Kenese 23:1-20
-
Te mate o Sala mo te koga ne tanu i ei (1-20)
23 Ne ola a Sala i tausaga e 127; konei a tausaga o te olaga o Sala.+
2 Ne mate a Sala i Kiliata-alapa,+ telā ko Hepelona,+ i te fenua o Kanana,+ kae ne fanoanoa kae tagi mautuutu a Apelaamo ona ko Sala.
3 Tenā ne tu aka ei a Apelaamo mai te koga e takato ei te foitino mate o tena avaga kae fai atu ki tino Heti:+
4 “Au se tino fakaa‵tea telā e ‵nofo mo koutou.+ Tuku mai aka ne koutou se koga ke tanu i ei a tino ko te mea ke ave ne au taku avaga o tanu i ei.”
5 Ne tali atu a tino Heti ki a Apelaamo:
6 “Fakalogo mai ki a matou, e te motou aliki. A koe se takitaki a te Atua* telā e ola i tafa o matou.+ E mafai o tanu ne koe tau avaga i toe tanuga ‵lei eiloa o matou. E seai eiloa se tino i a matou e taofi ne ia tena tanuga mai i a koe ke mo a ma tanu tau avaga i ei.”
7 Ne tu aka a Apelaamo kae ifo i mua o tino o te fenua, kolā ko tino Heti,+
8 kae fai atu ki a latou: “Kafai e talia ne koutou ke ave taku avaga o tanu, faka‵logo mai la ki a au kae fakamalosi atu ki a Efelona te tama tagata a Sioala
9 ke ‵togi mai ki a au te ana o Makapelu telā e tu i te fakaotiga o tena manafa. Fai ke ‵togi ne au mai i a ia i mua o koutou a te aofaki kātoa o siliva+ ko te mea ke maua ne au se koga mo fai se tanuga.”+
10 I te taimi tenā, a Efelona ne saga‵saga fakatasi mo tino Heti. Ne tali atu a Efelona te tino Heti ki a Apelaamo i mua o tino Heti katoa, e penā foki mo tino katoa kolā ne ulu mai ki loto i te mataloa o tena fakai,+ ana muna:
11 “Ikai e toku aliki! Fakalogo mai ki a au. Ka tuku atu ne au ki a koe a te manafa mo te ana tenā e tu i ei. Ko tuku atu ne au ki a koe a mea konā i mua o tino katoa o toku fenua. Tanu tau avaga i ei.”
12 Tenā ne punou ifo ei a Apelaamo i mua o tino katoa o te fenua
13 kae faipati atu ki a Efelona i mua o tino katoa, ana muna: “Fakalogo mai ki a au! Ka tuku atu ne au ki a koe te aofaki kātoa o siliva mo ‵togi te manafa. Puke te aofaki tenā ko te mea ke mafai o tanu ne au taku avaga i ei.”
14 Tenā ne tali atu ei a Efelona ki a Apelaamo:
15 “Toku aliki, fakalogo mai ki a au. A te ‵togi o te manafa e 400 sekela* siliva, kae se a te aoga o te mea tenā ki a tāua? Tela la, tanu tau avaga.”
16 Ne fakalogo a Apelaamo ki a Efelona, kae fua ne Apelaamo ki a Efelona a te aofaki o tupe siliva kolā ne taku mai ne ia i mua o tino Heti, e 400 sekela* siliva i te fua masani telā ne fakaaoga sāle ne tino faipisinisi i aso konā.+
17 Tela la, a te manafa o Efelona i Makapelu, telā e tu i mua o Mamele—ko te manafa mo te ana mo lakau katoa i loto i tuakoi o te manafa—ne fakamautinoa aka
18 me se koga ko oti ne ‵togi ne Apelaamo i mua o tino Heti, kae i mua o tino katoa kolā ne ulu atu ki loto i te mataloa o tena fakai.
19 Mai tua ifo, ne tanu ne Apelaamo a tena avaga ko Sala i te ana o Makapelu i te manafa i mua o Mamele, telā ko Hepelona, i te fenua o Kanana.
20 Tenā ne tuku atu ei ne tino Heti a te manafa mo te ana telā e tu i ei, ki a Apelaamo mo fai te tanuga o ana tino ‵mate.+
Fakamatalaga mai lalo
^ Io me kāti, “se takitaki sili.”
