Tanielu 4:1-37
-
Ko iloa ne te Tupu ko Nepukanesa a te pulega fakatupu a te Atua (1-3)
-
Te moemiti a te tupu e uiga ki se lakau (4-18)
-
Ko fakamatala atu ne Tanielu te uiga o te moemiti (19-27)
-
Tena fakataunuga muamua ki luga i te tupu (28-36)
-
Ko fakavalevale te tupu i taimi e fitu (32, 33)
-
-
Ko fakamaluga aka ne te tupu a te Atua o te lagi (37)
4 “Mai te Tupu ko Nepukanesa ki tino katoa, atufenua, mo ‵gana kolā e ‵nofo i te lalolagi kātoa: Ke lasi te otou filemu!
2 Ko fiafia au o folafola atu a fakailoga mo mea fakaofoofogia ne fai ne te Atua Tafasili i te Maluga ki a au.
3 Ko oko eiloa i te ‵gali o ana fakailoga, kae ma‵losi ana mea fakaofoofogia! A tena malo se malo ki te se-gata-mai, kae ko tena pulega e oko ki kautama katoa.+
4 “Au, Nepukanesa, ne nofo filemu i toku fale kae manuia i toku palesi.
5 Ne lavea ne au se moemiti telā ne fai ne ia au ke mataku. I taku moega i luga i toku moega, ne mataku au i ata mo fakaasiga ne lavea ne au.+
6 Tenā ne fai ei taku fakatonuga ke aumai ki oku mua a tāgata ‵poto o Papelonia ko te mea ke fakamatala mai ne latou ki a au te uiga o te moemiti.+
7 “I te taimi tenā ne o‵mai ki loto a faitaulaga faivailakau, tino faivailakau, tino Kaletaia,* mo tino iloilo fetū.+ I te faiatuga ne au ki a latou a te moemiti, ne seki mafai o fakamatala mai ne latou te uiga o te moemiti ki a au.+
8 Fakamuli loa, ne vau a Tanielu ki oku mua, a tena igoa ko Peletisala+ ko te igoa o toku atua+ telā e isi se agaga o atua tapu i ei,+ kae ne fai atu ne au ki a ia a te moemiti:
9 “‘Peletisala te pule o faitaulaga faivailakau,+ e iloa ‵lei ne au me e maua i a koe a te agaga o atua tapu+ kae e seai se mea ‵funa e tō faigata ki a koe.+ Tela la, fakamatala mai aka ki a au a fakaasiga ne lavea ne au i taku moemiti mo tena uiga.
10 “‘I fakaasiga ne lavea ne au i taku moega i luga i toku moega, ne lavea ne au se lakau+ i te kogaloto o te lalolagi, kae e maluga ‵ki eiloa.+
11 Ne tupu aka te lakau kae malosi, kae ko tena taulu ne oko atu ki te lagi, kae ne lavea mai i koga ‵mao o te lalolagi kātoa.
12 Ana lau e ‵gali, ana fuagalakau e uke, kae isi ne meakai i luga i ei mō tino katoa. Mai lalo i ei e faka‵malu i ei a manu fe‵kai o te vao, kae i luga i ana kaula e ‵nofo i ei a manu o te lagi, kae ko manu katoa e ‵kai mai i ei.
13 “‘I taku kiloatuga ki te fakaasiga i luga i toku moega, ne lavea ne au se avefekau, se tino tapu, e fanaifo mai i te lagi.+
14 Ne kalaga atu a ia i se leo maluga: “‵Kati ki lalo te lakau,+ ‵kati ki lalo ana kaula, luelue kea‵tea ana lau, kae laku valevale atu ana fuagalakau. Ke na ‵tele kea‵tea a manu fe‵kai mai lalo i ei mo manu eva mai i ana kaula.
