Ki te kau Loma 15:1-33
15 A tatou kolā e ma‵losi e ‵tau o amo ne tatou a vāivāiga o latou kolā e se ma‵losi+ kae ke se fakafiafia ifo ki a tatou eiloa.+
2 Ke na fakafiafia ne tatou taki tokotasi a ‵tou tuakoi mō tena ‵lei, ke fakamalosi aka ei a ia.+
3 Me ne seki fakafiafia foki ne Keliso a ia eiloa,+ kae e pelā eiloa mo pati i te tusi: “A fakamaseiga a latou kolā e fakamasei ne latou koe ko oko mai ki a au.”+
4 Me i mea katoa kolā ne tusi i aso mua ne tusi ke akoako ei tatou,+ me e auala i te ‵tou kufaki+ mo fakamafanafanaga mai i Tusitusiga Tapu, ko mafai ei o maua ne tatou a te fakamoemoega.+
5 Ke tuku atu ki a koutou ne te Atua telā e tuku mai ne ia te kufaki mo fakamafanafanaga a te kilokiloga telā ne maua foki ne Keliso Iesu,
6 ko te mea ke ‵viki fakatasi+ atu koutou i otou leo* ki te Atua mo te Tamana o te ‵tou Aliki ko Iesu Keliso.
7 Tela la, ke fakatau talia ne koutou te suā tino mo te suā tino+ e pelā eiloa mo Keliso ne talia ne ia koutou,+ mō te vikiga o te Atua.
8 Me e fai atu au ki a koe i a Keliso ne fai eiloa mo fai te tavini a latou kolā ne pilitome+ mō te fai mea tonu o te Atua, ke fakatalitonu aka ei Ana folafolaga kolā ne fai ki olotou tupuga,+
9 kae ke ‵viki atu a fenua fakaa‵tea ki te Atua ona ko tena alofa fakamagalo.+ E pelā eiloa mo pati i te tusi: “Tenā te pogai ka fakaasi atu ei ne au a koe ki fenua fakaa‵tea kae ka usu atu ne au a pese o vikiga ki tou igoa.”+
10 Kae ne toe fai mai foki a ia: “Ke fia‵fia koutou e atufenua, fakatasi mo ana tino.”+
11 Kae ne toe fai mai foki: “‵Viki atu ki a Ieova,* koutou e atufenua katoa, kae ke na tavae atu a tino katoa ki a ia.”+
12 Kae e fai mai foki a Isaia: “Tenā ka vau te aka o Iese,+ ko te tino telā ka tu aka o pule i atufenua;+ ka fakamoe‵moe eiloa ki a ia a atufenua katoa.”+
13 Ke faka‵fonu koutou ne te Atua, telā e tuku mai ne ia te fakamoemoega, ki te fiafia mo te filemu ona ko te otou tali‵tonu ki a ia, ko te mea ke ‵fonu koutou i te fakamoemoega i te ‵mana o te agaga tapu.+
14 E talitonu foki au e uiga ki a koutou, e oku taina, me ko ‵fonu foki koutou i te aga‵lei, ko ‵fonu i te iloa, kae ko mafai ne koutou o fakatau fakamalosi* atu te suā tino ki te suā tino.
15 Kae ko oti ne tusi atu au ki a koutou mo te loto toa ke fakamaina atu a nisi manatu, ke toe fakamasaua ki a koutou, ona ko te alofa tauanoa ne tuku mai ne te Atua ki a au
16 ke fai au mo tavini a Keliso Iesu ki tino o fenua fakaa‵tea.+ Au e galue i te galuega tapu o te tala ‵lei a te Atua,+ ko te mea ke talia ne te Atua te ofoatuga o fenua konei e pelā me se taulaga telā e fakatapugina ki te agaga tapu.
17 Tela la, e isi se pogai e fiafia ei au i a Keliso Iesu e ‵tusa mo mea e uiga ki te Atua.
18 Me ka se faipati au e uiga ki se isi mea kae na ko mea fua kolā ko oti ne fai ne Keliso e auala i a au ko te mea ke mafai o faka‵logo a fenua fakaa‵tea, e auala i aku pati mo aku faiga,
19 i te ‵mana o fakailoga mo mea fakaofoofogia,+ i te ‵mana o te agaga o te Atua, me ko oti ne talai fakamaea atu ne au te tala ‵lei e uiga ki te Keliso mai i Ielusalema ke oko atu eiloa ki Iluliko.+
20 E tonu, ne fai ne au taku fuafuaga ke se folafola atu te tala ‵lei i koga kolā ko oti ne fakailoa atu i ei a te igoa o Keliso, ko te mea ke se fakavae aku galuega ki luga i galuega a te suā tino;
21 kae e pelā eiloa mo pati i te tusi: “Ka lavea ne latou kolā e seki maua ne latou se ‵tala e uiga ki a ia, kae ko latou kolā e seki lagona ne latou se mea ka malamalama.”+
22 Tenei foki te pogai ne ‵lave ei au i taimi e uke ke fanatu ki a koutou.
23 Kae nei la, ko seai eiloa ne kogā fenua e seki talai au i ei i kogā koga konei, kae ko leva ne fia fanatu au ki a koutou i tausaga e uke ko ‵teka.
24 Tela la, kafai e fano au ki Sepania, e fakamoemoe au ke fetaui tatou kae ke olo tasi tatou mō se taimi toetoe i taku malaga ki konā māfai ko oti ne ‵nofo fakatasi au mo koutou mō se vaitaimi.
25 Kae nei la ko pili o faimalaga atu au ki Ielusalema ke tavini atu ki tino tapu i konā.+
26 Me ko oti ne fia‵fia a latou kolā i Maketonia mo Akaia ke tuku atu olotou mea e pelā me ne meaalofa mō tino tapu kolā e ma‵tiva i Ielusalema.+
27 E tonu, ne fia‵fia eiloa a latou o fai te mea tenā, kae ko latou foki e ‵nofo kaitalafu i tino konā; me kafai ko oti ne maua ne tino o fenua fakaa‵tea a mea faka-te-agaga mai i tino konā, e ‵tau foki o tavini atu latou ki tino konā i mea faka-te-foitino.+
28 Tela la, kafai ko oti ne fai ne au te mea tenei kae tuku faka‵lei atu a te meaalofa tenei ki a latou, ka fanatu au ki Sepania kae ka ui atu au i a koutou.
29 E se gata i ei, e iloa ne au me kafai e fanatu au ki a koutou, ka fanatu eiloa au mo fakamanuiaga katoa mai i a Keliso.
30 Nei la, ko fakamalosi atu au ki a koutou, e oku taina, e auala i te ‵tou Aliki ko Iesu Keliso mo te alofa o te agaga, ke ‵talo malosi fakatasi tatou ki te Atua mō au,+
31 ko te mea ke fakasao au+ mai tino sē tali‵tonu i Iuta kae ke talia taku galuega talai ne tino tapu i Ielusalema,+
32 ko te mea ke fanatu au ki a koutou mo te fiafia e ‵tusa mo te loto o te Atua kae ke fakafou aka ei toku malosi fakatasi mo koutou.
33 Ke fakatasi atu ki a koutou katoa a te Atua telā e tuku mai ne ia te filemu.+ Amene.
