Vaega fo‵liki o te toto. A vaega fo‵liki konei e maua mai i vaega ‵lasi o te toto—sela ‵kula, sela ‵kena, potopotogā toto, mo te sua. E pelā me se mea telā e aoga ki te fakatupu foitino ko te protein hemoglobin e maua mai i sela ‵kula. Ko oti ne fakaaoga a hemoglobin mai tino io me ko manu ki tino kolā e se lava olotou toto io me ko tino kolā e uke a toto ko oti ne ‵sali ki tua mai i olotou foitino.

A te sua—telā e 90 pasene te vai i ei—e maua i ei te fia o hormones, masima, enzymes, mo niutilisini, e aofia i ei a mea aoga ki te foitino mo suka. E maua foki i te sua a mea kolā e fai ei ke ‵poto te toto mo mea kolā e ‵teke atu ki masaki, e pelā foki mo mea faka‵tupu foitino, ko albumin. E mafai o fakaiku aka ne tokita ke ‵suki ki se tino masaki te gamma globulin telā e maua mai i sua o tino kolā ko se mafai o ma‵saki i te masaki tenā. E mafai o maua a interferons mo interleukins mai i sela ‵kena kolā e fakaaoga ki masaki ‵pisi mo vaega kese‵kese o te kenisa.

E mata, e ‵tau o talia ne Kelisiano a togafiti kolā e fakaaoga i ei a vaega fo‵liki o te toto? E se maua i te Tusi Tapu a fakamatalaga likiliki e uiga ki ei, tela la, e fai eiloa ne te tino tena fakaikuga i mua o te Atua. E se talia ne nisi tino a vaega fo‵liki katoa o te toto, ona ko te mea ne manakogina i te Tulafono a te Atua ki Isalaelu ke “‵ligi ki te laukele” a te  toto. (Teutelonome 12:22-24) E tiga eiloa e se talia ne nisi tino te ‵sukiga o te toto kātoa io me ko ana vaega ‵lasi, e mafai o talia ne latou a togafiti kolā e aofia i ei a vaega fo‵liki o te toto. E mafai o fai mai latou me ko se ‵tau o sui ne vaega fo‵liki konei o te toto a ola o tino kolā ne aumai i ei a vaega fo‵liki konā i olotou toto.

I te faiga o fakaikuga e uiga ki vaega fo‵liki o te toto, mafaufau ki fesili konei: E mata, e iloa ne au me kafai e se talia ne au a vaega fo‵liki katoa o te toto, ka se talia foki ne au a nisi togafiti kolā e fakaaoga ke ‵teke atu ki masaki io me fesoasoani atu i te faiga ke ‵poto te toto ke fakagata aka ei te ‵sali o te toto? E mata, e mafai o fakamatala atu ne au ki se tokita te pogai e se talia ei ne au se vaega e tasi io me e uke atu o vaega fo‵liki o te toto?

Faifaiga masani o te tipitipi. E aofia i faifaiga konei ko te fakaaogaga o masini e lua ko te hemodilution mo te cell salvage. I te faifaiga ko te hemodilution, e ave keatea i ei te toto mai te foitino kae sui atu ki se mea fakalasi toto, ko fakafoki fakamuli atu ei ki te foitino o te tino masaki. A ko te cell salvage ko te tausiga o toto i te taimi e fai ei te tipitipiga kae toe faka‵foki atu i te taimi eiloa tenā. E tausi i ei a toto mai se pakiaga i te foitino, ‵fulu io me faka‵ma aka, ko fakafoki atu ei ki te foitino o te tino masaki. Ona ko te mea e kese‵kese a auala e fakaaoga ei ne tokita a togafiti konei,  e ‵tau o iloa ne te Kelisiano a mea e manako te tokita o fai ne ia.

I te faiga o fakaikuga e uiga ki togafiti konei, fesili ifo ki a koe: ‘Kafai e fakasali se vaega o toku toto ki tua mo toku foitino kae ko se aofia i te tamilosaga a te toto i se taimi tai leva, e mata, e ‵lei toku loto lagona māfai e se “‵ligi ki  te laukele” te toto tenā? (Teutelonome 12:23, 24) E mata, ka se ‵lei toku loto lagona māfai e tapale se vaega o toku toto i te faiga o se togafiti fakatokita kae toe fakafoki atu ki toku foitino? E mata, e iloa ne au me kafai e se talia ne au a togafiti fakatokita katoa kolā e fakaaoga i ei toku toto eiloa ko tena uiga ko se talia foki ne au ke iloilo toku toto, ke fakaaoga te togafiti ko te hemodialysis, mo te masini telā e fakaaoga ki te fatu mo te māmā?’

E ‵tau eiloa o fai ne te Kelisiano tena fakaikuga e uiga ki te fakaaogaga o tena toto i faifaiga masani o te tipitipi. E penā foki a iloiloga mo togafiti fakatokita masani kolā e aofia i ei te tapalega o se aofaki foliki o te toto o te tino, fakagalue aka, ko toe fakafoki atu ei ki te tino tenā.