E nofo ki te ono masina mai tua ifo o te kamataga o te galuega talai a Ioane te Papatiso, ne fanatu ei a Iesu ki a ia i te Vaitafe o Iolitana, telā kāti ko 30 nei ana tausaga. Se a te pogai? E se ko te āsi atu fua ki a ia. Io me ko te fia iloa fua ne Iesu me e pefea te galuega a Ioane. Ikai, ne fanatu eiloa a Iesu o fakamolemole atu ki a Ioane ke papatiso a ia.

E malamalama ‵lei, me ne ‵teke fakavave atu a Ioane penei: “Ko au te tino e ‵tau o papatiso ne koe, kae nei ko vau koe ki a au?” (Mataio 3:14) Ne iloa ne Ioane me i a Iesu ko te Tama fakapito a te Atua. Masaua me i te taimi koi nofo atu ei i te moegatama o tena mātua, ne gasuesue a Ioane mo te fiafia i te taimi ne āsi atu ei a Malia, telā ko faitama i a Iesu, ki te mātua o Ioane ko Elisapeta. Kāti e se taumate ne taku fakamuli atu ne te mātua o Ioane a te mea tenei ki a ia. Kae ne iloa foki ne tou tagata a te tala ki te faka‵pulaga a te agelu e uiga ki te fanaumaiga o Iesu mo agelu kolā ne faka‵sae atu ki tausi mamoe i te po ne fanau ei a Iesu.

Ne iloa ‵lei ne Ioane me i te papatisoga telā e fai ne ia, se mea mō latou kolā ko sala‵mo ki olotou agasala. Kae e seai ne agasala a Iesu. E tiga eiloa te ‵teke atu o Ioane, ne fakatonu atu a Iesu penei: “Ke fai mua aka penā i te taimi nei me tenā eiloa te auala ka fai ei ke ‵tonu a mea katoa.”—Mataio 3:15.

Kaia ne ‵lei ei ke papatiso a Iesu? Ne seki papatiso a Iesu ke fakamailoga mai ei te salamo ki agasala. Ne fakaasi atu i tena papatisoga me ko tuku atu a ia ke fai te loto o tena Tamana. (Epelu 10:5-7) Ne galue a Iesu e pelā me se kamuta, kae nei la, ko oko ki te taimi ke kamata te galuega telā ne uga mai ei a ia ki te lalolagi ne tena Tamana faka-te-lagi ke fai ne ia. E mata, ne fakamoemoe a Ioane ke tupu se mea fakaofoofogia i te taimi ne papatiso ei ne ia a Iesu?

Kae ne toe lipoti fakamuli mai a Ioane penei: “Kae ko te Tino eiloa telā ne uga mai ne ia au ke papatiso ki te vai ne fai mai ki a au, ‘Ko te tino telā e lavea ne koe e fanaifo te agaga kae nofo i luga i ei, tenei eiloa te tino ka fai ne ia te papatisoga ki te agaga tapu.’” (Ioane 1:33) Tela la, ne fakamoemoe a Ioane ke fanaifo te agaga o te Atua ki luga i se tino telā ka papatiso ne ia. E ‵tusa mo te mea tenā, i te taimi ne fanaka ei a Iesu mai i te vai, kāti ne seki ofo a Ioane ke matea atu “a te agaga o te Atua e fakape‵pepe e pelā me se lupe i luga i a Iesu.”—Mataio 3:16.

Kae e isi aka foki ne mea ne ‵tupu i te papatisoga o Iesu. “Ne matala te lagi.” Se a te uiga o te mea tenei? Kāti e fakauiga eiloa me i te taimi ne papatiso ei a Iesu, ne toe masaua ne ia tena olaga mua i te lagi.  Tela la, ne masaua ne ia tena olaga e pelā me se tama faka-te-agaga a Ieova, e aofia i ei a muna‵tonu kolā ne akoako atu ne te Atua ki a ia i te lagi a koi tuai o vau a ia ki te lalolagi.

E se gata fua i konā, i te taimi o te papatisoga a Iesu, ne folafola mai penei se leo mai te lagi: “Tenei eiloa taku Tama, ko taku fagasele telā ko oti ne talia ne au.” (Mataio 3:17) I ōi te leo tenā? E se ko te leo o Iesu; me ne ‵tu fakatasi atu eiloa a Iesu mo Ioane i konā. Ko te leo eiloa o te Atua. E fakaasi faka‵lei mai i ei me i a Iesu ko te Tama a te Atua. A ia e se ko te Atua.

E lavea faka‵lei atu me i a Iesu ko te Tama faka-te-foitino a te Atua, e pelā eiloa mo te tagata muamua, ko Atamu. Ne tusi mai penei te soko ko Luka, mai tua o te taimi ne fakamatala mai ei ne ia a te papatisoga o Iesu: “I te taimi ne kamata ei ne Iesu tena galuega, kāti ko 30 ana tausaga, kae ne ma‵natu aka a tino i a ia ko te tama tagata a Iosefa, te tama a Heli, . . . te tama a Tavita, . . . te tama a Apelaamo, . . . te tama a Noa, . . . te tama a Atamu, te tama a te Atua.”—Luka 3:23-38.

E pelā eiloa mo Atamu ne fai mo fai te “tama” faka-te-foitino “a te Atua,” ne penā foki loa a Iesu. I tena papatisoga, ne maua ei ne Iesu se fesokotakiga fou mo te Atua, me ko fai a ia mo fai se Tama faka-te-agaga a te Atua. Tela la, ne tu atu eiloa a Iesu i se tulaga ‵lei ke akoako mai ne ia a muna‵tonu mai te Atua kae fakaasi mai foki te auala ki te ola. Ne kamata ei o sasale atu a Iesu i te auala telā ka iku atu i ei ki te tukuatuga o tena ola faka-te-foitino mo fai te taulaga mō tino agasala.