Teutelonome 6:1-25
6 “Konei a fakatonuga, tulafono fo‵liki, mo ikuga o fakamasinoga ne tuku mai ne Ieova te otou Atua ke akoako atu ki a koutou, ko te mea ke faka‵logo koutou ki ei māfai ko olo atu koutou ki te suā feitu ki loto i te fenua telā ka puke mō koutou,
2 ko te mea ke mataku koe ki a Ieova tou Atua kae tausi ana tulafono fakavae katoa mo ana fakatonuga konei e fakatonu atu ne au ki a koe—ko koe mo tau tama tagata mo tou mokopuna tagata+—i aso katoa o tou olaga, ko te mea ke ola leva koe.+
3 Isalaelu, e ‵tau mo koe o fakalogo kae tausi faka‵lei a mea konā, ko te mea ke manuia koe kae ke tokouke foki koutou i te fenua telā e ‵tafe i ei a susu mo hani, e pelā eiloa mo te tautoga a Ieova te Atua o ou tupuga ki a koe.
4 “Isalaelu, faka‵logo mai: A Ieova+ te ‵tou Atua ko Ieova tokotasi eiloa.
5 E ‵tau mo koe o alofa ki a Ieova tou Atua mo tou loto kātoa mo tou ola kātoa+ mo tou malosi kātoa.+
6 A pati konei ne fakatonu atu ne au i te aso nei e ‵tau o ‵teu ne koutou i otou loto,
7 kae e ‵tau mo koutou o akoako atu a mea konā ki* otou tama‵liki+ kae sautala ki ei māfai e saga‵saga koutou i otou fale kae penā foki māfai e sa‵sale koutou i te auala, kae māfai e ta‵kato koutou i lalo, kae māfai foki ko ‵tu aka koutou ki luga.+
8 Ke ‵sai a mea konā e pelā me ne fakamasauaga ki otou lima, kae e ‵tau o fai pelā me ne mea ‵sai ulu i otou lae.*+
9 Tusi a mea konā ki luga i pou o mataloa i otou fale mo mataloa o otou fakai.
10 “Kafai ko aumai koutou ne Ieova te otou Atua ki te fenua telā ne tauto a ia me ka tuku atu ki otou tupuga ko Apelaamo, Isaako, mo Iakopo+—ne fakai ‵lasi kae ‵gali kolā ne seki faite ne koutou,+
11 ko fale kolā e ‵fonu i vaegā mea ‵lei valevale kolā ne seki ga‵lue koutou ki ei, ko vaikeli kolā ne seki keli ne koutou, mo togavine mo lakau ko olive kolā ne seki ‵toki ne koutou—kae ne ‵kai kae ma‵kona koutou i ei,+
12 fakaeteete la ke mo a ma puli i a koutou a Ieova,+ telā ne aumai ne ia koutou ki tua mo te fenua o Aikupito, te koga ne ‵nofo pologa koutou i ei.
13 E ‵tau o ma‵taku koutou ki a Ieova te otou Atua,+ kae ‵tau o tavini koutou ki a ia,+ kae tauto foki koutou i tena igoa.+
14 E se ‵tau mo koutou o tau‵tali i nisi atua, so se atua o tino kolā e ‵nofo i otou tafa,+
15 me i a Ieova te otou Atua telā e nofo i te va o koutou, se Atua telā e manako ke tapuaki atu fua koutou ki a ia tokotasi.+ Kafai e se fai penā, ka ‵ka eiloa te kaitaua o Ieova te otou Atua e pelā me se afi ki luga i a koutou+ kae ka ‵ta fakapalele ne ia koutou mai luga i te laukele.+
16 “E se ‵tau mo koutou o tofotofo a Ieova te otou Atua,+ e pelā mo te tofotofoga ne koutou a ia i Masa.+
17 E ‵tau o faka‵logo faka‵lei koutou ki fakatonuga a Ieova te otou Atua mo ana fakamasauaga mo ana tulafono fo‵liki kolā ne fakatonu atu ne ia ke faka‵logo koutou ki ei.
18 E ‵tau mo koutou o fai a te mea tonu kae ‵lei i te kilokiloga a Ieova, ko te mea ke manuia koutou, kae ke ulu atu foki koutou o puke mō koutou a te fenua ‵lei telā ne tauto a Ieova ke tuku atu ki otou tupuga,+
19 kae ka afuli kea‵tea ne ia mai otou mua a otou fili katoa, e pelā eiloa mo te tautoga a Ieova ne fai.+
20 “Kafai e fesili atu otou tama ki a koutou i aso mai mua, ‘Se a te uiga o fakamasauaga, tulafono fo‵liki, mo ikuga o fakamasinoga kolā ne fakatonu mai ne Ieova te ‵tou Atua ki a koutou?’
21 e ‵tau o fai atu koutou ki otou tama, ‘A matou ne fai pelā me ne pologa a te Falao i Aikupito, kae ne aumai matou ne Ieova ki tua mo Aikupito ki tena lima malosi.
22 Tenā ne fai ei ne Ieova i omotou mua a fakailoga mo vavega fakaofoofogia kae fakama‵taku ki luga i Aikupito,+ mo te Falao mo tena kaufale kātoa.+
23 Kae ne aumai kea‵tea ne ia matou mai konā ko te mea ke aumai ne ia matou ki konei ke tuku mai ki a matou a te fenua ne tauto a ia ke tuku atu ki ‵tou tupuga.+
24 Tenā ne fakatonu mai ei a Ieova ki a matou ke faka‵logo ki tulafono katoa konei kae ke ma‵taku ki a Ieova te ‵tou Atua mō te ‵lei o tatou,+ ko te mea ke tumau tatou i te ola,+ e pelā eiloa mo te aso nei.
25 Kae ka taku tatou ne tino amio‵tonu, māfai e faka‵logo faka‵lei tatou ki fakatonuga konei kae faka‵logo ki a Ieova te ‵tou Atua, e pelā eiloa mo tena fakatonuga ki a tatou.’+
Fakamatalaga mai lalo
^ Io me “fakamasaua atu a mea konā ki; fakamalamalama atu a mea konā ki.”
^ Epelu, “i te va o otou mata.”
