I te suā Sapati, ne āsi atu a Iesu ki te sunako, kāti i tafa o Kalilaia. I konā, ne maua atu ei ne ia se tagata e ‵mate tena lima fakaatamai. (Luka 6:6) Ne alamati ne failautusi mo te kau Falesaio a Iesu. Kaia? Ne fakaasi faka‵lei atu ne latou olotou lagonaga ‵tonu i te taimi ne fesili atu ei latou: “E mata, e talia i te tulafono ke faka‵lei a masaki i te Sapati?”—Mataio 12:10.

Ne tali‵tonu a takitaki lotu Iutaia me e saoloto fua a te faka‵leiga o ma‵saki i te Sapati māfai e iku atu ki te mate o se tino. E pelā mo te lotou akoakoga, e tapu ma faka‵tonu se ivi ne fati io me ke fai se litaga mō tamā pa‵kiaga i te Sapati, ko vaegā mea kolā e se fakamataku ki te ola. E manino ‵lei, me ne seki fakafesili ne failautusi mo te kau Falesaio a Iesu ona ko te mea ne manava‵se tonu latou ki te logo‵mae o te tagata fakaalofa tenei. Ne taumafai fua latou ke maua se mea ‵se i a Iesu.

Kae ne iloa ‵lei ne Iesu te ‵se o olotou mafaufauga. Ne iloa ne ia me ne talia ne latou se manatu ‵se ‵ki telā e se maua i te Tusi Tapu, e uiga ki mea kolā e ‵teke atu ki galuega kolā e se ‵tau o fai i te Sapati. (Esoto 20:8-10) Ko oti foki ne fe‵paki a ia mo vaegā fakamaseiga penā ki ana galuega ‵lei. Nei la, ko fakatoka eiloa a Iesu o fakafesagai atu ki a latou mai te fakatonu atu ki te tagata telā e ‵mate tena lima: “Tu ki luga kae vau ki te kogaloto.”—Maleko 3:3.

Ne mafuli atu a Iesu ki failautusi mo te kau Falesaio, kae fai atu: “Kafai e tasi fua tau mamoe kae to te mamoe tenā ki loto i se lua i te Sapati, e a, e isi se tagata i a koutou ka se puke ne ia te mamoe tenā o ‵futi aka ki luga?” (Mataio 12:11) E lasi te ‵togi o te mamoe, tela la, e se mafai o tiakina ne latou te mamoe i te lua ke oko ki te suā aso; e mafai o mate te mamoe i te taimi tenā kae e se mafai o maua olotou tupe mai i ei. Kae e fai mai foki te Tusi Tapu: “A te tagata amiotonu e tausi faka‵lei ki ana manu.”—Faataoto 12:10.

Ne fai ne Iesu se fakatusaga ‵lei, me ne toe fai mai a ia: “E sili fakafia atu te tāua o te tagata i lō te mamoe! Tela la, e talia i te tulafono ke fai a mea ‵lei i te Sapati.” (Mataio 12:12) E ‵tusa mo te mea tenā, ne seki soli ne Iesu a te Sapati mai te faka‵leiga o te tagata tenā. Ne ma‵vale a takitaki lotu konā, me ne seki mafai o fakafiti ne latou te fakamatalaga ‵lei kae atafai tenā. Ne ‵nofo filemu fua latou.

Ne ita a Iesu, kae ne fanoanoa foki i olotou mafaufauga ‵se, ne kilokilo atu a ia ki a latou katoa. Ne fai atu ei a ia ki te tagata: “‵Fola mai tou lima.” (Mataio 12:13) I te taimi ne ‵fola ei ne te tagata tena lima ‵mate, ne toe ‵lei eiloa. Ne fai eiloa te mea tenā mo fai se mea fakafiafia ki te tagata tenā, kae ne pokotia pefea a tino kolā ne taumafai o fakatogafiti a Iesu?

I lō te fia‵fia me ko toe ‵lei te lima o te tagata tenei, ne olo atu te kau Falesaio kae ne fai fakavave olotou aofaga mo “tino o te potukau a Helota ke tamate ne latou a ia [Iesu].” (Maleko 3:6) E foliga mai me ne aofia i te potukau fakapolitiki tenā a sui o te kau lotu o Satukaio. Ne seki fealofani sāle a te potukau fakapolitiki tenā mo te kau Falesaio, kae ko ‵kau fakatasi nei latou i te lotou ‵teke atu ki a Iesu.