Salamo 40:1-17
Ki te takitaki o te kau fai pese. Ko te salamo a Tavita. Se pese.
40 Au ne fakamoemoe malosi ki a* Ieova,Kae ne tuku mai ana taliga* ki a au kae lagona ne ia taku tagi mō se fesoasoani.+
2 Ne avaka ne ia au mai te lua telā e ‵gulu,Ki tua mo pela mole‵mole.
Kae faka‵tu ne ia oku vae i luga i se kaupapa;Ne fai ne ia oku vae ke ‵mautakitaki.
3 Tenā ne tuku mai ei ne ia se pese fou ki toku gutu,+Ke vikia te ‵tou Atua.
E tokouke a tino ka ‵kilo atu ki ei mo te ofoKae tali‵tonu ki a Ieova.
4 E fiafia te tagata telā e talitonu ki a IeovaKae e se fakalagolago ki tino ‵teke io me ko tino ‵loi.
5 Ko oko eiloa i te uke o au mea ne fai,E Ieova toku Atua,Ko au galuega fakaofoofogia mo ou mafaufauga ki a matou.+
E seai se tino e mafai o ‵pau mo koe;+Kafai e taumafai au o fakailoa kae faipati e uiga ki mea konā,Ko tō uke katoa a mea konā ke lau aka!+
6 Ne seki manako* koe ki taulaga mo mea kolā e ofo atu,+Kae ne ‵tala ne koe oku taliga ke ‵logo.+
Ne seki fakamolemole mai koe ki taulaga ‵sunu mo taulaga mō agasala.+
7 Tenā ne fai aka ei au: “Kiloke, au ko vau.
E tusi i te peluga tusi a mea e uiga ki a au.+
8 A te faiga o tou loto, e toku Atua, ko toku fiafia,*+Kae ko tau tulafono e tuku i loto i toku loto.+
9 E folafola atu ne au te tala ‵lei o te amiotonu i loto i te fakapotopotoga lasi.+
Kiloke! E se taofi ne au oku laugutu,+E Ieova, e pelā mo te mea e iloa ‵lei ne koe.
10 E se ‵funa ne au tou amiotonu i loto i toku loto.
E folafola atu ne au tou fakamaoni mo te fakaolataga.
E se ‵funa ne au tou alofa fakamaoni mo tau munatonu i loto i te fakapotopotoga lasi.”+
11 Ieova, sa taofi ne koe tou alofa fakamagalo mai i a au.
Ke puipui faeloa au ne tou alofa fakamaoni mo tau munatonu.+
12 A fakalavelave i oku tafa ko tō uke katoa ke lau aka.+
Ko tō uke katoa aku mea ‵se, ko se mafai ei ne au o lavea toku auala;+Ko uke atu i laulu o toku ulu,Kae ko au ko loto vāivāi.
13 Fakamolemole, ke loto fiafia koe e Ieova o fakaola aka au.+
Ieova, fakavave o fesoasoani mai ki a au.+
14 A latou katoa kolā e taumafai o tamate auKe na fakamasiasi kae fakamavale atu.
A latou kolā e fia‵fia ona ko oku puapuagaKe na ‵foki ki tua mo te masiasi.
15 A latou kolā e fai mai ki a au: “A! A!”
Ke ‵poi ona ko te lotou masiasi.
16 Kae ko latou kolā e ‵sala ki a koe+Ke ‵lifu kae fia‵fia ki a koe.+
A latou kolā e fia‵fia ki au faifaiga faka‵sao tino ke fai aka faeloa:
“Ke fakamaluga aka a Ieova.”+
17 Kae ko au e vāivāi kae mativa;Ke saga tonu mai eiloa a Ieova ki a au.
A koe ko toku fesoasoani mo te tino e fakasao ne ia au;+Toku Atua, sa fakatuai.+
Fakamatalaga mai lalo
^ Io me “fakatalitali mo te kufaki ki a.”
^ Io me “ne punou ifo kae fakalogo mai.”
^ Io me “fiafia.”
^ Io me “manakoga.”
