafai ko po, ko seai se mea e manavase koe ki ei. Ka fakataunu eiloa a pati i te Esekielu 34:25, ko te mea ke mafai ne tino o te Atua o “ola mo te saogalemu i tua o te fa‵kai, kae ‵moe i te vao.”

17. Kaia e mafai ei o mautinoa i a tatou me ka tuku mai ne Ieova a mea e lava kae ‵toe valevale, ke tausi ei tatou i te taimi e pule mai ei te Malo ki te laloalgi kātoa?

¹⁷ E Lava Kae ‵Toe Valevale. Fakaataata i tou mafaufau a te taimi telā ka seai ei se mativa, te fiakai, ogegā meakai, io me ko fakatokaga mō te ‵lei o tino. A te uke o mea faka-te-agaga kolā e maua ne tino o te Atua i aso nei se fakamaoniga me ka fagai eiloa ne te Tupu faka-Mesia ana tino i so se auala. I te taimi ne nofo ei a Iesu i te lalolagi, ne fagai ne ia te fia afe o tino fia‵kai ki nai falaoa mo ika. (Mata. 14:17, 18; 15:34-36; Male. 8:19, 20) Kafai ko pule mai te Malo o te Atua ki te lalolagi kātoa, a valoaga penei ka lavea atu eiloa a te fakataunuga tonu: “Ka faka‵to ne te Aliki te vaiua ko te mea ke ola otou lakau kaina, kae lasi te taukai, mo laukele moukua e uke mo kai‵kai otou pulumakau.”​—Isa. 30:23.

18, 19. (a) Se a te aoga o te Isaia 65:20-22 ki a koe? (e) Se a te auala ka ola leva tatou “e pelā mo lakau”?

¹⁸ I aso nei, e mafai o faigata ki tino e tokouke ke fakaataata i olotou mafaufau me e mafai o maua ne latou se fale ‵lei io me se galuega gali kae fakafiafia. I te lalolagi masei tenei, e mafau‵fau a tino e tokouke me e ga‵lue latou i itula e uke kae e mu‵tana fua a mea aoga e maua ne latou mō latou eiloa io me ko olotou kāiga, kae e maua eiloa ne tino mau‵mea kae kaima‵nako a mea ‵gali katoa. Mafaufau me ka pefea te olaga māfai ko fakataunu a te valoaga tenei i te lalolagi kātoa: “A tino ka faite olotou fale ko nofo ei i ei - ka se toe fakaaoga eiloa ne nisi tino fakaa‵tea. Ka toki olotou togāvine kae inu fia‵fia i te uaina mai i olotou togāvine konā, kae se toe inu ne nisi tino fakaa‵tea. A oku tino ka ola leva e pelā me ne lakau. Ka fakaaoga faka‵lei eiloa ne latou mo te fia‵fia a fua o olotou galuega.”​—Isa. 65:20-22.

 ¹⁹ Se a te uiga me ka ola leva tatou “e pelā me ne lakau”? Kafai e tu atu koe i te tafito o se lakau lasi, e mata, e ofo koe i te taimi e mafaufau ei koe ki te leva o latou​—kāti mai mua o te taimi ne fa‵nau mai ei a mātua o ou tupuna? E mafai o mafaufau koe me kafai e tumau koe i tou tulaga sē ‵lei katoatoa, kāti ka ola leva atu a te lakau tenā i a koe, telā ka tumau eiloa tena ola filemu mai tua o te fia tausaga ne galo atu ei koe. Ko oko eiloa i te atafai o Ieova ke fakatalitonu mai me ka ola leva kae filemu ‵tou olaga i te Palataiso! (Sala. 37:11, 29) Ka oko mai eiloa te aso ka lavea atu ei ne koe a lakau ola leva e pelā me ne mouku kolā e ola aka kae ‵mate i te taimi e tumau ei tatou i te ola ki te se-gata-mai!

20. Ka maua pefea ne tino a‵lofa fakamaoni o te Malo a te malosi ‵lei katoatoa?

²⁰ Malosi ‵lei katoatoa. I aso nei, ko pokotia a te lalolagi kātoa i masaki mo te mate. I se auala tai ‵pau, e ma‵saki tatou katoa​—e pisipisia katoa i se masaki tumau e igoa ki te agasala. A te faka‵leiga fua e tasi ko te taulaga togiola a Keliso. (Loma 3:23; 6:23) I te Pulega i te Meleniuma, ka fakaaoga katoatoa ne Iesu mo ana pule lagolago a mea aoga mai te taulaga tenā, mai te fakaseai malielie atu a vaega katoa o te agasala mai tino fakamaoni. Ka fakataunu katoatoa mai ei a te valoaga a Isaia: “Ka seai eiloa se tino i luga i te ‵tou fenua e tagi i a ia e masaki; a agasala katoa foki ka fakamagalogina katoa.” (Isa. 33:24) Mafaufau ki te taimi ka se toe ai se tino ‵kivi, ‵tuli, io me se katoatoa tena foitino. (Faitau te Isaia 35:5, 6.) E seai ne masaki ka se mafai o faka‵lei ne Iesu​—faitalia me ne masaki faka-te-foitino, te mafaufau, io me ko lagonaga. Ka maua ne tino a‵lofa fakamaoni o te Malo a te malosi ‵lei katoatoa!

