MATAUPU 19
E Mata, a Molimau a Ieova ne Kelisiano ‵Tonu?
E pelā me ne Molimau a Ieova, e tali‵tonu matou me i a matou ne Kelisiano ‵tonu. Kaia? Mafau‵fau ki te fakavae o omotou talitonuga, te igoa telā e tu ‵kese ei matou, mo te motou fakatau a‵lofa.
1. Se a te fakavae o talitonuga a Molimau a Ieova?
Muna a Iesu: “Tau muna [a te Atua] ko te munatonu.” (Ioane 17:17) E pelā mo Iesu, ne fakavae faeloa ne Molimau a Ieova olotou talitonuga ki te Muna a te Atua. Mafaufau ki te tala fakasolopito o matou. I te fakaotiga o te 19 senitenali, ne kamata se potukau o tino a‵koga ki te Tusi Tapu o suke‵suke faka‵lei ki te Tusi Tapu. Ne fakavae olotou talitonuga ki ei, faitalia te ‵kese o talitonuga konā mo akoakoga masani a lotu. Oti aka, kamata ei o folafola atu ne latou a muna‵tonu mai te Tusi Tapu ki nisi tino. a
2. Kaia e taku ei matou ki Molimau a Ieova?
E fakasino atu a Ieova ki ana tino tapuaki me ko ana molimau me e fakaasi atu ne latou te munatonu e uiga ki a ia. (Epelu 11:4–12:1) E pelā mo aso mua, ne fai atu a te Atua ki ana tino: “A koutou ko aku molimau.” (Faitau te Isaia 43:10.) Ne taku a Iesu ko “te Molimau Fakamaoni.” (Fakaasiga 1:5) Tela la, i te 1931 ne fakaaoga ei ne matou a te igoa ko Molimau a Ieova. Kae se tauliaga gali eiloa ke tauave ne matou a te igoa tenā.
3. E fakaakoako atu pefea a Molimau a Ieova ki te alofa o Iesu?
Ne lasi ‵ki te alofa o Iesu ki ana soko kae ne fai eiloa latou pelā me ne ana kāiga. (Faitau te Maleko 3:35.) I se auala tai ‵pau, e fai eiloa a Molimau a Ieova e pelā me se kāiga fealofani i te lalolagi kātoa. Tenā te pogai e taku ei matou ki taina mo tuagane. (Filemoni 1, 2) E faka‵logo foki matou ki te fakatonuga tenei: “A‵lofa ki te kautaina kātoa.” (1 Petelu 2:17) E fakaasi atu ne Molimau a Ieova a te alofa tenei i auala e uke, pelā mo te fesoasoani atu ki motou taina tali‵tonu i te lalolagi kātoa i taimi o fakalavelave.
KELI MALOSI IFO
Sukesuke faka‵lei ki te tala fakasolopito o Molimau a Ieova ke iloa ne koe a fakamaoniga me i a matou ne Kelisiano ‵tonu.
E fakavae ne Kelisiano ‵tonu olotou talitonuga ki te Tusi Tapu kae folafola atu ki nisi tino
4. E fakavae omotou talitonuga ki te Tusi Tapu
Ne folafola mai a Ieova me i te munatonu i te Tusi Tapu ka gasolo eiloa o maina faka‵lei mai. Faitau te Tanielu 12:4 mo te fakamatalaga mai lalo, ko sau‵tala ei ki te fesili tenei:
-
Se a te mea ka “gasolo aka” i tino o te Atua i te taimi e tumau ei latou i suke‵suke ki te Tusi Tapu?
Mafaufau ki te auala ne suke‵suke ki te Muna a te Atua, se potukau o tino a‵koga ki te Tusi Tapu, e aofia ei a Charles Russell. Pei te VITIO, ko sau‵tala ei ki te fesili tenei.
-
I te vitio, ne suke‵suke pefea ki te Tusi Tapu a Charles Russell mo ana Tino A‵koga ki te Tusi Tapu?
E iloa ne koe?
I nisi taimi ne ‵fuli ne matou omotou talitonuga. Kaia? E pelā loa mo te saeakaga o te la telā e fakamaina malielie mai ne ia se kogā laukele, e fakamalamalama malielie mai foki ne te Atua tena Muna ki a tatou. (Faitau te Faataoto 4:18.) Tela la, e tiga loa e se mafuli te Tusi Tapu, e ‵fuli ne matou omotou talitonuga e ‵tusa mo te momea aka o te motou malamalama i te Tusi Tapu.
