Te Tusi a Luka 17:1-37
17 Tenā ne fai atu ei a ia ki ana soko: “E se mafai eiloa o se oko mai a mea kolā e ‵siga ei a tino. Kae kalofa eiloa i te tino telā e māfua mai i ei a mea konā!
2 E ‵lei atu moi ne fakatautau se fatu solo saito i tena ua kae ‵pei atu a ia ki te tai i lō te fakasiga ne ia se tino fatauva i tino konei.+
3 Ke ‵saga tonu ifo ki a koutou eiloa. Kafai e fai ne tou taina se agasala, polopoloki atu a ia,+ kae kafai e salamō, fakamagalo atu.+
4 Kafai e agasala a ia ki a koe fakafitu taimi i te aso kae foki atu fakafitu ki a koe kae fai atu, ‘Au ko salamō,’ e ‵tau eiloa o fakamagalo ne koe a ia.”+
5 Ne fai atu a apositolo ki te Aliki: “Fakalasi aka te motou fakatuanaki.”+
6 Tenā ne fai atu ei te Aliki ki a latou: “Kafai e fai te otou fakatuanaki e pelā mo te lasi o te fuaga o te sinapi, ka fai atu koutou ki te lakau tenei ko te sukamina,* ‘Masagi ki luga kae fano o tu i te tai! kae ka fakalogo eiloa te lakau tenā ki a koutou.+
7 “Ko oi te tino i a koutou e isi sena pologa telā e fakamalū laukele io me e tausi manu ka fai atu ki a ia i te taimi ko foki mai i tena galuega, ‘Vau fakavave o kai’?
8 I lō te fai penā, e mata, ka se fai atu a ia, ‘Fakatoka se mea mo oku kai i te afiafi, pei tou gatu situati kae tavini mai ke oko ki te taimi e oti ei au ne kai kae inu, ka oti ko mafai ei koe o kai kae inu’?
9 E a, ka se loto fakafetai a ia ki tena pologa me ne fai ne ia a mea kolā ne fakatonu atu ke fai?
10 E penā foki koutou, kafai ko oti ne fai ne koutou a mea katoa kolā ne tuku atu ke fai, ko fai atu ei penei: ‘A matou ne pologa e seai ne aoga. A mea kolā ko oti ne fai ne matou ko mea eiloa ne ‵tau o fai ne matou.’”+
11 I tena auala o fano ki Ielusalema ne ui atu a ia i te tuakoi o Samalia mo Kalilaia.
12 Kae i tena okoatuga ki se fakai foliki, ne fetaui a ia mo tāgata lepela e tokosefulu, kolā ne ‵tu ‵mao mai.+
13 Ne paka‵laga latou kae fai atu: “Iesu, te Faiakoga, alofa mai ki a matou!”
14 I te laveaga ne ia a latou, fai atu ei ki a latou: “Olo o fakaasi atu koutou ki faitaulaga.”+ Kae i te lotou ologa ne faka‵magina latou.+
15 E tokotasi i a latou, i te laveaga ne ia i a ia ko ‵lei, toe foki atu ei o tavae atu ki te Atua i se leo maluga.
16 Ne totuli ifo a ia mo ana mata e ‵fuli ki lalo i vae o Iesu kae fakafetai atu ki a ia. E se gata i ei, a ia se tino Samalia.+
17 Ne fai atu a Iesu ki a ia: “E a, e se tokosefulu a tino ne faka‵magina? Kofea la te suā tokoiva?
18 E a, e seai se tino i a latou ne foki mai o ‵viki atu ki te Atua kae na ko te tagata fua tenei mai se isi fenua?”
19 Tenā ne fai atu ei a Iesu ki a ia: “Tu ki luga kae fano; ko tou fakatuanaki ne ‵lei ei koe.”+
20 I te taimi ne fakafesili ei ne Falesaio me ka oko mai mafea te Malo o te Atua,+ ne tali atu a ia ki a latou: “A te Malo o te Atua ka se oko mai i se auala fakaofoofogia;
21 kae ka se fai mai foki a tino, ‘Kiloke, tenei i konei!’ io me ‘Telā i ko!’ Kae kiloke! a te Malo o te Atua tenā eiloa i va o koutou.”*+
22 Ne fai atu a ia ki ana soko: “Ka oko mai a aso ka ma‵nako ei koutou o fia ‵kilo ki se aso e tasi o te Tama a te tagata, kae ka se lavea eiloa ne koutou.
23 Kae ka fai atu a tino ki a koutou, ‘Kiloke, tenā i konā!’ io me, ‘Kiloke, tenei i konei!’ Sa olo ki tua io me tau‵tali atu i a latou.+
24 Me e pelā eiloa mo te ‵lapa o te uila mai te feitu e tasi o te lagi ki te suā feitu o te lagi, ka penā foki te Tama a te tagata+ i tena aso.+
25 Kae muamua la, e ‵tau o oko ki a ia a logo‵maega e uke kae ka ‵teke atu ki ei a te kautama tenei.+
26 E se gata i ei, e pelā eiloa mo te mea ne tupu i aso o Noa,+ ka penā foki a mea e ‵tupu i aso o te Tama a te tagata:+
27 ne ‵kai latou, ne inu latou, ne fai a avaga a tāgata, ne tuku atu a fāfine ke a‵vaga ke oko ki te aso ne ulu atu ei a Noa ki loto i te vaka,+ kae ne oko mai te Lolo, fakaseai atu ei a latou katoa.+
28 E penā foki te mea ne tupu i aso o Lota:+ ne ‵kai latou, ne inu latou, ne ‵togi olotou mea kae fakatau atu, ne ‵toki olotou lakau, ne fai olotou galuega fakatu‵tu.
29 Kae i te taimi ne fano ei a Lota kea‵tea mai Sotoma, ne ‵to ifo te vaiua afi mo pauta ‵ka mai te lagi, fakaseai atu ei a latou katoa.+
30 Ka fai foki penā i te aso e fakaasi mai i ei te Tama a te tagata.+
31 “I te aso tenā, a te tino i luga i te tuafale kae e isi ne ana kope i tena fale ke se fanaifo ki lalo o puke, e penā foki te tino i te fatoaga e se ‵tau o foki ki mea i ana tua.
32 Ke masaua te avaga a Lota.+
33 So se tino e taumafai o tausi tena ola ke sao ka se maua ne ia, kae ko so se tino e galo tena ola, ka ola eiloa a ia.+
34 Au e fai atu ki a koutou, i te po tenā, e tokolua a tino ka ‵moe i te moega e tasi; e tokotasi e ave kae tiaki a te suā tino.+
35 E tokolua fāfine e tuki saito i te koga tuki saito e tasi; e tokotasi e ave kae tiaki a te suā tino.”
36 * ——
37 Ne fai atu latou ki a ia: “I te koga fea, e te Aliki?” Ana muna ki a latou: “Ko te koga e takato i ei te foitino mate, ka mumu atu foki ki ei a aeto.”+
Fakamatalaga mai lalo
^ Se lakau malosi telā e nofo ki se 6 m (20 ft) tena maluga, kae ko ana lau e ‵lasi kae foliga pelā me ne āta kae ko ana fuaga e ‵kula ‵mafa io me uli.
^ Io me “‵nofo tasi mo koutou.”
