Te Tusi a Luka 5:1-39
5 I te taimi e tasi ne mumu atu ei te vaitino ki a ia o fakalogo‵logo ki te muna a te Atua, kae ko ia ne tu atu i tafa o te namo o Kenesaleta.*+
2 Ne lavea ne ia a pōti e lua e taula i te feitu o te namo kae ko oti ne olo a tino faiika mai i ei o ‵fulu olotou tili.+
3 Ne sopo a ia ki se pōti e tasi, ko te pōti o Simona, kae fakamolemole atu ke tai usu atu ki tai. Ne sagasaga a ia ki lalo, kae kamata o akoako atu ki te vaitino mai te pōti.
4 I tena otiga ne faipati, fai atu ei a ia ki a Simona: “Usu atu ki te koga ‵poko, ko tuku ifo ei otou tili ke maua ne otou ika.”
5 Kae ne tali atu a Simona: “Te Faiakoga, ne logofiofio eiloa matou i te po kātoa kae seai eiloa se ika ne maua,+ kae ona ko au pati ka ‵pei ifo eiloa ne au ki lalo a tili.”
6 I te taimi ne fai ei ne latou te mea tenā, ne maua ne latou a ika e uke. E tonu, ne kamata eiloa o masae‵sae olotou tili.+
7 Ne tālo atu latou ki olotou taugasoa i te suā pōti ke o‵mai o fesoasoani ki a latou, ne o‵mai latou, kae ne faka‵fonu ne latou te avā pōti ki ika, kae ko tai a‵pulu aka eiloa.
8 I te laveaga ne ia o te mea tenei, fakasiga ifo ei a Simona Petelu ki tulivae o Iesu, kae fai atu: “Te Aliki, fano kea‵tea mai i a au, i a au se tino agasala.”
9 Ne ofo malosi a ia fakatasi mo tino kolā ne ‵nofo mo ia i te uke o ika,
10 e penā foki a Iakopo mo Ioane, ko tama a Sepetaio,+ kolā ne ‵kau fakatasi mo Simona. Kae ne fai atu a Iesu ki a Simona: “Sa mataku. Mai te taimi tenei o fano ki mua, ka faiika eiloa koe ki tino ola.”+
11 Avaka ei ne latou a pōti ki uta i te fenua, tiaki ne latou olotou mea katoa kae tau‵tali atu i a ia.+
12 I te suā taimi ne nofo atu ei a ia i se fakai e tasi, kiloke! e isi se tagata ko ‵fonu eiloa i te lepela! I te laveaga ne ia a Iesu, ne totuli ifo a ia mo ana mata e ‵fuli ki lalo kae fakatagi atu ki a ia: “Te Aliki, kafai e manako koe ki ei, e mafai o fai ne koe au ke ‵ma.”+
13 Ne ‵kapa atu tena lima, fakapatele atu ki a ia, kae fai atu: “Au e manako ki ei! Ke ‵ma koe.” I konā eiloa, galo ei tena lepela.+
14 Ne fakatonu atu a ia ki te tagata tenei ke mo a ma fakailoa atu te mea tenei ki se tino: “Kae fano o fakaasi atu a koe ki te faitaulaga kae ofo atu se taulaga mō tou faka‵māga e pelā eiloa mo te fakatonuga a Mose,+ ke fai mo fai se molimau ki a latou.”+
15 Kae ne salalau valevale te tala e uiga ki a ia, kae ne maopoopo atu a te vaitino o fakalogo‵logo ki a ia kae faka‵lei olotou masaki.+
16 Kae ne fano sāle a ia ki se koga sē logoa o ‵talo i ei.
17 I te aso e tasi ne akoako ei a ia, ne saga‵saga atu foki i konā a Falesaio mo faiakoga o te Tulafono kolā ne o‵mai mai fakai fo‵liki katoa o Kalilaia mo Iuta mo Ielusalema; kae ne maua ne ia te ‵mana o Ieova* ke faka‵lei a masaki.+
18 Kae kiloke! ne avatu ne tāgata se tino e ‵mate tena foitino i luga i se moega, kae ne taumafai latou o avatu a ia ki mua o Iesu.+
19 Ona ko te vaitino ne seki ai se auala ke avatu ei tou tagata ki a ia, ne ‵kake aka latou ki te tuafale, kae tukutuku ifo ne latou a ia mai te tuafale i luga i te moega i te va o latou kolā i mua o Iesu.
