Te Tusi a Maleko 9:1-50
-
‵Fuliga o foliga o Iesu (1-13)
-
Ne faka‵lei aka se tamaliki e pukea ne temoni (14-29)
-
E mafai o fai a mea katoa ne te tino telā e fakatuanaki (23)
-
-
Toe ‵valo mai te mate o Iesu (30-32)
-
Ko kinau a soko me ko oi e sili (33-37)
-
So se tino e se ‵teke ki a tatou e kau mo tatou (38-41)
-
Mea fakavāivāi tino (42-48)
-
“Ke maua te masima i a koutou” (49, 50)
9 E se gata i ei, ne fai atu a Iesu ki a latou: “Au e fai ‵tonu atu ki a koutou me e isi ne tino e ‵tu mai i konei ka se ‵mate* seiloga ke lavea muamua ne latou te Malo o te Atua ko oko mai i tena ‵mana.+”
2 I te ono o aso mai tua ifo i ei, ne puke ne Iesu a Petelu mo Iakopo mo Ioane kae olo aka ki luga i se mauga maluga, ko latou aka eiloa. Kae ne ‵fuli ana foliga i olotou mua;+
3 kae ko ana gatu ne kamata o malapu‵lapu kae ‵kena atu i lō so se gatu e ‵ta ne se tino i te lalolagi.
4 Ne lavea atu foki ne latou a Elia mo Mose e sau‵tala fakatasi mo Iesu.
5 Tenā ne fai atu ei a Petelu ki a Iesu: “Te Faiakoga,* ko ‵lei aka eiloa ke ‵nofo matou i konei. Tela la, ka faka‵tu ne matou a faleie e tolu, e tasi mō koe, e tasi mō Mose, kae e tasi mō Elia.”
6 E tonu, ne se iloa ne Petelu me ne a ana mea e ‵tau o fai, me ko oko eiloa te lotou ma‵taku.
7 Kae ne fakatu aka se kaumana kae ufi ei latou, kae faipati mai se leo+ i loto i ei penei: “Tenei eiloa taku Tama, ko taku fagasele.+ Faka‵logo ki a ia.”+
8 Tenā ne fakatau kilo‵kilo fakavave latou kae e seai se tino e lavea ne latou kae na ko Iesu fua.
9 I te lotou oloifoga mai luga i te mauga, ne tuku atu ne ia se fakatonuga ‵mafa ke mo a ma fakailoa atu ki se isi tino a te mea ne lavea ne latou+ ke oko ki te taimi ko oti ei ne toe fakatu aka te Tama a te tagata mai te mate.+
10 Ne taofi ‵mau ne latou ana pati i olotou loto,* kae ne sau‵tala loa latou ki te uiga o te toetu mai te mate.
11 Kae ne kamata o fesili atu latou ki a ia, olotou muna: “Kaia e fai mai ei a failautusi me e ‵tau o vau muamua a Elia?”+
12 Ana muna ki a latou: “E vau muamua eiloa a Elia o toe faka‵foki a mea katoa;+ kae ne mafai pefea o tusi mai e uiga ki te Tama a te tagata me e ‵tau o oko atu ki a ia a logo‵maega e uke+ kae fakatauemu atu foki ki ei?+
13 Kae e fai atu au ki a koutou i a Elia+ ko leva ne vau kae ne fai fua ne latou ki a ia a mea kolā ne ma‵nako latou ki ei, e pelā eiloa mo te mea ne tusi mai e uiga ki a ia.”+
14 I te lotou okoatuga ki nisi soko, lavea ei ne latou se vaitino e mumu atu i olotou tafa mo failautusi e kinau mo latou.+
15 I te laveaga eiloa ne te vaitino a Iesu, ne ‵poi latou kae ‵tele atu o fakafetaui ki a ia.
16 Ne fesili atu a ia ki a latou: “Se a te mea e kinau ei koutou mo latou?”
17 Kae ne tali atu se tino e tokotasi mai te vaitino: “Te Faiakoga, ne aumai ne au taku tamaliki ki a koe me e nofo i ei se agaga telā e fai ne ia a ia ke gūgū.+
18 I so se koga e ulufia ei a ia ne te agaga, e ‵pei a ia ki lalo i te laukele, ‵sali ana suavale kae ū ana nifo kae galo atu tena malosi. Ne fakamolemole atu au ki ou soko ke afuli aka te agaga tenā kea‵tea kae ne seki mafai ne latou.”
19 Ne tali atu a ia ki a latou: “Te kautama sē fakatuanaki tenei,+ ka pefea te leva e fesoasoani atu ei au ki a koutou? Ka pefea te leva e fa‵ki ei au i a koutou? Aumai ki a au te tamaliki tenā.”+
20 Tenā ne aumai ei ne latou te tamaliki ki a ia, kae i te laveaga ne te agaga a Iesu, ne fai fakavave ne ia ke pole te tamaliki. Kae i tena sigaga ki lalo i te laukele, takafilifili valevale ei a ia kae ‵sali ana suavale.
21 Tenā ne fesili atu ei a Iesu ki tena tamana: “Ko pefea te leva ne tupu ei te mea tenei ki a ia?” Ana muna: “Talu mai te taimi koi foliki ei a ia,
22 e ‵pei sāle ne te agaga a ia ki loto i te afi e pelā foki mo te vai ke tamate ei a ia. Kae kafai e mafai ne koe o fai se mea ki ei, ke alofa mai koe kae fesoasoani mai ki a matou.”