5. E ola matou e ‵tusa mo te motou igoa
Kaia ne fakaaoga ei ne matou a te igoa ko Molimau a Ieova? Pei te VITIO, ko sau‵tala ei ki te fesili tenei.
-
Kaia e fetaui ‵lei ei a te igoa ko Molimau a Ieova?
Kaia ne filifili ei ne Ieova a tino ke fai mo ana molimau? Me ka fakailoa atu ne latou i a ia ko te Atua tonu, ona ko te uke o loi ko oti ne fai atu e uiga ki a ia. Mafaufau la ki loi e lua konā.
E akoako atu ne nisi lotu ki olotou tino me e manako te Atua ke fakaaoga ne latou a mea fakatusa i olotou tapuakiga. Kae ke faitau te Levitiko 26:1, ko sau‵tala ei ki fesili konei:
-
Se a te munatonu e fakaasi mai i konei? E pefea a lagonaga o Ieova e uiga ki tupua?
E akoako atu ne nisi takitaki lotu me i a Iesu ko te Atua. Kae ke faitau te Ioane 20:17, ko sau‵tala ei ki fesili konei:
-
Se a te munatonu e fakaasi mai i konei? E mata, a te Atua mo Iesu se tino e tokotasi?
-
E pefea ou lagonaga ke iloa atu me ne uga ne Ieova ana Molimau ke talai te munatonu e uiga ki a ia mo tena Tama?
6. E fakatau a‵lofa matou
E fakatusa i te Tusi Tapu a Kelisiano ki vaega kese‵kese o te foitino. Faitau te 1 Kolinito 12:25, 26, ko sau‵tala ei ki fesili konei:
-
Ne a mea e ‵tau o fai ne Kelisiano ‵tonu māfai ko logo‵mae a nisi Kelisiano?
-
Ne a mea ne lavea ne koe e uiga ki te fakatau a‵lofa o Molimau a Ieova?
Kafai e logo‵mae a Molimau a Ieova i se feitu e tasi o te lalolagi e fesoasoani fakavave atu ki a latou a nisi Molimau i te lalolagi kātoa. Ke onoono ki se fakaakoakoga, pei te VITIO. Ko sau‵tala ei ki te fesili tenei.
-
E fai pefea a galuega fesoasoani a Molimau a Ieova mo fai se fakamaoniga o te alofa?
E fakaasi atu ne Kelisiano ‵tonu a te alofa i taimi o fakalavelave
MEA E FAI MAI NE NISI TINO: “A Molimau a Ieova se lotu fou fua.”
-
Ne kamata anafea o taku ne Ieova ana tino tapuaki me ko ana molimau?
MANATU AOGA
A Molimau a Ieova ne Kelisiano ‵tonu. A matou se kāiga o tino tapuaki i te lalolagi kātoa kolā e fakavae omotou talitonuga ki te Tusi Tapu kae fakasalalau atu a te munatonu e uiga ki a Ieova.
Fesili
-
Kaia ne filifili ei ke fakaaoga ne matou te igoa ko Molimau a Ieova?
-
Ne a faifaiga e fakatau fakaasi atu ne matou?
-
Se a tau faka‵tau, e mata, a Molimau a Ieova ne Kelisiano ‵tonu?
NISI FAKAMATALAGA
Onoono ki se fakaakoakoga ki te auala ne fakaasi faka‵sau atu ne Molimau a Ieova a akoakoga ‵se.
Jehovah’s Witnesses—Faith in Action, Part 1: Out of Darkness (1:00:53)
Onoono ki se auala ne fakaasi faka‵sau atu ne Molimau a Ieova a akoakoga ‵se.
‵Sala ke maua a tali o au fesili e uiga ki Molimau a Ieova.
“Fesili Masani e Uiga ki Molimau a Ieova” (Itulau i te neti)
Ne aofia a Stephen i amioga solitulafono ona ko tena takalialia ki tino mai nisi fenua. Onoono ki mea ne lavea ne ia i Molimau a Ieova kolā ne fakamalosi atu ei ke ‵fuli tena olaga.
“Ne Gasolo Aka Faeloa o Masei Toku Olaga” (Te Faleleoleo Maluga, Iulai 1, 2015)
a A te motou mekesini tāua, Te Faleleoleo Maluga, ne ‵lomi sāle i ei a muna‵tonu mai te Tusi Tapu talu mai te 1879.