15 Kae tuku i ei a te tafito mo ana aka i te laukele, mo te fusi fiti mo te fusi kopa, fakatasi mo mouku o te laukele. Tuku ke ‵siu i te ‵sau o te lagi, kae ke maua eiloa tena vaega fakatasi mo manu fe‵kai kolā e ola i va o lakau o te lalolagi.+
16 Ke ‵fuli eiloa a tena loto mai te loto o te tino, kae ke tuku atu ki ei a te loto o se manu fekai, kae tuku penā ke palele+ atu a taimi e fitu.+
17 A te mea tenei e auala mai i te fakatonuga a avefekau,+ kae ko te fakamolemole e auala mai i te muna a tino tapu, ko te mea ke iloa ne tino kolā e ola me i te Atua Tafasili i te Maluga ko te Pule i malo o tāgata+ kae e tuku atu ne ia ki so se tino e manako a ia ki ei, kae fakatu aka ne ia i luga i ei a te ‵toe tino malalo eiloa.”
18 “‘Tenei te moemiti telā ne lavea ne au, te Tupu ko Nepukanesa; nei la, e Peletisala, fakamatala mai tena uiga, me ne seki mafai o fakamatala mai ne tāgata ‵poto katoa o toku malo a tena uiga ki a au.+ Kae e mafai ne koe o fai te mea tenā, me i te agaga o atua tapu e maua eiloa i a koe.’
19 “I te taimi tenā, a Tanielu telā e igoa ki a Peletisala,+ ne poi mō se taimi, kae ne kamata o mataku a ia i ana mafaufauga.
“Ne fai atu te tupu ki a ia, ‘Peletisala, sa fai ke mataku koe i te moemiti mo tena uiga.’
“Ne tali atu a Peletisala, ‘Toku aliki, talosia ke fakasino atu a te moemiti ki a latou kolā e takalia‵lia ki a koe, kae ke fakasino atu eiloa tena uiga ki ou fili.
20 “‘A te lakau telā ne lavea ne koe telā ne ola aka ke maluga kae malosi, kae ko tena taulu ne oko atu ki te lagi kae mafai o lavea ne tino katoa i te lalolagi,+
21 telā e ‵gali ana lau, e uke ana fuagalakau, kae fai mo meakai a tino katoa, kae mai lalo i ei e ‵nofo i ei a manu fe‵kai o te laukele kae ko ana kaula e ‵nofo i ei a manu eva o te lagi,+
22 ko koe eiloa tenā, e te tupu, me i a koe ne tupu aka ke takutakua kae malosi, kae ko tou gali ko gasolo aka eiloa kae ko oko ki te lagi,+ kae ko tau pulega ko oko atu ki koga ‵mao o te lalolagi.+
23 “‘Kae ne lavea ne te tupu se avefekau, se tino tapu,+ e vau mai i te lagi, ana muna: “‵Kati ki lalo te lakau kae fakaseai atu, kae tuku i ei te tafito mo ana aka i te laukele, mo te fusi fiti mo te fusi kopa, fakatasi mo mouku o te laukele. Kae ko te ‵sau o te lagi ke fai i ei ke ‵siu te mea tenā, kae ke maua eiloa tena vaega fakatasi mo manu fe‵kai o te laukele ke oko ki te taimi ko palele atu ei a taimi e fitu.”+
24 Tenei tena uiga, e te tupu; ko te fakatonuga a te Atua Tafasili i te Maluga telā e ‵tau o oko ki toku aliki te tupu.
25 A koe ka afuli kea‵tea mai i tino, kae ka ‵nofo fakatasi koe mo manu fe‵kai o te laukele, kae ka tuku atu ki a koe a mouku ke kai ki ei e pelā eiloa mo pulumakau; kae ko koe ka ‵siu i te ‵sau o te lagi,+ kae ka palele+ atu a taimi e fitu,+ ke oko ki te taimi ko iloa ei ne koe me i te Atua Tafasili i te Maluga ko te Pule i malo o tāgata kae e tuku atu fua ne ia ki so se tino e manako a ia ki ei.+
26 “‘Kae ona ko latou ne fai mai ke tuku i ei a te tafito o te lakau mo ana aka,+ ka toe maua eiloa ne koe a tou malo māfai ko iloa ne koe me e isi se Atua telā e pule mai i te lagi.
