Te Tusi a Mataio 18:1-35
18 I te itula tenā ne olo atu a soko ki tafa o Iesu kae fai atu: “Ko oi te ‵toe tino sili i te Malo o te lagi?”+
2 Ne kalaga atu a ia ki se tamaliki foliki kae fakatu ne ia i olotou mua,
3 ana muna: “Au e fai ‵tonu atu ki a koutou, seiloga ke ‵fuli koutou ke fai pelā me ne tama‵liki fo‵liki,+ ka se mafai eiloa o ulu atu koutou ki te Malo o te lagi.+
4 Tela la, so se tino e fakamalalo ne ia a ia eiloa e pelā mo te tamaliki foliki tenei, ko ia tenā te ‵toe tino sili i te Malo o te lagi;+
5 kae ko so se tino e talia ne ia se tamaliki foliki penei ona ko toku igoa, e talia foki ne ia au.
6 Kae ko so se tino e fakavāivāi* ne ia se tino i tino fatauva konei, kolā e fakatuanaki mai ki a au, e ‵lei atu ke ‵sai tena ua ki se fatu solo saito telā e toso ne se asini kae ‵pei atu ke ‵goto ki lalo i te ‵kano moana.+
7 “Kalofa eiloa i te lalolagi ona ko mea kolā e fakavāivāi ne latou a tino! E tonu, ka oko mai eiloa a mea fakavāivāi konā, kae kalofa eiloa i te tino telā e auala mai i ei a mea konā!
8 Kafai ko tou lima io me ko tou vae e fakaagasala* ne ia koe, ‵kati ke tō kae ‵pei kea‵tea.+ E ‵lei atu ke maua ne koe te ola e aunoa mo se lima io me se vae i lō tou ‵pei atu mo ou lima e lua mo ou vae e lua ki te afi se-gata-mai.+
9 Kafai foki ko tou mata e fakaagasala ne ia koe, ‵kape ke tō kae ‵pei kea‵tea. E ‵lei atu ke maua ne koe te ola mo tou mata e tasi i lō tou ‵pei atu mo ou mata e lua ki te afi i Kena.*+
10 Ke mo a eiloa ma takalia‵lia koutou ki se tokotasi o tino fatauva konei, me e fai atu au ki a koutou me e ‵kilo atu faeloa olotou agelu i te lagi ki foliga o toku Tamana telā i te lagi.+
11 * ——
12 “Se a te otou faka‵tau? Kafai se tagata e 100 ana mamoe kae takasēsē atu kea‵tea se mamoe e tasi,+ e a, ka se tiaki ne ia ana mamoe e 99 i luga i mauga kae fano o ‵sala te mamoe e tasi telā ko takasēsē kea‵tea?+
13 Kae kafai ko maua ne ia, e fai ‵tonu atu au ki a koutou, e sili atu tena fiafia ki te mamoe tenā i lō mamoe e 99 kolā ne seki takasē‵se kea‵tea.
14 E penā foki a toku* Tamana i te lagi, e se manako ke mate se tokotasi o tino fatauva konei.+
15 “E se gata i ei, kafai ne fai ne tou taina se agasala, fano o faipati ki ei i a koulua aka eiloa kae fakaasi atu tena mea ‵se.*+ Kafai e fakalogo a ia ki a koe, ko maua ne koe tou taina.+
16 Kae kafai e se fakalogo, puke la ne koe se tokotasi io me se tokolua, ko te mea ke fakatalitonu aka a mea katoa i molimau a tino e tokolua io me e tokotolu.+
17 Kafai a ia e se fakalogo ki tino konā, faipati atu ki te fakapotopotoga. Kafai foki a ia e se fakalogo ki te fakapotopotoga, ke fai la ne koe a ia e pelā me se tagata o fenua fakaa‵tea+ mo se tino ‵tae lafoga.+
18 “Au e fai ‵tonu atu ki a koutou, so se mea e saisai ne koutou i te lalolagi ko mea kolā ko oti ne saisai i te lagi, kae ko so se mea e ‵tala ne koutou i te lalolagi ko mea kolā ko oti ne ‵tala i te lagi.