23 Ne fai atu a Iesu ki a ia: “Kaia e fai mai ei koe penei, ‘Kafai e mafai ne koe’? Me i te tino telā e fakatuanaki e mafai o fai ne ia a mea katoa.”+
24 Ne kalaga fakavave atu te tamana o te tamaliki kae fai atu: “Au e fakatuanaki! Fesoasoani mai ke fakamalosi aka toku fakatuanaki!”+
25 I te laveaga ne Iesu me ko ‵tele katoa atu te vaitino ki a latou, ‵liko ei ne ia te agaga masei kae fai atu ki ei: “Te agaga gūgū kae ‵tuli, au e fakatonu atu ki a koe, fano kea‵tea mai i a ia kae e tapu koe e toe foki ki ei.”+
26 I te otiga ne pakalaga kae pole valevale, fano ei te agaga ki tua, kae ko te tamaliki ko pelā eiloa me ko mate, me ne fai mai te tokoukega o tino: “A ia ko mate!”
27 Ne puke atu a Iesu ki tena lima, fakatu aka ki luga, tu aka ei tou tagata.
28 Kae i tena uluga ki loto i se fale, ne fesili atu ana soko ki a ia i a latou aka eiloa: “Kaia ne seki mafai ei ne matou o afuli kea‵tea te agaga tenā?”+
29 Ana muna ki a latou: “A te vaega tenei e mafai fua o vau ki tua e auala i te ‵talo.”
30 Ne tiakina ne latou te koga tenā kae olo atu i loto i Kalilaia, kae ne seki manako a ia ke iloa ne se tino te mea tenā.
31 Ne akoako ne ia ana soko kae fai atu ki a latou: “A te Tama a te tagata ka tuku atu ki lima o tāgata faitogafiti, kae ka tamate ne latou a ia,+ kae faitalia tena mate, ka toetu aka a ia fakamuli i te tolu o aso.”+
32 Ne seki malamalama latou i ana pati kae ne ma‵taku latou ma fesili atu ki a ia.
33 Kae ne oko atu latou ki Kapanaumi. I tena nofoga i loto i te fale, fesili atu ei a ia ki a latou: “Se a te mea ne kinau ei koutou i te auala?”+
34 Tenā ne ‵nofo filemu ei latou, ona ko latou ne kinau i te auala me ko oi e sili i a latou.
35 Ne sagasaga a ia ki lalo kae kalaga atu ki te toko Sefululua kae fai atu ki a latou: “Kafai se tino e manako ke mua a ia, e ‵tau o fai a ia mo fai te tino fakamuli i tino katoa kae tavini atu ki tino katoa.”+
36 Tenā ne puke mai ei ne ia se tamaliki foliki, fakatu atu i olotou mua, ‵sai mai ne ia ki ana lima kae fai atu ki a latou:
37 “So se tino e talia ne ia se tamaliki foliki+ penei ona ko toku igoa e talia foki ne ia au, kae ko so se tino e talia ne ia au e se talia fua ne ia au kae ko Ia foki telā ne uga mai ne ia au.”+
38 Ne fai atu a Ioane ki a ia: “Te Faiakoga, ne lavea ne matou se tagata e afuli ne ia a temoni mai te fakaaogaga o tou igoa kae ne taumafai matou o taofi a ia, me ne seki tautali mai i a matou.”+
39 Kae ne fai atu a Iesu: “Sa taumafai o taofi a ia, me e seai se tino e fai ne ia a galuega ‵mana i toku igoa ka mafai ne ia o fai fakavave ne pati sē ‵lei e uiga ki a au.
40 Me ko so se tino telā e se ‵teke ki a tatou e kau mo tatou.+
41 Kae ko so se tino e tuku atu ne ia ki a koutou se ipu vai ke inu ona ko koutou ko tino o Keliso,+ au e fai ‵tonu atu ki a koutou, ka maua eiloa ne ia tena taui.+
42 Kae ko so se tino e fakavāivāi ne ia se tino i tino fatauva konei, kolā e fakatuanaki mai ki a au, e ‵lei atu moi ne ‵sai tena ua ki se fatu solo saito telā e toso ne se asini kae ‵pei atu a ia ki te moana.+
43 “Kafai ko tou lima e fakaagasala* ne ia koe, ‵kati ke tō. E ‵lei atu ke maua ne koe te ola e aunoa mo se lima i lō tou ‵pei atu mo ou lima e lua ki Kena,* ki loto i te afi telā e se mafai o tamate.+
44 * ——
45 Kae kafai ko tou vae e fakaagasala ne ia koe, ‵kati ke tō. E ‵lei atu ke maua ne koe te ola mo te vae e tasi i lō tou ‵pei atu mo ou vae e lua ki loto i Kena.*+
46 * ——
47 Kae kafai ko tou mata e fakaagasala ne ia koe, ‵pei kea‵tea.+ E ‵lei atu ke ulu atu koe ki loto i te Malo o te Atua mo tou mata e tasi i lō tou ‵pei atu mo ou mata e lua ki Kena,*+
48 telā e seai se ilo e mafai o mate i ei mo te afi telā e se mafai o tamate.+
49 “Me e ‵tau o fakamasima a tino katoa ki te afi.+
50 E ‵lei te masima kae kafai ko galo te ‵kona o te masima, se a la te mea e mafai o toe faka‵kona ki ei?+ Ke maua te masima i a koutou,+ kae tausi te filemu i te va o koutou.”+
Fakamatalaga mai lalo
^ Eleni, “tami ki te mate.”
^ Eleni, “Lapi.”
^ Io me kāti, “tausi te mea tenā i a latou eiloa.”
^ Io me “fakapakū.”