20 I te laveaga ne ia te lasi o te lotou fakatuanaki, fai atu ei a ia: “Toku tagata, au agasala ko magalo.”+
21 Tenā ne kamata ei o mafau‵fau a failautusi mo Falesaio kae fai aka olotou muna: “Ko oi tenei e muna masei ki te Atua? Ko oi e mafai o fakamagalo ne ia a agasala kae na ko te Atua fua?”+
22 Kae ne iloa ne Iesu olotou mafaufauga, tali atu ei ki a latou: “Ne a mea e mafau‵fau koutou ki ei i otou loto?
23 Se a te mea e faigofie atu, ko te fai atu, ‘Au agasala ko magalo’? io me fai atu, ‘Tu ki luga o sasale’?
24 Kae ko te mea ke iloa ne koutou me e isi se malosi o te Tama a te tagata o fakamagalo a agasala i te lalolagi—” ne fai atu a ia ki te tino e ‵mate tena foitino: “Au e fai atu ki a koe, Tu ki luga, puke tou moega, kae fano ki tou fale.”+
25 I konā eiloa, tu tou tagata ki luga i mua o latou katoa, puke te mea telā ne takato sāle ei a ia, fano ki tena fale, kae ‵viki atu ei ki te Atua.
26 Tenā ne ‵poi ei latou katoa, kae kamata o ‵viki atu ki te Atua, kae ne ma‵taku latou, olotou muna: “Ko oti ne lavea ne matou a mea fakaofoofogia i te aso nei!”
27 I te otiga o te mea tenei, fano ei a ia ki tua kae lavea ne ia te tino ‵tae lafoga e igoa ki a Levi e sagasaga i te ofisa ‵tae lafoga, fai atu ei ki a ia: “Tautali mai i a au.”+
28 Ne tiaki ne ia ana mea katoa, tu tou tagata ki luga, tautali atu ei i a ia.
29 Ne fakatoka ne Levi se ‵kaiga lasi mō ia i tena fale, kae ne tokouke a tino ‵tae lafoga mo nisi tino ne ‵kai* fakatasi mo latou.+
30 Kae ne kamata o mui‵mui a Falesaio mo olotou failautusi ki ana soko, kae fai atu: “Kaia e ‵kai kae inu ei koutou mo tino ‵tae lafoga mo tino agasala?”+
31 Ne tali atu a Iesu ki a latou: “A tino kolā e malosi ‵lei e se ma‵nako ki se tokita, kae ko tino fua kolā e ma‵saki.+
32 Au ne vau o kalaga ki tino agasala ke sala‵mo kae e se ki tino amio‵tonu.”+
33 Ne fai atu latou ki a ia: “A soko o Ioane e fakaliki‵liki sāle kae ‵talo foki, e pelā foki mo soko o Falesaio, kae ko ou soko e ‵kai kae inu.”+
34 Ne fai atu a Iesu ki a latou: “E a, e mafai ne koutou o fai ki taugasoa o te tagata ka fakaipoipo ke fakaliki‵liki māfai koi ‵nofo latou mo te tagata ka fakaipoipo?
35 Kae ka oko mai a aso e ave ei kea‵tea te tagata ka fakaipoipo+ mai i a latou; ko fakaliki‵liki ei latou i aso konā.”+
36 Ne fai atu foki ne ia ki a latou se tala fakatusa: “E seai se tino e ‵kati ne ia se potu laugatu mai i se gatu fou kae ‵sui atu ki se gatu mago. Kafai e fai ne ia penā, ko te potu laugatu fou ka ‵sae ne ia te gatu mago me e se fetaui mo te gatu mago.+
37 E se utu foki ne se tino a te uaina fou ki loto i taga uaina mua. Kafai e fai ne ia penā, ka fai ne te uaina fou ke ma‵pa a taga uaina kae ka maligi ei ki tua te uaina ko ma‵sei ei a taga uaina.
38 Kae ko te uaina fou e ‵tau o utu ki loto i taga uaina ‵fou.
39 E seai se tino e manako ki te uaina fou māfai ko oti ne inu ki te uaina mua, me e fai mai a ia ‘E gali loa te mea mua.’”