19 E toe fai atu foki au ki a koutou, kafai e lotoma‵lie se tokolua i a koutou i te lalolagi ki se mea tāua telā e ‵tau o ‵talo atu e uiga ki ei, ka fakataunu eiloa te mea tenā ne toku Tamana telā i te lagi.+
20 Me i so se koga e maopoopo i ei se tokolua io me se tokotolu i toku igoa,+ e nofo foki au i konā.”
21 Tenā ne fanatu ei a Petelu kae fai atu ki a ia: “Te Aliki, e fakafia taimi e agasala mai ei toku taina ki a au kae e ‵tau o fakamagalo ne au? E a, e fakafitu taimi?”
22 Muna a Iesu ki a ia: “Au e fai atu ki a koe, e se fakafitu taimi, kae faka-77 taimi.+
23 “Tenā te pogai e mafai ei o fakatusa te Malo o te lagi ki se tupu telā e manako ke ‵tina mai ne ana pologa olotou kaitalafu ki a ia.
24 I te taimi ne kamata ei o fai ne ia ke ‵tina mai a mea konā, ne aumai ki a ia se tagata telā ne kaitalafu ne ia a taleni e 10,000.*
25 Kae ona ko te mea ko se mafai ne ia o ‵togi tena kaitalafu, ne fakatonu atu ei tena matai ke fakatau atu ki tua a ia eiloa fakatasi mo tena avaga mo ana tama‵liki mo ana mea katoa, ko te mea ke ‵togi ki ei tena kaitalafu.+
26 Tenā ne punou ifo te pologa kae ifo atu ki a ia, ana muna, ‘Kufaki malie aka, me e toe ‵togi atu eiloa ne au au mea katoa.’
27 Ona ko te alofa o te matai ki tena pologa, fakamagalo ei ne ia tena kaitalafu kae tuku atu ke fano.+
28 Ne fanatu te pologa tenā kae maua ne ia te suā pologa telā ne kaitalafu ne ia e 100 tenali* mai i a ia. Ne puke ne ia, ‵kumi tena ua, kae fai atu, ‘‵Togi mai a mea katoa kolā ne kaitalafu ne koe.’
29 Ne punou ifo te pologa tenā i ana mua kae kamata o fakamolemole atu ki a ia, ana muna, ‘Kufaki malie aka me ka toe ‵togi atu eiloa ne au au mea.’
30 Kae ne seki talia ne ia kae fakatonu atu ke ‵pei te pologa tenā ki te falepuipui ke oko eiloa ki te taimi ko mafai ei ne ia o ‵tina mai tena kaitalafu.
31 I te laveaga ne nisi pologa a mea katoa ne fai ne ia, ne fanoa‵noa malosi latou, olo atu ei o fakamatala atu a mea katoa kolā ne ‵tupu ki te lotou matai.
32 Tenā ne kalaga atu ei te matai ki tou tagata kae fai atu: ‘Te pologa masei, ne fakamagalo ne au tau kaitalafu, i a koe ne tagi mai ki a au.
33 E a, e se ‵tau foki o fakamagalo ne koe tou taina pologa, e pelā mo koe ne fakamagalo ne au?’+
34 Ona ko te mea tenā, ne kaitaua malosi te matai kae tuku atu a ia ki leoleo o te falepuipui ke oko eiloa ki te taimi e ‵tina mai ei tena kaitalafu kātoa.
35 E penā foki eiloa a mea ka fai ne toku Tamana i te lagi ki a koutou+ māfai e se fakamagalo ne koutou taki tokotasi otou taina mo otou loto kātoa.”+
Fakamatalaga mai lalo
^ Io me “fakapakū.”
^ Io me “fakapakū.”
^ Io me kāti, “te otou.”
^ Eleni, “kae polopoloki ‵mafa atu a ia.”
