Salamo 147:1-20
147 ‵Viki atu ki a Ioa!*
Se mea ‵lei ke usu atu a vikiga ki ‵tou Atua;Ko oko loa i te gali kae ‵lei ke ‵viki atu ki a ia!+
2 Ko faite ne Ieova a Ielusalema;+Ko fakamaopoopo fakatasi mai ne ia a tino o Isalaelu kolā ne salalau valevale.+
3 E faka‵lei aka ne ia a tino loto mafatia;E fusi ne ia olotou pa‵kiaga.
4 E lau aka ne ia te aofaki o fetū;E kalaga atu a ia ki a latou katoa i olotou igoa.+
5 A te ‵tou Aliki e sili kae lasi tena ‵mana;+A tena malamalama e seai sena gataga.+
6 E faka‵tu aka ne Ieova a tino agamalu,+Kae ‵pei ifo ne ia a tino amio ma‵sei ki te laukele.
7 Usu atu ki a Ieova fakatasi mo te fakafetai;Usu atu ki te ‵tou Atua, fakatasi mo kitala,
8 Te Atua telā e ufi ne ia a te lagi ki kaumana,Te Atua telā e tuku mai ne ia te vaiua ki te lalolagi,+Te Atua telā e fai ne ia a mouku ke ola+ i luga i mauga.
9 E tuku atu ne ia a meakai ki manu,+Ki tamā leveni kolā e ‵tagi atu ki ei.+
10 E se fiafia a ia ki te malosi o te solofanua;+Io me ofo a ia i te ma‵losi o vae o se tagata.+
11 E fiafia eiloa a Ieova ki a latou kolā e ma‵taku ki a ia,+Ki a latou kolā e fakatalitali ki tena alofa fakamaoni.+
12 Faka‵malu atu ki a Ieova, e Ielusalema.
‵Viki atu ki tou Atua, e Siona.
13 E faite ne ia a lakau faka‵lava o mataloa o tou fakai ke ma‵losi;E fakamanuia ne ia au tama tāgata.
14 E aumai ne ia te filemu ki tou laukele;+E fakamalie ne ia koe ki toe saito ‵lei.+
15 E fai atu ne ia tena fakatonuga ki te lalolagi;
A tena muna e tele makini.
16 E aumai ne ia te kiona e pelā eiloa me se vulu;+E fakasalalau atu ne ia a te sau ‵moko e pelā eiloa me ne lefu.+
17 E faka‵to ifo ne ia ana vaiua fatu* e pelā me ne matu‵tutuga o falaoa.+
Ko oi e mafai o fa‵ki ne ia tena ‵moko?+
18 E fai atu ne ia tena muna, ko liuvai i ei.
E fakaagi ne ia tena matagi+ kae ‵tafe ei a vai.
19 E folafola atu ne ia ana pati ki a Iakopo,Ana tulafono fo‵liki mo fakamasinoga ki Isalaelu.+
20 Ne seki fai eiloa ne ia se mea penā ki se isi fenua;+E seai se lotou mea e iloa e uiga ki ana fakamasinoga.
‵Viki atu ki a Ioa!*+
Fakamatalaga mai lalo
^ Io me “Aleluia!” A “Ioa” ko te fakatoetoega o te igoa o Ieova.
^ Io me “kati poloka.”
^ Io me “Aleluia!” A “Ioa” ko te fakatoetoega o te igoa o Ieova.