21. Se a te mea ka tupu ki te mate, kae kaia e fakamafanafana loto ei te folafolaga tenei?

²¹ Kae e a te fakaotiga masani o te masaki ko te mate, telā ko te ikuga o te agasala? Tenā eiloa te “‵toe fili,” ko te fili telā e se mafai eiloa o ‵teke katoatoa atu ki ei a tino sē ‵lei katoatoa i so se taimi. (1 Koli. 15:26) Kae e mata, e fai te mate mo fai se fili fakamataku ki a Ieova? Onoono ki te mea ne ‵valo mai ne Isaia: “A te Aliki Sili ka fakagata ne ia te mate ke se toe ai eiloa! Ka ‵solo ne ia a loimata mai i mata o tino katoa, kae ave keatea te masiasi telā ne fakapuapuaga ei ona tino i te lalolagi kātoa.” (Isa. 25:8) E mata, e mafai o fakaataata ne koe i tou mafaufau a te taimi tenā? E se toe ai ne faigā mate, ne tanuga, io me ne loimata o te fanoanoa! E ‵kese mai i ei​—ka isi ne loimata o te fiafia māfai ko fakataunu ne Ieova tena folafolaga fakafiafia i te taimi e toe faka‵tu mai ne ia a tino ‵mate! (Faitau te Isaia 26:19.) Ka fatoa faka‵lei aka ei a pa‵kiaga kolā ne māfua mai i te mate.

22. Ne a mea ka ‵tupu māfai ko fakaoti ne te Malo faka-Mesia a te faiga o te loto o te Atua i te lalolagi?

²² I te fakaotiga o te Meleniuma, ka fakaoti eiloa ne te Malo a te faiga o te loto o te Atua i te lalolagi, kae ka tuku atu ne Keliso a te pulega ki tena Tamana. (1 Koli. 15:25-28) Ka ‵lei katoatoa a tino i te taimi tenā kae ka toka ei latou ke fakafesagai atu ki te ‵toe tofotofoga, i te taimi e toe ‵tala mai ei a Satani mai tena tulaga sē gasuesue i te lua ‵poko. Mai tua ifo i ei, ka fakaseai atu ei ne Keliso i te fakaotiga a te gata matagā mo tino katoa  kolā e ‵lago atu ki a ia. (Kene. 3:15; Faka. 20:3, 7-10) Kae ko latou katoa kolā e a‵lofa fakamaoni ki a Ieova ka maua ne latou se fakamoemoega tafasili i te gali. Kāti e seai ne pati e mafai o fakamatala mai i ei se ata tai ‵lei atu i lō pati kolā e maua ne tatou i se fuaiupu fakaosofia mai te Atua. Ko te folafolaga eiloa me i tino a‵lofa fakamaoni “ka maua ne latou a te saolotoga ‵malu, ko te fai mo fai a fanau a te Atua.”​—Loma 8:21.

23, 24. (a) Kaia e mautinoa ei a te fakataunuga o folafolaga a te Atua? (e) Se a te mea e ‵tau o fakaiku aka ne koe ke fai?

²³ E se fakavae fua a folafolaga konā ki fakamoemoega, manakoga, io me ko moemiti. E mautinoa eiloa te fakataunuga o folafolaga a Ieova! Kaia? Masaua a pati a Iesu kolā ne fakamatala mai i te mataupu muamua o te tusi tenei. Ne akoako ne ia ana soko ke ‵talo atu ki a Ieova: “Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.” (Mata. 6:9, 10) A te Malo o te Atua e sē se mea telā e māfua mai i mafaufauga o se tino. Se pulega tonu eiloa! Ko pule mai eiloa nei i te lagi. Ko oti ne fakataunu mai nei i se senitenali, a folafolaga a Ieova i auala kolā e mafai o lavea faka‵lei atu i te fakapotopotoga Kelisiano. E mafai o mautinoa i a tatou me ka fakataunu eiloa a folafolaga a Ieova i te taimi e pule katoatoa mai ei a te Malo o te Atua ki te lalolagi!

²⁴ E iloa ne tatou me ka oko mai eiloa te Malo o te Atua. E iloa ne tatou me ka taunu eiloa a pati katoa a Ieova i ana folafolaga. Kaia? Ona ko te mea KO PULE MAI TE MALO O TE ATUA! A te fesili la mō tatou ko te, ‘E mata e pule mai te Malo ki a au?’ Ke na fai nei ne tatou a mea katoa e mafai ne tatou o fai e pelā me ne tino o te Malo tenā, ko te mea ke mafai o maua ne tatou a mea aoga mai tena pulega ‵lei katoatoa kae fakamaoni ki te se-gata-mai!