Kāti ko tasi mo te āfa tausaga talu mai te taimi ne taku atu ei ne Ioane te Papatiso me i a Iesu ko te Tamā Mamoe a te Atua. I te taimi ne kamata ei ne Iesu tena taviniga, ne fai a nai tāgata loto fakamaoni mo fai ana soko, e pelā mo Anitelea, Simona Petelu, Ioane, kāti ko Iakopo (te taina o Ioane), Filipo, mo Patolomaio (ne fakaigoa foki ki a Natanielu). Fakamuli ifo, ne ‵kau atu a nisi tino e tokouke i te tau‵tali atu i a Keliso.—Ioane 1:45-47.

Ne toka a Iesu o filifili ana apositolo. Konei a tino ne fai mo fai ana taugasoa pele kae ne maua foki ne latou a akoakoga fakapito. Kae koi tuai o filifili ne ia latou, ne fanatu a Iesu ki se mauga, kāti e pili atu ki te Tai o Kalilaia telā e se ‵mao mai i Kapanaumi. Ne fakamāumāu ne ia te po kātoa ki te ‵talo, kāti ne fakamolemole atu a ia mō te poto mo te fakamanuiaga foki a te Atua. I te aso mai tua ifo, ne kalaga atu a ia ki ana soko ke olo atu, kae ne filifili ei ne ia a te toko 12 o ana soko ke fai mo apositolo.

Ne filifili ne Iesu a te tokoono kolā ne lau atu mai luga nei, e pelā foki mo Mataio, telā ne kalagagina ne Iesu mai te ofisa ao lafoga. A te suā tokolima kolā ne filifiligina ko Iuta (e fakaigoa foki ko Tataio mo “te tama a Iakopo”), Simona te tino loto finafinau, Toma, Iakopo te tama a Alefaio, mo Iuta te Isikaliota.—Mataio 10:2-4; Luka 6:16.

I te taimi tenei, ko oti ne faima‵laga fakatasi sāle a te toko 12 konā mo Iesu, kae ko iloa ‵lei ne ia latou. E tokouke i a latou e kāiga mo ia. E mautinoa eiloa me i a Iakopo mo tena taina ko Ioane ko taina tua tasi o Iesu. E pelā mo manatu o nisi tino, kafai a Alefaio ko te taina o Iosefa, te tamana fai o Iesu, ko tena uiga, a te tama a Alefaio, ko te apositolo ko Iakopo, se fakataina o Iesu.

E tonu, e se faigata ki a Iesu ke masaua a igoa o ana apositolo. Kae e mata, e mafai o masaua ne koe? E tasi te auala e fesoasoani mai ke masaua ne tatou, me e tokolua e fakaigoa ki a Simona, e tokolua ki a Iakopo, kae e tokolua foki e fakaigoa ki a Iuta. E isi se taina o Simona (Petelu) ko Anitelea, kae ko te taina o Iakopo (te tama a Sepetaio) ko Ioane. Tenā te auala ke masaua ei a igoa o apositolo e tokovalu. A te suā tokofa e aofia i ei se tino ao lafoga (ko Mataio), se tino ne fakalotolotolua fakamuli (ko Toma), se tino ne kalagagina mai lalo i te lakau (ko Natanielu), mo te taugasoa o Natanielu (ko Filipo).

E toko sefulutasi apositolo ne tino Kalilaia, ko te fa‵kai tenā o Iesu. A Natanielu, se tino Kana. Kae ko Filipo, Petelu, mo Anitelea ne tino mai Petesaita. Fakamuli ifo ne olo atu a Petelu mo Anitelea ki Kapanaumi, telā e foliga mai me ko te koga e nofo i ei a Mataio. Kāti ne ‵nofo atu a Iakopo mo Ioane i Kapanaumi io me se koga tai pili atu ki ei, kae ne seki ‵mao foki te koga ne fai ei te lā pisinisi faiika. Kae e foliga mai me ko Iuta te Isikaliota, telā ne fakalata fakamuli ne ia a Iesu, ko te apositolo fua mai i Iuta.