Ne ‵teka atu a tausaga kāti e 17 talu mai te taimi ne fakafesilisili aka ne Iesu telā ko 12 ana tausaga, a faiakoga i te faletapu. Ko ‵tau nei e ‵somo aka a lau o lakau i te 29 T.A. Ne fai‵pati a tino e tokouke e uiga ki te kāiga o Iesu ko Ioane, telā ne talai atu i fenua katoa i te feitu ki togala o te Vaitafe o Iolitana.

E tonu, a Ioane se tagata telā e ‵kese ana foliga mo ana pati. Ne pei a ia ki gatu ne faite ki fulufulu o kamela, kae ne pei foki ki se fusi pa‵kili manu i tena taugasulu. Ne kai a ia ki sē akelise—se vaegā sikusikulauniu—mo hani i te vao. Se a tena fekau? “Ke sala‵mo, me ko pili mai te Malo o te lagi.”—Mataio 3:2.

Ne fakaosofia eiloa ne te fekau a Ioane a loto o tino kolā ne olo atu o fakalogo‵logo ki a ia. Ne iloa ne te tokoukega o latou me ne ‵tau o sala‵mo latou, ko tena uiga, ke ‵fuli ne latou olotou manatu mo auala, kae ‵teke atu ki olotou olaga mua e pelā me se mea telā e se manakogina. A tino kolā ne olo atu ki a ia ne ‵mai i “Ielusalema mo Iuta mo koga katoa i tafatafa o te Iolitana.” (Mataio 3:5) Ne sala‵mo eiloa a tino kolā ne olo atu ki a Ioane. Ne papatiso ne ia latou, mai te ufi kātoa o latou ki lalo i te vai ko te Iolitana. Kaia?

Ne papatiso ne ia a tino e pelā me se fakailoga, io me se ‵takuatuga o te lotou loto sala‵mo ki agasala i te feagaiga o te Tulafono a te Atua. (Galuega 19:4) Kae e se ko tino katoa ne fetaui ‵lei ke fai penā. I te taimi ne olo atu ei te kau Falesaio mo Satukaio, ne taku ne Ioane a latou ki “tama a gata ‵poisini.” Ana muna: “Fakaasi mai ne faiga ke iloa ei i a koutou ko sala‵mo. Kae ke mo a ma fai ifo koutou, ‘A te motou tamana ko Apelaamo.’ Me e fai atu au ki a koutou me e mafai ne te Atua o faka‵tu aka ne tama ma Apelaamo mai i fatu konei. Ko leva ne takato te takū i tafito o lakau. Tela la, a lakau katoa kolā e se ‵fua mai ki fuaga ‵lei e ‵kati ki lalo kae ‵pei ki te afi.”—Mataio 3:7-10.

Ona ko te ‵saga malosi atu o tino ki a Ioane, e isi sena fekau tāua, kae ko papatiso foki ne ia a tino e tokouke, ne uga atu ei a faitaulaga mo te kau Levi ke fesili atu ki a ia: “Ko oi koe?”

Ne taku ‵tonu atu a Ioane: “Au e se ko te Keliso.”

“Ko oi la koe?” ko te lotou fesili. “A koe ko Elia?”

“Au e se ko ia,” ko tena tali.

“A koe ko te Pelofeta?” ko te lotou fesili, telā e fakauiga ki te Pelofeta sili ne fai mai a Mose me ka vau.—Teutelonome 18:15, 18.

“Ikai!” ko te tali a Ioane.

Kae ne toe fesili atu latou penei: “Kae ko oi la koe? Fai mai ki a matou ko te mea ke isi se tali e tuku atu ne matou ki a latou kolā ne uga mai ne latou matou.” Se a tau fakamatalaga e uiga ki a koe? Ne fai atu penei a Ioane: “Au ko te leo o te tino telā e pakalaga i te koga lavaki, ‘Fai ke ‵tonu te auala o Ieova,’ e pelā eiloa mo pati a Isaia te pelofeta.”—Ioane 1:19-23.

“Kaia la e papatiso ei ne koe a tino,” e fia iloa ne latou, “māfai a koe e se ko te Keliso io me ko Elia io me ko te Pelofeta?” Ne fai atu ne ia se tali aoga: “Au e papatiso ki te vai. E isi se tino tenā e ‵tu fakatasi mai mo koutou kae e se iloa ne koutou.”—Ioane 1:25-27.

Ao, ne fakatoka ne Ioane te auala mai te faiga ke ‵lei a loto o tino ke talia ne latou te Mesia ne folafola mai, ko te tino telā ka fai mo fai te Tupu. Ne fai atu a Ioane e uiga ki a Ia: “Kae ko Ia telā e vau mai i oku tua e sili atu i a au, e se ‵tau o tapale ne au ana taka.” (Mataio 3:11) A te ‵tonuga loa, ne fai atu foki a Ioane: “A te tino telā e vau i oku tua ko Ieva ne mua atu i a au, me ne ola muamua a ia i a au.”—Ioane 1:15

Tela la, a te fekau a Ioane, “Ke sala‵mo koutou, me ko pili mai te Malo o te lagi” ne fetaui ‵lei eiloa. (Mataio 3:2) E fai pelā me se faka‵pulaga ki tino ke iloa ne latou me ko pili o kamata te galuega a te Tupu a Ieova, ko Iesu Keliso.