27 Tela la, e te tupu, ke talia eiloa ne koe aku pati fakatonutonu. ‵Fuli kea‵tea mai i au agasala e auala i te faiga o te mea tonu, mo au faifaiga sē ‵lei e auala i te fakaasiatuga o te alofa fakamagalo ki tino ma‵tiva. E se taumate ka gasolo aka koe o manuia malosi.’”+
28 A mea katoa konei ne oko atu ki te Tupu ko Nepukanesa.
29 E 12 masina mai tua ifo ne sasale atu a ia i te tuafale o te palesi o te tupu o Papelonia.
30 Muna a te tupu: “E a, e se ko Papelonia te Sili tenei, telā ne faite ne au mō te fale o te tupu e auala i toku malosi mo toku mafi kae mō te vikiga o toku tulaga ‵malu?”
31 E seki oti a pati konā mai te gutu o te tupu, kae ne fanaifo se leo mai i te lagi: “Ko oti ne fai mai e uiga ki a koe, e te Tupu ko Nepukanesa, ‘A te malo ko ave kea‵tea mai i a koe,+
32 kae ka ‵tuli kea‵tea koe mai i tino. A koe ka ‵nofo fakatasi mo manu fe‵kai o te laukele, kae ka tuku atu ki a koe a mouku ke kai ki ei e pelā eiloa mo pulumakau, kae ka palele atu a taimi e fitu, ke oko ki te taimi ko iloa ei ne koe me i te Atua Tafasili i te Maluga ko te Pule i malo o tāgata kae e tuku atu ne ia ki so se tino e manako a ia ki ei.’”+
33 I te taimi eiloa tenā ne taunu a pati konā ki a Nepukanesa. Ne ‵tuli kea‵tea a ia mai i tino, kae ne kamata o kai ki mouku e pelā eiloa mo pulumakau, kae ko tena foitino ne ‵siu i te ‵sau o te lagi, ke oko ki te taimi ko ‵loa ei tena laulu e pelā eiloa mo fulufulu o te aeto kae ko ana mania ko pelā eiloa mo mania o se manu eva.+
34 “I te fakaotiga o te taimi tenā,+ ne kilo aka au, Nepukanesa, ki te lagi kae ne toe foki mai a toku malamalama ki a au; kae ne ‵viki atu au ki te Atua Tafasili i te Maluga, kae ne avatu ne au a vikiga mo te ‵malu ki te Atua telā e ola ki te se-gata-mai, me i tena pulega se pulega ki te se-gata-mai kae ko tena malo e oko ki kautama katoa.+
35 A tino katoa e ‵nofo i te lalolagi e pelā fua me ne mea e seai, kae e fai ne ia a mea e ‵tusa eiloa mo tena loto ki te kautau o te lagi mo tino e ‵nofo i te lalolagi. Kae e seai se tino e mafai o taofi ne ia a ia+ io me fai atu ki a ia, ‘Se a te mea ne fai ne koe?’+
36 “I te taimi tenā ne foki mai ei toku malamalama ki a au, kae ko te ‵malu o toku malo, toku tulaga ‵malu, mo toku gali ne toe ‵foki mai ki a au.+ Aku ofisa ma‵luga mo tino tāua ne ‵sala malosi mai ki a au, kae ne toe fakafoki atu au ki toku malo, kae ko sili atu te takutakua ne fakaopoopo mai ki a au.
37 “Nei la, au, Nepukanesa e ‵viki kae fakamaluga kae faka‵malu atu ki te Tupu o te lagi,+ me i ana galuega katoa e ‵tonu kae ko ana auala katoa e fai mea tonu,+ me e mafai foki o fakamasiasi ne ia a latou kolā e sa‵sale i te fakamata‵mata.”+
Fakamatalaga mai lalo
^ Telā se potukau o tino ‵poto i te fakataulaitu mo te iloiloga o fetū.
