A koi nofo atu a ia i Ielusalema mō te Paseka i te 30 T.A., ne fai ne Iesu a fakailoga fakaofoofogia, io me ko vavega. Ona ko te mea tenā, ne fakatuanaki a tino e tokouke ki a ia. Ne ofo a Nikotemo, se Falesaio mo se tino i te fono maluga a te kau Iutaia, telā e taku ki te Sanetulini. Ne fia iloa ne ia a mea e uke atu, telā ne āsi atu ei a ia ki a Iesu kae ko po, kāti ne mataku i a ia ma taku fakamasei ne nisi takitaki Iutaia māfai e matea ne latou a ia.

Muna a Nikotemo: “Te Faiakoga, e iloa ne matou i a koe ne vau mai te Atua e pelā me se faiakoga me e seai se tino e mafai ne ia o fai a galuega ‵mana konei e fai ne koe seiloga ke fakatasi ki ei te Atua.” I tena tali, ne fai atu a Iesu ki a Nikotemo me e ‵tau o “toe fanau mai” se tino ko te mea ke ulu atu ei a ia ki te Malo o te Atua.—Ioane 3:2, 3.

E mafai la pefea o toe fanau mai se tino? Ne fesili atu penei a Nikotemo: “E se mafai o toe ulu a ia ki loto i te moegatama o tena mātua ke toe fanau mai i te lua o taimi, e tonu au?”—Ioane 3:4.

Ikai, e se tenā te uiga o te toe fanau mai. Ne fakamatala atu a Iesu: “E se mafai o ulu atu se tino ki te Malo o te Atua seiloga ke toe fanau mai a ia i te vai mo te agaga.” (Ioane 3:5) I te taimi ne papatiso ei a Iesu kae fanaifo te agaga tapu ki luga i a ia, ne toe fanau mai a Iesu “i te vai mo te agaga.” I te taimi tenā, ne oko mai foki te faka‵pulaga mai te lagi: “Tenei eiloa taku Tama, ko taku fagasele telā ko oti ne talia ne au.” (Mataio 3:16, 17) I te faiga tenei, ne faka‵pula atu ne te Atua me ne aumai ne ia a Iesu e pelā me se tama faka-te-agaga telā e maua ne ia te fakamoemoega ke ulu atu ki te Malo faka-te-lagi. Fakamuli ifo, i te Penitekoso i te 33 T.A., ne ‵ligi atu te agaga tapu ki nisi tino kolā ne papatiso, kae ne toe fa‵nau mai ei latou e pelā me ne tama faka-te-agaga a te Atua.—Galuega 2:1-4.

Ne faigata ki a Nikotemo ke malamalama i mea ne akoako atu ne Iesu ki a ia e uiga ki te Malo. Tela la, ne toe tuku atu ne ia a nisi fakamatalaga e uiga ki tena tulaga tāua e pelā me ko te Tama faka-te-foitino fakapito a te Atua. Ne fai mai a Iesu: “E pelā eiloa mo te sikiakaga ki luga ne Mose a te gata i te koga lavaki, e penā foki te Tama a te tagata, e ‵tau o siki aka ki luga, ko te mea ke maua ne tino katoa kolā e tali‵tonu ki a ia a te ola se-gata-mai.”—Ioane 3:14, 15.

I aso mua, a tino Isalaelu kolā ne ū ne gata poisini e ‵tau o ‵kilo atu ki te gata palasi ke fakaola ei latou. (Numela 21:9) E penā foki loa, e ‵tau mo tino katoa o fakatuanaki ki te Tama a te Atua ko te mea ke fakaolagina latou mai te lotou tulaga telā ka ‵mate latou i ei kae ke maua te ola se-gata-mai. Ke faka‵mafa atu a te faiga alofa a Ieova i te feitu tenei, ne toe fai atu a Iesu ki a Nikotemo: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.” (Ioane 3:16) Tela la, i konā loa i Ielusalema, kāti se ono masina mai tua ifo o te kamataga o tena galuega, ne fakaasi faka‵lei mai ne Iesu, me i a ia ko te auala ki te fakaolataga o tino.

Ne fai atu a Iesu ki a Nikotemo: “Ne seki uga mai ne te Atua tena Tama ki te lalolagi o fakamasino a te lalolagi.” Ko tena uiga, ne seki uga mai a ia ke fakamasino, mai te faiga ke fakasala a tino katoa ki te fakaseaiga. Kae e tiga eiloa te feitu tenā, ne fai mai a Iesu, me ne uga mai a ia ke “fakasao a te lalolagi e auala i a ia.”—Ioane 3:17.

Ona ko te mataku ne fanatu ei a Nikotemo ki a Iesu i te taimi ko pouli ei. Tela la, se mea gali me ne fakaoti ne Iesu te lā sau‵talaga ki pati konei: “Tenei eiloa te fakavae o te fakamasinoga: me ko oti ne oko mai te mainaga [telā ko Iesu, telā e fetaui ‵lei tena olaga mo ana akoakoga] ki te lalolagi, kae e fia‵fia atu a tino ki te pouliga i lō te mainaga, me e matagā olotou galuega. Me ko so se tino e fai faeloa ne ia a mea ma‵sei e takalialia ki te mainaga kae se fia vau ki  te mainaga, ko te mea ke mo a ma polopoloki a ia i ana galuega. So se tino telā e fai mea tonu e vau ki te mainaga, ko te mea ke fakaasi mai ana galuega kolā ne fai e ‵tusa mo te loto o te Atua.”—Ioane 3:19-21.

Nei la, ko tuku atu loa ki te Falesaio mo te faiakoga tenei o Isalaelu, ko Nikotemo, ke toe mafaufau ki mea ne fatoa lagona ne ia e uiga ki te tulaga o Iesu i te fuafuaga a te Atua.